நெருங்கும் தேர்தல்; திடீர் ராஜினாமா செய்த தேர்தல் ஆணையர்... விவாதம் கிளப்பும் எதிர்க்கட்சிகள்!

2024 மக்களவைத் தேர்தல் நெருங்கிக் கொண்டிருப்பதால், அரசியல் கட்சிகள் கூட்டணி, தொகுதிப் பங்கீடு, வேட்பாளர்கள் தேர்வு, கள பிரசாரம் மேற்கொள்வது எனத் தேர்தல் வேலைகளில் மும்முரம் காட்டி வருகின்றன. தேர்தல் அறிவிப்பு வெளியாக இன்னும் சில நாள்களே இருக்கும் நிலையில், தேர்தல் ஆணையர் அருண் கோயல் தனது பதவியை ராஜினாமா செய்திருப்பது, அரசியல் வட்டாரத்தில் மிகுந்த பரபரப்பையும், விவாதங்களையும் எழுப்பியிருக்கிறது. தேர்தல் ஆணையர் அருண் கோயலின் ராஜினாமாவைக் குடியரசுத் தலைவர் திரௌபதி முர்முவும் ஏற்றுக்கொண்டிருக்கிறார்.அருண் கோயல்

மூன்று ஆணையர்களைக் கொண்ட இந்திய தேர்தல் ஆணையத்தில், தலைமைத் தேர்தல் ஆணையராக ராஜிவ் குமார் இருந்து வருகிறார். ஏற்கெனவே கடந்த மாதம் தேர்தல் ஆணையர் அனுப் பாண்டேவின் பதவிக்காலம் முடிந்து அவர் ஓய்வு பெற்றுவிட்டதால், மூன்றில் ஒரு பதவி காலியாக இருந்தது. இத்தகைய சூழலில், தேர்தல் ஆணையர் அருண் கோயல் ராஜினாமா செய்திருக்கிறார். `இதன் விளைவாக உலகின் மிகப்பெரிய ஜனநாயக நாடு, ஒரேயொரு தேர்தல் ஆணையருடன் பொதுத் தேர்தலை எதிர்கொள்ளும் சூழல் உருவாகியிருக்கிறது' என அரசியல் நோக்கர்கள் கருத்து தெரிவித்திருக்கின்றனர். `வென்று வாருங்கள்; மீண்டும் சந்திப்போம்..!’ - அமைச்சர்களிடம் எச்சரிக்கையாக இருக்கச் சொன்ன மோடி!

``அருண் கோயல், தனது ராஜினாமா முடிவைக் கைவிட வேண்டுமென உயரதிகாரிகள் வலியுறுத்தினார்கள். ஆனால் அவர் ராஜினாமா செய்துவிட்டார். அவரின் இந்த முடிவுக்கு நிச்சயம் உடல்நிலை காரணமாக இருக்காது என நம்புகிறோம். ஏனென்றால் அவர் நல்ல உடல்நலத்துடன் இருக்கிறார். தேர்தல் ஆணையரின் ராஜினாமாவைத் தொடர்ந்து, தற்போது காலியாக இருக்கும் இரண்டு தேர்தல் ஆணையர்களை நியமிப்பது தொடர்பான வேலைகளை அரசு துரிதமாகத் தொடங்கும்" எனத் தனியார் ஊடகத்திடம், சம்பந்தப்பட்ட அதிகாரிகள் தெரிவித்திருக்கின்றனர்.

1985 பேட்ச் ஐ.ஏ.எஸ் அதிகாரியான அருண் கோயல், நவம்பர் 18, 2022 அன்று பணியிலிருந்து விருப்ப ஓய்வு பெற்றார். அதற்கு அடுத்த நாளே, அவர் தேர்தல் ஆணையராக நியமிக்கப்பட்டார். அவரின் பதவிக்காலம் 2027-ம் ஆண்டுதான் முடிவடைகிறது. தற்போது தலைமைத் தேர்தல் ஆணையராக இருக்கும் ராஜிவ் குமாரின் ஓய்வுக்குப் பிறகு, ஆணையத்தின் தலைமை பதவிக்கு அருண் கோயல் செல்லவிருந்தார் என்பது குறிப்பிடத்தக்கது. இத்தகைய சூழலில்தான் அவர் தன்னுடைய பதவியை ராஜினாமா செய்திருக்கிறார்.மஹுவா மொய்த்ரா

தேர்தல் ஆணையரின் ராஜினாமா குறித்து எதிர்க்கட்சியினர் பல்வேறு கேள்விகளை எழுப்பியிருக்கின்றனர். திரிணாமுல் காங்கிரஸ் முன்னாள் எம்.பி மஹுவா மொய்த்ரா இந்த விவகாரம் தொடர்பாகத் தனது எக்ஸ் ட்விட்டர் பக்கத்தில், ``தேர்தல் ஆணையர் அருண் கோயல், கொல்கத்தாவில் நடைபெற்ற தேர்தல் ஆய்வுக் கூட்டத்துக்குப் பிறகு ஏன் திடீரென ராஜினாமா செய்தார்...

தேர்தலைப் பல கட்டங்களாக நடத்துவது மற்றும் அதிகப்படியான படைகளை முன்னிறுத்துவது தொடர்பான டெல்லியின் கட்டளைக்கு, அருண் கோயல் உடன்படாமல் போயிருக்கலாம். தற்போது இவருக்குப் பதில் அந்த இடத்தில், `ஆம்' சொல்லக்கூடிய வேறொருவர் நியமிக்கப்படுவார்" எனப் பதிவிட்டிருக்கிறார்.

அதேபோல திரிணாமுல் காங்கிரஸ் செய்தித் தொடர்பாளர் சாகேத் கோகலே, ``தேர்தல் ஆணையர் அருண் கோயல் திடீரென ராஜினாமா செய்திருக்கிறார். இதைத் தொடர்ந்து மோடி அரசின் புதிய வழிமுறைப்படி, தேர்தல் ஆணையர்களைத் தேர்ந்தெடுக்கும் குழுவில் இப்போது பிரதமர், மத்திய அமைச்சர் மற்றும் எதிர்க்கட்சி தலைவர் ஆகியோர் இருக்கின்றனர். அருண் கோயிலின் ராஜினாமாவால் தற்போது இரண்டு தேர்தல் ஆணையர்கள் பதவியிடங்கள் காலியாக இருக்கின்றன. மோடி

அதனால், பிரதமர் மோடி மற்றும் அமைச்சரின் வாக்குகளுடன் தேர்தல் ஆணையர்கள் நியமிக்கப்படுவார்கள். 2024 லோக் சபா தேர்தலுக்கு முன்பு இது நடக்கும்" எனத் தெரிவித்திருக்கிறார்.

காங்கிரஸ் மூத்த தலைவர் கே.சி.வேணுகோபால், தேர்தல் ஆணையரின் ராஜினாமா குறித்து தனது கவலையை வெளிப்படுத்தியதுடன், `தேர்தல் ஆணையம் எப்படிச் செயல்படுகிறது என்பதில் கொஞ்சமும் வெளிப்படைத்தன்மை இல்லை' என்று குறிப்பிட்டிருக்கிறார்.Tamil News Live Today: தேர்தல் ஆணையர் அருண் கோயல் ராஜினாமா!


http://dlvr.it/T3sKjN

Read More

கேரளா: `வேட்பாளர் தேர்வில் பெண்களைப் புறக்கணிக்கிறார்கள்..!' - காங்கிரஸ் பெண் நிர்வாகி அதிருப்தி

கேரள மாநிலத்தில் உள்ள 20 மக்களவைத் தொகுதிகளிலும் காங்கிரஸ் கூட்டணி சார்பில் வேட்பாளர்கள் களமிறக்கப்பட்டுள்ளனர். அதில் காங்கிரஸ் கை சின்னத்தில் நேரடியாக 16 தொகுதிகளில் போட்டியிடுகிறது. அதற்கான வேட்பாளர் பட்டியல் நேற்று முன்தினம் வெளியாகியிருந்தது. அதில் வயநாடு தொகுதியில் மீண்டும் ராகுல் காந்தி போட்டியிடுகிறார். திருவனந்தபுரம் தொகுதியில் மீண்டும் சசி தரூர் போட்டியிடுகிறார். பெரும்பாலும் சிட்டிங் எம்.பி-க்களுக்கே மீண்டும் வாய்ப்பு வழங்கப்பட்டுள்ளது. 16 பேர் வேட்பாளர்கள் பட்டியலில் ரம்யா ஹரிதாஸ் என்ற ஒரே ஒரு பெண் வேட்பாளர் மட்டுமே உள்ளார். ரம்யா ஹரிதாஸ் ஆலத்தூர் தொகுதியில் போட்டியிடுகிறார். அதே சமயம் சி.பி.எம் கட்சி தலைமையிலான இடது முன்னணி கூட்டணியில் கேரள மாநிலத்தில் 20 தொகுதிகளிலும் போட்டியிட்டாலும், சி.பி.எம் கட்சி நேரடியாக 15 தொகுதிகளில் போட்டியிடுகிறது. சி.பி.எம் சார்பில் முன்னாள் சுகாதாரத்துறை அமைச்சரும் சிட்டிங் எம்.எல்.ஏ-வுமான கே.கே.சைலஜா டீச்சர் வடகரா தொகுதியிலும், எர்ணாகுளம் தொகுதியில் கே.ஜெ.ஷைனும் என 2 பெண் வேட்பாளர்கள் அறிவிக்கப்பட்டுள்ளனர். சி.பி.எம் கூட்டணியில் 4 தொகுதிகளில் போட்டியிடும் சி.பி.ஐ கட்சியில், வயநாடு தொகுதியில் ராகுல் காந்திக்கு எதிராக பெண் வேட்பாளரான ஆனி ராஜா களமிறக்கப்பட்டுள்ளனர்.அகில இந்திய காங்கிரஸ் செய்தித் தொடர்பாளர் ஷமா முஹம்மது

ஆனால், 16 தொகுதிகளில் போட்டியிடும் காங்கிரஸ் வேட்பாளர்களில் ஆலத்தூரில் போட்டியிடும் ரம்யா ஹரிதாஸ் என்ற ஒருவர் மட்டுமே பெண் வேட்பாளர். அதுமட்டுமல்லாது காங்கிரஸ் கூட்டணியில் மொத்தமுள்ள 20 வேட்பாளர்களையும் சேர்த்தாலும் ரம்யா ஹரிதாஸ் மட்டுமே பெண் வேட்பாளர். இது காங்கிரஸ் கட்சியில் உள்ள மகளிர் நிர்வாகிகளுக்கு கடும் அதிருப்தியை ஏற்படுத்தியுள்ளது. அந்த அதிருப்தியை பொதுவெளியில் கொட்டித் தீர்த்திருக்கிறார் அகில இந்திய காங்கிரஸ் கமிட்டியின் செய்தித் தொடர்பாளர் ஷமா முஹம்மது. இது குறித்து ஷமா முகம்மது கூறும்போது, "காங்கிரஸ் வேட்பாளர் பட்டியலில் மகளிர்களுக்கான இட ஒதுக்கீடு மிகவும் குறைவாக உள்ளது. மகளீர் இட ஒதுக்கீட்டு மசோதா வருவதற்கு முன்பு கடந்த முறை காங்கிரஸில் மகளிருக்கு 2 சீட் வழங்கப்பட்டது. ஆனல், மகளீர் இட ஒதுக்கீடு மசோதா வந்தபிறகு இந்த முறை ஒரு சீட் மட்டுமே வழங்கப்பட்டுள்ளது.ஷமா முஹம்மது

காங்கிரஸ் கட்சியில் பெண்களுக்கு பிரதிநிதித்துவம் வழங்குவதில்லை. இதை கட்சி தலைமை புரிந்துகொள்ள வேண்டும். ராகுல் காந்தி எப்போதும் பெண்களுக்காக பேசிக் கொண்டிருக்கிறார். ஆனால் காங்கிரஸ் வேட்பாளர் பட்டியலில் பெண்களை புறக்கணிக்கிறார்கள். பெண்களுக்கான ஒதுக்கீடு இல்லை என்றால் ரம்யா ஹரிதாஸுக்கும் சீட் கொடுத்திருக்க மாட்டார்கள். கட்சி நிகழ்ச்சிகளில் மேடையில்கூட பெண்களை அமரவைக்க மாட்டார்கள். பெண்களுக்கு எப்போதுமே தோல்வி அடையும் தேர்தல் சீட்டை மட்டுமே வழங்குவார்கள். வடகரா தொகுதியில் இருந்து கே.முரளிதரன் திருச்சூருக்கு மாற்றப்பட்டுள்ளார். எனவே வடகரா தொகுதியில் சிட்டிங் எம்.எல்.ஏ ஷாபி பறம்பிலுக்கு பதில் என்னை வேட்பாளராக அறிவித்திருக்கலாம்" என்றார்.

வேட்பாளர்கள், பிரசார களத்தில் இறங்கியுள்ள நிலையில், காங்கிரஸ் கட்சிக்குள் இருந்து எதிர் குரல் எழுந்திருப்பது அதிர்வலையை ஏற்படுத்தியுள்ளது. `வயநாட்டில் மீண்டும் ராகுல்’ - கேரளாவில் சிட்டிங் எம்பி-க்களுக்கு மீண்டும் வாய்ப்பளித்த காங்கிரஸ்!


http://dlvr.it/T3s9Qh

Read More

`காஸ் சிலிண்டர் விலையைக் குறைத்தது, பெண்களைக் கொச்சைப்படுத்தும் செயல்!' - கனிமொழி எம்.பி காட்டம்

தி.மு.க மகளிர் அணி சார்பில் உலக மகளிர் தினவிழா தூத்துக்குடி எம்.பி கனிமொழி தலைமையில் திண்டுக்கல்லில் நடைபெற்றது. அமைச்சர்கள் ஐ.பெரியசாமி, சக்கரபாணி, கீதா ஜீவன் உள்ளிட்டோர் கலந்துகொண்டனர். எம்.பி கனிமொழி

இக்கூட்டத்தில் பேசிய எம்.பி கனிமொழி, ``மகளிர் தின பரிசாக பிரதமர் மோடி காஸ் சிலிண்டர் விலையை 100 ரூபாய் குறைத்துள்ளார். சமையல் அறையும், சிலிண்டரும் பெண்களுக்கானது எனச் சொல்லாமல் சொல்லியிருக்கிறார் பிரதமர் மோடி. காஸ் சிலிண்டர் விலை குறைத்தது பெண்களை கொச்சைப்படுத்தும் செயல். காஸ் சிலிண்டர் விலையை குறைத்தால் பெண்கள் ஓட்டு போட்டுவிடுவார்கள் என்று நினைக்கிறார்கள். ஆனால் பெண்கள் ஏமாற தயாராக இல்லை. பெண்கள் முன்னேற்றத்திற்கான அரசு திராவிட மாடல் அரசுதான்.

பிரதமர் மோடி துவாரகா சென்று கடலுக்கு அடியில் தியானம் செய்கிறார். அஸ்ஸாம் சென்று யானை சவாரி போகிறார். இப்படி எத்தனை பகுதிகளுக்குச் சென்று கொண்டிருக்கிறார். ஆனால் இதுவரை மணிப்பூர் மட்டும் செல்ல அவருக்கு மனமில்லை. சாதி, மத அரசியலால் மணிப்பூரில் தீயை மூட்டினார்கள். அங்குள்ள மக்கள் இன்றுவரை உணவு, உடை, இருப்பிடமின்றி இருக்கிறார்கள். மருத்துவம் உள்ளிட்ட அடிப்படை வசதிகள்கூட அவர்களுக்குக் கிடைக்கவில்லை. ஆயிரம் பேர் சேர்ந்து 2 பெண்களை வன்கொடுமை செய்தார்கள். அந்த பெண்களுக்கு என்ன நியாயம் கிடைத்திருக்கிறது. நாட்டையே பெண்ணாக போற்றுகிறோம் என்கிறார்கள். ஆனால் பெண்களுக்கு என்ன பாதுகாப்பை தந்தார்கள். சமையல் காஸ், விலை குறைப்பு

உத்தரப்பிரதேசத்தில் 16 வயது பெண் நகைகள் அணிந்து கொண்டு இரவில் நடந்து செல்லலாம் என்கிறார்கள். ஆனால் உண்மை நிலவரம் என்னவென்றால், கடந்த 5 ஆண்டுகளில் பெண்கள், குழந்தைகள்மீதான வன்கொடுமை 2 மடங்கு அதிகரித்துள்ளது. குஜராத் பில்கிஸ் பானு வழக்கில் குற்றவாளிகளை விடுவிக்கிறார்கள். உச்ச நீதிமன்றம் தலையீட்டு அவர்களை மீண்டும் சிறைக்கு அனுப்புகிறது. இவர்கள் மீண்டும் ஆட்சிக்கு வந்தால் பெண்கள், குழந்தைகள் பாதிக்கப்படுவார்கள். பிரதமர் மோடி

நாட்டில் சராசரி வருமானம் அதிகரித்து நாடு முன்னேற்றம் அடைந்திருக்கிறது என்கிறார்கள். ஆனால் முன்னேறியது 3 பேர் தான். அம்பானி, அதானி, பா.ஜ.க. சாமானியர்கள், விவசாயிகள், இளைஞர்கள், பெண்கள் முன்னேற்றத்திற்கு எதுவும் செய்யவில்லை. விவசாயிகள் தங்களின் உரிமைக்காக போராட வந்தால் கம்பி வேலி, சிமென்ட் தடுப்பு போட்டு தடுக்கிறார்கள். சாதி, மதத்தால் பிரித்தாளும் ஆட்சி மீண்டும் வந்துவிடக் கூடாது" என்றார். `நாட்டின் ஒற்றுமையைக் காக்க வேண்டுமென்றால் பாஜக ஆட்சியை அகற்றுவதுதான் ஒரே தீர்வு' - கனிமொழி காட்டம்


http://dlvr.it/T3s9L8

Read More

குலதெய்வ கோயிலில் தந்தை... சதுரகிரியில் மகன் - விருதுநகரில் ஆன்மிக விசிட் அடித்த ஓ.பி.எஸ் தரப்பு

தமிழகத்தில், நாடாளுமன்ற தேர்தல் பரபரப்பு, அரசியல் கட்சிகளுக்குள் கடும் அனலை கிளப்பியிருக்கிறது. தி.மு.க., அ.தி.மு.க. உள்பட ஏனைய பிற கட்சிகளும் கூட்டணி பேச்சுவார்த்தையை ஒருபக்கம் தீவிரமாக நடத்திக் கொண்டிருக்கும் நிலையில், அ.தி.மு.க.விலிருந்து நீக்கப்பட்ட முன்னாள் முதல்வர் ஓ.பன்னீர்செல்வம், அ.தி.மு.க. தொண்டர்கள் உரிமை மீட்புக்குழு எனும் பெயரில் மற்றொரு பக்கமாக மீண்டுமொரு தன் தர்மயுத்த போரை நடத்த தொடங்கியிருகிறார். இன்னும் சற்று கூடுதலாக, வருகிற நாடாளுமன்ற தேர்தலில் அ.தி.மு.க.வேட்பாளர்களுக்கு எதிராக, தனது சார்பில் வேட்பாளர்களை களம் இறக்கும் முனைப்பிலும் அவர் செயல்பட்டு வருகிறார். இதற்காக வலுவான கூட்டணி நோக்கி காய் நகர்த்தும் ஓ.பன்னீர் செல்வம், சசிகலா ஆதரவுடன், அம்மா மக்கள் முன்னேற்ற கழக பொதுச்செயலாளர் டி.டி.வி.தினகரன், ஆகியோருடன் கூட்டணி சேர்ந்து தேர்தலை சந்திப்போம் என ஏற்கெனவே அறிவித்தார்.ஓ.பன்னீர்செல்வம்

இந்நிலையில், பிணைப்பை மேலும் வலுவாக்க பா.ஜ.க.வுடன் கூட்டணி பேச்சுவார்த்தை நடத்தி வரும் தகவல்களும் தடதடக்கின்றன. நாடாளுமன்ற தேர்தலில் மட்டுமல்ல, சட்டமன்ற தேர்தலிலும் இனி பா.ஜ.க.வுடன் கூட்டணி கிடையாது என அ.தி.மு.க. பொதுச்செயலாளர் எடப்பாடி பழனிசாமி அறிவித்திருக்கும் நிலையில், பா.ஜ.க.கூட்டணியில் அ.தி.மு.க. இல்லாத இடத்தை நிரப்பிட ஓ.பன்னீர்செல்வம் தரப்பு முயற்சித்து வருகிறது. ஆனால் ஒருங்கிணைந்த அ.தி.மு.க.வை எதிர்பார்க்கும் பாஜக, ஓ.பன்னீர்செல்வத்துடனான தனிப்பட்ட கூட்டணியை விரும்பாமல் கூட்டணி பேச்சுவார்த்தையை தள்ளிபோடுவதாக கூறப்படுகிறது. இந்நிலையில், ஓ.பன்னீர்செல்வம் தனது குலதெய்வம் கோயிலுக்கு குடும்பத்துடன் வந்து பூஜை செய்திருக்கிறார்.

முதல்வர் பதவியை இழந்த சமயத்திலும், அ.தி.மு.க. பிளவுபட்ட நேரத்திலும், இரட்டை இலை சின்னத்துக்காக உச்ச நீதிமன்றத்தில் வழக்காடும் போதிலும் தனது குலதெய்வ கோயிலுக்கு தனியே வந்து பூஜைகள் செய்துவிட்டு காரியத்தை தொடங்கி ஓ.பன்னீர்செல்வம், இம்முறை மகன்கள், மருமகள்கள், பேரன், பேத்தி என ஒட்டுமொத்த குடும்பத்துடனும் குலதெய்வ கோயிலுக்கு வந்து சென்றிருக்கிறார்.ஓ.பன்னீர்செல்வம்

இதுகுறித்து, ஓ.பன்னீர்செல்வம் அணி தொண்டர்களிடம் விசாரித்தோம். அப்போது நம்மிடம் பேசியவர்கள், "ஸ்ரீவில்லிபுத்தூர் அருகே உள்ள செண்பகத்தோப்பு வனப்பகுதியில் இருக்கும் பேச்சியம்மன்- ராக்காச்சி அம்மன் கோவில் தான் ஓ.பன்னீர்செல்வத்தின் குலதெய்வ கோயில். இம்முறை குலதெய்வ கோயில் வழிபாட்டுக்கு முன்பாக, ராஜபாளையம் அருகே நீர்காத்த அய்யனார் கோயிலில் ஓட்டக்காரன் சாமியை தரிசனம் செய்தபின்பே குலதெய்வமான பேச்சியம்மன் கோயிலுக்கு வந்து சாமிதரிசனம் செய்தார்.

அதற்கு காரணம், புராண வரலாறுபடி ராக்காச்சி அம்மன் பேச்சி அம்மனின் சகோதரர்கள்தான் ராஜபாளையம் நீர்காத்த அய்யனார் கோயிலில் அருள்பாலிக்கும் சாமிகள். அதில் ஓட்டக்காரன் சாமியின் பெயர்தான் ஓ.பன்னீர்செல்வத்தின் தந்தையின் பெயர்.ஓ.பன்னீர்செல்வம்

ஆகவே தனது தந்தையின் பெயர் காரண சாமியான ஓட்டக்காரனையும், நீர்காத்த அய்யனாரையும் முதலில் வணங்குவதுதான்‌ எடுத்தக்காரியங்களின் வெற்றிக்கு சித்தமாயிருக்கும் என நெருங்கியவர்கள் சொன்ன அறிவுரையின்படி குடும்பத்தினரை குலதெய்வக்கோயிலில் அமரவைத்துவிட்டு ஓ‌.பி.எஸ்.-ம், அவரின் தம்பி ஓ.ராஜாவும் மட்டும் தனியே அங்கு சென்று முதலில் சாமி தரிசனம் செய்தார்.

அதன்பின் தனது குலதெய்வமான பேச்சியம்மன் - ராக்காச்சி அம்மன் ஆகியோரை தரிசனம் செய்தனர். ஓ.ராஜாவின் பேத்திக்கு முடிக்காணிக்கை செலுத்தி வேண்டுதலையும் நிறைவேற்றியிருக்கிறார். குலதெய்வ அருள் மட்டுமல்லாமல், குலதெய்வ சாமிகளின் முன்னோர் மற்றும் மூத்தோர் அருளையும் சேர்த்து வேண்டியிருப்பதால் இனி எல்லாம் சுமுகமாக முடியும் என ஓ.பி.எஸ் நம்புகிறாராம்.ஓ.பி.ஆர்.

அதுமட்டுமல்ல மஹா சிவராத்திரியை முன்னிட்டு முன்னிட்டு ஓ.பி.ரவீந்திரநாத் மட்டும் தனியே நேற்று மாலை திடீரென ஸ்ரீவில்லிபுத்தூருக்கு வந்திறங்கினார். தொடர்ந்து அவர் ஆன்மீக பயணமாக சதுரகிரி மலை மீது உள்ள சுந்தரமகாலிங்கம் சாமி கோயிலுக்கு புறப்பட்டு சென்றார். முன்னதாக மலையடிவாரத்தில் உள்ள விஸ்வேஸ்வரர் தியான நிலையத்தில் நடைபெற்ற சிறப்பு பூஜையில் கலந்து கொண்ட அவர், சிவலிங்கத்திற்கு பால் அபிஷேகமும், திருநீறு அபிஷேகமும் செய்து மனமுருக வேண்டிக் கொண்டார். அபிஷேகம்

வழக்கமாக ஜெயபிரதீப்தான் ஆன்மிக பணிகளில் அதிக ஈடுபாட்டுடன் இருப்பவர். ஆனால் அவரை மிஞ்சும் அளவுக்கு ஓ.பி.ஆர்.நேற்று பயபக்தியுடன் பூஜையில் கலந்துக்கொண்டது‌ எங்களுக்கு ஆச்சரியத்தை ஏற்படுத்தியது. வருகிற நாடாளுமன்ற தேர்தலில், ஓ.பி.எஸ்.அணி சார்பில் அவரின் மகன்களில் யாரேனும் ஒருவர் விருதுநகரில் போட்டியிடலாம் என கணிப்புகள் இருக்கும்‌ நிலையில் ஓ.பி.ஆரின் தனிப்பட்ட விஜயம், ஆன்மிக ஈடுபாடு ஆகியவை, அவர் வேட்பாளராக களமிறங்குவதற்கான நகர்தலாக இருக்குமோ என சந்தேகிக்கிறோம்" என எதிர்பார்ப்பை கிளப்பினர்.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்...
https://bit.ly/47zomWY />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...
https://bit.ly/47zomWY``மக்களும், தொண்டர்களும் விரும்பினால் ஓ.பி.எஸ் தேனியில் போட்டியிடுவார்!” - ரவீந்திரநாத் எம்.பி


http://dlvr.it/T3r1VX

Read More

மதுரை எய்ம்ஸ்: `தேர்தல் நேர கண்துடைப்பு' - சு.வெ கருத்து எத்தகையது? - விகடன் கருத்துக்கணிப்பு முடிவு

2018-ம் ஆண்டு மதுரை தோப்பூரில், 222 ஏக்கரில் எய்ம்ஸ் மருத்துவமனை அமைப்பதற்கு மத்திய அரசு ஒப்புதல் அளித்தது. அதற்கு, 2019-ம் ஆண்டு பிரதமர் மோடி அடிக்கல் நாட்டினார். அதன் பிறகு, எந்தப் பணியும் தொடங்கப்படவில்லை. அதனால், மத்திய பா.ஜ.க அரசை தி.மு.க உள்ளிட்ட கட்சிகள் கடுமையாக விமர்சித்துவந்தன. தற்போது, நாடாளுமன்றத் தேர்தல் நெருங்கிவரும் சூழலில், மதுரை எய்ம்ஸ் மருத்துவமனைக்கு திடீரென பூமிபூஜை நடத்தியிருப்பது, அரசியல் அரங்கில் பேசுபொருளாகியிருக்கிறது.விகடன் கருத்துக்கணிப்பு

இது தொடர்பாக மதுரை எம்.பி-யான சு.வெங்கடேசன், ``கடந்த வாரம்தான் பிரதமர் மோடி மதுரைக்கு வந்து சென்றார். எனவே, மதுரை எய்ம்ஸ் கட்டுமானப் பணிகளை உண்மையிலேயே தொடங்குவதாக இருந்தால், பிரதமர் மோடி தலைமையில் அதை பிரமாண்டமாக செய்திருக்க முடியும். ஆனால், தமிழ்நாடு அரசுக்கோ, மாவட்ட நிர்வாகத்துக்கோ, மதுரை எம்.பி-க்கோ, அந்த இடம் அமைந்திருக்கும் விருதுநகர் மக்களவைத் தொகுதி எம்.பி-யான மாணிக்கம் தாகூருக்கோகூட தெரியாமல், யாரையும் அழைக்காமல் ஏன் பூமிபூஜை நடத்துகிறார்கள்?

உண்மையிலேயே, மதுரை எய்ம்ஸ் மருத்துவமனைக்கான கட்டுமானப் பணிகளை மத்திய அரசு தொடங்கியிருப்பது தேர்தல் நேர கண்துடைப்பு நாடகம்தான்" எனக் குறிப்பிட்டிருந்தார்.

மதுரை எம்.பி-யின் விமர்சனம் குறித்து நமது விகடன் வலைதளப்பக்கத்தில் கருத்துக்கணிப்பு நடத்தினோம். மதுரை எய்ம்ஸ் மருத்துவமனைக்கான கட்டுமானப் பணிகளை மத்திய அரசு தொடங்கியிருப்பது தேர்தல் நேர கண்துடைப்பு நாடகம் என எம்.பி குறிப்பிட்டிருப்பது, "சரி" - "தவறு" - "கருத்து இல்லை" என மூன்று விருப்பத் தேர்வுகளையும் கொடுத்திருந்தோம்.விகடன் கருத்துக்கணிப்பு

இந்தக் கருத்துக்கணிப்பில் கலந்துகொண்ட வாசகர்களில், 'மதுரை எய்ம்ஸ் மருத்துவமனைக்கான கட்டுமானப் பணிகளை மத்திய அரசு தொடங்கியிருப்பது தேர்தல் நேர கண்துடைப்பு நாடகம்' என எம்.பி சு.வெங்கடேசன் கூறியிருப்பது 'சரி' என 75 சதவிகித வாசகர்களும், `தவறு' என 21 சதவிகித வாசகர்களும், `கருத்து இல்லை' என 4 சதவிகித வாசகர்களும் தெரிவித்திருக்கின்றனர்.

இந்தக் கருத்துக்கணிப்பைத் தொடர்ந்து, மகளிர் தினத்தை முன்னிட்டு சமையல் எரிவாயு சிலிண்டர் விலையில் ரூ.100 குறைக்க முடிவு செய்திருப்பதாக பிரதமர் மோடி அறிவித்திருப்பது குறித்து கருத்துக்கணிப்பு நடத்தப்படுகிறது.விகடன் கருத்துக்கணிப்பு

அதற்கு விருப்பத்தேர்வாக `மக்கள் மீதான அக்கறை', `தேர்தல் ஆதாயத்துக்காக', `கருத்து இல்லை' என மூன்று விருப்பத்தேர்வுகளும் வழங்கப்பட்டிருக்கிறது. அதில் உங்கள் கருத்தைத் தெரிவிக்க www.vikatan.com என்ற லிங்க்கை க்ளிக் செய்து, வாக்களிக்கலாம்.`எம்.ஜி.ஆர், ஜெயலலிதாவை மோடி புகழ்ந்து பேசியதன் நோக்கம் என்ன?' - விகடன் கருத்துக்கணிப்பு முடிவுகள்


http://dlvr.it/T3pXQN

Read More

புதுச்சேரி: சிறுமி கொலைக்கு நீதி கேட்டுப் போராட்டம்; ஆளுநர் மாளிகையை நெருங்கியதால் போலீஸ் தடியடி!

புதுச்சேரி, முத்தியால்பேட்டை சோலை நகரைச் சேர்ந்த 9 வயது சிறுமி, கடந்த 2-ம் தேதி தனது வீட்டின் அருகில் விளையாடிக் கொண்டிருந்தபோது மாயமானார். அதையடுத்து 5-ம் தேதி அதே பகுதியில் உள்ள கழிவு நீர் கால்வாயில், கை கால்கள் கட்டப்பட்ட நிலையில் சடலமாக மீட்கப்பட்டார். இந்த சம்பவத்தில் விவேகானந்தன், கருணாஸ் ஆகிய இருவர் கைது செய்யப்பட்டிருக்கும் நிலையில், சிறுமி பாலியல் வன்கொடுமைக்கு உள்ளாக்கப்பட்டு கொலை செய்யப்பட்டிருப்பது முதற்கட்ட விசாரணையில் தெரியவந்தது. அதையடுத்து ஒட்டுமொத்த புதுச்சேரியும் போராட்டக்களமாக மாறியிருக்கிறது. அதையடுத்து கொலைசெய்ய காரணமான போதைப்பொருளை கட்டுப்படுத்த தவறிய முதலமைச்சர் ரங்கசாமி, அமைச்சர் நமச்சிவாயம் ஆகியோர் பதவி விலக வேண்டும் என வலியுறுத்தி இந்தியா கூட்டணி கட்சிகள் சார்பில் பந்த் போராட்டம் இன்று நடந்தது.புதுச்சேரி சிறுமி கொலை

பந்த் போராட்டம் அறிவித்த இந்தியா கூட்டணி கட்சியினர், இன்று காலை 10 மணியளவில் ராஜா தியேட்டர் சந்திப்பில் ஒன்று கூடினர். அப்போது முதலமைச்சர் ரங்கசாமியும், உள்துறை அமைச்சர் நமச்சிவாயமும் பதவி விலக வேண்டும் என வலியுறுத்தியும் கோஷம் எழுப்பினர். சிலர் தரையில் அமர்ந்து போராட்டத்தில் ஈடுபட்டனர். இந்த நிலையில் திடீரென இந்தியா கூட்டணி கட்சியினர் ஊர்வலமாக புறப்பட்டனர்.  ஊர்வலத்தில் தி.மு.க அமைப்பாளரும், எதிர்க்கட்சித் தலைவருமான சிவா, மாநில காங்கிரஸ் தலைவர் வைத்திலிங்கம் எம்.பி, முன்னாள் முதலமைச்சர் நாராயணசாமி, காங்கிரஸ் சட்டமன்ற கட்சித்தலைவர் வைத்தியநாதன், தி.மு.க எம்.எல்.ஏ-க்கள் கென்னடி, சம்பத், செந்தில்குமார், இந்திய கம்யூனிஸ்ட் மாநில செயலாளர் சலீம், மார்க்சிஸ்ட் மாநில செயலாளர் ராஜாங்கம், விடுதலை சிறுத்தைகள் கட்சி  தேவபொழிலன் உள்ளிட்ட பலர் பங்கேற்றனர்.

நேரு வீதி வழியாக வந்த அந்த ஊர்வலத்தை நேருவீதி, மிஷன்வீதி சந்திப்பில் பேரிகார்டு அமைத்து போலீஸார் தடுத்தனர். இதனால் ஊர்வலத்தில் வந்தவர்கள் மிஷன் வீதியில் திரும்பினர். அவர்களை போலீஸார் தடுக்க முயன்றனர். அவர்களை தள்ளிவிட்டு, ஊர்வலத்தில் வந்தவர்கள் மிஷன் வீதி, ரங்கப்பிள்ளை வீதி வழியாக தலைமை தபால் நிலையத்தை அடைந்தனர். அங்கு போலீஸார் பேரிகார்டு அமைத்து அவர்களை தடுத்தனர். அங்கு பாதுகாப்பு பணியில் குறைவாகவே போலீஸார் இருந்தனர். இதனால் போலீஸாருடன் கடும் தள்ளுமுள்ளு ஏற்பட்டது. பெண் போலீஸார் உட்பட போலீஸார் அங்கு  குவிக்கப்பட்டனர். ஆனாலும் பேரிகார்டுகளை தள்ளிவிட்டு, போராட்டத்தில் ஈடுபட்ட பெண்கள், திருநங்கைகள் சிலர் கவர்னர் மாளிகையை நோக்கி சென்றனர். அவர்களை துரத்திச் சென்ற போலீஸார் பாரதிதாசன் சிலை அருகே தடுத்து நிறுத்தினர். பெண்கள் தரையில் அமர்ந்து தர்ணாவில் ஈடுபட்டனர். போலீஸார் அவர்களை கவர்னர் மாளிகை நோக்கி செல்லவிடாமல் சுற்றி வளைத்தனர்.

ஆனால் அவர்களை மீறி திடீரென மீண்டும் அங்கிருந்து கவர்னர் மாளிகை நோக்கி ஓடினர். சிலர் கவர்னர் மாளிகை வாசலில் இருந்த பேரிகார்டுகளை தாண்டி கவர்னர் மாளிகை வாசலுக்கு சென்றனர். கவர்னர் மாளிகை வாசலில் நின்று அவர்கள் கோஷம் எழுப்பினர். போலீஸார் அவர்களை துரத்திப் பிடித்து கைது செய்தனர். இந்த போராட்டத்தால் கவர்னர் மாளிகை வாசல், சுற்றுப்புற பகுதிகள் கலவரமாக காட்சியளித்தது. இதையடுத்து நூற்றுக்கணக்கான போலீஸார் கவர்னர் மாளிகையை சுற்றிலும் குவிக்கப்பட்டு பாதுகாப்பு பணியில் ஈடுபடுத்தப்பட்டனர். தொடர்ந்து போராட்டத்தில் ஈடுபட்ட இந்தியா கூட்டணி கட்சியினரையும் போலீஸார் கைது செய்தனர். வைத்திலிங்கம் எம்.பி, முன்னாள் முதலமைச்சர் நாராயணசாமி, எதிர்க்கட்சித் தலைவர் சிவா, தி.மு.க மற்றும் காங்கிரஸைச் சேர்ந்த 4 எம்.எல்.ஏ-க்கள் உட்பட நூற்றுக்கணக்கானவர்கள் கைதுசெய்யப்பட்டனர். போலீஸாருடன் ஏற்பட்ட மோதலில் 3 திருநங்கைகளுக்கு கை, கால்களில் லேசான காயம் ஏற்பட்டது.புதுச்சேரி கொடூரம்: மாயமான சிறுமி... வேட்டியில் சுற்றி சாக்கடையில் வீசப்பட்ட உடல் - நடந்தது என்ன?!


http://dlvr.it/T3pX3j

Read More

புதுச்சேரி: `அரசுப் பள்ளிகளில் மாணவர்களிடையே தலைவிரித்தாடும் கஞ்சா..!'- ஆசிரியர் கூட்டமைப்பு அச்சம்

 புதுச்சேரி, முத்தியால்பேட்டை சோலை நகரைச் சேர்ந்த சிறுமி, கடந்த 2-ம் தேதி தனது வீட்டின் அருகில் விளையாடிக் கொண்டிருந்தபோது மாயமானார். அதையடுத்து 5-ம் தேதி அதே பகுதியில் உள்ள கழிவு நீர் கால்வாயில், கை கால்கள் கட்டப்பட்ட நிலையில் சடலமாக மீட்கப்பட்டார். இந்த சம்பவத்தில் விவேகானந்தன், கருணாஸ் ஆகிய இருவர் கைது செய்யப்பட்டிருக்கும் நிலையில், சிறுமி பாலியல் வன்கொடுமைக்கு உள்ளாக்கப்பட்டு கொலை செய்யப்பட்டிருப்பது முதற்கட்ட விசாரணையில் தெரியவந்தது. அதையடுத்து ஒட்டுமொத்த புதுச்சேரியும் போராட்டக்களமாக மாறியிருக்கிறது. இந்த நிலையில், புதுச்சேரி அரசு அனைத்து ஒருங்கிணைந்த ஆசிரியர் கூட்டமைப்பின் தலைவர் செந்தில்குமார், பேராசிரியார் கலைவாணி உள்ளிட்ட ஆசிரியர்கள் அறிக்கை ஒன்றை வெளியிட்டிருக்கின்றனர். அதில், ``புதுச்சேரியில் முத்தியால்பேட்டை அரசு தொடக்கப் பள்ளியில் ஐந்தாம் வகுப்பு படித்து வந்த சிறுமி, கஞ்சா போதை ஆசாமிகளால் கொடூரமான முறையில் பாலியல் வன்கொடுமை செய்யப்பட்டு, கொலை செய்யப்பட்டிருப்பது கண்டனத்திற்குரியது.மாணவர்கள் |கோப்புப் படம்

இது போன்ற நிகழ்வு இனிமேல் எந்த பள்ளி மாணவிக்கும் நடக்கக் கூடாது. அதற்கான கடுமையான நடவடிக்கைகளில் புதுவை அரசு ஈடுபடவேண்டும். பல அரசுப் பள்ளிகளில் பயிலும் மாணவர்கள், சர்வ சாதாரணமாக கஞ்சா உள்ளிட்ட போதை வஸ்துகளை பயன்படுத்த துவங்கியுள்ளனர். அவர்களிடம் ஆசிரியர்கள், குறிப்பாக பெண் ஆசிரியர்கள் இன்னல்கள் மற்றும் மன உளைச்சலுக்கு ஆளாகி வருகிறார்கள். எனவே இது குறித்து மாணவர்களுக்கு தகுந்த விழிப்புணர்வை உண்டாக்க வேண்டும். அத்துடன் தொடர்ச்சியாக கஞ்சா பயன்படுத்தும் மாணவர்களை உடனடியாக பள்ளியில் இருந்து விடுவித்து, மற்ற மாணவர்களை பாதுகாத்து நல்வழிப்படுத்தும் வகையில் அவர்களுக்கு மாற்று சான்றிதழ் கொடுத்து மாற்றுக் கல்வி முறையில் ஈடுபடுத்த வேண்டும். மேலும் கல்வித்துறையில் மாணவர்களின் போதை பழக்கங்களை கட்டுப்படுத்த ஆசிரியர்களுக்கு உரிய பணி பாதுகாப்பை உறுதி செய்து, அவர்களுக்கான அதிகாரத்தை அனைத்து வகைகளிலும் அதிகப்படுத்த வேண்டும்.

ஒவ்வொரு மேல்நிலைப் பள்ளியிலும் காவல்துறை மற்றும் சுகாதாரத்துறை, பெற்றோர் மற்றும் ஆசிரியர் சார்ந்த ஒருங்கிணைந்த குழுவை உருவாக்க வேண்டும். கஞ்சா, மது, சிகரெட் போன்ற போதை வஸ்துகளை பயன்படுத்தும் மாணவர்கள் மீது பாரபட்சம் இல்லாமல் உடனடியாக நடவடிக்கை எடுத்து புதுவை அரசும், கல்வித்துறையும் பள்ளியின் மதிப்பையும் ஒழுங்கையும் பேணிக்காக்க உறுதுணையாக இருக்கவேண்டும். அதேபோல தவறு செய்யும் மாணவர்கள் மீது எடுக்கப்படும் நடவடிக்கைகளுக்கு, எந்த ஒரு அதிகார மையத்தில் இருந்தும் பரிந்துரை செய்யாமல் இருக்கவேண்டும் என்று கேட்டுக் கொள்கின்றோம். எப்பொழுதும் ஆசிரியர்கள், மாணவர்கள், மற்றும் குழந்தைகள் மீது நன்மதிப்பை பெற்றிருக்கும் மாண்புமிகு முதலமைச்சர் அவர்கள் குழந்தைகள் நல வாரியத்தில் நேர்மையான உறுதியான குழுவை நியமித்து கண்காணிப்பை தீவிரப்படுத்த வேண்டும்.புதுச்சேரி அரசு

தற்பொழுது நடைபெற்று இருக்கக்கூடிய கொலை சம்பவம், பெற்றோர்களை குறிப்பாக பெண் குழந்தைகளை வைத்திருக்கும் பெற்றோர்கள் மற்றும் ஆசிரியர்கள் மத்தியில் மிகுந்த மன உளைச்சலையும், அச்சத்தையும் உண்டாக்கி இருக்கிறது. சமுதாயத்தில் பெண் பிள்ளைகளின் பாதுகாப்பை உறுதி செய்ய எதிர்காலத்தில் கடுமையான சட்டதிட்டங்களை உருவாக்க வேண்டும். அத்துடன் புதுவையில் அதிகரித்து வரும் போதை கலாசார சீரழிவு செயல்பாடுகளை இரும்பு கரம் கொண்டு ஒடுக்க நடவடிக்கை வேண்டும் என்று புதுச்சேரி மேதகு ஆளுநர், மாண்புமிகு முதலமைச்சர் மற்றும் மாண்புமிகு கல்வி அமைச்சர், மாண்புமிகு அமைச்சர் பெருமக்கள், சட்டமன்ற உறுப்பினர்கள், அரசியல் தலைவர்களுக்கும் மற்றும் கல்வித்துறை உயர் அதிகாரிகளை கேட்டுக் கொள்கிறோம்." எனக் குறிப்பிட்டிருக்கின்றனர்.புதுச்சேரி: ``அனைத்து ரெஸ்டோ பார்களிலும் கஞ்சா, கொக்கைன்!” - முதல்வர் ரங்கசாமியை விளாசும் அதிமுக


http://dlvr.it/T3p7l8

Read More