பிரிவு 370 ரத்து: உச்ச நீதிமன்றத் தீர்ப்பு எதிரொலி... ஜம்மு காஷ்மீரில் இனி என்ன?!

ஜம்மு காஷ்மீருக்கு சிறப்பு அந்தஸ்து வழங்கிய அரசியலமைப்புச் சட்டத்தின் பிரிவு 370 ரத்துசெய்யப்பட்டதை எதிர்த்து தொடரப்பட்ட வழக்குகளை விசாரித்த உச்ச நீதிமன்றம் நேற்று முன்தினம் (டிச. 11) தீர்ப்பு வழங்கியது. `பிரிவு 370 நீக்கப்பட்டது செல்லும்’ என்று அந்தத் தீர்ப்பில் உச்ச நீதிமன்றம் கூறியிருக்கிறது. ஜம்மு காஷ்மீர்

ஜம்மு காஷ்மீருக்கு விரைவில் மாநில அந்தஸ்து வழங்க வேண்டும், அடுத்த ஆண்டு செப்டம்பர் 30-ம் தேதிக்குள் அங்கு சட்டமன்றத் தேர்தலை நடத்த வேண்டும் என்று உச்ச நீதிமன்றம் உத்தரவிட்டிருக்கிறது.

ஏற்கெனவே, ஜம்மு காஷ்மீருக்கு உடனடியாக மாநில அந்தஸ்து வழங்கப்பட வேண்டும், சட்டமன்றத் தேர்தலை நடத்த வேண்டும் என்று காங்கிரஸ் கட்சி, தேசிய மாநாடு கட்சி, மக்கள் ஜனநாயகக் கட்சி உள்ளிட்ட அரசியல் கட்சிகள் தொடர்ந்து வலியுறுத்திவருகின்றன. ஜம்மு காஷ்மீர்

பா.ஜ.க., மக்கள் ஜனநாயகக் கட்சி ஆகியவற்றின் கூட்டணி ஆட்சி ஜம்மு காஷ்மீரில் நடைபெற்றுவந்த நிலையில், 2018-ம் ஆண்டு ஆட்சியிலிருந்து பா.ஜ.க விலகிக்கொண்டது. எனவே, அங்கு குடியரசுத் தலைவர் ஆட்சி அமல்படுத்தப்பட்டது. அந்த நிலையில்தான், ஜம்மு காஷ்மீருக்கு சிறப்பு அந்தஸ்து வழங்கிவந்த அரசியலமைப்புச் சட்டத்தின் பிரிவு 370-ஐ 2019-ம் ஆண்டு, ஆகஸ்ட் 5-ம் தேதி அதிரடியாக மத்திய பா.ஜ.க அரசு ரத்துசெய்தது.

ஜம்மு காஷ்மீர் முழுவதும் ஊரடங்கு உத்தரவு பிறப்பிக்கப்பட்டு, ராணுவம் குவிக்கப்பட்டு, தொலைபேசி மற்றும் இணையத் தொடர்புகளை முடக்கிவிட்டு, முன்னாள் முதல்வர்கள் ஃபரூக் அப்துல்லா, உமர் அப்துல்லா, மெஹபூபா முஃப்தி உள்ளிட்ட அரசியல் தலைவர்களை வீட்டுச் சிறையில் வைத்துவிட்டு பிரிவு 370-ஐ நீக்குவதற்கான நடவடிக்கையில் மத்திய பா.ஜ.க அரசு இறங்கியது. ஜம்மு காஷ்மீர்

பின்னர், வீட்டுச் சிறையில் இருந்த தலைவர்கள் விடுவிக்கப்பட்டு, பல மாதங்களுக்குப் பிறகு இணைய சேவை மீண்டும் வழங்கப்பட்டாலும், ராணுவத்தின் துணையுடன்தான் அங்கு ‘அச்சுறுத்தலான’ ஆட்சி நடைபெற்றுவருவதாக அங்குள்ள அரசியல் தலைவர்கள் குற்றம்சாட்டிவருகிறார்கள். ஜம்மு காஷ்மீரில் அமைதி திரும்பிவிட்டதாக மத்திய அரசு கூறுகிறது. ஆனால், ‘அது ஒரு மயான அமைதி’ என்று எதிர்க்கட்சிகள் விமர்சிக்கின்றன.

ஜம்மு காஷ்மீருக்கு மீண்டும் சிறப்பு அந்தஸ்து வழங்க வேண்டும், மீண்டும் மாநில அந்தஸ்து வழங்க வேண்டும், உடனடியாக சட்டமன்றத் தேர்தலை நடத்த வேண்டும் என்பது பெரும்பாலான அரசியல் கட்சிகளின் கோரிக்கை. சிறப்பு அந்தஸ்தை மீண்டும் வழங்க முடியாது என்பதில் உறுதியாக இருந்த பா.ஜ.க., ஜம்மு காஷ்மீருக்கு மீண்டும் மாநில அந்தஸ்து வழங்கப்படும் என்று கூறிவந்தது. 2018-ம் ஆண்டிலிருந்து துணைநிலை ஆளுநரின் ஆட்சியே நடைபெற்றுவருவதால், உடனடியாக அங்கு தேர்தலை நடத்த வேண்டும் என்று அந்த மாநிலத்திலுள்ள பெரும்பாலான கட்சிகள் தொடர்ந்து வலியுறுத்திவருகின்றன. உச்ச நீதிமன்றம்

இந்த நிலையில்தான், உச்ச நீதிமன்றத்தின் தீர்ப்பு வந்திருக்கிறது. `பிரிவு 370 ரத்துசெய்யப்பட்டது சரியே’ என்ற தீர்ப்பை தேசிய மாநாடு கட்சி, மக்கள் ஜனநாயகக் கட்சி போன்ற கட்சிகள் ஏற்கவில்லை. அதேநேரத்தில், அடுத்த ஆண்டு செப்டம்பர் 30-ம் தேதிக்குள் சட்டமன்றத் தேர்தலை நடத்த வேண்டும் என்ற உச்ச நீதிமன்றத்தின் உத்தரவைப் பல கட்சிகள் வரவேற்கின்றன.நாடாளுமன்றத்தில் பெரியாரை மேற்கோள் காட்டியது தவறா?! - சர்ச்சையும் பின்னணியும்

அதேநேரத்தில், ‘எதற்காக அடுத்த செப்டம்பர் 30 வரை காத்திருக்க வேண்டும்... உடனடியாக அங்கு தேர்தலை நடத்துங்கள்’ என்று காங்கிரஸ் கட்சி கூறுகிறது. அத்துடன், பாகிஸ்தான் ஆக்கிரமிப்பு காஷ்மீரை மத்திய அரசு மீட்க வேண்டும் என்றும் காங்கிரஸ் வலியுறுத்தியிருக்கிறது. பாகிஸ்தான் ஆக்கிரமிப்பில் இருக்கும் காஷ்மீரை மீட்போம் என்று மத்திய உள்துறை அமைச்சர் அமித் ஷா முன்பு வாக்குறுதி அளித்தார் என்பது குறிப்பிடத்தக்கது. அமித் ஷா

உடனடியாகத் தேர்தலை நடத்தி, ‘ராணுவ ஆட்சி’க்கு முற்றுப்புள்ளி வைத்தாலே அங்கு பல மாற்றங்கள் நிகழும். மேலும், உடனடியாக மாநில அந்தஸ்து வழங்கப்பட்டால், அதுவும் ஜம்மு காஷ்மீரில் சில மாற்றங்களை உண்டாக்கும். `ஜம்மு காஷ்மீரில் தீவிரவாதத்தைக் கட்டுப்படுத்திவிட்டோம்’ என்று பா.ஜ.க-வினர் கூறிவந்தாலும், அங்கு பயங்கரவாதத் தாக்குதல் சம்பவங்கள் முழுமையாகக் குறையவில்லை. அதைக் கட்டுப்படுத்துவது சவால் மிகுந்ததாகவே இருக்கும். இதற்கெல்லாம், மத்திய ஆட்சியாளர்கள் என்ன திட்டங்களை வைத்திருக்கிறார்கள் என்பது போகப் போகத்தான் தெரியும்.!

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... 
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... 
https://bit.ly/46c3KEk">
https://bit.ly/46c3KEk />

http://dlvr.it/T04tFB

Read More

சபரிமலையில் பக்தர்களை கையாளுவதில் குளறுபடி... பாதியில் திரும்பும் நிலை?! - சாடும் எதிர்க்கட்சிகள்

சபரிமலை ஐயப்ப சுவாமி கோயிலில் கடந்த ஒரு வாரத்துக்கும் மேலாக பக்தர்கள் கூட்டம் அலைமோதுகிறது. நிலக்கல் பார்க்கிங் ஏற்பாட்டில் குளறுபடியால் சுமார் 4 மணி நேரம் காத்திருக்கும் நிலை ஏற்பட்டுள்ளது. பம்பையில் இருந்து சந்நிதானம் செல்ல சுமார் 14 மணி நேரம் ஆகிறது. நிலக்கல்லில் இருந்து பம்பா-வுக்கு செல்ல பஸ் கிடைக்காத நிலை ஏற்பட்டுள்ளது. அனைத்து பஸ்களும் கூட்டமாகவே இருந்ததால் பக்தர்கள் செய்வதறியாமல் திணறினர். சீட் பிடிப்பதற்காக குழந்தைகளை ஜன்னல் வழியாக பஸ்ஸுக்குள் ஏற்றிவிடும் அவல காட்சிகளை நிலக்கல்லில் பார்க்க முடிகிறது.

சந்நிதானத்தில் பக்தர்கள் கூட்டத்தை குறைக்க வேண்டும் என்பதற்காக, நிலக்கல்லில் பக்தர்கள் காக்க வைக்கப்பட்டதாக குற்றச்சாட்டு எழுந்துள்ளது. நிலக்கல்லில் குவிந்த பக்தர்களுக்கு தண்ணீர், உணவு உள்ளிட்ட அடிப்படை வசதிகள் கூட செய்யப்படவில்லை என பக்தர்கள் குமுறலுடன் தெரிவித்தனர். குழந்தைகளும் முதியவர்களும் மிகவும் சிரமப்பட்டனர். சபரிமலையில் பக்தர்களுக்கான ஏற்பாடுகளை செய்வதில் அரசு தோல்வியடைந்துவிட்டதாக எதிர்க்கட்சிகள் குற்றம்சாட்டி வருகின்றன. பந்தளம் கோயிலில் அமைக்கப்பட்டுள்ள யாக குண்டம்

கட்டுக்கடங்காத கூட்டம், அடிப்படை வசதிகள் இல்லாததை அடுத்து அதிக அளவு பக்தர்கள் சபரிமலையில் தரிசனம் செய்யாமல் பாதியில் வீடு திரும்பி வருகின்றனர். அதில் பெரும்பாலானோர் பந்தளம் ஸ்ரீதர்மசாஸ்தா கோயிலுக்குச் சென்று இருமுடியை சமர்ப்பிக்கின்றனர். இருமுடியில் உள்ள நெய் அங்குள்ள சுவாமிகளுக்கு அபிஷேகம் செய்யப்படுகின்றன. மேலும், உடைத்த நெய்தேங்காய்களை போடுவதற்கு வசதியாக பந்தளம் கோயிலில் யாக குண்டம் ஒன்றும் ஏற்படுத்தப்பட்டுள்ளது.

இந்த நிலையில் முதல்வர் பினராயி விஜயன் தலைமையில் சபரிமலை குறித்த ஆலோசனைக் கூட்டம் நேற்று நடைபெற்றது. தேக்கடியில் இருந்து ஆன்லைன் மூலம் முதல்வர் பினராயி விஜயன் இந்த கூட்டத்தில் கலந்துகொண்டார். தேவசம்போர்டு அமைச்சர் ராதாகிருஷ்ணன், திருவிதாங்கூர் தேவசம்போர்டு தலைவர் பிரசாந்த், தலைமைச் செயலாளர் உள்பட பலர் கலந்துகொண்டனர். இந்த கூட்டத்தில் தினமும் ஆன்லைனில் முன்பதிவு செய்ய 80,000 பக்தர்களை மட்டுமே அனுமதிப்பது என தீர்மானிக்கப்பட்டுள்ளது. சபரிமலை நடை திறந்த முதல் 19 நாள்கள் சராசரியாக 62,000 பக்தர்கள் தரிசனத்துக்கு வந்ததாகவும், டிசம்பர் 6-ம் தேதி முதல் எண்ணிக்கை அதிகரித்ததாகவும் இக்கூட்டத்தில் தெரிவிக்கப்பட்டது. டிசம்பர் 7-ம் தேதி ஒரு லட்சத்து இரண்டாயிரம் பக்தர்கள் சபரிமலைக்கு வந்ததுதான் கூட்ட நெரிசலுக்கு காரணம் என இக்கூட்டத்தில் தெரிவிக்கப்பட்டது. சபரிமலையில் தரிசனத்துக்கு காத்திருக்கும் பக்தர்கள்

இதைத்தொடர்ந்து செய்தியாளர்களை சந்தித்த திருவிதாங்கூர் தேவசம்போர்டு தலைவர் பிரசாந்த், "கடந்த சனிக்கிழமை மற்றும் ஞாயிற்றுக்கிழமைகளில் சபரிமலையில் பக்தர்களை கையாளுவதில் குளறுபடிகள் ஏற்பட்டது உண்மைதான். அந்த குளறுபடிகளை உடனுகுடன் சரிசெய்ய நடவடிக்கை எடுக்கப்பட்டது. எல்லா ஆண்டுகளும் இதுபோன்ற சம்பவங்கள் நடப்பது வழக்கம்தான். ஆனால், தேவசம்போர்டும், அரசும் ஒரு வசதியும் ஏற்படுத்தவில்லை என்ற பிரசாரங்கள் உண்மைக்கு புறம்பானவை. பக்தர்கள் தண்ணீர் கிடைக்கவில்லை என்பதுபோன்ற குற்றச்சாட்டுக்களை மீடியாக்களிடம் தெரிவித்தனர்.திருவிதாங்கூர் தேவசம் போர்டு தலைவர் பிரசாந்த்

கூட்டம் அதிகரிக்கும்போது அனைவருக்கும் அனைத்தையும் வழங்குவதில் சிரமம் ஏற்பட்டது. அதை வரும் ஆண்டுகளில் எப்படி நிவர்த்தி செய்ய வேண்டும் என்பதுகுறித்து ஆலோசித்துவருகிறோம். நிலக்கல்லில் வாகனங்கள் நிறுத்துவதை சுமூகமாக்கும் வகையில் தனியார் ஏஜென்சி ஊழியர்கள் நியமிக்கப்படுவார்கள்" என்றார்.

``சபரிமலையில் பக்தர்களுக்கு உதவ என்.எஸ்.எஸ், என்.சி.சி தன்னார்வலர்களை பயன்படுத்தலாம்’ என கேரளா ஐகோர்ட் கருத்து தெரிவித்துள்ளது குறிப்பிடத்தக்கது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... 
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... 
https://bit.ly/46c3KEk">
https://bit.ly/46c3KEk />

http://dlvr.it/T048XV

Read More

``நீர் வழித்தடங்களில் கல்லூரிகள், ஹோட்டல்கள் கட்ட அனுமதித்தது யார்?” - கேட்கிறார் கே.பாலகிருஷ்ணன்

``ஐந்து மாநிலத் தேர்தல் முடிவுகள், நாடாளுமன்றத் தேர்தலில் பா.ஜ.க-வுக்கு வாய்ப்புகளை அதிகரித்து இருக்கிறதே?"

``அப்படி சொல்லமுடியாது. மிசோரம் தவிர்த்து நான்கு மாநிலங்களில் ஒன்றில் பா.ஜ.க-வும், மூன்றிலும் காங்கிரஸும் வெற்றி பெறும் என்று நினைத்தோம். ஆனால், அப்படியே தலைகீழாக காங்கிரஸ் ஒன்றில்தான் வெற்றி பெற்று இருக்கிறது. இது பா.ஜ.க-வுக்கு கிடைத்த வெற்றி என்று சொல்லமுடியாது. பா.ஜ.க வெற்றியடைந்த மாநிலங்களில் வாக்கு வித்தியாசம் என்பது குறைவுதான். காங்கிரஸூக்கும் பா.ஜ.க-வுக்கும் கடுமையான போட்டி நிலவி இருக்கிறது. தற்போது நடந்தத் தேர்தல் மாநில அரசை தீர்மானிப்பது. ஆனால், நாட்டின் எதிர்க்கால முன்னேற்றத்துக்காக மோடியின் 10 ஆண்டுக்கால அரசு எதுவுமே செய்யவில்லை. கடந்த காலங்களைவிட பா.ஜ.க எதிர்ப்புதான் அதிகமாக இருக்கிறது. அதை எதிர்க்கட்சிகள் எப்படி ஒருங்கிணைக்கப் போகிறது என்பதில்தான் இருக்கிறது. அதை சரியாக செய்வோம் என்ற நம்பிக்கை இருக்கிறது."
அமித் ஷா, மோடி

"பா.ஜ.க-வுக்கு எதிராக கட்சிகளை ஒருங்கிணைக்க காங்கிரஸ் தவறிவிட்டது என்கிறார்களே?"

" ஐந்து மாநிலத் தேர்தலை பொறுத்தவரையில் மற்ற கட்சிகளை காங்கிரஸ் இணைத்து இருந்தால் நிச்சயம் பா.ஜ.க வெற்றியை தடுத்து இருக்கலாம். தமிழ்நாட்டில் தி.மு.க செய்வதுபோல போதுமான அளவுக்கு எதிர்க்கட்சிகளை மாநில காங்கிரஸ் கமிட்டிகள் ஒருங்கிணைக்கவில்லை. நாங்கள்தான் பெரிய கட்சி என்ற மனபான்மையில் சில மாநில காங்கிரஸ் இருக்கிறது. சிறு கட்சிகளை ஒருங்கிணைக்க வேண்டும் என்று மாநில தலைமைக்கு தேசிய காங்கிரஸ் தலைமை வலியுறுத்தி இருக்க வேண்டும். ஆனால் அதை செய்யவே இல்லை."
கே.பாலாகிருஷ்ணன்

"கம்யூனிஸ்ட் கட்சியே காங்கிரஸுடன் உடன்படாமல் ஓரிரு மாநிலங்களில் தனித்துதானே நின்றது?"

" (மெல்லிய குரலில்...) அது அப்படியில்லை. தேர்தல் நடந்த மாநிலங்களில் காங்கிரஸ் தலைமையில்தான் கூட்டணி அமைக்கப்பட்டது. எனவே அவர்கள்தான் கூட்டணியை ஒருங்கிணைக்க வேண்டும். அவர்கள்தான் தங்களின் பங்கு குறைந்தாலும் பரவாயில்லையென்று நினைக்கவேண்டும். சின்ன கட்சிகள் அப்படி நினைத்து எந்த பயனும் இல்லை. தேர்தல் அரசியலில் கொஞ்சம் நெழிவு சுளிவாகதான் போகவேண்டும். காங்கிரஸ் அப்படி செய்யவில்லை."

``ஆனால், பா.ஜ.க தனித்துதானே நின்று வெற்றிப் பெற்று இருக்கிறது?"

``மத, சாதி உணர்வை தூண்டிவிட்டு அதன்மூலம் அரசியல் ஆதாயமடைகிறது பா.ஜ.க. அது நாட்டை மிக மோசமான நிலைக்கு வழிநடத்துகிறது. இதை எதிர்த்து அரசியல் செய்வது சவாலானது. வெறும் பா.ஜ.க, மோடி எதிர்ப்பு மட்டும் இதற்கு போதாது. மாற்று திட்டங்களை முன்னிறுத்தி மக்களை சந்திக்க வேண்டும். அதைதான் எங்கள் கூட்டணி செய்கிறது. நிச்சயம் வெற்றி பெறுவோம்."கேரள முதல்வர் பினராயி விஜயன்

``கேரளாவில் முதல்வர் பினராயி விஜயன் காங்கிரஸோடு இணக்கமாக செல்லவாரா என்ன?"

" (சிரிப்போடு...) கேரளா கதையே வேறு. அங்கு சி.பி.எம் காங்கிரஸ் ஒத்துபோகவேண்டுமென்ற பிரச்னையே கிடையாது. இந்திய கூட்டணியை ஒருங்கிணைக்க நாங்கள் போராடுவதே பா.ஜ.க வெற்றி பெறகூடாது என்பதற்காகதான். ஆனால், கேரளாவில் பா.ஜ.க-வுக்கு வாய்ப்பே இல்லை. அங்கு யாருக்கு பலம் அதிகமென்று போட்டி போடுகிறோம். யார் வெற்றிப் பெற்றாலும், அது மதசார்ப்பின்மை வெற்றிப் பெற்றதாகதான் அர்த்தம். ஒருவேளை பா.ஜ.க வெற்றி பெற்றுவிடும் என்ற சூழ்நிலை வந்தால், சேர்ந்து பணியாற்றுவது பற்றி யோசிக்கலாம்"

" அப்படியென்றால் தமிழ்நாட்டில் பா.ஜ.க-வுக்கு வெற்றி வாய்ப்பு இருக்கிறதா என்ன? இல்லை பா.ஜ.க வந்துவிடுமென்று அச்சப்பட்டு இப்போதே கைகோர்க்கிறீர்களா?"

" இல்லை இல்லை... அ.தி.மு.க-வும் பா.ஜ.க-வும் இணைந்தால் அது பெரிய கூட்டணி என்பதில் சந்தேகம் இல்லை. ஆனால், அவர்கள் இணைந்து வெற்றி பெறமுடியவில்லை. இருப்பினும் கடந்த தேர்தலில் அத்தி பூத்தார்போல தேனியில் அ.தி.மு.க வென்றதுபோல, மீண்டும் ஒரு தொகுதியில் வெற்றி பெற்றுவிடக்கூடாதென்று நினைக்கிறோம்."கே.பாலாகிருஷ்ணன்

"கொள்கை ரீதியாக பா.ஜ.க-வை எதிர்க்கும் நீங்கள், மத்திய பா.ஜ.க-வின் பல திட்டங்களையும் தொழிலாளர்கள் விரோத சட்டங்களையும் தி.மு.க அரசு அமல்படுத்துகிறதே? "


" பாசிச கொள்கை கொண்ட பா.ஜ.க-வை வீழ்த்தவேண்டுமென்றுதான் தி.மு.க-வுடன் நாங்கள் கைகோர்த்து இருக்கிறோம். அதேசமயத்தில், தொழிலாளர் நலனுக்கு எதிராக தி.மு.க அரசு கொண்டு வந்த சட்டங்களை நாங்கள் எதிர்த்து இருக்கிறோம். நீங்கள் எவ்வளவு நன்மை செய்தாலும், மக்கள் விரோத செயல்களில் ஈடுப்பட்டால் அவர்களின் கோபத்துக்கு ஆளாக நேரிடும் என்பதை தி.மு.க உணர வேண்டும். "

" மிக்ஜாம் வெள்ள பாதிப்புக்கு மத்திய அரசு..?"

" (இடைமறிக்கிறார்...) தமிழ்நாடு மக்கள் தொகையில் மூன்றில் ஒரு பங்கு மக்கள் வெள்ளத்தினால் பாதிக்கப்பட்டு இருக்கிறார்கள். அதற்காக 5000 கோடி ரூபாய் கேட்டால், 500 கோடி ரூபாய்தான் கொடுக்கிறார்கள். அதை வைத்து என்ன செய்யமுடியும். இதுதான் மோடி தமிழ்நாட்டு மக்களுக்கு செய்யும் நிவாரணம். இப்படி நிதியை கொடுக்காமல், நிவாரண பணிகளை மேற்கொள்ள முடியாமல் தி.மு.க அரசுக்கு கெட்ட பெயர் வாங்கிக் கொடுக்க பா.ஜ.க முயலுகிறது. நாம் என்ன வேறு நாட்டு மக்களா? அண்டை நாட்டுகளே அதை செய்கிறோம் இதை செய்கிறோம்... அத்தணாயிரம் கோடி கொடுக்கிறோம்... என்று சொல்கிறார்கள். ஆனால், தமிழ்நாட்டுக்கு பாதிப்பு ஏற்பட்டால், மத்திய அரசுக்கு எதுவும் செய்வதில்லை."

" இதுபோன்ற நிர்பந்ததில்தானே அ.தி.மு.க-வும் இருந்தது. அதை அடிமை அரசு என்று சொன்ன நீங்கள், தி.மு.க-வை என்ன சொல்வீர்கள்?"


" இதை அப்படி ஒப்பிட முடியாது. அ.தி.மு.க-வும் அவரது ஆட்சியும் பா.ஜ.க கொண்டு வரும் எல்லா திட்டங்களுக்கும் ஆதரவு அளித்தது. ஆனால், பா.ஜ.க-வுக்கு நேர் எதிராக தி.மு.க என்ற கட்சி செயல்படுகிறது. அதை யாரும் மறுக்கமுடியாது. ஆனால், அரசு என்று வரும்போது பா.ஜ.க அரசின் நடவடிக்கைகளை அமல்படுத்தவேண்டிய நிலைக்கு வருகிறார்கள். அதை முழுக்க தவிர்க்க முடியாது. மத்திய அரசின் அழுத்தத்துக்கு உள்ளாகும்போது நிலைமையை எப்படி சமாளிப்பதென்று எங்களை போன்ற கூட்டணி கட்சிகளிடமும், சங்க பிரதிநிதிகளிடமும் தி.மு.க அரசு கலந்து ஆலோசிக்கலாம். ஆனால், அதை செய்வதே இல்லை. "கே.பாலாகிருஷ்ணன்

" ஆனால், சென்னையில் மழைநீர் வடிகாலுக்கு 4000 கோடி செலவு செய்தும், இன்னும் பல இடங்கள் மிதந்துக் கொண்டே இருக்கிறதே?"

" திருவள்ளூர், காஞ்சிபுரம் மாவட்டங்களில் பெய்த மழையும் ஏரிகள், ஆறுகள், கால்வாய் வழியாக சென்னைக்குள் வருவதால்தான் பிரச்னை. எதிர்பாராத அளவைவிட அதிக மழை பெய்யும்போது எதுவுமே செய்ய முடியவில்லை. அதிமுக ஆட்சியில்கூடதான் 2015-ல் வெள்ளம் வந்தது. இரவோடு இரவாக செம்பரபாக்கம் ஏரியை திறந்துவிட்டதால்தான், பெரிய சேதம் ஏற்பட்டது. அ.தி.மு.க-வைவிட திமுக நிதானமாக, நன்றாகவேதான் செயல்படுகிறார்கள்."

"எட்டு ஆண்டுகள் முன்பு நடந்ததை தற்போது ஒப்பீடு செய்வது சரியாக இருக்குமா?"

" (நிதானமாக) எட்டு வருஷமா... பத்து வருஷமா... 50 வருஷமா என்பது முக்கியமல்ல. ஆசியாவிலேயே மிக அதிகப்படியான மக்கள் வசிக்கும் நகரம் சென்னை. ஆனால், இவ்வளவு மக்களுக்கு தேவையான அடிப்படை கட்டமைப்புகள் ஏற்படுத்தப்படவில்லை. தற்போது வெள்ளக்காடான சென்னையில், மே மாதம் தண்ணீர் தட்டுப்பாடு ஏற்படும். தமிழ்நாட்டில் எந்த ஏரியும் முறையாக தூர்வாரப்படவில்லை. இதுபோன்ற பிரச்னைகளில் அரசு கவனம் செலுத்தவேண்டும். நீர் வழித்தடங்களில் உள்ள குடிசைகளை அகற்றுகிறார்கள். ஆனால் அங்கு பிரமாண்டமாக கல்லூரிகளை, ஹோட்டல்களை கட்ட அனுமதி கொடுத்தது யார்? அவர்களுக்கு பட்டா, பத்திரம் பதிவு செய்தது யார்? என்பது உள்ளிட்ட பல கேள்விகள் இருக்கிறது. தமிழ்நாட்டை ஆண்ட கட்சிகள் நீர் மேலாண்மையில் கவனம் செலுத்தவில்லை."மிக்ஜாம் புயல்

" 2015 வெள்ளத்தின்போது அரசை கடுமையாக விமர்சனம் செய்து களமாடிய கம்யூனிஸ்ட் தோழர்களை தி.மு.க ஆட்சியில் காணவில்லையே..? ஏன்?"

" அப்படியெல்லாம் சொல்லமுடியாது. களத்தில் வேலைபார்த்துக் கொண்டுதான் இருக்கிறோம். புயல் வருவதற்கு முன்பாகவே மாவட்ட அளவில் கூட்டம் போட்டு நிவாரண பொருள்கள் வாங்கினோம். பிறரைபோல எங்களிடம் கோடி கணக்கில் கையில் பணம் இல்லை. எங்களால் இயன்றதை வாங்கி மக்களுக்கு கொடுக்கிறோம்."


http://dlvr.it/T048Pj

Read More

``அரசு ரூ.4,000 கோடி செலவு செய்திருக்கிறதா என்பதை நாம் முடிவு செய்ய முடியாது!” - கே.எஸ்.அழகிரி

தமிழ்நாடு காங்கிரஸ் கட்சித் தலைவர் கே.எஸ்.அழகிரி, கும்பகோணத்தில் செய்தியாளர்களைச் சந்தித்துப் பேசினார். அப்போது அவர், ``ஒவ்வொரு தொகுதிக்கும் வாக்குச்சாவடி பாசறை அமைத்து வருகிறோம். சென்னையில் மழை வெள்ள பாதிப்புகளை அரசு திறமையாகக் கையாண்டிருக்கிறது. அதில் குறைபாடுகள் இருப்பதாகச் சொல்ல முடியாது.கே.எஸ்.அழகிரி

இந்திய வானிலை மையத்தின் அறிக்கையின்படி உருவாகிய புயல், சென்னை மாநகரத்தில் மட்டும் 17 மணி நேரம் மையம் கொண்டிருந்தது. அந்த17 மணி நேரமும் மழை பெய்தது. அதை மழை பொழிவு என்று சொல்ல முடியாது, மேகப் பிளவு ஏற்பட்டது. இந்தியாவில் 17 மணி நேரம் தொடர்ந்து மழை பெய்தால், எந்த நகரமும் தாங்காது. பேரிடர் என வந்த பிறகு எவ்வளவு சரி செய்ய முடியுமோ அதனை அரசாங்கம் திறமையாகச் செய்திருக்கிறது.

இது இயற்கை பேரிடர், மனித பிழையல்ல. எதிர்ப்பாளர்கள், ஆதரவாளர்கள், நியாயமானவர்கள் என பலரும் இருப்பார்கள். எதிர்ப்பாளர்களும் ஆதரவாளர்களும் என்ன சொல்கிறார்கள் என்பது முக்கியமல்ல. நியாயமானவர்கள் என்ன நினைக்கிறார்களோ அதுதான் ஏற்றுக்கொள்ளக் கூடியது.கும்பகோணம் செய்தியாளர்கள் சந்திப்பில் கே.எஸ்.அழகிரி

அரசு ரூ.4,000 கோடி ரூபாய்க்கான செலவை முறையாகச் செய்திருக்கிறதா என்பதை கணக்கு தணிக்கையில் முடிவுசெய்வார்கள். அதை நம்மைப் போன்றவர்கள் முடிவுசெய்ய முடியாது, குறை சொல்வது எளிது. இந்தியா கூட்டணி பளிச்சென்று இருக்கிறது. மத்திய அரசிடம் 5,000 கோடி ரூபாய் மாநில அரசால் கேட்கப்பட்டிருக்கிறது. இது பாதிப்பல்ல... பேரிடர் எனக் கருதி மத்திய அரசு அதை வழங்க வேண்டும்" என்றார்.மிக்ஜாம் புயல்: `திமுக பக்கம் சாயும் கமல்..!’ - ஆதரவா, ஆதாயமா?!


http://dlvr.it/T03x9Y

Read More

``மருத்துவத்துறையின் தர்மத்திலிருந்து அரசும் மருத்துவத்துறையும் தவறியிருக்கின்றன!” - விஜயபாஸ்கர்

தென்சென்னை தெற்கு மேற்கு மாவட்ட அ.தி.மு.க சார்பில், 170-வது வார்டில் புயல் நிவாரணமாக பெட்ஷீட், பாய் உள்ளிட்ட 18 பொருள்கள் அடங்கிய நிவாரணப் பொருள்கள் வழங்கப்பட்டன. இந்த நிகழ்வில் முன்னாள் சுகாதாரத்துறை அமைச்சர் விஜயபாஸ்கர் கலந்துகொண்டு நிவாரணப் பொருள்களை வழங்கினார். அதைத் தொடர்ந்து செய்தியாளர்களிடம் பேசிய அவர், ``அ.தி.மு.க ஆட்சியில் இல்லாவிட்டாலும், மக்கள் பணியில் தொடர்ந்து பணியாற்றிவருகிறது.சென்னை வெள்ளம்

அரசின் சரியான திட்டமிடல் இல்லாததால்தான் இந்த மாபெரும் சேதம் ஏற்பட்டிருக்கிறது. அரசு தோல்வியடைந்திருக்கிறது. நம்பிக்கையாக இருக்கவேண்டிய அரசு, மக்களின் நம்பிக்கையை இழந்திருக்கிறது. தலைநகரில் `பால் இல்லை, தண்ணீர் இல்லை’ என்ற குரல் வேகமாக ஒலிக்கிறது. இன்னும் உட்புறப் பகுதிகளில் மின்சாரம் வழங்கப்படவில்லை எனக் கூறப்படுகிறது. எனவே, 90 சதவிகித மீட்புப்பணிகள் முடிந்துவிட்டன எனக் கூறாமல், விரைந்து அரசு நடவடிக்கைகளை மேற்கொள்ள வேண்டும்.

பெருந்தொற்று ஏற்படும்போது, நோய்த் தொற்றைத் தவிர்க்க முடியாத சூழல் ஏற்படும். ஆனால், அ.தி.மு.க ஆட்சியில் ஜீரோ நோய்த் தொற்று என்ற சூழலை உருவாக்கினோம். ஆனால், இன்றைய சூழல் அப்படி இல்லை. பல இடங்களில் விலங்குகள் இறந்து மிதந்தன. அது பெரும் நோய்த் தொற்றுகளை உருவாக்கும். இது பெரும் ஆபத்தை உருவாக்கும். இதற்கு முதலில் அனைவருக்கும் தடுப்பூசி போட வேண்டும். ஆனால் கோவையிலிருந்து வந்த மருத்துவ ஊழியர்களுக்கு உணவு வழங்கப்படவில்லை எனக் குற்றம்சாட்டப்படுகிறது. இது போன்ற ஒருங்கிணைப்பு இல்லாமல் செயல்படும் அரசை எதிர்த்து ஊடகங்களும் மக்களும் கேள்வி கேட்கத்தான் செய்வார்கள்.விஜயபாஸ்கர் - மா.சுப்பிரமணியன்

இதற்கெல்லாம் கோபப்படாமல், மக்களுக்குத் தேவையானதைச் செய்யவேண்டியது அரசின் கடமை. இந்த வெள்ள பாதிப்பு குறித்த தகவல்கள் இன்னும் பெரிதாக வெளியே வரவில்லை. தனியார் மருத்துவமனையில் பலர் இறந்ததாகக் கூறப்படுகிறது. அந்த விவரங்களை அரசு இன்னும் வெளியிடவில்லை. புளியந்தோப்பைச் சேர்ந்த மசூத் - சௌமியா தம்பதியின் இறந்த குழந்தை அட்டைப்பெட்டியில் கொண்டு செல்லப்பட்ட வீடியோவை பார்த்தேன். அவர்களுக்கு நிகழ்ந்திருப்பது பெரும் கொடுமை. அரசு மருத்துவமனையில், குழந்தை காப்பாற்றப்பட்டிருக்க வேண்டும்.

ஆனால், காப்பாற்றப்படவில்லை. இறந்த குழந்தையின் உடலை, துணியில் சுற்றி, அதற்கான மரியாதையுடன் வழங்கியிருக்க வேண்டும். அதுதான் மருத்துவத்துறையின் தர்மம். அந்த தர்மத்திலிருந்து இந்த அரசும், இந்த அரசின் மருத்துவத்துறையும் தவறியிருக்கின்றன. கால்பந்து வீராங்கனை பிரியா தொடங்கி, தவறான சிகிச்சை காரணமாக கை அகற்றப்பட்டு இறந்த குழந்தை வரை இந்த மருத்துவத்துறையில் தொடர்ந்து அவலங்கள் நிகழ்ந்துவருகின்றன.தி.மு.க அரசின் மருத்துவத்துறை அவலம்

இறந்த குழந்தையைத் துணியில் சுற்றிக் கொடுங்கள் எனத் துக்கத்தில் இருக்கும் பெற்றோர் கேட்க மாட்டார்கள். அது அரசின் கடமை. அதேநேரம் இந்த நிகழ்வு குறித்துக் கேள்வி எழுப்பும் ஊடகத்துறையைச் சேர்ந்தவர்களைத் திட்டுவதும், தாக்குவதும் கடும் கண்டனத்துக்குரியது. இந்த அரசின் மருத்துவத்துறை ஐ.சி.யூ-வில் இருக்கிறது" எனத் தெரிவித்திருக்கிறார்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்...
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...
https://bit.ly/46c3KEk">
https://bit.ly/46c3KEk />
கன்னிகாபுரம் வெள்ளம்: பிறந்து இறந்த குழந்தை - அட்டைப்பெட்டியில் உடல் கொடுக்கப்பட்ட அவலம்!


http://dlvr.it/T02LxR

Read More

கேரளா: `கிரிமினல்ஸ்..!’ - கறுப்புக்கொடி காட்டியவர்களிடம் நடுரோட்டில் ஆவேசமான கவர்னர்

கேரள மாநிலத்தில் பல்கலைக்கழகங்களில் வேந்தர்களை நியமிப்பது தொடர்பாக ஆளும் சி.பி.எம் அரசுக்கும், கவர்னர் ஆரிஃப் முகமது கானுக்கும் இடையே அதிகார மோதல் நடந்துவருகிறது. இந்த நிலையில் கவர்னருக்கு எதிராக சி.பி.எம் மாணவர் அமைப்பான எஸ்.எஃப்.ஐ உள்ளிட்டவை கறுப்புக்கொடி காட்டுதல் போன்ற போராட்டங்களை நடத்திவருகின்றன. பல்கலைக்கழகங்ககுக்கு கவர்னர் காவிபூச முயல்கிறார் எனக் கூறி கடந்த வெள்ளிக்கிழமை ராஜ் பவன் முன்பு எஸ்.எஃப்.ஐ அமைப்பினர் போராட்டம் நடத்தினர். இந்த நிலையில் நேற்று இரவு கவர்னர் ஆரிஃப் முகமது கான் டெல்லிக்குச் செல்வதற்காக கவர்னர் மாளிகையிலிருந்து திருவனந்தபுரம் விமான நிலையத்துக்கு காரில் புறப்பட்டுச் சென்றார்.

அவர் காரில் பயணித்தபோது ஒரு கிலோமீட்டர் தூரத்துக்குள் மூன்ரு இடங்களில் எஸ்.எஃப்.ஐ அமைப்பினர் கறுப்புக்கொடி காட்டி போராட்டம் நடத்தினர். திருவனந்தபுரம் பேட்டை பள்ளிமுக்கு பகுதியில் கவர்னர் ஆரிஃப் முகமது கான் காரில் சென்றுகொண்டிருந்த சமயத்தில், எஸ்.எஃப்.ஐ அமைப்பினர் ரோட்டில் இறங்கி கவர்னருக்கு கறுப்புக்கொடி காட்டி கோஷங்களை எழுப்பினர். போலீஸார் தடுத்து நிறுத்தியும் நிற்காமல் ரோட்டில் ஓடிச் சென்று கறுப்புக்கொடி காட்டினர்.நடுரோட்டில் இறங்கி திட்டிய கவர்னர் ஆரிஃப் முகமது கான்

அப்போது காரை நிறுத்தச் சொன்ன கவர்னர் ஆரிஃப் முகமது கான் காரிலிருந்து வெளியே இறங்கி, ``ஃபூல்ஸ், கிரிமினல்ஸ், வாருங்கள்... தாக்க வருவதென்றால் வாருங்கள். நான் பயப்பட மாட்டேன். யார் இங்கிருக்கும் சீனியர் போலீஸ் ஆபீஸர்?" என நடுரோட்டில் ஆவேசமானார். பின்னர், விமான நிலையத்தில் செய்தியாளர்களிடம் பேசிய கவர்னர் ஆரிஃப் முகமது கான், "முதலமைச்சரின் வழிகாட்டுதல்படி என்மீது தாக்குதல் நடத்த முயல்கிறார்கள். தலைநகரம் குண்டர்களின் ராஜ்ஜியம் ஆகிவிட்டது. கிரிமினல்கள் எனது கார் கண்ணாடியில் வந்து இடித்தனர். எனக்குப் போதிய பாதுகாப்பு வழங்கவில்லை" என்றார் காட்டமாக.பினராயி விஜயன், ஆரிஃப் முகமது கான்

இதற்கிடையே கவர்னருக்கு எதிராகப் போராட்டத்தில் ஈடுபட்ட எஸ்.எஃப்.ஐ அமைப்பைச் சேர்ந்த 19 பேரை போலீஸார் கைதுசெய்தனர். அவர்களில் 11 பேர்மீது ஜாமீன் கிடைக்காத பிரிவில் வழக்கு பதிவுசெய்யப்பட்டிருக்கிறது.

இதற்கிடையே 'நவகேரள சதஸ்' என்ற பெயரில் பஸ்ஸில் யாத்திரை நடத்தும் முதல்வர் பினராயி விஜயனுக்கு எதிராகக் கறுப்புக்கொடி காட்டும் போராட்டத்தில் காங்கிரஸ் கட்சியினர் ஈடுபட்டுவருகின்றனர். நேற்று முன்தினம் முதல்வர் பினராயி விஜயன் பயணித்த பஸ்ஸை நோக்கி கறுப்பு ஷூவை வீசிய காங்கிரஸ் நிர்வாகிமீது கொலை முயற்சி வழக்கு பதிவுசெய்யப்பட்டது. எனவே கவனர் கார்மீது இடித்து கறுப்புக்கொடி காட்டிய எஸ்.எஃப்.ஐ நிர்வாகிகள் மீது கொலை முயற்சி வழக்கு தொடரப்படுமா என காங்கிரஸ் எதிர்க்கட்சித் தலைவர் வி.டி.சதீசன் கேள்வி எழுப்பியிருக்கிறார். ஆளுநர் Vs அரசு விவகாரத்தால் கேரளாவிலும் பரபரப்பான நிலையே தொடர்கிறது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்...
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...
https://bit.ly/46c3KEk">
https://bit.ly/46c3KEk />

http://dlvr.it/T02LfR

Read More

அவைக் குறிப்பில் இருந்து பெரியார் பெயர் நீக்கம்: மாநிலங்களவையில் `திமுக vs பாஜக’ | நடந்தது என்ன?

2019-ல் மத்திய பா.ஜ.க அரசு ஜம்மு காஷ்மீரின் அரசியலமைப்புச் சட்டப் பிரிவு 370-ஐ ரத்துசெய்தது. அதை எதிர்த்து, உச்ச நீதிமன்றத்தில் தாக்கல்செய்யப்பட்ட மனுக்களை, உச்ச நீதிமன்றத் தலைமை நீதிபதி சந்திரசூட் தலைமையிலான நீதிமன்ற அமர்வு விசாரித்த நிலையில்,``ஜம்மு காஷ்மீரின் சிறப்பு அந்தஸ்தை ரத்துசெய்தது செல்லும். 2024 செப்டம்பருக்குள் ஜம்மு காஷ்மீரில் தேர்தல் நடத்த வேண்டும்" எனத் தீர்ப்பளித்தது. இந்த தீர்ப்பு பா.ஜ.க-வினரால் வெகுவாக வரவேற்கப்பட்டது.

அதைத் தொடர்ந்து, நேற்று நடந்த நாடாளுமன்ற கூட்டத் தொடரில் மத்திய உள்துறை அமைச்சர் அமித்ஷா, ஜம்மு காஷ்மீரில் சட்டசபை இடங்களை அதிகரிப்பது, எஸ்.சி, எஸ்.டி பிரதிநிதித்துவம் உள்ளிட்ட திருத்தங்களுடன் ஜம்மு காஷ்மீர் மறுவரையறை 2019 திருத்த மசோதாவைத் தாக்கல் செய்தார்.அமித் ஷா

இந்த மசோதா மீதான விவாதத்தின் போது தி.மு.க சார்பில் பேசிய எம்.பி அப்துல்லா, ”​​நமது முன்னோர்கள் கொடுத்த வாக்குறுதிகளைக் காப்பாற்ற வேண்டும். ஜம்மு காஷ்மீர் மகாராஜா ஹரிசிங்குக்கு சர்தார் வல்லபாய் பட்டேல் போன்ற முன்னோர்கள் கொடுத்த வாக்குறுதிகளைக் காப்பாற்றி இருக்க வேண்டும். வல்லபாய் பட்டேலுக்கு பிரமாண்ட சிலை வைப்பதை விட அவரின் வாக்குறுதிகளைக் காப்பாற்றுவதுதான் மிகவும் முக்கியமானது. மேலும், ஒவ்வொரு இனமும் தங்களது தலைவிதியைத் தீர்மானித்துக் கொள்ள உரிமை உண்டு எனத் தந்தை பெரியார் குறிப்பிட்டுள்ளார். எனவே, 370-வது சட்டப்பிரிவை ரத்து செய்தது கூட்டாட்சித் தத்துவத்தின் மீதான தாக்குதல்” எனப் பேசினார்.

இதில் பெரியாரின் கருத்து ஏற்கமுடியாது என பா.ஜ.க தரப்பு நாடாளுமன்ற உறுப்பினர்கள் கூச்சலிட்டனர்.

இதற்கிடையே பேசிய மாநிலங்களவைத் தலைவர் ஜெகதீப் தன்கர், "370-வது சட்டப்பிரிவை ரத்து செய்தது கூட்டாட்சித் தத்துவத்தின் மீதான தாக்குதல் என வர்ணித்த தி.மு.க உறுப்பினரின் கருத்தை ஏற்க முடியாது. இனத்தின் அடிப்படையில் தீர்மானிப்பது, அரசியலமைப்பின் சாரத்திற்கு எதிரானது. நாடாளுமன்ற அவையில், கருத்துச் சுதந்திரம் எனும் உரிமையால் தேசத் துரோகக் கருத்தைக் கூட மேற்கோள் காட்ட முடியுமா என்ன? தி.மு.க உறுப்பினர் அப்துல்லாவின் கருத்து நமது அரசியலமைப்புச் சட்டத்திற்கு எதிரானது. உச்ச நீதிமன்றத்தின் தீர்ப்புக்கு எதிரானது. அதை ஏற்க முடியாது.திமுக எம்.பி அப்துல்லா

இந்தக் கருத்து பேச்சு சுதந்திரத்துக்குத் தகுதியற்றது. இது போன்ற பிரச்னையில் எதிர்க்கட்சி உறுப்பினர்கள் ஏன் அமைதியாக இருக்கிறார்கள்? நாம் அனைவரும் அரசியலமைப்பின் மீது சத்தியப்பிரமாணம் செய்துள்ளோம். இது பேச்சு சுதந்திரம் அல்ல. ஒரு உறுப்பினரின் இத்தகைய தவறான செயல்களை நாம் எவ்வாறு எதிர்கொள்வது? உறுப்பினர் பேசும் ஒவ்வொரு வார்த்தையையும் ஏற்றுக்கொள்ள முடியாது. நமது அரசியலமைப்புச் சட்டத்தில் நம்பிக்கை உள்ளவர்களால் இதை ஏற்க முடியாது. எனவே, அந்த பகுதிகளை நான் நீக்குகிறேன்" என்றார்.

அதைத் தொடர்ந்து, பெரியாரின் பெயருடன், அவருடைய கருத்துகளும் நாடாளுமன்ற அவைக் குறிப்பிலிருந்து நீக்கப்பட்டன.

அப்போது குறுக்கிட்ட தி.மு.க உறுப்பினர் அப்துல்லா, "நான் கூறமுனைந்ததை அவைக்குத் தவறாக முன்வைக்கப்பட்டிருக்கிறது. அவைத் தலைவர் எனது கருத்துகளைத் தவறாக புரிந்துகொண்டிருக்கிறார்" என விளக்கமளிக்க முன்வந்தார்.

அப்போது மத்திய நிதியமைச்சர் நிர்மலா சீதாராமன் எழுந்து, "தி.மு.க-வுடன் கூட்டணியில் இருக்கும் காங்கிரஸ், தி.மு.க உறுப்பினருடைய கருத்துடன் உடன்படுகிறீர்களா என்பதைக் காங்கிரஸ் கட்சி உறுப்பினர்கள் எழுந்து நின்று பதில் சொல்ல வேண்டும்" எனப் பேசினார்.ஜக்தீப் தன்கர்

இதற்கு மத்தியில் பேசிய தி.மு.க எம்.பி திருச்சி சிவா, "மத்தியில் இந்தியா கூட்டணி வெற்றி பெற்று ஆட்சி அமைத்தால் 370வது பிரிவை மீண்டும் அமல்படுத்தி ஜம்மு காஷ்மீருக்குச் சிறப்பு அந்தஸ்து வழங்குவோம். எம்.பி அப்துல்லா பேசியதிலும், பெரியாரின் கருத்திலும் என்ன தவறு இருக்கிறது? அது ஏன் அவைக்குறிப்பிலிருந்து நீக்க வேண்டும்" எனக் கண்டனம் தெரிவித்தார்.

இதற்கு நடுவே குறுக்கிட்ட அமித் ஷா, "திருச்சி சிவா தி.மு.க சார்பில் பேசுகிறாரா அல்லது இந்தியா கூட்டணி சார்பில் பேசுகிறாரா?" எனக் கேள்வி எழுப்பினார். மேலும், எம்.பி திருச்சி சிவாவின் கருத்துக்கு பா.ஜ.க தரப்பில் கடும் எதிர்ப்புகள் தெரிவிக்கப்பட்டது. இதனால், அவையில் சிறிது நேரம் கூச்சல் குழப்பம் ஏற்பட்டது.

அதைத் தொடர்ந்து பேசிய எதிர்க்கட்சித் தலைவர் மல்லிகார்ஜுன் கார்கே, "அவை உறுப்பினர் ஒருவரின் கருத்து சபையின் அலுவல் விதிகளுடன் ஒத்துப்போகவில்லை என்றால், அவைத் தலைவர் அந்தக் கருத்துக்களை நீக்கலாம். இது அரசியலமைப்பிற்கு விரோதமானது என்று சொல்வதால் மட்டும் அதை ஏற்றுக்கொள்ள முடியாது" எனத் தெரிவித்தார்.

காங்கிரஸ் கட்சியின் மூத்த தலைவர் கே.சி.வேணுகோபால், "தி.மு.க உறுப்பினர் மேற்கோள் காட்டி, பேசிய பெரியார் கூறிய கருத்து எந்தச் சூழலில் தெரிவிக்கப்பட்டது என்பதை ஆய்வு செய்து சரிபார்க்குமாறு அவைத் தலைவரைக் கேட்டுக்கொள்கிறேன்" என்றார்.அமித் ஷா - மல்லிகார்ஜுன கார்கே

இதற்கிடையில் மத்திய உள்துறை அமைச்சர் அமித் ஷா, எதிர்க்கட்சி தலைவரிடம், "எனக்கு ஒரு கேள்வி இருக்கிறது. தி.மு.க உறுப்பினர் கூறியதைக் காங்கிரஸ் ஆதரிக்கிறதா... அப்துல்லாவின் இந்த அறிக்கையை நீங்கள் ஆதரிக்கிறீர்களா?" எனக் கேள்வி எழுப்பினார்.

அதற்குப் பதிலளித்த எதிர்க்கட்சி தலைவர் மல்லிகார்ஜுன கார்கே, "அப்துல்லா பெரியாரை மேற்கோள் காட்டியிருக்கிறார். அதை ஆதரிப்பதா அல்லது எதிர்ப்பதா என்பது விவாதத்திற்குரிய விஷயமாக இருக்கலாம், ஆனால் ஒருவரை நாடாளுமன்றத்தில் பேசவிடாமல் தடுப்பது ஜனநாயக விரோதமானது" எனத் தெரிவித்தார்.

சி.பி.ஐ எம்.பி சந்தோஷ் குமார், காஷ்மீர் சிறப்பு அந்தஸ்து நீக்கம் பிரிவு 370 மசோதாவை எதிர்த்து, "இந்த விவகாரத்தில் உண்மை மற்றும் நல்லிணக்க ஆணையத்தை அமைக்க வேண்டும்" எனத் தெரிவித்தார்.

இந்த விவாதத்துக்குப் பிறகு, தி.மு.க தலைவரும், தமிழ்நாட்டின் முதல்வருமான மு.க ஸ்டாலின் தனது எக்ஸ் ட்விட்டர் பக்கத்தில்,"மாநிலங்களவையில் தி.மு.க எம்.பி அப்துல்லா உரையாற்றும்போது சுட்டிக்காட்டிய தந்தை பெரியாரின் மேற்கோளுக்கு பா.ஜ.க.வினர் எதிர்ப்பு தெரிவித்துள்ளனர். பெரியாரின் பெயரும் அவைக்குறிப்பிலிருந்து நீக்கப்பட்டுள்ளது. நாடாளுமன்றத்திலேயே கருத்துரிமையின் கழுத்து நெரிக்கப்பட்டுள்ளது!முதல்வர் ஸ்டாலின்

மண்டல் ஆணையப் பரிந்துரையை அமல்படுத்தியபோது தந்தை பெரியார்தான் இதற்குக் காரணம் என்று பிரதமர் வி.பி.சிங் பேசிய நாடாளுமன்றத்தில் தந்தை பெரியார் பெயர் நீக்கப்பட்டுள்ளது அவமானம்! மக்களின் மனங்களில் நிலைத்து நின்று, வகுப்பு வாதிகளை இன்றளவும் அச்சுறுத்தும் தந்தை பெரியாரின் பெயரை எங்கும் - எப்போதும் - எந்தச் சூழலிலும் பயன்படுத்துவோம்! அனைவரும் பயன்படுத்துங்கள்!" எனப் பதிவிட்டிருக்கிறார்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்...
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...
https://bit.ly/46c3KEk">
https://bit.ly/46c3KEk />
`தந்தை பெரியார் தனி மனிதர் அல்லர்; பெரிய இயக்கம்!' - டி.டி.வி.தினகரன்


http://dlvr.it/T01bsl

Read More