நெல்லை மேயருக்கு எதிராக நம்பிக்கையில்லா தீர்மானம் - கவுன்சிலர்கள் சுற்றுலா! - என்னதான் நடக்கிறது?

மொத்தம் 55 வார்டுகள் உள்ள நெல்லை மாநகராட்சியில் தி.மு.க மற்றும் கூட்டணிக் கட்சிகளின் சார்பாக 51 கவுன்சிலர்கள் உள்ளனர். அ.தி.மு.க-வுக்கு நான்கு கவுன்சிலர்களே உள்ளனர். மாநகராட்சியில் அசுர பலத்துடன் இருக்கும் தி.மு.க-வின் சார்பாக பி.எம்.சரவணன் மேயராக தேர்வு செய்யப்பட்டார். தனக்கு வேண்டப்பட்டவர் என்கிற ஒரே காரணத்துக்காக அவருக்கு மேயர் பொறுப்பு கிடைக்க அப்போது மாவட்டச் செயலாளராக இருந்த அப்துல் வஹாப் ஏற்பாடு செய்தார். மேயர் சரவணன்

கட்சிக்காக உழைத்தவர்கள், மூத்த கவுன்சிலர்களுக்கு வாய்ப்பு கொடுக்கப்படாதது அப்போதே கட்சிக்குள் விமர்சனத்தை ஏற்படுத்தியது. ஆனால் மேயர் சரவணன், தனக்கு வாய்ப்பு கிடைக்க காரணமாக இருந்த அப்துல் வாஹாபுக்கு எதிராக ஓரிரு மாதங்களிலேயே முரண்பட்டார். அத்துடன், தனது வீட்டுப் பத்திரத்தை மிரட்டி வாங்கி வைத்துக் கொண்டதாக கட்சித் தலைமையிடம் புகார் அளித்ததால், பரபரப்பு ஏற்பட்டது.

அப்துல் வஹாபுக்கு எதிரான நிலைப்பாட்டை மேயர் சரவணன் எடுத்ததால், ஆளுங்கட்சி கவுன்சிலர்கள் பலரும் அவருக்கு எதிரான மனநிலைக்குச் சென்றனர். மாநகராட்சிக் கூட்டங்களில் ஆளுங்கட்சி கவுன்சிலர்களே வெளிப்படையாக மேயரை குற்றம்சாட்டினார்கள். அத்துடன் மேயர் கொண்டுவரும் தீர்மானங்களை ஏற்க மறுத்து முரண்டு பிடித்தனர். மேலும் மேயரை மாற்ற வேண்டும் என்கிற கோரிக்கையுடன் உள்ளாட்சித்துறை அமைச்சர் கே.என்.நேருவிடமும் கட்சித் தலைமையிடமும் பலமுறை முறையிட்டனர். ஆனால் கவுன்சிலர்களை கட்சித் தலைமை சமாதானப்படுத்தி அனுப்பிவைத்தது. சரவணன் மற்றும் அப்துல் வஹாப்

மேயருக்கும் ஆளுங்கட்சி கவுன்சிலர்களுக்கும் எதிரான மோதல் முடிவுக்கு வராத நிலையில், மாவட்டச் செயலாளராக இருந்த அப்துல் வாஹாப் மாற்றப்பட்டு அவருக்குப் பதிலாக முன்னாள் அமைச்சரான டி.பி.எம்.மைதீன்கான் நியமிக்கப்பட்டார். அதன் பின்னரும் பிரச்னை முடிவுக்கு வரவில்லை. ஆளுங்கட்சி கவுன்சிலர்கள் திருச்சிக்கும் சென்னைக்கும் சென்று அமைச்சர் நேருவிடமும் கட்சித் தலைமையிடமும் புகார் தெரிவித்தனர். அதில் பலன் கிடைக்காததால் மாநகராட்சி முன்பாக போராட்டத்தில் ஈடுபட்டனர். அதனால் இரு கவுன்சிலர்கள் மற்றும் ஒரு பெண் கவுன்சிலரின் கணவர் ஆகியோர் கட்சியில் இருந்து நீக்கப்பட்டனர்.

மாநகராட்சி டெண்டர்களில் கிடைக்கும் கமிஷன் பணத்தை முழுமையாக மேயர் சரவணன் எடுத்துக் கொள்வதே கவுன்சிலர்களுடனான மோதலுக்குக் காரணம் என பொதுமக்களே பேசிக் கொண்டனர். நெல்லை மாநகராட்சியின் அடிப்படை பிரச்னைகளைத் தீர்க்க எந்த நடவடிக்கையும் எடுக்கப்படாமல் தங்களுடைய கமிஷன் விவகாரத்துக்காக மேயரும் கவுன்சிலர்களும் மோதிக்கொண்ட சம்பவத்தால், பொதுமக்கள் மட்டுமல்லாமல் கட்சி நிர்வாகிகளும் மாநகராட்சி மீது அதிருப்தியடைந்தனர். மேயருக்கு எதிராக கவுன்சிலர்கள்

இந்த நிலையில், மாநகராட்சி ஆணையரை மாற்றினால் பிரச்னை முடிவுக்கு வரும் எனக் கருதி, அதற்கான ஏற்பாடுகள் நடந்தன. ஆனால் புதிய ஆணையர் வந்த பின்னரும் மாநகராட்சி நிர்வாகத்தின் செயல்பாட்டில் எந்த முன்னேற்றமும் ஏற்படவில்லை. மாநகராட்சி முழுமையாக முடங்கும் அளவுக்கு மேயருக்கும் கவுன்சிலர்களுக்குமான மோதல் வெளிப்படையாக நடைபெற்றது. இந்த நிலையில், மேயர் சரவணனுக்கு எதிராக நம்பிக்கையில்லா தீர்மானம் கொண்டு வருவதாக கடந்த மாதம் 38 கவுன்சிலர்கள் கையெழுத்திட்டு ஆணையரிடம் மனு அளித்தனர்.

கவுன்சிலர்களின் கையெழுத்து உண்மையானது தானா என ஒவ்வொரு கவுன்சிலரையும் தனித்தனியாக அழைத்து ஆணையர் தாக்கரே சுபம் ஞானதேவ்ராவ் விசாரணை நடத்தினார். அதில் ஒவ்வொரு கவுன்சிலரும் தாங்கள் கையெழுத்திட்டது உண்மை என உறுதியளித்தனர். அதைத் தொடர்ந்து ஜனவரி 12-ம் தேதி நம்பிக்கையில்லா தீர்மானத்தின் மீது விவாதமும் வாக்கெடுப்பும் நடத்தப்படும் என அறிவித்தார். அதனால் அடுத்து என்ன நடக்குமோ என்கிற எதிர்பார்ப்பு நிலவுகிறது. நம்பிக்கையில்லா தீர்மானம் கொண்டுவரப்படும் மாநகராட்சி

இந்த நிலையில், மேயருக்கு எதிரான நம்பிக்கையில்லா தீர்மானம் வெற்றி பெற்றால், ஆளுங்கட்சிக்கு அவப்பெயரை ஏற்படுத்தும் என தி.மு.க தலைமை கருதுகிறது. இந்த விவகாரம் நாடாளுமன்றத் தேர்தலில் எதிரொலிக்கும் என்பதோடு, தமிழகம் முழுவதும் பல்வேறு மாநகராட்சி, நகராட்சி மற்றும் பேரூராட்சிகளில் இதே போன்ற பிரச்னை நிலவுவதால், அடுத்தடுத்து நம்பிக்கையில்லா தீர்மானங்கள் கொண்டுவரப்படும் என்கிற அச்சம் எழுந்துள்ளது.

நெல்லை மாநகராட்சியில் நம்பிக்கையில்லா தீர்மானம் கொண்டுவரப்படாமல் தடுக்க மாவட்டத்தின் பொறுப்பு அமைச்சரான தங்கம் தென்னரசு அனுப்பிவைக்கப்பட்டார். அவர் பேச்சுவார்த்தை நடத்திய பின்னரும், மேயரை மாற்ற வேண்டும் என்கிற தங்களின் கோரிக்கையில் கவுன்சிலர்கள் பிடிவாதமாக இருந்தனர். மாவட்ட பொறுப்பாளரான டி.பி.எம்.மைதீன்கான் பேச்சையும் கவுன்சிலர்கள் கேட்கவில்லை. அதனால் முன்னாள் மாவட்டச் செயலாளரும் எம்.எல்.ஏ-வுமான அப்துல் வஹாப் மற்றும் மாலைராஜா ஆகியோர் இதில் தலையிட்டு சமரச முடிவைக் கொண்டுவர கட்சித் தலைமை உத்தரவிட்டது.டி.பி.எம்.மைதீன்கான்

அப்துல் வஹாப் தரப்பில் 40-க்கும் அதிகமான கவுன்சிலர்கள் இருப்பதாகத் தெரிகிறது. அவர்கள் இரு குழுக்களாக குற்றாலம், கேரளாவின் பூவாறு என சுற்றுலா சென்றுள்ளனர். அத்துடன் கவுன்சிலர்களுக்கு பணம் வழங்கப்படுவதாகவும் தகவல் வெளியாகியுள்ளது. ஆனாலும் நம்பிக்கையில்லாத் தீர்மானம் குறித்த கூட்டம் ரத்து செய்யப்பட வேண்டும் என கட்சித் தலைமை விரும்புகிறது. அதற்காக அப்துல் வஹாப் உள்ளிட்ட கட்சியின் நிர்வாகிகளுடன் அமைச்சர் தங்கம் தென்னரசு தொடர்ந்து பேசிவருகிறார்.

இது குறித்து ஆளுங்கட்சி கவுன்சிலர்கள் சிலரிடம் பேசியபோது, “நெல்லை மாநகராட்சி முடங்கிப் போனதற்கு மேயர் சரவணன் மட்டுமே காரணம். எந்த வேலை நடந்தாலும் அதில் தனக்கு எவ்வளவு கமிஷன் கிடைக்கும் என கணக்குப் போடுகிறாரே தவிர மக்கள் நலனில் துளியும் அக்கறை காட்டவில்லை. அதனால் வார்டு மக்களின் ஏச்சுக்கும் பேச்சுக்கும் ஆளாக வேண்டிய சூழல் எங்களுக்கு ஏற்பட்டுள்ளது. அவரை மாற்றினால் மட்டுமே மக்களிடம் கட்சிக்கு நல்ல பெயர் ஏற்படும்.தி.மு.க கவுன்சிலர்கள்38 கவுன்சிலர்கள் நம்பிக்கையில்லா தீர்மானம் கொண்டுவந்தபோதே மேயர் பொறுப்பில் இருந்து விலகியிருக்க வேண்டும்

அதன் காரணமாகவே நம்பிக்கையில்லா தீர்மானம் கொண்டுவந்துள்ளோம். கட்சித் தலைமை சார்பாக பேசியவர்கள், எங்களின் கோரிக்கையை ஓரிரு மாதங்களில் பரிசீலிப்பதாக சொல்லியிருக்கிறார்கள். 55 கவுன்சிலர்களில் 38 பேர் மேயருக்கு எதிராக கையெழுத்திட்டுள்ளோம். மேயர் சரவணன் நியாயமானவராக இருந்தால் அப்போதே தனது பொறுப்பில் இருந்து ராஜினாமா செய்திருக்க வேண்டாமா? இருந்தாலும் கட்சியின் முடிவுக்குக் கட்டுப்படுவோம்” என்றார்கள்.

நம்பிக்கை வாக்கெடுப்புக்கான கூட்டம் நடக்க வேண்டுமானால் 80 சதவிகிதம் கவுன்சிலர்கள் கூட்ட அரங்கில் இருக்க வேண்டும். அதன்படி 44 கவுன்சிலர்கள் பங்கேற்றால் மட்டுமே கூட்டம் நடைபெறும். ஆனால் கட்சித் தலைமையின் வேண்டுகோளை ஏற்று பெரும்பான்மையான தி.மு.க கவுன்சிலர்கள் கூட்டத்தில் பங்கேற்க மாட்டார்கள் எனத் தெரிகிறது. அதனால் தற்போதைக்கு நெல்லை மாநகராட்சி மேயர் சரவணனின் பதவிக்கு ஆபத்து ஏற்படும் வாய்ப்பு இல்லை என்கிறார்கள், கட்சியின் மூத்த நிர்வாகிகள். நெல்லை: "மேயர் மீது நம்பிக்கையில்லாத் தீர்மானம் நிறைவேற்ற வேண்டும்!" - திமுக கவுன்சிலர்கள் மனு


http://dlvr.it/T1FjhW

Read More

பில்கிஸ் பானு வழக்கு: குற்றவாளிகளை மீண்டும் சிறைக்கு அனுப்பிய நீதிபதி பி.வி.நாகரத்னா... யார் இவர்?!

குஜராத் கலவரத்தின்போது பில்கிஸ் பானு கூட்டுப் பாலியல் வன்கொடுமை செய்யப்பட்ட வழக்கில் ஆயுள் தண்டனை அனுபவித்து வந்த குற்றவாளிகள் 11 பேரையும், கடந்த ஆண்டு மாநில அரசு விடுதலை செய்து உத்தரவிட்டது. அந்த உத்தரவை எதிர்த்து பில்கிஸ் பானு தாக்கல் செய்த மனுவை சுப்ரீம் கோர்ட் விசாரித்து வந்தது. இதில் கடந்த வாரம் தீர்ப்பு கூறிய உச்ச நீதிமன்றம், குற்றவாளிகள் விடுவிக்கப்பட்டதை கடுமையாக விமர்சனம் செய்தது. குற்றவாளிகள் சரணடைய கோர்ட் உத்தரவிட்டது. `பில்கிஸ் பானு வழக்கு மும்பை கோர்ட்டில் நடந்தது என்பதால் அந்த மாநில அரசுதான் குற்றவாளிகளை விடுதலை செய்வது குறித்து முடிவு செய்ய வேண்டும்’ என்று கோர்ட் தெரிவித்தது. பெரும் பரபரப்பை ஏற்படுத்திய இத்தீர்ப்பை வழங்கியவர் நீதிபதி பி.வி.நாகரத்னா தலைமையிலான அமர்வு.`கருவை பாதிக்கும் பிளாஸ்டிக்': ஒரு லிட்டர் பாட்டில் தண்ணீரில் 2,40,000 பிளாஸ்டிக் துகள்கள் - ஆய்வு!

நீதிபதி நாகரத்னா இதற்கு முன்பு பல முக்கியத்துவம் வாய்ந்த தீர்ப்புகளை வழங்கி இருக்கிறார். கர்நாடக மாநிலத்தைச் சேர்ந்த நாகரத்னா 2027-ம் ஆண்டு சுப்ரீம் கோர்ட் தலைமை நீதிபதியாக பதவியேற்க இருக்கிறார். ஆனால், அவர் பதவியேற்ற ஒரு மாதத்தில் ஓய்வு பெற்றுவிடுவார். நாகரத்னா சுப்ரீம் கோர்ட் நீதிபதியாக இருந்தும், கர்நாடக உயர் நீதிமன்ற நீதிபதியாக இருந்தும் பல முக்கியத் தீர்ப்புகளை வழங்கி இருக்கிறார்.

நாகரத்னாவின் தந்தை வெங்கடராமையா, கர்நாடகாவில் இருந்து சுப்ரீம் கோர்ட் தலைமை நீதிபதியாகப் பதவியேற்ற முதல் நீதிபதி என்ற பெருமைக்குச் சொந்தக்காரர். 1962-ம் ஆண்டு அக்டோபர் 30-ம் தேதி பிறந்த நீதிபதி நாகரத்னா தன் பள்ளி மற்றும் கல்லூரிப் படிப்பை டெல்லியில் முடித்தார். 1987-ம் ஆண்டு கர்நாடகா பார் கவுன்சிலில் தன்னை வழக்கறிஞராகப் பதிவு செய்துகொண்ட நாகரத்னா, வழக்கறிஞராகப் பணியைத் தொடங்கினார்.

2008-ம் ஆண்டு கர்நாடக உயர் நீதிமன்றத்தின் கூடுதல் நீதிபதியாக நாகரத்னா நியமிக்கப்பட்டார். 2010-ம் ஆண்டு நிரந்தர நீதிபதியானார். 2021-ம் ஆண்டு சுப்ரீம் கோர்ட் நீதிபதியாக நியமிக்கப்பட்டார். கர்நாடக உயர் நீதிமன்றத்தில் நீதிபதியாக இருந்தபோது, 2012-ம் ஆண்டு எலெக்ட்ரானிக் மீடியாவை ஒழுங்குபடுத்த வேண்டும் என்று குறிப்பிட்டிருந்தார். தீர்ப்பு `இஸ்லாமிய பெண் மறுமணம் செய்தாலும், முதல் கணவரிடம் மெஹர் பெற உரிமை உண்டு' - மும்பை உயர்நீதிமன்றம்!

நாகரத்னா 2019-ம் ஆண்டு அளித்த தீர்ப்பில் கோயில்கள் வர்த்தக நிறுவனம் கிடையாது என்றும், அங்கு பணிபுரிபவர்களுக்குக் கருணைத் தொகையான கிராஜுவிட்டி கொடுக்க முடியாது என்றும் குறிப்பிட்டிருந்தார். அதோடு சுப்ரீம் கோர்ட்டில் பணமதிப்பிழப்பு வழக்கு விசாரணையில் தீர்ப்பு கூறப்பட்டபோது, அதில் மற்ற நீதிபதிகளில் இருந்து நாகரத்னா மாறுபட்ட தீர்ப்பையே வழங்கினார். தன் தீர்ப்பில், பணமதிப்பிழப்பு நல்ல நோக்கத்தில் கொண்டு வரப்பட்டதுதான் என்றாலும் சட்டதந்துக்கு எதிரானது என்றும், வெறும் ஓர் உத்தரவு மூலம் இதைச் செயல்படுத்தக் கூடாது என்றும், பாராளு மன்றத்தின் மூலம் கொண்டு வந்திருக்க வேண்டும் என்றும் குறிப்பிட்டிருந்தார்.


http://dlvr.it/T1FKJT

Read More

பாமக சாயப்போகும் கூட்டணி எது? - அன்புமணி அரசியலும் அறிகுறிகளும்!

தமிழ்நாட்டை ஆண்ட அ.தி.மு.க., ஆளும் தி.மு.க-வை பா.ம.க நிறுவனர் ராமதாஸ், தலைவர் அன்புமணியைவிட வேறு யாரும் இந்த அளவுக்கு விமர்சனம் செய்திருக்க மாட்டார்கள். அதேநேரத்தில், அந்த இரண்டு கட்சிகளுடன் கூட்டணியும் அமைத்து, பலனும் அடைந்திருக்கிறது பா.ம.க.அன்புமணி ராமதாஸ் ஸ்டாலின் எடப்பாடி பழனிசாமி

2021 சட்டமன்றத் தேர்தலில் அ.தி.மு.க-வுடன் கூட்டணி அமைத்து 23 இடங்களில் போட்டியிட்ட பா.ம.க., ஐந்து இடங்களில் வெற்றிபெற்றது. இதையடுத்து நடந்த ஊரக, நகர்ப்புற உள்ளாட்சித் தேர்தலில் தனித்து நின்றது. தற்போது அ.தி.மு.க - பா.ஜ.க கூட்டணி முறிந்த நிலையில், 'தேசிய அளவில் பா.ஜ.க-வுடன் கூட்டணி... தமிழ்நாட்டில் யாருடனும் கூட்டணி இல்லை' என்று புது விளக்கம் கொடுத்து அரசியல் செய்கிறது பா.ம.க. ஆனால், பா.ம.க கூட்டணியில் இருப்பதாகவோ, இல்லை என்றோ பா.ஜ.க இதுவரை அறிவிக்கவில்லை. தேர்தலுக்கு முன்னர் வரையில் ஒரு முடிவிலிருக்கும் பா.ம.க., தேர்தல் நெருங்கும்போது தனது நிலைப்பாட்டை மாற்றிக்கொண்ட வரலாறு இருக்கிறது. அப்படி நாடாளுமன்றத் தேர்தல் நெருங்கும் நிலையில், பா.ம.க யார் பக்கம் சாயப்போகிறது என்ற எதிர்பார்ப்பு எழுந்திருக்கிறது.

இது குறித்து அந்தக் கட்சியின் சீனியர் நிர்வாகிகளுடன் பேசினோம். ``கட்சி நிர்வாகம், தேர்தல், கூட்டணி என எல்லா முடிவுகளையும் ஐயா ராமதாஸ்தான் எடுப்பது வழக்கம். தற்போது அன்புமணியும் சில முடிவுகளை எடுக்கிறார். 2011 சட்டமன்றத் தேர்தலுக்கு பிறகு 2021-ல்தான் பா.ம.க பிரதிநிதிகள் சட்டமன்றத்துக்குள் நுழைந்திருக்கிறோம். இதற்கும், அன்புமணி ராஜ்ய சபா எம்.பி-யாக இருப்பதற்கும் காரணம் அ.தி.மு.க-தான். நாடாளுமன்றத் தேர்தலில் பா.ம.க-வின் உச்சபட்ச வாக்கு (22,97,431) எண்ணிக்கையைப் பெற்றுத் தந்தது அதிமுக கூட்டணிதான். எனவே, அ.தி.மு.க கூட்டணியிலேயே தேர்தலைச் சந்திக்கலாம் என்பது ஒரு தரப்பின் கருத்தாக இருக்கிறது.ராமதாஸ் - அன்புமணி

'பா.ம.க வலுவிழக்கக் காரணமாக இருப்பது பா.ஜ.க-தான். நமது கட்சி நிர்வாகிகளை அவர்கள் பக்கம் இழுக்கிறார்கள்' என ராமதாஸ் அவர்களே பகிரங்கமாகக் குற்றச்சாட்டை முன்வைத்திருக்கிறார். இதனால், பா.ஜ.க-வுடன் செல்ல பலருக்கும் விருப்பம் இல்லை. ஆனால், பா.ம.க-வுக்கு தேசிய அளவில் அங்கீகாரம் கொடுத்து ஏ.கே.மூர்த்தி, பொன்னுசாமி, என்.டி.சண்முகம் ஆகியோரை மத்திய அமைச்சரவையில் அமரவைத்தது பா.ஜ.க-தான். எனவே, வரும் தேர்தலில் பா.ஜ.க-வுடன் போட்டியிட்டால், வெற்றி பெறாவிட்டாலும், ராஜ்ய சபா எம்.பி மூலமாக மத்திய அமைச்சரவையில் இடம்பெற்றுவிடலாம் என்பது இன்னோரு தரப்பின் கருத்தாக இருக்கிறது.

அதேநேரத்தில், தி.மு.க-வுடன் கூட்டணியில் இணைந்தால், எம்.பி ஆவது உறுதி. இதுதான் கட்சியின் தற்போதைய நிலைமையைச் சரிசெய்ய உதவும் என்றும் தலைமை நினைக்கிறது. இவற்றை மனதில் வைத்துத்தான் ஆளும் தி.மு.க அரசையும், மத்திய பா.ஜ.க அரசையும் வலுவாக எதிர்க்காமல், பெயரளவில் விமர்சனம் செய்து தலைமை கடந்துபோகிறது.அன்புமணி - மோடி

அ.தி.மு.க அல்லது பா.ஜ.க-வுடன் இணைந்தால் அதிக அளவில் சீட் கிடைக்க வாய்ப்பு இருக்கிறது. தி.மு.க-வுடன் இணைந்தால் சீட் குறைவாக இருந்தாலும் வெற்றி வாய்ப்பு இருக்கிறது. தற்போது யாருடன் கூட்டணிக்குச் செல்லலாம் என்ற குழப்ப மனநிலையில் பா.ம.க-வும் இருக்கிறது" என்றனர் விரிவாக.

மறுபக்கம் பா.ம.க-வைச் சேர்த்துக்கொண்டால், தற்போதைய கூட்டணி சிதைய வாய்ப்பு இருப்பதாக தி.மு.க தலைமை கருதுவதாலேயே பாமக குறித்துப் பேசுவதைத் தவிர்த்துவருகிறது. ஆனால், பா.ம.க-வைத் தங்கள் கூட்டணிக்குள் கொண்டுவர அ.தி.மு.க கடுமையாக முயற்சி செய்கிறது. திரை மறைவில் பேச்சுவார்த்தையும் நடத்துகிறது.

இது தொடர்பாக அ.தி.மு.க அமைப்புச் செயலாளர் ஒருவரிடம் பேசும்போது, "அம்மா மறைவுக்குப் பிறகு டி.டி.வி.தினகரன் 18 எம்.எல்.ஏ-க்களை இழுத்துச் சென்றதால், எடப்பாடி தலைமையிலான அதிமுக ஆட்சிக்குச் சிக்கல் ஏற்பட்டது. அப்போது நடைபெற்ற இடைத்தேர்தலில் பா.ம.க-வுடன் கூட்டணி சேர்ந்ததால்தான், வெற்றிபெற்று ஆட்சியைத் தக்கவைக்க முடிந்தது.

பா.ம.க-வைக் கூட்டணிக்குள் கொண்டுவந்தால், அது தென்மாவட்டங்களில் பாதிப்பை ஏற்படுத்தும் என்று தென்மாவட்ட நிர்வாகிகள் மறுப்பு தெரிவிக்கிறார்கள். ஆனால், வடக்கு மற்றும் கொங்கு மண்டலத்தின் ஒரு பகுதியில் பா.ம.க-வுக்கு செல்வாக்கு இருப்பதால்தான், தனிப்பட்ட முறையில் பா.ம.க-வை மீண்டும் கூட்டணிக்குள் கொண்டுவர தீவிரமாக முயல்கிறார் எடப்பாடி. பெரியவர் கிரீன் சிக்னல் போட்டால், சின்னவர் ரெட் சிக்னல் போடுகிறார்.ராமதாஸ், எடப்பாடி பழனிசாமி

தற்போதைய நிலைமையில் பா.ம.க., அ.தி.மு.க கூட்டணிக்குள் வந்தால் ஒரு வகையில் லாபம் இருப்பதுபோல, தி.மு.க கூட்டணிக்குச் சென்றால் இன்னோரு வழியாக லாபம் இருக்கிறது. அதாவது, பா.ம.க., தி.மு.க பக்கம் சென்றால், அங்கிருக்கும் வி.சி.க நிச்சயமாக வெளியே வரும். அவர்களை எங்கள் கூட்டணிக்குள் இணைக்க ஒரு வாய்ப்பு கிடைக்கும்" என்றார் பெருமூச்சுடன்.

தேர்தல் நெருங்க நெருங்க அடுத்தகட்ட நகர்வுகள் தெரியவரும்!

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்...
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...
https://bit.ly/46c3KEk">
https://bit.ly/46c3KEk />

http://dlvr.it/T1FK2m

Read More

Passport: பவர்ஃபுல் பாஸ்போர்ட்ஸ்; முதலிடத்தில் சிங்கப்பூர்... லிஸ்ட்டில் இந்தியாவின் நிலை என்ன?!

உலகின் மிகவும் சக்திவாய்ந்த பாஸ்போர்ட்டுகள் குறித்து, சர்வதேச விமான போக்குவரத்து சங்கத்தின் (IATA) தரவுகளின் அடிப்படையில், தரவரிசை வெளியிடப்பட்டிருக்கிறது. ஹென்ஸி பாஸ்போர்ட் குறியீட்டின் அடிப்படையில்... அதாவது, விசா இல்லாமல், பாஸ்போர்ட் மூலம் மட்டுமே உலகின் பெரும்பாலான நாடுகளுக்கு பயணிக்க அனுமதிக்கும் நாடுகளின் பாஸ்போர்ட்டுகள் `சக்திவாய்ந்த பாஸ்போர்டுகள்' எனக் கருதப்படுகிறது. இந்த தரவரிசைப் பட்டியலில், 194 நாடுகள் இடம்பெற்றிருக்கின்றன.இந்தியா - மோடி

அதன்படி ஜப்பான், சிங்கப்பூர் ஆகிய நாடுகளின் பாஸ்போர்ட்டுகளை வைத்திருப்பவர்கள், உலக அளவில் 194 நாடுகளுக்குள் விசா இல்லாமல் நுழைய முடியும். அதனால், கடந்த ஐந்தாண்டுகளாக இந்த இரண்டு நாடுகளும் தொடர்ந்து முதலிடத்தில் ஆதிக்கம் செலுத்தி வருகின்றன. பின்லாந்து, ஸ்வீடன், தென் கொரியா ஆகிய நாடுகளின் பாஸ்போர்ட்டுகள் வைத்திருப்பவர்களால், 193 நாடுகளில் விசா இல்லாமல் நுழையமுடியும் என்பதால், அந்த நாடுகள் இரண்டாவது இடத்திலும், 192 நாடுகளுக்கு விசா இல்லாமல் பயணிக்க தகுதிவாய்ந்தவையாகக் கருதப்படும் ஆஸ்திரியா, டென்மார்க், அயர்லாந்து, நெதர்லாந்து ஆகிய நாடுகள் மூன்றாவது இடத்தையும் பிடித்துள்ளன.

இந்த தரவரிசையில் இந்தியா 80-வது இடத்தைப் பிடித்திருக்கிறது. இந்தியாவின் பாஸ்போர்ட் மூலம், 62 நாடுகளுக்கு விசா இல்லாமல் பயணிக்க முடியும். அதில் இந்தோனேசியா, மலேசியா, தாய்லாந்து உள்ளிட்ட பிரபல சுற்றுலா நாடுகளும் அடங்கும். இந்தியாவின் அண்டை நாடான பாகிஸ்தான், இந்த தரவரிசையில் 101-வது இடத்தில் இருக்கிறது.``இந்தியா கூட்டணி மத நம்பிக்கைகளை புண்படுத்துகிறது..!" - திருச்சூரில் பிரதமர் மோடி


http://dlvr.it/T1FJfF

Read More

அயோத்தி கோயில்: `மதம் ஒவ்வொருவரின் தனிப்பட்ட விஷயம், அதனால்..' - விழா குறித்த காங்கிரஸின் முடிவென்ன?

உத்தரப்பிரதேச மாநிலம், அயோத்தியில் ராமர் கோயில் கட்டுமானப் பணிகள் முழு வீச்சில் நடைபெற்று வருகின்றன. இந்த மாதம், 22-ம் தேதி மதியம் 12:45 மணிக்குள் ராமர் கோயிலின் கருவறையில் குழந்தை ராமர் சிலையைப் பிரதிஷ்டை செய்வதற்கான பணிகளை, ஸ்ரீ ராம ஜென்ம பூமி ஷேத்ரா அறக்கட்டளை மேற்கொண்டுவருகிறது. இதற்கான பூஜைகள் 16-ம் தேதி தொடங்குகின்றன.

1990-களில் அயோத்தி ராமர் கோயிலை முன்வைத்தே பா.ஜ.க தேர்தல் பிரசாரங்களை நடத்தியது. பா.ஜ.க-வின் முக்கிய வாக்குறுதிகளில் ஒன்றான அயோத்தி ராமர் கோயில் விவகாரம் பா.ஜ.க-வின் அரசியல் வளர்ச்சிக்கு முக்கியத் தூணாகவே இருந்தது.பிரதமர் மோடி

ராம் மந்திர் அறக்கட்டளை செயலர் சம்பத் ராய் தனியார் செய்தி நிறுவனத்துக்கு அளித்தப் பேட்டியில், "ராமர் கோயிலின் கருவறை தயாராக இருக்கிறது. குழந்தை ராமர் சிலையும் தயாராக இருக்கிறது. ஆனால் கோயில் முழுவதும் இன்னும் முழுமையாக கட்டுமானப் பணிகள் முடியவில்லை. இந்த முழுப்பணியும் முடிய இன்னும் இரண்டு ஆண்டுகள் ஆகலாம். இன்னும் கோயிலில் நிறைய வேலைகள் உள்ளன. எனவே, ஏராளமான மக்கள் இன்னும் கட்டுமானப் பணி முழுமைப்பெறாத கோயிலுக்கு வந்தால் நகரத்தில் கூட்ட நெரிசல் ஏற்படும்" எனத் தெரிவித்திருந்ததும், அரசியல் வட்டாரங்களில் பேசப்பட்டது.

இதற்கிடையில், கடந்த ஒன்பது ஆண்டுகளாக ஆட்சியில் இருந்த பா.ஜ.க அரசு மூன்றாவது முறையாக ஆட்சியமைக்க நாடாளுமன்றத் தேர்தலை முன்னிட்டு, ராமர் கோயில் திறப்பு விழாவை நடத்துவதாக எதிர்க்கட்சிகள் குற்றம்சாட்டிவருகின்றன.ராமர் கோயில் - சம்பத் ராய்

கர்நாடக முதல்வர் சித்தராமையா, ``நான் ஓர் இந்து, ஆனால் மதவாதத்தையும் இந்துத்துவாவையும் எதிர்க்கிறேன். எந்த மதமும் கொலையை ஆதரிக்கவில்லை... ஆனால் இந்துத்துவா கொலை மற்றும் மக்களிடம் பிரிவினைவாதத்தை ஆதரிக்கிறது. ராமர் கோயில் கட்டுவதை எப்போதும் எதிர்த்ததில்லை. ஆனால், அதை அரசியல் லாபத்திற்காகப் பயன்படுத்துவதைத்தான் எதிர்த்துக் கேள்வி கேட்கிறோம்" எனக் காட்டமாகத் தெரிவித்திருந்தார்.

மேற்கு வங்க முதல்வர் மம்தா பானர்ஜி, ``மக்களை மத அடிப்படையில் பிரிப்பதில் நம்பிக்கை இல்லை. ஒற்றுமையை வலியுறுத்தும் வகையில் அனைத்து சமூகத்தினரையும் இணைக்கக்கூடிய பண்டிகைகள்மீது எனக்கு நம்பிக்கை உள்ளது. மற்ற சமூகங்களை ஒதுக்கி வைக்கும் விழாக்களை நான் ஆதரிப்பதில்லை. உச்ச நீதிமன்றத்தின் உத்தரவின்பேரில், ராமர் கோயில் திறப்பு விழாவை பா.ஜ.க நடத்துகிறது. ஆனால், மக்களவைத் தேர்தல் நெருங்கி வரும் நிலையில், ராமர் கோயில் திறப்பு விழாவை வைத்து பா.ஜ.க வித்தைக் காட்டி வருகிறது" எனக் குறிப்பிட்டிருந்தார்.சித்தராமையா - மம்தா பானர்ஜி

அதைத் தொடர்ந்தே ராமர் கோயில் கும்பாபிஷேகத்தில் கலந்துக்கொள்வது குறித்து காங்கிரஸ் தனது முடிவைத் தெரிவித்திருக்கிறது. இந்த விவகாரம் குறித்து காங்கிரஸ் மூத்த தலைவர் ஜெய்ராம் ரமேஷ் தனது எக்ஸ் ட்விட்டர் பக்கத்தில், ``2019 உச்ச நீதிமன்றத் தீர்ப்புக்குக் கட்டுப்பட்டு, ராமரை வணங்கும் கோடிக்கணக்கான மக்களின் உணர்வுகளுக்கு மதிப்பளித்து, கோயில் விவகாரத்தில் எந்தக் கருத்தையும் காங்கிரஸ் தலைவர்கள் தெரிவிக்கவில்லை.

இன்னும் முழுமையாக கட்டி முடிக்கப்படாத ராமர் கோயிலுக்கு, பா.ஜ.க, ஆர்.எஸ்.எஸ் தலைவர்களால் திறப்பு விழா நடத்தப்படுகிறது. இது அப்பட்டமாக தேர்தல் ஆதாயத்திற்காக கொண்டாடப்படுகிறது என்பதையும் மக்கள் அறிவார்கள். ஆர்.எஸ்.எஸ்-ஸின் நீண்டகால திட்டத்தை பா.ஜ.க செயல்படுத்துகிறது. அதனால், மல்லிகார்ஜுன் கார்கே, சோனியா காந்தி, ஆதிர் ரஞ்சன் சௌத்ரி ஆகியோர் இந்த நிகழ்ச்சியின் அழைப்பை ஏற்க மறுத்திருக்கிறார்கள். மதம் என்பது ஒவ்வொருவரின் தனிப்பட்ட விஷயம். ஆனால், ஆர்.எஸ்.எஸ் - பா.ஜ.க அயோத்தியில் ராமர் கோயில் என்பதை நீண்டகால அரசியலாக செய்து வருகின்றன" எனப் பதிவிட்டிருக்கிறார்.அயோத்தி ராமர் கோயில்: ரூ.25 லட்சத்தில் மணி; 100 கிலோ தங்கத்தில் 42 கதவுகள்!


http://dlvr.it/T1CBqs

Read More

Shiv Sena: `ஏக்நாத் ஷிண்டே அணியே உண்மையான சிவசேனா!' - மகாராஷ்டிரா சபாநாயகர் அறிவிப்பு

மகாராஷ்டிராவில் 2022-ம் ஆண்டு மே இறுதியில் சிவசேனாவை உடைத்துக்கொண்டு, வெளியில் வந்த ஏக்நாத் ஷிண்டே தலைமையிலான அணி, பா.ஜ.க-வுடன் சேர்ந்து ஆட்சி அமைத்துள்ளது. அதன் பிறகு சிவசேனாவின் சின்னம் யாருக்கு சொந்தம் என்பது தொடர்பான வழக்கில், சிவசேனா சின்னத்தை ஏக்நாத் ஷிண்டே அணிக்கு தேர்தல் கமிஷன் ஒதுக்கியது. ஏக்நாத் ஷிண்டே சிவசேனாவில் இருந்து விலகியது, கட்சித் தலைமை கூட்டிய கூட்டத்தில் பங்கேற்காதது போன்ற காரணங்களை காட்டி ஏக்நாத் ஷிண்டே ஆதரவு எம்.எல்.ஏ-க்களின் பதவியை பறிக்கவேண்டும் என்று கோரி, உத்தவ் தாக்கரே தரப்பில் மாநில சபாநாயகரிடமும், சுப்ரீம் கோர்ட்டிலும் மனுத்தாக்கல் செய்யப்பட்டது. சபாநாயகர் இம்மனுக்கள்மீது நடவடிக்கை எடுக்காமல் கிடப்பில் போட்டார். தாக்கரே - ஷிண்டே

ஏக்நாத் ஷிண்டே அணியும், உத்தவ் தாக்கரே அணியில் இடம் பெற்றிருக்கும் எம்.எல்.ஏ-க்களின் பதவியைப் பறிக்கவேண்டும் என்று சபாநாயகரிடம் மனு கொடுத்தது. மனுவை சபாநாயகர் தொடர்ந்து கிடப்பில் போட்டதால், தங்களது எம்.எல்.ஏ பதவி பறிப்பு மனுமீது நடவடிக்கை எடுக்கவேண்டும் என்று சுப்ரீம் கோர்ட்டில் உத்தவ் தாக்கரே தரப்பில் நிர்ப்பந்தம் செய்யப்பட்டது. ஆனால் எம்.எல்.ஏ-க்கள் பதவி பறிப்பு விவகாரத்தில் தங்களால் தலையிட முடியாது என்றும், இதில் சபாநாயகர்தான் முடிவு செய்யவேண்டும் என்றும் சுப்ரீம் கோர்ட் தெரிவித்தது. மேலும் எம்.எல்.ஏ-க்கள் பதவி பறிப்பு மனுவை விரைவில் விசாரித்து தீர்ப்பு வழங்கும்படி, மகாராஷ்டிரா சபாநாயகருக்கு சுப்ரீம் கோர்ட் நீதிபதிகள் உத்தரவிட்டனர்.ராகுல் நர்வேகர்

அப்படி இருந்தும் சபாநாயகர், எம்.எல்.ஏ-க்கள் பதவி பறிப்பு தொடர்பாக இரு தரப்பிலும் தாக்கல் செய்யப்பட்ட 34 மனுக்கள்மீது முடிவு எடுக்காமல் இருந்தார். இதையடுத்து சபாநாயகரை சுப்ரீம் கோர்ட் கடுமையாக விமர்சித்திருந்தது. அதோடு ஜனவரி 10-ம் தேதிக்குள் விசாரித்து முடிவை அறிவிக்கும்படி கடந்த மாதம் 15-ம் தேதி நீதிபதிகள் கேட்டுக்கொண்டனர். அதனைத் தொடர்ந்தே எம்.எல்.ஏ-க்கள் பதவி பறிப்பு மனுமீதான விசாரணையை சபாநாயகர் தொடங்கினார். விசாரணை முடிந்து 10-ம் தேதி தீர்ப்பு வழங்கப்படும் என்ற நிலையில், சபாநாயகர் ராகுல் நர்வேகர், துணை முதல்வர் தேவேந்திர பட்னாவிஸ் மற்றும் முதல்வர் ஏக்நாத் ஷிண்டே ஆகியோரைச் சந்தித்துப் பேசினார்.

இது குறித்து கருத்து தெரிவித்த சிவசேனா (உத்தவ்) தலைவர் உத்தவ் தாக்கரே, ``நீதிபதி குற்றவாளியை சந்தித்து பேச சென்றால், நீதிபதியிடம் என்ன எதிர்பார்க்க முடியும்?'' என்று கேள்வி எழுப்பியிருந்தார். இது தொடர்பாக உத்தவ் தாக்கரே தரப்பில் சுப்ரீம் கோர்ட்டிலும் ஒரு மனு தாக்கல் செய்யப்பட்டது. இன்று மாலை 4 மணியளவில் சபாநாயகர் தனது தீர்ப்பை அறிவிப்பார் என்று எதிர்பார்க்கப்பட்டது. அதே போல, சபாநாயகர் தனது இந்த விவகாரத்தில் தனது முடிவைத் தெரிவித்தார்.ஏக்நாத் ஷிண்டே

இது தொடர்பாக சபாநாயகர் ராகுல் நர்வேகர் அளித்தப் பேட்டியில், ``சிவசேனாவின் 1999-வது சட்டப்பிரிவின்கீழ் ஏக்நாத் ஷிண்டேவை சிவசேனா எம்.எல்.ஏ-க்களின் தலைவர் பதவியிலிருந்து நீக்க முடியாது. ஏக்நாத் ஷிண்டே தலைமையிலான அணியே உண்மையான சிவசேனா. கட்சி சார்பாக கூட்டப்பட்ட கூட்டத்தில் பங்கேற்கவில்லை என்பதற்காக, எம்.எல்.ஏ-க்களின் பதவியைப் பறிக்க முடியாது. உத்தவ் தாக்கரே

ஏக்நாத் ஷிண்டே தலைமையிலான அணி நியமித்த பரத் கோகாவாலாதான் உண்மையான சிவசேனா கொறடாவாகும்" என்றார்.

சபாநாயகரின் இத்தகைய முடிவு, ஷிண்டே அணியே உண்மையான சிவசேனா என்பதை உறுதிப்படுத்தும் விதமாக அமைந்திருக்கிறது. எனவே, இது தாக்கரே தரப்புக்குப் பெரும் பின்னடைவாகப் பார்க்கப்படுகிறது.அயோத்தி: `எங்களை அழைக்கவில்லை' - சிவசேனா... `ராமரின் பக்தர்களுக்கு மட்டுமே அழைப்பு’ - மதகுரு


http://dlvr.it/T1CBXd

Read More

போக்குவரத்து தொழிற்சங்கங்களின் வேலைநிறுத்தத்துக்குப் பின்னால் ‘அரசியல்’ நகர்வுகளா?!

`போக்குவரத்து தொழிலாளர்களின் வேலை நிறுத்தப் போராட்டத்துக்குப் பின்னால் அ.தி.மு.கவின் அரசியல் உள்நோக்கம் இருக்கிறது. தேர்தல் வரும் நேரத்தில் இதுபோன்று செய்தால், மக்களுக்கு தி.மு.க அரசின்மீது கோபம் வரும் என்ற நோக்கத்தில்தான் இதைச் செய்கிறார்கள்' என தி.மு.க கடுமையாக குற்றம்சாட்டியிருக்கிறது. வேலை நிறுத்தம் : போக்குவரத்து தொழிற்சங்கங்கள்

வெடித்த வேலை நிறுத்த போராட்டம்:

நீண்ட காலமாக போக்குவரத்து தொழிலாளர்கள் முன்வைத்து வரும் 6 அம்ச கோரிக்கைகளை தமிழ்நாடு அரசு உடனடியாக நிறைவேற்ற முடியாது எனக்கூறிவிட்டதால், பல்வேறு தொழிற்சங்கங்களைச் சேர்ந்த போக்குவரத்து தொழிலாளர்கள் திட்டமிட்டபடி வேலைநிறுத்தப் போராட்டத்தில் ஈடுபட்டு வருகின்றனர். பொங்கல் பண்டிகைச் சூழல் என்பதால் இவற்றை சமாளிப்பதற்காக தி.மு.கவின் தொ.மு.ச, காங்கிரஸின் ஐ.என்.டி.யு.சி தொழிலாளர்கள் மற்றும் தற்காலிக ஓட்டுநர்கள் நடத்துனர்களை வைத்து பெரும்பாலான அரசுப் பேருந்துகளை இயக்கி வருகிறது தமிழ்நாடு அரசு. அதேசமயம் தமிழ்நாடு முழுவதும் அனைத்து மாவட்டங்களிலும் பரவலாக பேருந்துபோக்குவரத்து சிறிய அளவில் பாதிக்கப்பட்டிருக்கிறது. மேலும், தற்காலிக ஓட்டுநர்களின் அனுபவமின்மையால் சில விபத்துகளும் ஏற்பட்டிருக்கின்றன. இதனால் பொதுமக்கள் பாதிக்கப்பட்டு வருகின்றனர். நெருங்கும் பொங்கல்... போக்குவரத்து தொழிலாளர்களின் ஸ்ட்ரைக் - எப்படி சமாளிக்கப் போகிறது அரசு?!

நீண்டகாலமாக முன்வைக்கப்பட்டுவரும் கோரிக்கைகள்:

தமிழ்நாடு அரசு போக்குவரத்துக் கழகத்தில் பணியாற்றும் பல்வேறு சங்கங்களைச் சேர்ந்த தொழிலாளர்கள் கடந்த பல ஆண்டுகளாக, `தமிழ்நாடு அரசுப் போக்குவரத்துக் கழகங்களில் உள்ள காலிப் பணியிடங்களை நிரப்ப வேண்டும், காலிப் பணியிடங்களை நிரப்பும்போது கருணை அடிப்படையில் நிரப்ப வேண்டும், ஓய்வுபெற்ற ஊழியர்களுக்கு நிலுவையிலுள்ள அகவிலைப் படியை வழங்க வேண்டும், புதிய ஓய்வூதியத் திட்டத்தைக் கைவிட வேண்டும், போக்குவரத்துத்துறையில் வரவுக்கும் செலவுக்கும் இடையில் ஏற்படும் இழப்பை சரிசெய்வதற்கான நிதியை பட்ஜெட்டில் ஒதுக்கீடு செய்ய வேண்டும்' உள்ளிட்ட 6 அம்ச கோரிக்கைகளை வலியுறுத்தி அவ்வபோது போராடி வருகின்றனர். அந்த நிலையில், கடந்த மாதம் இறுதியில், `தங்களின் கோரிக்கைகளை அரசு நிறைவேற்றாவிட்டால் ஜனவரி 9-ம் தேதி முதல் காலவரையற்ற வேலைநிறுத்தத்தில் ஈடுபடப்போவதாக, சி.ஐ.டி.யு, ஏ.ஐ.டி.யு.சி, அண்ணா தொழிற்சங்கப் பேரவை, பி.எம்.எஸ் உள்ளிட்ட தொழிற்சங்கங்களைச் சேர்ந்த போக்குவரத்து தொழிலாளர்கள் திடீர் அறிவிப்பை வெளியிட்டனர். அரசு போக்குவரத்து கழகம்

தோல்வியடைந்த பேச்சுவார்த்தைகள்:

அதையடுத்து, போக்குவரத்து தொழிலாளர்களின் போராட்டத்தை வாபஸ் பெற வைப்பதற்காக போக்குவரத்துத்துறை, தொழிலாளர் நலத்துறை ஆணையம் சார்பாக டிசம்பர் 27, ஜனவரி 3 மற்றும் ஜனவரி 8-ம் தேதி என அடுத்தடுத்து நடைபெற்ற மூன்றுகட்ட முத்தரப்பு பேச்சுவார்த்தையும் தோல்வியில் முடிவடைந்தது. குறிப்பாக அரசு தரப்பில், ``பொங்கல் சூழலில் போராட்டம் நடத்தினால் பொதுமக்கள் கடுமையாக பாதிக்கப்படுவார்கள். மேலும், இவை நீண்டகாலப் பிரச்னை என்பதால் இவற்றையெல்லாம் தீர்க்க கால அவகாசம் தேவைப்படும். எனவே, இந்தப் பிரச்னையை பொங்கலுக்குப் பிறகு பேசித் தீர்த்துக்கொள்ளலாம்'' எனத் தெரிவிக்கப்பட்டது. அதேபோல, தமிழ்நாடு அரசின் நிதித்துறை செயலர்கள், அரசு அதிகாரிகளிடம் கலந்தாலோசனை செய்த போக்குவரத்துத்துறை அமைச்சர் எஸ்.எஸ். சிவசங்கர், `மொத்தமுள்ள 6 கோரிக்கைகளில் 2 கோரிக்கைகளை நிறைவேற்றித்தர சம்மதம் தெரிவிக்கிறோம். மற்ற கோரிக்கைகளை பொங்கலுக்குப் பிறகு பரிசீலிருக்கிறோம். தமிழ்நாடு அரசின் நிதிநிலைமை காரணத்தால் உடனடியாக அனைத்துக் கோரிக்கைகளையும் நிறைவேற்றித்தர முடியாது' எனத் திட்டவட்டமாகத் தெரிவித்துவிட்டார். வேலைநிறுத்தம்!

தொடங்கியப் போராட்டம், பாதிக்கப்படும் பொதுமக்கள்:

இதனால் அதிருப்தியடைந்த போக்குவரத்து தொழிற்சங்கங்களின் பிரதிநிதிகள், ``கடந்த 8 ஆண்டுகளுக்கும் மேலாக இதையேத்தான் இரண்டு அரசுகளும் மாறிமாறிப் பேசி இழுத்தடித்துக்கொண்டிருக்கிறீர்கள் எனக்கூறி, திட்டமிட்டபடி ஜனவரி 9-ம் தேதி முதல் காலவரையற்றை வேலைநிறுத்தப் போராட்டத்தைத் தொடங்கியிருக்கின்றனர். குறிப்பாக, தி.மு.க-வின் தொ.மு.ச மற்றும் காங்கிரஸின் ஐ.என்.டி.யு.சி போக்குவரத்துத் தொழிலாளர்களைத் தவிர, அ.தி.மு.க-வின் அண்ணா தொழிற்சங்கப் பேரவை, இரு கம்யூனிஸ்ட் கட்சிகளின் சி.ஐ.டி.யு, ஏ.ஐ.டி.யு.சி உள்ளிட்ட 20-க்கும் மேற்ப்பட்ட போக்குவரத்து தொழிற்சங்கத் தொழிலாளர்கள் வேலைநிறுத்தப் போராட்டத்தில் ஈடுபட்டுவருகின்றனர். இதனால் பொதுமக்கள் பாதிக்கப்பட்டு வருகின்றனர். அதேசமயம், தி.மு.கவின் தொ.மு.ச, காங்கிரஸின் ஐ.என்.டி.யு.சி தொழிலாளர்கள் மற்றும் தற்காலிக ஓட்டுநர்கள் நடத்துனர்களை வைத்து பெரும்பாலான அரசுப் பேருந்துகளை இயக்கி தற்காலிகமாக சமாளித்து வருகிறது தமிழ்நாடு அரசு.

வலியுறுத்தும் எதிர்க்கட்சிகள்:

இந்த நிலையில், `போராடிவரும் போக்குவரத்து தொழிலாளர்களின் கோரிக்கைகளை உடனடியாக நிறைவேற்றித்தரவேண்டும், பொங்கல் சூழலில் பொதுமக்கள் பாதிக்கப்படாமலிருப்பதை அரசு உறுதிசெய்யவேண்டும்' என அ.தி.மு.க, பா.ஜ.க, பா.ம.க உள்ளிட்ட எதிர்க்கட்சிகள் கருத்துதெரிவித்திருக்கின்றன. குறிப்பாக, அ.தி.மு.க பொதுச்செயலாளர் எடப்பாடி பழனிசாமி, ``ஓய்வு பெற்ற தொழிலாளர்களுக்கு 96 மாதங்களாக நிலுவையில் உள்ள அகவிலைப்படி உயர்வு நிலுவைத் தொகை சுமார் ரூ.2 ஆயிரம் கோடி உள்ளதாகவும், அதில் இந்த மாதத்தில் இருந்து அகவிலைப்படி உயர்வை உடனடியாக வழங்கினால்கூட போதும் என்றும், அதற்கு ரூ.70 கோடி மட்டுமே ஆகும் என்றும், நிலுவையில் உள்ள 96 மாதகால அகவிலைப்படியையும் மற்றும் இதர கோரிக்கைகளையும் பொங்கலுக்குப் பிறகுகூட பேசிக் கொள்ளலாம் என்றும், இதனை இந்த அரசு ஏற்றுக்கொண்டால் வேலை நிறுத்த அறிவிப்பை வாபஸ் பெற்றுக்கொள்கிறோம் என்று தொழிற்சங்கங்கள் தெரிவித்த குறைந்தபட்ச இந்த ஒரு கோரிக்கையைக் கூட ஏற்காத மனிதாபிமானமற்ற அரசாக முதலமைச்சர் மு.க.ஸ்டாலின் தலைமையிலான தி.மு.க அரசு இருந்து வருவது கடும் கண்டனத்திற்குரியது. அரசு வீராப்பு காட்டாமல், லட்சக்கணக்கான மக்கள் அவர்களுடைய சொந்த ஊர்களுக்குச் சென்று பொங்கல் பண்டிகையைக் கொண்டாட வேண்டும் என்பதைக் கருத்தில்கொண்டு, போக்குவரத்துத் தொழிற்சங்கங்களுடன் மீண்டும் பேச்சுவார்த்தை நடத்தி, அவர்களுடைய குறைந்தபட்ச கோரிக்கையை உடனடியாக நிறைவேற்ற வேண்டும் என்று விடியா தி.மு.க அரசை வலியுறுத்துகிறேன்!" என அறிக்கை வெளியிட்டிருக்கிறார்.அதிமுக | எடப்பாடி பழனிசாமி

அரசியல் உள்நோக்கம் - குற்றம்சாட்டும் தி.மு.க:

இதற்குப் பதிலடி கொடுக்கும் விதமாகப் பேசியிருக்கும் போக்குவரத்துத்துறை அமைச்சர் எஸ்.எஸ். சிவசங்கர், ``போக்குவரத்து தொழிலாளர்களுக்காக நீலிகண்ணீர் வடிக்கும் எடப்பாடி! 96 மாத காலமாக ஓய்வு பெற்றவர்களுக்கு அகவிலைப்படி உயர்வு வழங்கப்படவில்லை என உங்கள் அறிக்கையிலே சொல்லியிருக்கிறீர்களே, அதை நிறுத்தியதே நீங்கள் தானே! 65 மாத காலம் அகவிலைப்படி கொடுக்காமல் இருந்தது நீங்கள் தானே! இதை சொல்லி பேருந்தை நிறுத்தினால், மக்கள் தி.மு.க அரசு மீது கோபப்படுவார்கள் எனது உங்கள் கற்பனை. ஆனால் உங்கள் வேடம், உங்கள் அறிக்கையாலேயே கலைந்து விட்டது. மக்கள் உண்மையை அறிவார்கள். மக்களுக்கு இடையூறாக பொய் சொல்லி ஒரு போராட்டம் நடத்துவதை மக்கள் மன்னிக்க மாட்டார்கள்!" என தனது எக்ஸ் தளத்தில் பதிவிட்டிருக்கிறார்.அமைச்சர் சிவசங்கர்

மேலும் பத்திரிகையாளர் சந்திப்பின்போது, ``போக்குவரத்து தொழிற்சங்கத்தினருடனான பேச்சுவார்த்தையின்போது, அரசால் என்ன செய்ய முடியும். எதை செய்வது கடினம் என்பது குறித்து தெளிவாகக் கூறியிருக்கிறோம். கடந்த அ.தி.மு.க ஆட்சிக் காலத்தில் ஆட்சியாளர்கள் செய்யாமல் விட்டதை, தி.மு.க ஆட்சி அமைந்தபிறகு அ.தி.மு.க தொழிற்சங்கத்தினர் கேட்பதும், எடப்பாடி பழனிசாமி கேட்பதும் வேடிக்கையாக இருக்கிறது. அவர்களால் செய்ய முடியாமல் விட்டுவிட்டனர். அதை நாங்கள் செய்யமுடியாது என்று கூறவில்லை. நிதி நிலை சீரான பிறகு செய்து தருகிறோம் என்று கூறியிருக்கிறோம். ஆகவே, செய்து தரவே முடியாது என்று கூறியவர்களுக்கு மத்தியில், நிதிநிலை சீரான பிறகு செய்து தருவோம் என்று கூறும் தமிழ்நாடு அரசுக்கு எதிராக வேலைநிறுத்தத்தில் ஈடுபவடுவது என்பது பொதுமக்களுக்கு இடையூறு ஏற்படுத்துவதாகவே அமையும். இது `அரசியல் உள்நோக்கம்' கொண்டது. தேர்தல் வரும் நேரத்தில் இதுபோன்று செய்தால், மக்களுக்கு அரசின்மீது கோபம் வரும் என்ற நோக்கத்தில்தான் இதைச் செய்கிறார்கள். ஆனால், பொதுமக்கள் இவற்றையெல்லாம் நன்கு அறிவார்கள். எனவே, பொதுமக்களுக்கு இடையூறு செய்பவர்கள் மீதுதான் மக்களுக்கு கோபம் வரும்!" என போக்குவரத்துத்துறை அமைச்சர் சிவசங்கர் கூறியிருக்கிறார்.ஏ.ஐ.டி.யு.சி, பொதுச் செயலாளர் ஆறுமுகம்

இதை அரசியலாகப் பார்க்க வேண்டாம்:

இதுதொடர்பாக ஏ.ஐ.டி.யு.சி, பொதுச் செயலாளர் ஆறுமுகத்திடம் பேசியபோது, ``9-ம் தேதிவேலை நிறுத்தம் தொடங்கப்பட்டிருக்கிறது. வெளி நபர்களை வைத்து 60% பேருந்துகள் அரசால் தற்போது இயக்கப்பட்டு வருகின்றன. இன்று 40%-க்கும் மேற்பட்ட தொழிலாளர்கள் வேலை நிறுத்தத்தில் ஈடுபட்டு வருகின்றனர். இந்த எண்ணிக்கை படிப்படியாக நாளை மறுநாள் கூடும். அரசின் நடவடிக்கை காரணமாக ஓய்வு பெற்ற தொழிலாளர்கள் மிகுந்த வேதனையிலும் மன உளைச்சலிலும் உள்ளனர். அடுத்த கட்ட போராட்டத்தில் ஈடுபடுவதற்கு தயாராகி வருகின்றனர். தமிழக அரசு இதை அரசியலாக பார்க்காமல் தொழிலாளர்களின் கோரிக்கையை, தேர்தல் காலத்தில் அளித்த வாக்குறுதியை நிறைவேற்றுவதற்கு முன் வரவேண்டும் என்று தமிழ்நாடு முதல்வரைக் கேட்டுக் கொள்கிறோம். தொழிற்சங்கங்களை அழைத்துப் பேசி தொழில் அமைதி ஏற்படும் சூழ்நிலையை உருவாக்க வேண்டும்!" எனக் கேட்டுக்கொண்டார்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... 
https://bit.ly/46c3KEk">
https://bit.ly/46c3KEk />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... 
https://bit.ly/46c3KEk">
https://bit.ly/46c3KEk />

http://dlvr.it/T1Bp9p

Read More