`சாத்தன்குளம் சம்பவத்துல கிடைச்ச நீதி, துப்பாக்கிச்சூடு சம்பவத்துல கிடைக்கலை!' - குமுறும் மக்கள்

`நீதிபதி அருணா ஜெகதீசன் ஆணைய அறிக்கையின்படி நடவடிக்கை எடுக்காமல் இருப்பது ஏன்?’ என்று சென்னை உயர் நீதிமன்றம், தமிழ்நாடு அரசிடம் விளக்கம் கேட்டிருப்பதன் மூலம், தூத்துக்குடி துப்பாக்கிச்சூடு சம்பவத்தில் ஆட்சி மாறியும், பாதிக்கப்பட்டவர்களுக்கு நீதி கிடைப்பதில் தாமதம் ஏற்பட்டிருப்பது தெரியவருகிறது.போலீஸ் தாக்குதல்தமிழக மக்களால் அவ்வளவு சீக்கிரத்தில் மறந்துவிட முடியாது, அந்தக் கொடுமையான சம்பவத்தை..!

2018, மே 22 தூத்துக்குடியின் கறுப்புநாள். சுற்றுச்சூழலை மாசுபடுத்திவந்த வேதாந்தாவின் ஸ்டெர்லைட் ஆலைக்கு எதிராகப் போராடிய மக்களில், 13 பேர் சுட்டுக் கொல்லப்பட்டனர். 100-க்கும் மேற்பட்டோர் படுகாயமடைந்தனர். ’தூத்துக்குடி’ என்றாலே துப்பாக்கிச்சுடு சம்பவம் நினைவுக்கு வரும் வகையில், வரலாற்றில் அழியாக்கறை படிந்துவிட்டது. இந்தத் துப்பாக்கிச்சூடு சம்பவம் ஏற்படுத்திய அதிர்வலைகளையடுத்து, மே 26-ல் ஆலை சீல் வைத்து மூடப்பட்டதுதூத்துக்குடி கலவரம்

இந்தச் சம்பவம் குறித்து சி.பி.ஐ ஒருபக்கம் விசாரிக்க, அப்போதைய அ.தி.மு.க ஆட்சிக்கு நெருக்கடி ஏற்பட்டதால், ஓய்வுபெற்ற உயர் நீதிமன்ற நீதிபதி அருணா ஜெகதீசன் தலைமையில் ஒருநபர் விசாரணை ஆணையம் இன்னொரு பக்கம் அமைக்கப்பட்டது.

மூன்று ஆண்டுகளுக்கும் மேலாக 36 கட்டங்களாக நடத்தப்பட்ட விசாரணையில், 1,426 பேருக்கு சம்மன் அனுப்பப்பட்டு, 1,048 பேர் நேரில் ஆஜராகி விளக்கமளித்தனர். 1,544 ஆவணங்கள் பதிவு செய்யப்பட்டன. 3,000-க்கும் மேற்பட்ட பக்கங்களைக் கொண்ட விசாரணை ஆணையத்தின் முழுமையான அறிக்கை, 2022, மே 18-ம் தேதி முதல்வர் ஸ்டாலினிடம் ஒப்படைக்கப்பட்டது. கடந்த ஆகஸ்ட் 18-ம் தேதி இறுதி அறிக்கையின் சில பகுதிகள் கசிந்தன.அருணா ஜெகதீசன் ஆணைய அறிக்கை அரசிடம் சமர்பிப்பு

அதில், `யாருடைய உத்தரவும், தூண்டுதலுமின்றி துப்பாக்கிச்சூடுநடந்திருக்கிறது. தமிழ்நாடு இதுவரையிலும் கண்டிராத காவல்துறை நடவடிக்கைகளில் மிக மோசமான சம்பவம் இது' எனக் குறிப்பிடப்பட்டிருந்தது.

``குற்றம்சாட்டப்பட்ட 17  பேர் உடனடியாகப் பணியிடை நீக்கம் செய்யப்பட்டு, அவர்கள்மீது குற்ற வழக்கு பதிவு செய்யப்படுவதுடன் சிறையில் அடைக்க வேண்டும்” என துப்பாக்கிச்சூட்டில் உயிரிழந்தவர்களின் குடும்பத்தினர்,   ஸ்டெர்லைட் ஆலை எதிர்ப்பு போராளிகள் உள்ளிட்டோர் அரசுக்குக் கோரிக்கை விடுத்தனர். இதையடுத்து 19.10.22-ல் நடந்த சட்டமன்றக் கூட்டத்தொடரில் துப்பாக்கிச்சூடு தொடர்பான ஆணையத்தின் அறிக்கை சமர்ப்பிக்கப்பட்டு, விவாதிக்கப்பட்டது. இருப்பினும், குற்றம்சாட்டப்பட்டவர்கள்மீது இதுவரை எந்தவொரு நடவடிக்கையும் எடுக்கப்படவில்லை என கொந்தளிக்கிறார்கள் ஸ்டெர்லைட் எதிர்ப்பாளர்கள்.போலீஸ் துப்பாக்கிச்சூடு

ஸ்டெர்லைட் எதிர்ப்பு, தூத்துக்குடி மாவட்ட மக்கள் கூட்டமைப்பின் ஒருங்கிணைப்பாளர் கிருஷ்ணமூர்த்தியிடம் பேசினோம். ``கடந்த சட்டமன்றத் தேர்தல் பிரசாரத்தின்போது, தூத்துக்குடிக்கு வந்த முதல்வர் ஸ்டாலின், ‘அ.தி.மு.க-வும், பா.ஜ.க-வும் கூட்டுச்சேர்ந்து நடத்திய, பச்சைப் படுகொலைதான் துப்பாக்கிச்சூடு சம்பவம், குற்றம்சாட்டப்பட்டவர்கள்மீது எந்த நடவடிக்கையும் எடுக்கவில்லை. ஸ்டெர்லைட் ஆலைக்கு எதிராக தமிழக அரசு கொண்டுவந்திருக்கும் கொள்கை முடிவு கண்துடைப்பானது.

நாங்கள் ஆட்சிக்கு வந்தால் சிறப்புச் சட்டம் இயற்றி, ஸ்டெர்லைட்  ஆலையை நிரந்தரமாக அகற்றிட நடவடிக்கை எடுப்போம். துப்பாக்கிச்சூடு படுகொலைக்குக் காரணமானவர்கள் எவராக இருந்தாலும், எந்த உயர் பதவியில் இருந்தாலும், தண்டிக்கப்படுவார்கள்’ எனப் பேசினார். ஆனால், இதுவரை அவர்கள்மீது என்ன குற்றவியல் நடவடிக்கை பாய்ந்தது,தேர்தல் பிரசாரத்தில் பேசியது ஓட்டுக்கான வெறும் பேச்சுதானா?தூத்துக்குடி கலவரம்

ஆணையத்தின் அறிக்கை  குறித்து வெளியிடப்பட்ட அரசாணையில், குற்றம்சாட்டப்பட்டவர்கள்மீது  துறைரீதியான நடவடிக்கை  மேற்கொள்ளப்பட்டுவருகிறது எனச் சொல்லப்பட்டிருக்கிறது. பல நூறு சாட்சிகளை விசாரித்து, சிசிடிவி கேமரா, பிரேத பரிசோதனை அறிக்கை, காயச் சான்றிதழ்கள் உள்ளிட்ட அனைத்து ஆவணங்களையும் பரிசீலனை செய்து, ஆணையத்தின் அறிக்கை சமர்ப்பிக்கப்பட்டு, சம்பந்தப்பட்ட காவல்துறையினரை அடையாளம் காட்டியும், அரசு அதை ஏற்றுக்கொண்ட பிறகும், அவர்கள்மீது குற்றவியல் நடவடிக்கை மேற்கொள்ள முதல்வர் தயங்குவது ஏன்?” என்றார்.

துப்பாக்கிச்சூட்டில் வாயில் சுடப்பட்டு உயிரிழந்த ஸ்னோலினின் தாயார் வனிதாவிடம் பேசினோம். ”துப்பாக்கிச்சூட்டுல சம்பந்தப்பட்ட எல்லா குற்றவாளிகளுக்கும் தண்டனை கிடைக்கும் நாள், எந்த நாளோ அந்த நாள்தான், என் மகள் உள்ளிட்ட 13 பேரின் இறப்புக்கு நீதி கிடைக்கும் நாள். சாத்தான்குளத்துல அப்பா, மகனை போலீஸ் ஸ்டேஷன்ல வெச்சு அடிச்சுக் கொலைசெஞ்ச 10 போலீஸ்காரங்களுமே இப்போ வரைக்கும் தண்டனை அனுபவிச்சிக்கிட்டு இருக்காங்க. சாத்தன்குளம் சம்பவத்துல கிடைச்ச நீதி, துப்பாக்கிச்சூடு சம்பவத்துல கிடைக்கலை. முதல்வர் கொடுத்த வாக்குறுதியை நிறைவேற்றணும்" என்றார் கண்ணீருடன்.  கிருஷ்ணமூர்த்தி - வனிதா

இந்த வழக்கில் தற்போது உயர் நீதிமன்றம், தமிழ்நாடு அரசிடம் விளக்கம் கேட்கக் காரணமான மதுரை மக்கள் கண்காணிப்பக இயக்குநர் ஹென்றி டிபேனிடம் பேசினோம். ``அருணா ஜெகதீசன் அறிக்கையின் அடிப்படையில் ஏன் நடவடிக்கை எடுக்கவில்லை என்று நீதிபதிகள் கேள்வி எழுப்ப, தேசிய மனித உரிமைகள் ஆணையத்தின் மீது தொடர்ந்த வழக்குதான் காரணம். தூத்துக்குடி துப்பாக்கிச்சூடு விசாரணையை, சம்பவம் நடந்த அதே ஆண்டில் சூமோட்டோவாக விசாரணைக்கு எடுத்துக்கொண்ட தேசிய மனித உரிமைகள் ஆணையம் (NHRC), தமிழ்நாடு அரசால் கொடுக்கப்பட்ட விளக்கத்தை ஏற்றுக்கொண்டு, ஐந்து மாதங்களில் விசாரணையை முடித்துக்கொண்டது.

நான் தனியாகவும் தேசிய மனித உரிமைகள் ஆணையத்தில் புகார் செய்திருந்தது குறித்துக் கேட்டதற்கு, சூமோட்டோவாக எடுக்கப்பட்டு முடிக்கப்பட்ட வழக்கில், என் புகாரை இணைத்திருந்ததால், வழக்கு க்ளோஸ் செய்யப்பட்டது என்று தெரிவித்தார்கள். எனக்குத் தெரிவிக்காமல் எப்படி வழக்கை முடிக்கலாம் என்றேன். அது மட்டுமின்றி என்.ஹெச்.ஆர்.சி மூலம் தூத்துக்குடிக்கு அனுப்பிய விசாரணைக்குழுவின் அறிக்கையையும் எனக்குத் தரவில்லை. வழக்கு முடிக்கப்பட்டது ஏன் என்றதற்கு, `பாதிக்கப்பட்டவர்களுக்கு தமிழ்நாடு அரசு இழப்பீடு வழங்கிவிட்டது, வழக்கை சி.பி.ஐ விசாரித்துவருகிறது, அருணா ஜெகதீசன் ஆணையம் அமைக்கப்பட்டிருக்கிறது, தூத்துக்குடியில் அமைதி நிலவுகிறது' என்று அரசு கூறிய விளக்கத்தை எனக்கு பதிலாகக் கொடுத்தார்கள்.ஹென்றி டிபேன்

என் புகாரின் அடிப்படையில் விசாரணையை மீண்டும் நடத்த வேண்டும் என்று தேசிய மனித உரிமைகள் ஆணையத்துக்கு பலமுறை நினைவூட்டியும், இரண்டு ஆண்டுகளாக அவர்கள் எந்த நடவடிக்கையும் எடுக்கவில்லை. 2020-ல் உயர் நீதிமன்றத்தில் நான் வழக்கு தொடர்ந்தேன். `ஐந்து மாதங்களில் ஒரு வழக்கை க்ளோஸ் செய்வதா?' என்று ஆதங்கப்பட்ட உயர் நீதிமன்றம், தேசிய மனித உரிமைகள் ஆணையத்திடம் விளக்கம் கேட்டது. அதோடு அவர்களின் விசாரணைக்குழு நடத்திய விசாரணை அறிக்கையை எனக்கு வழங்க உத்தரவிட்டதுடன், க்ளோஸ் செய்த வழக்கை மீண்டும் விசாரணை செய்ய வேண்டும் என்றும் உத்தரவிட்டது. ஆனால், மீண்டும் எனக்கோ, அரசுக்கோ முறையாக நோட்டீஸ் கொடுக்காமல், வழக்கை முடிப்பதாகத் தெரிவித்தார்கள்.

அரசு கொடுத்த விளக்கத்தின் அடிப்படையில், ஐந்து மாதங்களில் சூமோட்டோவாக எடுத்த வழக்கை முடித்த தேசிய மனித உரிமைகள் ஆணையத்தின்மீதான வழக்கு விசாரணையின்போதுதான், சி.பி.ஐ விசாரித்துவருவதையும், அருணா ஜெகதீசன் ஆணையம் விசாரணை நடத்தி ஐ.ஜி., டி.ஐ.ஜி., எஸ்.பி., ஏடி.எஸ்.பி உள்ளிட்டவர்கள்மீது நடவடிக்கை எடுக்கப் பரிந்துரை செய்திருப்பதையும் சுட்டிக்காட்டினேன். 2022-ல் சமர்ப்பிக்கப்பட்ட அருணா ஜெகதீசனின் முழுமையான விசாரணை அறிக்கையை, தமிழக அரசு ஏற்றுக்கொண்டு அரசாணையும் வெளியிட்டது.  தூத்துக்குடி கலவரம்

இழப்பீடு வழங்கிய தமிழக அரசு நடவடிக்கை எடுக்கவில்லை என்பதை நீதிமன்றத்தில் தெரிவித்தேன். சி.பி.ஐ-யோ விசாரணையில் ஒரேயொரு இன்ஸ்பெக்டரைத்தான் குற்றவாளியாகக் காட்டியிருக்கிறது. அதனால், சிறப்புப் புலனாய்வுக்குழுவை நியமிக்க நீதிமன்றத்தில் கோரிக்கை வைத்திருக்கிறேன். ஆணைய அறிக்கையை நிறைவேற்ற தமிழக அரசின் நிலைப்பாடு என்ன என்பதைத்தான் தற்போது நீதிமன்றம் கேள்வியாக முன்வைத்திருக்கிறது" என்றார்.தமிழக அரசு அளிக்கும் விளக்கத்தில்தான், துப்பாக்கிச்சூட்டில் பாதிக்கப்பட்டவர்களுக்கு நீதி கிடைக்குமா என்பது தெரியவரும்!தூத்துக்குடி துப்பாக்கிச்சூடு விவகாரம்: நடவடிக்கை எடுப்பதில் மெத்தனம் காட்டுகிறதா திமுக அரசு?


http://dlvr.it/SywGhZ

Read More

நிலுவையிலுள்ள மசோதாக்களை அரசுக்குத் திருப்பியனுப்பிய ஆளுநர்; சட்டமன்றக் கூட்டத்தைக் கூட்டும் அப்பாவு

``தமிழ்நாட்டின் பிரதான எதிர்க்கட்சியாகச் செயல்படுகிறது ஆளுநர் மாளிகை" என ஆளும் தி.மு.க விமர்சிக்கும் அளவுக்கு, அரசுக்கும் ஆளுநருக்கும் இடையிலான மோதல் முற்றிக்கொண்டிருக்கிறது. சட்டமன்றத்தில் அரசு கொடுத்த உரையில் ஆளுநர் திருத்தம் செய்து வாசித்தது, அதை உடனடியாக தமிழக அரசு நீக்கியது, மசோதாக்களுக்கு கையெழுத்திடாமல் கிடப்பில்போடுவது, திராவிடம் - சனாதனம் குறித்த ஆளுநரின் கருத்துகளால் வெடித்த சர்ச்சைகள் என பட்டியல் நீண்டுகொண்டே செல்லும். ஆர்.என்.ரவி - ஸ்டாலின்

மேலும், ஆளுநர் மாளிகை முன்பு பெட்ரோல் குண்டு வீசப்பட்டது தொடர்பான ஆளுநரின் விமர்சனம், பல்கலைக்கழகங்களின் துணைவேந்தர் விவகாரம் என ஆர்.என்.ரவி தமிழ்நாட்டின் ஆளுநரானதிலிருந்தே அவருக்கும் அரசுக்கும் இடையில் மோதல் நீடிக்கிறது. இந்த நிலையில்தான், தமிழ்நாடு அரசால் சட்டப்பேரவையில் நிறைவேற்றப்பட்ட மசோதாக்களுக்கு ஒப்புதல் வழங்க, ஆளுநருக்குக் கால வரம்பு நிர்ணயம் செய்ய வேண்டும் என்பது உள்ளிட்ட கோரிக்கைகளை முன்வைத்து, உச்ச நீதிமன்றத்தில் ஆளுநருக்கு எதிராக மனுத்தாக்கல் செய்தது தமிழக அரசு. பஞ்சாப்பிலும் முன்னதாக இது போன்று ஒரு வழக்கு, ஆளுநரை எதிர்த்து உச்ச நீதிமன்றத்தில் மாநில அரசால் தொடரப்பட்டது.

தமிழக அரசு தொடர்ந்த வழக்கை விசாரித்த உச்ச நீதிமன்றத் தலைமை நீதிபதி சந்திரசூட் தலைமையிலான அமர்வு, "தமிழக ஆளுநர் மசோதாக்கள் மற்றும் கோப்புகளுக்கு ஒப்புதல் அளிக்காமல் இருப்பது தொடர்பாக, மாநில அரசு முன்வைத்திருக்கும் குற்றச்சாட்டுகள், மிகவும் முக்கியத்துவம் வாய்ந்தவை. மசோதாமீது மாற்றுக் கருத்து இருந்து திருப்பி அனுப்புவதாக இருந்தால், உடனடியாகத் திருப்பி அனுப்ப வேண்டும். சட்டமன்றத்தில் நிறைவேற்றப்பட்ட மசோதாக்களை ஆளுநர் நிறுத்திவைக்க முடியாது.ஆளுநர் ஆர்.என்.ரவி

எனவே, தமிழக அரசின் மனுவுக்கு பதிலளிக்க ஆளுநரின் செயலாளருக்கும், மத்திய அரசுக்கும் நோட்டீஸ் அனுப்ப உத்தரவிடப்படுகிறது. இந்த வழக்கு விசாரணை வரும் 24-ம் தேதிக்குத் தள்ளிவைக்கப்படுகிறது" என உத்தரவிட்டது. இந்த நிலையில்தான், தமிழ்நாடு சட்டப்பேரவையில் நிறைவேற்றப்பட்டு, ஒப்புதலுக்காக ஆளுநருக்கு அனுப்பப்பட்டு, நீண்டகாலமாக நிலுவையில் இருக்கும் பல்கலைக்கழக மசோதா உள்ளிட்ட 10-க்கும் மேற்பட்ட மசோதாக்களுக்கு விளக்கம் கேட்டு, ஆளுநர் ஆர்.என்.ரவி, தமிழ்நாடு அரசுக்குத் திருப்பி அனுப்பியிருப்பதாகத் தகவல் வெளியாகியிருக்கிறது.

இந்த விவகாரம் தொடர்பாகப் பேசிய சபாநாயகர் அப்பாவு, ``வரும் சனிக்கிழமை காலை 10 மணிக்கு தமிழ்நாடு சிறப்பு சட்டமன்றக் கூட்டம் நடைபெறும். அதில், ஆளுநர் திருப்பியனுப்பிய 10 மசோதாக்களும், மீண்டும் நிறைவேற்றப்படும். சட்டமன்றம் என்பது மக்களால் தேர்ந்தெடுக்கப்பட்ட பிரதிநிதிகளால் ஆனது, இறையாண்மைமிக்கது. மக்களின் கருத்துகளைத்தான் தீர்மானமாக நிறைவேற்றியிருக்கிறோம்" எனத் தெரிவித்திருக்கிறார். தற்போது மீண்டும் இந்த மசோதா விவகாரம், அரசியல் வட்டாரத்தில் பேசுபொருளாகியிருக்கிறது.புதுச்சேரி: பழங்குடியின மக்களை தரையில் அமரவைத்த அதிகாரிகள்! - ஆளுநர் தமிழிசை விழாவில் நடந்தது என்ன?


http://dlvr.it/SyvswD

Read More

`அரசு மருத்துவமனை கேன்டீன்கள் சுகாதாரமாகத்தான் இருக்கின்றனவா?' - அரசின் நடவடிக்கைகள் என்னென்ன?!

சென்னை ஸ்டான்லி மருத்துவமனையில் உள்ள தனியார் கேன்டீனில் வைக்கப்படிருந்த உணவுப்பொருட்களை எலி தின்பதுபோன்ற வீடியோ வெளியாகி பெரும் பரபரப்பை ஏற்படுத்தியது. இந்தநிலையில், சம்மந்தப்பட்ட கேன்டீனுக்கு சீல் வைத்ததோடு தமிழ்நாடு முழுவதும் உள்ள மருத்துவமனை கேன்டீன்களில் ஆய்வு நடத்தவும் உணவுப்பாதுகாப்புத்துறை உத்தரவிட்டிருக்கிறது.கேன்டீனில் எலி

நாள்தோறும் நூற்றுக்கணக்கான பொதுமக்கள் மருத்துவ சிகிச்சைக்காக வந்துபோகும் இடமாக இருக்கிறது சென்னை ஸ்டான்லி அரசு மருத்துவமனை. இந்த மருத்துவமனை வளாகத்தில் தனியாருக்கு சொந்தமான கேன்டீன் ஒன்று இயங்கிவருகிறது. இந்த நிலையில் சில நாள்களுக்கு முன்னர் அந்த தனியார் கேன்டீனில் கண்ணாடி ஷோகேஷில் வைக்கப்பட்டிருந்த வடை, பஜ்ஜி போன்ற உணவுப் பண்டங்கள் மீது எலி ஒன்று உலாவித் திரிந்தபடியும், அந்த தின்பண்டங்களை கொரித்து தின்றபடியும் இருந்திருக்கிறது. இதைப் பார்த்து அதிர்ச்சியடைந்த ஒருவர் அந்த காட்சியை வீடியோவாக பதிவுசெய்து பொதுவெளியில் வெளியிட்டார். இந்த விவகாரம் சமூக வலைதளங்களிலும், காட்சி ஊடகங்களிலும் வெளியாகி பெரும் சர்ச்சையை ஏற்படுத்தியது. `அரசு மருத்துவமனை கேன்டீன்களிலேயே சுகாதாரத்தின் நிலை இதுதானா?' என பல்வேறு தரப்பினரும் கடுமையாக விமர்சித்தனர்.அரசு ஸ்டான்லி மருத்துவக் கல்லூரி மருத்துவமனை

இந்தநிலையில், இந்தப் புகார் குறித்து உடனடியாக நடவடிக்கை எடுத்த ஸ்டான்லி மருத்துவமனை டீன் பாலாஜி, சம்மந்தப்பட்ட தனியார் கேன்டீனை மூட உத்தவிட்டார். மேலும், இதுபோன்ற சம்பவங்கள் இனியும் நடக்காமல் இருக்க உரிய நடவடிக்கை எடுக்கப்படும் எனவும் உறுதியளித்தார். அதைத்தொடர்ந்து, மருத்துவமனை கேன்டீன்களை எப்படி தூய்மையாகப் பராமரிக்க வேண்டும் என்ற புதிய வழிகாட்டு நெறிமுறைகளை உணவு பாதுகாப்புத் துறை வெளியிட்டிருக்கிறது.குடிநீர் வசதிகூட இல்லாத எழும்பூர் அரசு குழந்தைகள் நல மருத்துவமனை... பொதுமக்கள் வேதனையும் விளக்கமும்!

அதன்படி, ``கேன்டீன்களை தொடர்ந்து முறையாக சுத்தம் செய்ய வேண்டும். கிருமி நாசினிகளைத் தெளிக்க வேண்டும். பூச்சிகள், விலங்குகள் உள்ளிட்டவை எளிதில் உணவகங்களுக்குள் வராத அளவுக்கு, முறையாகப் பராமரிக்க வேண்டும். கேன்டீனுக்கு அருகில் இருக்கக்கூடிய சாக்கடைகள், கால்வாய்கள் உள்ளிட்டவற்றை முழுமையாக மூட வேண்டும். செல்லப்பிராணிகளோ, விலங்குகளோ, பறவைகளோ கேன்டீன்களுக்குள் நுழைய அனுமதிக்கக்கூடாது. மேலும், உணவுப் பொருட்களை கையாளுபவர்கள் எப்போதும் கைகளை சோப்பு மற்றும் சுத்தமான நீரைக் கொண்டு கழுவி தூய்மையாக வைத்திருக்க வேண்டும். உணவுப் பொருட்கள் நல்ல தரத்துடன் இருக்கிறதா, காலாவதி ஆகியுள்ளதா என்பதை அடிக்கடி சோதனை செய்யவேண்டும். இந்த வழிகாட்டு நெறிமுறைகளை அனைத்து கேன்டீன் நிர்வாகத்தினரும் முறையாகப் பின்பற்ற வேண்டும்" என பல்வேறு புதிய வழிகாட்டு நெறிமுறைகளை வெளியிட்டு உணவு பாதுகாப்புத் துறை அறிவுறுத்தியிருக்கிறது.மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன்

மேலும், தமிழ்நாட்டில் உள்ள அரசு பொது மருத்துவமனைகள், மருத்துவக் கல்லூரி மருத்துவமனைகள் என அனைத்து மருத்துவமனைகளிலும் இயங்கி வரும் கேன்டீன்களை ஆய்வு செய்ய உணவு பாதுகாப்புத்துறை அதிரடியாக உத்தரவிட்டிருக்கிறது.

இந்த நிலையில், இதுகுறித்துப் பேசியிருக்கும் மருத்துவம் மற்றும் மக்கள் நல்வாழ்வுத்துறை அமைச்சர் மா.சுப்பிரமணியன், ``கேன்டீன் விவகாரத்தில் சம்மந்தப்பட்ட கேன்டீனை மூடி சீல் வைத்திருக்கிறோம். அதேபோல மருத்துவமனைகளை ஆய்வு செய்யும்போது அறைகள், படுக்கைகள், கேன்டீன்கள் மட்டுமல்லாது அங்குள்ள கழிவறைகளையும் ஆய்வு செய்யப்போகிறோம். எங்கெல்லாம் சுத்தம் இல்லையோ அங்கெல்லாம் உரிய நடவடிக்கை எடுத்து பராமரிக்க உத்தரவிட்டிருக்கிறேன். அரசு மருத்துவமனை என்றாலே அங்கு சுத்தம் இருக்காது என்ற மாயத்தோற்றத்தை யாரும் உருவாக்கிவிடக்கூடாது!" எனத் தெரிவித்திருக்கிறார்.

ஏதாவது சம்பவம் நடக்கும் போதும், அது வெளியுலகுக்கு தெரியும் போது மட்டும் ஆய்வு, நடவடிக்கை என்று எடுக்காமல், இது போன்ற விவகாரங்களில் தொடர் ஆய்வுகளும், சமசரமற்ற நடவடிக்கைகளும் அவசியம் என பொதுமக்கள் கோரிக்கை விடுக்கிறார்கள்.!

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... 
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... 
https://bit.ly/46c3KEk">
https://bit.ly/46c3KEk />
நெல்லை: சுகாதாரச் சீர்கேடு ஏற்படுத்தும் அரசு மருத்துவமனை - மருத்துவக் கழிவுகளால் நோய் பரவும் அபாயம்


http://dlvr.it/SyvscG

Read More

அமித் ஷாவின் மொத்த சொத்து எவ்வளவு..? ரியல் எஸ்டேட், பங்குச் சந்தை, பேங்க் பேலன்ஸ் விவரங்கள்..!

ஒவ்வோர் ஆண்டும் பிரதமர் மற்றும் அனைத்து மத்திய அமைச்சர்களும் தங்கள் சொத்துகள் மற்றும் கடன்கள் மற்றும் அவர்கள் குடும்ப உறுப்பினர்களின் சொத்துகள் மற்றும் கடன்களை தானாக முன்வந்து அறிவிப்பார்கள். 

இந்த நிலையில் மோடியின் வலது கையாகவும் மத்திய உள்துறை அமைச்சராகவும் பணியாற்றி வரும் அமித் ஷா, தனது சொத்து மதிப்புகள் குறித்த விவரங்களை அறிவித்துள்ளார். 

அதன்படி, ``2019-ம் ஆண்டு வெளியிடப்பட்ட அமித் ஷாவின் சொத்து விவர அறிவிப்பின் படி, அமித் ஷாவின் அசையும் மற்றும் அசையா சொத்துகளின் மொத்த மதிப்பு 30.48 கோடி ரூபாய். அமித் ஷா``உலக அளவில் ஸ்டார்ட் அப்களுக்கு இந்தியா 3-வது உகந்த இடம்!" - அமித்ஷா ட்வீட்

அவரின் மனைவி சோனல் பெனின் சொத்து மதிப்பு ரூ.8.33 கோடியாக இருந்தது. இந்தச் செல்வமானது ரியல் எஸ்டேட், முதலீடுகள் மற்றும் விலைமதிப்பற்ற நகைகள் உட்பட பலதரப்பட்ட சொத்துகளை உள்ளடக்கி இருந்தது.

இந்த நிலையில் 2023-ல் வெளியிடப்பட்டுள்ள அவரின் சொத்துகள் படுவேகமாக அதிகரித்துள்ளது. இந்த சொத்து மதிப்புகள் எங்கிருந்து எப்படி எவ்வளவு வேகத்தில் கிட்டியது என்பதெல்லாம் ஆச்சர்யம்தான்! 

அசையா சொத்துகள்… அமித் ஷாவின் மொத்த அசையா சொத்துகளின் மதிப்பு 13,56,08,593 ரூபாய். இதில் 6 அசையா சொத்துகள் அமித் ஷாவின் பெயரில் இருக்கின்றன. இதைத்தாண்டி அவரின் தாய் எழுதி வைத்த உயிலின் படி 4 சொத்துகள் உள்ளன. 

அமித் ஷாவின் அசையா சொத்துகளின் பட்டியல் முறையே… 

* குஜராத்தின் மெஹ்சானாவில் உள்ள வட்நகரில் 10.477 ஏக்கர் பரப்பளவில் விவசாய நிலம்.

* குஜராத்தின் அகமதாபாத்தில் உள்ள லிலாபூரில் 1.408 ஏக்கர் பரப்பளவில் உள்ள விவசாய நிலம்.

* குஜராத்தின் காந்திநகரில் 3,511.43 சதுர அடியில் உள்ள குடியிருப்பு நிலம். 

* குஜராத்தின் அகமதாபாத்தில் உள்ள சோலாவில் 2,690 சதுர அடியில் அலுவலக இடம்.

* குஜராத் அகமதாபாத்தில் தால்தேஜில் உள்ள ராய்யாய் கிரெசென்ட்டின் 3,848.13 சதுர அடியில் 50 சதவிகித உரிமை. 

* குஜராத் அகமதாபாத்தின் சோலாவில் 1,355 சதுர அடி பரப்பளவில் உள்ள கடை எண்.5-ல் 50 சதவிகித உரிமை.

* தாயிடமிருந்து பரம்பரை சொத்தாகப் பெற்ற குஜராத் ஷிலாஜ், தஸ்க்ரோயில் 59,890.89 சதுர அடி.

* சுதீப் சொசைட்டியில் 50 சதவிகித உரிமை. குஜராத்தின் அகமதாபாத்தில் உள்ள கோச்ராப்பில் 4,625 சதுர அடி அலுவலக இடம். அமித் ஷா - சோனல் ஷா!பிரதமர் மோடியின் பேங்க் அக்கவுன்டில் எவ்வளவு பணம் உள்ளது? சொத்து விவரங்கள் இதோ..!

இதைத்தாண்டி நிகர சொத்துகளின் மதிப்பு 13,40,31,556 ரூபாய். வங்கியில் வாங்கியுள்ள கடன் 15,77,037 ரூபாய். அமித் ஷாவின் வங்கிக் கணக்கில் 1.09 கோடி ரூபாய் வைத்துள்ளார். நகையாக 50.91 லட்சம் வைத்துள்ளார்.

இதைத்தாண்டி பங்குச் சந்தையில் பட்டியலிடப்படாத பங்குகளாக 3.08 கோடி ரூபாய், பட்டியலிடப்பட்ட பங்குகளாக 27.71 கோடி ரூபாய் மதிப்பிலான பங்குகளை வைத்து இருக்கிறார். அதோடு 19.75 லட்சத்துக்கு இன்ஷூரன்ஸ் பாலிசியும் உள்ளது.  

இதைத் தவிர்த்து அமித் ஷாவின் மனைவி சோனல்பெனின் கையில் பணமாக 20,633 ரூபாயும், பேங்க் பேலன்ஸில் 7,85,00,000 ரூபாயும், பிக்ஸ்டு டெபாசிட்டில் 6,00,00,000 ரூபாயும் உள்ளன.

நகையாக 1,55,40,075 ரூபாயும் உள்ளது. இவரின் அசையும் சொத்துகளின் மதிப்பு 42,98,62,537 ரூபாய். இதுவரை இன்ஷூரன்ஸ் பாலிசியில் செலுத்தி இருக்கும் தொகை 68,83,500 ரூபாய் என்று தெரிவிக்கப்பட்டுள்ளது.

திடீரென அரசியல்வாதிகளின் சொத்து மதிப்புகள் அதிகரிப்பது குறித்து உங்களின் கருத்தென்ன..? கமென்டில் சொல்லுங்கள்!


http://dlvr.it/SyvsKw

Read More

புதுச்சேரி: பழங்குடியின மக்களை தரையில் அமரவைத்த அதிகாரிகள்! - ஆளுநர் தமிழிசை விழாவில் நடந்தது என்ன?

ஜார்க்கண்ட் மாநிலம், குந்தியில் பழங்குடியினர் கௌரவ தின விழா கொண்டாட்டத்தை, பிரதமர் நரேந்திர மோடி இன்று தொடங்கி வைத்தார். இந்த விழா காணொளிக் காட்சி மூலம் புதுவை கம்பன் கலையரங்கில் ஒளிபரப்பு செய்யப்பட்டது. இந்த விழா, புதுவை ஆதிதிராவிடர் நலம் மற்றும் பழங்குடியினர் நலத்துறை ஏற்பாட்டில் நடந்தது. இந்நிகழ்வில் துணைநிலை ஆளுநர் தமிழிசை, முதல்வர் ரங்கசாமியுடன், அமைச்சர்கள் மற்றும் அதிகாரிகள் கலந்துகொண்டனர். விழாவில் பேசிய முதலமைச்சர் ரங்கசாமி, ``நாட்டின் விடுதலைக்காக பழங்குடியின மக்கள் பேராடிய சான்றுகள் இருந்தாலும், அவர்கள் வெளியே தெரியவில்லை. பிரதமர் அவர்கள், பழங்குடியினரின் நலனில் அக்கறை கொண்டு, பகவான் மிர்சா முண்டா பிறந்தநாளை பழங்குடியினர் விழாவாக கொண்டாட நடவடிக்கை எடுத்திருக்கிறார். புதுவை மாநிலத்தில் பழங்குடியின மக்களுக்கு உரிய மரியாதை, இட ஒதுக்கீடு அளிக்கப்பட்டு வருகிறது.தரையில் அமரவைக்கப்பட்ட பழங்குடியின மக்கள்

2016-ல் இருளர் மக்களை பழங்குடியினர் பட்டியலில் சேர்த்து, அவர்களுக்கு இட ஒதுக்கீடு வழங்கப்பட்டது. ஆதிதிராவிடர் நலத்துறையின்கீழ் அனைத்து திட்டங்கள், வீட்டு மனைகள் அவர்களுக்கு வழங்கப்பட்டிருக்கின்றன. மேலும், பல இடங்களில் வீட்டு மனைப்பட்டா வழங்க நடவடிக்கை எடுக்கப்பட்டு வருகிறது” என்றார்.

அவரை தொடர்ந்து பேசிய துணைநிலை ஆளுநர் தமிழிசை, "பழங்குடியின மக்களுக்கு பல திட்டங்களை பிரதமர் அறிவித்திருக்கிறார். அவர்களுக்கான திட்டங்கள் குறித்து விளக்கும் வகையில் `நமது லட்சியம், வளர்ச்சியடைந்த பாரதம்' என்ற வாகனப் பிரசார இயக்கத்தைத் தொடங்கி வைக்கிறார். புதுவையில் பழங்குடியின மக்களுக்கு பல திட்டங்கள் நிறைவேற்றப்பட்டிருக்கின்றன. பழங்குடியின மக்களுக்கு மருத்துவ வசதி, சாலை, பள்ளிகள் அதிகரிக்க வேண்டும் என கோரிக்கை வைத்திருக்கின்றனர். அதிகாரிகள் சில கோரிக்கைகளை நிறைவேற்றவில்லை என தகவல்கள் அனுப்பியிருக்கின்றனர்.

முதலமைச்சரோடு இணைந்து புதுவை மாநில பழங்குடியின மக்களின் கோரிக்கைகள் அனைத்தையும் நிறைவேற்றுவோம் என உறுதியளிக்கிறோம். மக்கள் விவசாயம் செய்ய ஆங்கிலேயர்களை எதிர்த்து, முதல் சுதந்திரப் போராட்டத்துக்கு வித்திட்டவர்கள் பழங்குடியின மக்கள். தெலங்கானாவில் 12 சதவிகிதம் பழங்குடியின மக்கள் இருக்கின்றனர். அவர்களில் ஆறு கிராமங்களை தத்தெடுத்து, பணிகளைச் செய்து வருகிறோம். இன்னும் அவர்களுக்கான வசதிகள் செய்துதரப்படாமல் இருக்கின்றன. பிரதமர் எப்போது ஆட்சிக்கு வந்தாலும் பழங்குடியின மக்களுக்கான பல திட்டங்களை நிறைவேற்றி வருகிறார். முத்ரா வங்கி திட்டத்தில் நான்கில் ஒருவருக்கு எஸ்.சி, எஸ்.டி வகுப்பினருக்கு கடன் வழங்கப்பட வேண்டும் என பிரதமர் கூறியிருக்கிறார். `அவர்களின் வங்கிக் கடனுக்கு சகோதரனாக நான் கியாரண்டி' எனத் தெரிவித்தார். பழங்குடியின மக்களைச் சமாதானப்படுத்தும் அதிகாரிகள், ஆட்சியர் வல்லவன்

பழங்குடியினர் தயாரிக்கும் கைவினைப் பொருள்கள் விற்கப்பட வேண்டும் என கோரிக்கை வைத்திருக்கிறார். பிரதமர் வெளிநாடுகளுக்குச் செல்லும்போது, வெளிநாட்டுத் தலைவர்களுக்கு வழங்கும் பரிசுப் பொருள்களில் அதிக அளவில் பழங்குடியினர் தயாரிக்கும் பொருள்கள் இருக்கின்றன. பழங்குடியினர் வளர்ச்சிக்கு பிரதமரோடு இணைந்து புதுவை அரசும் செயல்படும்” என்று குறிப்பிட்டார்.

தரையில் அமரவைக்கப்பட்ட பழங்குடியினர்:

விழா அரங்கில் இருந்த இருக்கைகளில் பெருமளவு அதிகாரிகளே அமர்ந்திருந்ததால், விழாவுக்கு அழைத்துவரப்பட்டிருந்த பழங்குடியின மக்களுக்கு இருக்கைகள் இல்லை. அதனால், அவர்கள் தரையில் அமரவைக்கப்பட்டிருந்தனர். `ஏன் தரையில் அமர்ந்திருக்கிறீர்கள்?' என்று கேட்ட செய்தியாளர்களிடம், ``விழாவுக்கு அழைத்து வந்தவர்கள்தான் தரையில் அமரும்படி கூறினார்கள்” என்றனர். அதைக் கேட்டு அதிர்ச்சியான பத்திரிகையாளர்கள், உடனே புகைப்படம் எடுத்தனர். அதையடுத்து அவசர அவசரமாக இருக்கைகளைக் கொண்டுவந்து அங்கு போட்ட அதிகாரிகள், பழங்குடியின மக்களை அவற்றில் அமரவைத்தனர்.

அப்போது அந்த மக்கள் தங்கள் உரிமைகளைக் கேட்டு, அதிகாரிகளிடம் வாக்குவாதத்தில் ஈடுபட்டனர். அப்போது பேசிய பழங்குடியினர் விடுதலை இயக்கத் தலைவர் ஏகாம்பரம், "பழங்குடியின மக்களுக்கு பல கிராமங்களில் பட்டா வழங்கவில்லை. ஆண்டுதோறும் விழா மட்டும் நடத்தப்படுகிறது. ஆனால், அவர்களுக்குத் தேவையான நலத்திட்டங்களைச் செயல்படுத்தவில்லை. இந்த விழாவுக்கு சுமார் ரூ.3 லட்சம் செலவிடப்பட்டிருக்கிறது. இந்த நிதியில் 4 பேருக்கு வீடு கட்டிக் கொடுத்திருக்கலாம். பழங்குடியின அமைப்பைச் சேர்ந்தவர்களை, விழா மேடையில் அமரவைத்து கௌரவிக்கவில்லை. முத்ரா கடன் எந்தப் பழங்குடியினருக்கும் கொடுக்கவில்லை" எனக் குற்றம்சாட்டினார். அப்போது அங்கிருந்த பழங்குடியினப் பெண்களும், தங்கள் பகுதியில் நிறைவேற்றப்படாமல் இருக்கும் கோரிக்கைகள் குறித்து தெரிவித்தனர். புதுச்சேரி: ``தெலங்கானாவில் என்னை யாரும் விரட்டவில்லை!” – ஆளுநர் தமிழிசை சீறுவதன் காரணம் என்ன?

அதையடுத்து அவர்களை தன்னிடம் வருமாறு அழைத்தார் ஆளுநர் தமிழிசை. ஆனால், அவர்கள் செல்ல மறுத்துவிட்டனர். அதையடுத்து ஏகாம்பரத்தை ஆளுநரிடம் வருமாறு துறைச் செயலர் கேசவன், ஆட்சியர் வல்லவன், துறை இயக்குநர் இளங்கோவன் ஆகியோர் அழைத்தனர். ஆனால், அவரும் செல்லவில்லை. அதையடுத்து ஆளுநர் தமிழிசை அவர்களைச் சமாதானப்படுத்த முயன்றார். அப்போது பேசிய அந்த மக்கள், "மாநில அரசால் இயலாவிட்டால், மத்திய அரசு அளிக்கும் திட்டங்கள் அடிப்படையில் எங்களுக்கு உதவ வேண்டும்" என்றனர். அதற்கு, "கோரிக்கைகளை எழுதி, ஆட்சியரிடம் தாருங்கள். நடவடிக்கை எடுக்கிறோம்" என்று சமாதானப்படுத்தி அமரவைத்தார் ஆளுநர் தமிழிசை.


http://dlvr.it/Syv8FY

Read More

ஏர் இந்தியா கட்டிடத்தை ரூ.1600 கோடிக்கு வாங்கும் மகாராஷ்டிரா அரசு... 5 ஆண்டு இழுபறிக்கு முடிவு!

ஏர் இந்தியா நிறுவனம் டாடா நிறுவனத்திற்கு விற்பனை செய்யப்பட்ட பிறகும் மும்பையில் உள்ள 23 மாடிகள் கொண்ட ஏர் இந்தியா தலைமை அலுவலக கட்டிடம் தொடர்ந்து அரசின் கட்டுப்பாட்டில் இருக்கிறது. அக்கட்டிடத்தை விலைக்கு வாங்க மாநில அரசு தொடர்ந்து பேச்சுவார்த்தை நடத்தி வந்தது. இதில் தற்போது உடன்பாடு எட்டப்பட்டுள்ளது. இதையடுத்து ஏர் இந்தியா கட்டிடத்தை விலைக்கு வாங்குவதற்கு மகாராஷ்டிரா அமைச்சரவையில் ஒப்புதல் வழங்கப்பட்டது. ஏலம் போன `ஏர் இந்தியா' - மத்திய அரசு, டாடா நிறுவனம்; யாருக்கு லாபம்?

இதில் 1601 கோடிக்கு ஏர் இந்தியா கட்டிடத்தை விலைக்கு வாங்க முடிவு செய்யப்பட்டது. தென் மும்பை முழுவதும் மாநில அரசு அலுவலகங்கள் அதிக அளவில் வாடகை கட்டிடத்தில் இயங்கி வருகிறது. தற்போது ஏர் இந்தியா கட்டிடத்தை விலைக்கு வாங்குவதன் மூலம் வாடகை கட்டிடத்தில் இயங்கும் அனைத்து அரசு அலுவலகங்களும் ஏர் இந்தியா கட்டிடத்திற்கு மாற்றப்படும். இதன் மூலம் மாநில அரசுக்கு ஆண்டுக்கு 200 கோடி வாடகை கொடுப்பது மிச்சமாகும்.

அரபிக்கடலை நோக்கி இருக்கும் இக்கட்டிடத்தில் முதலில் டி.சி.எஸ்.நிறுவனம் மற்றும் சில தனியார் கம்பெனிகள் செயல்பட்டு வந்தன. இப்போது நிதியமைச்சகத்தின் கீழ் வரக்கூடிய வருமான வரித்துறை அலுவலகங்கள் செயல்படுகின்றன. மாநில அரசு இக்கட்டிடத்தை விலைக்கு வாங்கிய பிறகு அதில் இருக்கும் அனைத்து அலுவலகங்களும் காலி செய்யப்பட்டுவிடும். கட்டிடம் இருக்கும் நிலம் ஏர் இந்தியாவிற்கு 99 ஆண்டுகளுக்கு குத்தகைக்கு கொடுக்கப்பட்டுள்ளது. எனவே ஏர் இந்தியா நிறுவனம் அதனை விற்பனை செய்வதால் நிலத்தின் மார்க்கெட் விலையில் 8-ல் ஒரு பங்கு பணத்தையும் சில அபராதத்தையும் அரசுக்கு செலுத்தவேண்டும். ஆனால் அக்கட்டணத்தையும் மாநில அரசு தள்ளுபடி செய்யவேண்டும் என்று ஏர் இந்தியா கேட்டுக்கொண்டுள்ளது.ஏர் இந்தியா9,000 ஏக்கர் நிலம்; கோடிக்கணக்கில் வருமானம்... விவசாயிகளுக்கு ஓய்வூதியம்... எங்கே தெரியுமா?

2018-ம் ஆண்டிலிருந்து இந்த கட்டிடத்தை வாங்க மாநில அரசு ஏர் இந்தியாவுடன் பேச்சுவார்த்தை நடத்தி வருகிறது. ஏர் இந்தியா நிறுவனம் கட்டிடத்தின் மதிப்பு 2000 கோடி என்று தெரிவித்தது. ஆனால் மாநில அரசு அதனை 1,450 கோடிக்குத்தான் மதிப்பீடு செய்தது. அதோடு ஏர் இந்தியா நிறுவனம் 300 கோடி வரை அக்கட்டிடத்திற்காக மாநில அரசுக்கு கொடுக்கவேண்டும் என்றும் அதனை கழித்துக்கொண்டு 1200 கோடி வரை கொடுக்க தயாராக இருப்பதாக மாநில அரசு தெரிவித்தது. இதனால் பேச்சுவார்த்தையில் மேற்கொண்டு முன்னேற்றம் ஏற்படவில்லை.

இதையடுத்து 2021-ம் ஆண்டு உத்தவ் தாக்கரே அரசு மீண்டும் பேச்சுவார்த்தை நடத்தியது. அதிலும் முன்னேற்றம் ஏற்படவில்லை. 2022-ம் ஆண்டு 2600 கோடி தர மாநில அரசு முன் வந்தது. அதனை ஏர் இந்தியா ஏற்றுக்கொண்டது. மகாராஷ்டிரா துணை முதல்வர் தேவேந்திர பட்னாவிஸ் டெல்லி சென்று மத்திய அமைச்சர் ஜோதிராதித்ய சிந்தியாவை சந்தித்து பேசியதை தொடர்ந்து ஏர் இந்தியா இந்த ஒப்பந்ததிற்கு சம்மதம் தெரிவித்தது. இதே கட்டிடத்தை விலைக்கு வாங்க ரிசர்வ் வங்கியும் முயற்சி மேற்கொண்டது.தேவேந்திர பட்னாவிஸ்முகேஷ் அம்பானி வாங்கும் ரூ.20,000 கோடி கடன்... ஏன் இந்த அளவுக்குப் பெரிதாக கடனை வாங்குகிறார்?

2018-ம் ஆண்டு இக்கட்டிடத்தை விற்பனை செய்ய ஏர் இந்தியா நிறுவனம் டெண்டர் விட்டது. ஆனால் அதற்கு எதிர்பார்த்த வரவேற்பு கிடைக்கவில்லை. தற்போது மாநில அரசுக்கும் ஏர் இந்தியாவிற்கும் ஒப்பந்தம் ஏற்பட்டுவிட்டது. 1601 கோடி ரூபாய் கொடுத்து வாங்கிக்கொள்ள மாநில அமைச்சரவை கூட்டத்தில் ஒப்புதல் வழங்கப்பட்டுள்ளது.


http://dlvr.it/Syspkq

Read More

என்.சங்கரய்யாவுக்கு முனைவர் பட்டம்: `சிலரின் சதியால் நடந்தேறாமல் போய்விட்டது!' - முதல்வர் வேதனை

சுதந்திரப் போராட்ட வீரரும், தகைசால் தமிழர் விருதுபெற்ற மூத்த கம்யூனிஸ்ட் தலைவருமான தோழர் என்.சங்கரய்யா, வயது மூப்பு காரணமாக இன்று காலமானார். அவரின் மறைவுக்கு அரசியல் தலைவர்கள் பலரும் இரங்கல் தெரிவித்துவருகின்றனர். முதல்வர் ஸ்டாலின், அமைச்சர்கள் துரைமுருகன், பொன்முடி, எம்.பி-க்கள் டி.ஆர்.பாலு, ஆ.ராசா உட்பட தி.மு.க தலைவர்கள் பலர், குரோம்பேட்டையிலுள்ள சங்கரய்யாவின் இல்லத்துக்கு நேரில் சென்று அவரின் உடலுக்கு அஞ்சலி செலுத்தினர். இந்த நிலையில், `தியாகி சங்கரய்யாவுக்கு அரசு மரியாதையுடன் பிரியாவிடை அளிக்கப்படும்' என்று முதல்வர் ஸ்டாலின் அறிவித்திருக்கிறார்.முதல்வர் ஸ்டாலின் - தோழர் சங்கரய்யா

இது குறித்து முதல்வர் ஸ்டாலின் வெளியிட்டிருக்கும் அறிக்கையில், `தகைசால் தமிழர், முதுபெரும் பொதுவுடைமைப் போராளி, விடுதலைப் போராட்ட வீரர் தோழர் என்.சங்கரய்யா மறைந்த செய்தியால், துடிதுடித்துப்போனேன். மருத்துவமனையில் சிகிச்சைக்காக அனுமதிக்கப்பட்டிருந்த அவர் நலம் பெற்றுவிடுவார் என்றே நம்பியிருந்த வேளையில், அவர் மறைந்த செய்தி அதிர்ச்சியையும் வேதனையையும் அளித்தது.

மிக இளம் வயதிலேயே பொதுவாழ்க்கையில் ஈடுபட்டு, 102 வயது வரை நாட்டுக்காகவும், உழைக்கும் வர்க்கத்துக்காகவும், தமிழ் மண்ணுக்காகவும் வாழ்ந்து மறைந்த சங்கரய்யாவின் வாழ்க்கையும் தியாகமும் என்றென்றும் வரலாற்றில் நிலைத்து நிற்கும். மதுரை அமெரிக்கன் கல்லூரி மாணவராக இருந்தபோதே விடுதலை வேட்கையோடு மாணவர் சங்கச் செயலாளராகப் போராட்டங்களை முன்னெடுத்தவர். தன்னுடைய தேசியம் சார்ந்த செயல்பாடுகளால் பலமுறை சிறையில் அடைக்கப்பட்டு, படிப்பைத் துறந்தவர். இந்தியா விடுதலை பெறுவதற்கு 12 மணி நேரத்துக்கு முன்புதான் அவர் விடுதலை செய்யப்பட்டார்.முதல்வர் ஸ்டாலின் - தோழர் சங்கரய்யா

இப்படிப்பட்ட விடுதலைப் போராட்ட வீரருக்கு 2021-ம் ஆண்டு, சுதந்திர தினத்தை முன்னிட்டு நேரில் சென்று, `தகைசால் தமிழர்' விருதை வழங்கியது எனக்குக் கிடைத்த வாழ்நாள் பேறு. விருதோடு கிடைத்த பெருந்தொகையைக்கூட கொரோனா நிவாரண நிதிக்காக அரசுக்கு அளித்த சங்கரய்யாவின் மாண்பால், நெகிழ்ந்துபோனேன். சிறந்த சட்டமன்ற உறுப்பினராகவும் நினைவுகூரத்தக்க பணிகளை ஆற்றியவர். கலைஞரின் உற்ற நண்பராக விளங்கிய சங்கரய்யா, கலைஞர் மறைந்தபோது, அவரின் இறுதிப் பயணத்தைக் கண்டு கண்கலங்கிய காட்சி, இருவருக்குமான நட்பைப் பறைசாற்றியது.

இந்திய கம்யூனிஸ்ட் கட்சியிலும், அதன் பின்னர் மார்க்சிஸ்ட் கம்யூனிஸ்ட் கட்சியிலும் இருந்து அவர் நடத்திய போராட்டங்களும், தீக்கதிர் நாளேட்டின் முதல் பொறுப்பாசிரியர் முதலிய பல்வேறு பொறுப்புகளில் ஆற்றிய அரசியல் செயல்பாடுகளும், தமிழ்நாட்டின் பொதுவுடைமை இயக்க வரலாற்றில் அவரின் தவிர்க்க முடியாத ஆளுமையை வெளிக்காட்டும்.

பொதுத் தொண்டே வாழ்க்கை என வாழ்ந்த செஞ்சட்டைச் செம்மலுக்கு, மதுரை காமராசர் பல்கலைக்கழகம் மூலமாக கௌரவ முனைவர் பட்டம் வழங்க ஆவண செய்யப்படும் என இந்த ஆண்டு ஜூலை 15 அன்று நான் அறிவிப்பு செய்திருந்தும், தமிழ்நாட்டின் விடுதலைப் போராட்ட வரலாற்றை அறியாத குறுகிய மனம் படைத்த சிலரது சதியால் அது நடந்தேறாமல் போனதை எண்ணி, இவ்வேளையிலும் மனம் வருந்துகிறேன்.

தகைசால் தமிழர், முனைவர் மட்டுமல்ல... அவற்றுக்கும் மேலான சிறப்புகளுக்கும் தகுதிவாய்ந்த போராளிதான் சங்கரய்யா. சிறப்புகளுக்கு அவரால் சிறப்பு என்று சொல்லத்தக்க அப்பழுக்கற்ற தியாக வாழ்வுக்குச் சொந்தக்காரர் அவர். மார்க்சிஸ்ட் கம்யூனிஸ்ட் கட்சி தோழர்களுக்கும், தமிழ்நாட்டுக்கும் அவரின் மறைவு எப்போதும் ஈடுசெய்ய முடியாத இழப்பாகும். அவரது அனுபவமும் வழிகாட்டலும் இன்னும் சில ஆண்டுகள் கிடைக்கும் என எண்ணிக்கொண்டிருந்த எனக்கு, அவரின் மறைவு தனிப்பட்ட முறையிலும் பேரிழப்பு.தோழர் சங்கரய்யா

சாதிய, வர்க்கம், அடக்குமுறை, ஆதிக்கம் ஆகியவற்றுக்கு எதிராக வாழ்நாளெல்லாம் போராடிய போராளி சங்கரய்யாவை இழந்து தவிக்கும் அவரின் குடும்பத்தினர், பொதுவுடைமை இயக்கத் தோழர்கள், பல்வேறு அரசியல் இயக்கங்களைச் சேர்ந்த நண்பர்கள் உள்ளிட்ட அனைவருக்கும் எனது ஆழ்ந்த இரங்கலையும் ஆறுதலையும் தெரிவித்துக்கொள்கிறேன். விடுதலைப் போராட்ட வீரராக, சட்டமன்ற உறுப்பினராக, அரசியல் கட்சித் தலைவராக அவர் தமிழ்நாட்டுக்கு ஆற்றிய தொண்டினைப் போற்றும்விதமாக அவரின் திருவுடலுக்கு அரசு மரியாதையுடன் பிரியாவிடை அளிக்கப்படும்' எனக் குறிப்பிட்டிருக்கிறார்.`தனது வீட்டையே சமத்துவபுரம் ஆக்கியவர்' - சங்கரய்யா குறித்து ஜி.ராமகிருஷ்ணன் எழுதியது!


http://dlvr.it/SysQ72

Read More