`விநாயகர் சதுர்த்திக்கு வாழ்த்தில்லை, இருமொழிக் கொள்கை..' - விஜய் அரசியல் குறித்து தமிழிசை விமர்சனம்

'தமிழக வெற்றிக் கழகம்' கட்சியை ஆரம்பித்து அரசியலில் களமிறங்கியிருக்கும் விஜய், 'விநாயகர் சதுர்த்தி'க்கு வாழ்த்து தெரிவிக்காமல், ஓணத்திற்கு வாழ்த்துத் தெரிவித்திருந்தார். மேலும், அண்ணாவின் பிறந்த நாளுக்கு, "சுயமரியாதைத் திருமணங்களைச் சட்டப்பூர்வமாக்கியது, 'மதராஸ் மாநிலம்' என்ற பெயரைத் 'தமிழ்நாடு' என மாற்றியது, தமிழ், ஆங்கிலம் என்ற இருமொழிக் கொள்கையைச் செயல்படுத்தியது என்று தமிழக அரசியல் களத்தில் புதிய வரலாறு படைத்தவர்" என வாழ்த்திப் பதிவிட்டிருந்தார்.விஜய்யின் வாழ்த்து

அவ்வகையில் நேற்று ஓணம் பண்டிகைக்கு வாழ்த்து தெரிவித்த விஜய், இன்று, தந்தை பெரியார் பிறந்த நாளுக்கு, " “சாதி, மத ஆதிக்கம் மற்றும் மூடப்பழக்க வழக்கங்களால் விலங்கிடப்பட்டுக் கிடந்த தமிழக மக்களிடையே விழிப்புணர்வை விதைத்தவர்: பிறப்பொக்கும் எல்லா உயிர்க்கும் என்ற சுய விடுதலை வேட்கையின் மூலம், ஏற்றத் தாழ்வுகளால் உண்டாக்கப்பட்ட அடிமைத் தளைகளை அறுத்தெறிந்தவர்; மக்களைப் பகுத்தறிவு மனப்பான்மையுடன் போராடத் தூண்டியவர்: சமூகச் சீர்திருத்தவாதி, பகுத்தறிவுப் பகலவன், தென்னகத்தின் சாக்ரட்டீஸ், தந்தை பெரியார் அவர்களின் பிறந்த நாளில், அவர் வலியுறுத்திய பெண் உரிமை, பெண்கல்வி, பெண்கள் பாதுகாப்பு, சமத்துவம், சம உரிமை, சமூகநீதிப் பாதையில் பயணிக்க உறுதியேற்போம்!” என்று தனது வாழ்த்துகளைத் தெரிவித்துள்ளார். இதற்கிடையில் ஒரு வரியில், "பிரதமர் திரு.நரேந்திர மோடி அவர்களுக்கு என் மனமார்ந்த பிறந்த நாள் வாழ்த்துகள். அரோக்கியமும், ஆயுளும் பெற வேண்டும் என பிரார்த்திக்கிறேன்" என்று குறிப்பிட்டுள்ளார்.

அண்ணா, தந்தை பெரியாருக்கு ஸ்பெஷலாக வாழ்த்து தெரிவித்திருப்பதும், விநாயகர் சதூர்த்திக்கு வாழ்த்துத் தெரிவிக்காமல், ஓணத்திற்கு வாழ்த்து தெரிவிப்பதும் விஜய்யின் அரசியல் நிலைப்பாட்டைக் காட்டுவதாக பலரும் கருத்துத் தெரிவித்து வருகின்றனர். அவ்வகையில் இது குறித்து கருத்துத் தெரிவித்திருக்கும் பா.ஜ.க-வின் மூத்த தலைவர் தமிழிசை சௌந்தரராஜன், "நடிகர் விஜய் கட்சி தொடங்குவதற்கு முன்பே திராவிட சாயலில் பயணிப்பதுபோல் தெரிகிறது. திராவிட சாயலில் இன்னொரு கட்சி தமிழ்நாட்டில் தேவையில்லை. தேசிய சாயலில்தான் கட்சிகள் இனி வரவேண்டும்.தமிழிசை, விஜய்

விஜய் திராவிட கட்சிகள் பாணியில் பயணிக்காமல், வேறு பாணியில் பயணிப்பார் என்று எதிர்பார்த்தோம். ஆனால், அவரும் விநாயகர் சதுர்த்திக்கு வாழ்த்து தெரிவிக்காதது, இருமொழிக் கொள்கையை ஆதரிப்பது என திராவிட கட்சிகளின் பாணியில் பயணிக்கிறார். விஜய்யின் திரைப்படங்கள் தெலுங்கு, இந்தி என பல மொழிகளில் வெளியாகி லாபம் பார்க்க வேண்டும். ஆனால், மக்களுக்கு, படிப்பிற்கு, வளர்ச்சிக்கு பல மொழி தேவையில்லை என்று இருமொழிக் கொள்கையை ஆதரிக்கிறார். திராவிட சாயத்தை பூசிக்கொள்வது விஜய்க்கு நல்லதல்ல" என்று பேசியிருக்கிறார். `இது மோடியின் கதை!' - Life History of PM Narendra Modi | BJP | RSS


http://dlvr.it/TDL6g4

Read More

DMK 75: `அண்ணா, கலைஞரைப் போன்றவரா ஸ்டாலின்?' - ஏ.எஸ்.பன்னீர்செல்வன் விரிவான நேர்காணல் - Long Read

பவளக்காரத் தெருவில் 'திராவிட முன்னேற்றக் கழகம்' என பொறித்திருந்த பெயர் பலகையைத் திறந்து வைத்து ராபின்சன் பூங்காவில் பேரறிஞர் அண்ணா எழுச்சிரையாற்றி 75 ஆண்டுகள் ஓடிவிட்டன.

திமுகவினர் தங்களின் பவளவிழாவை பிரமாண்டமாகக் கொண்டாடி வருகின்றனர். இந்த 75 ஆண்டுகளில் திமுக எத்தனையோ சாதனைகளைச் செய்திருக்கிறது. சறுக்கல்களை எதிர்கொண்டிருக்கிறது.ஏ.எஸ்.பன்னீர்செல்வன் திமுகவின் 75 ஆண்டுகால வரலாறு என்பது நவீன தமிழ்நாட்டின் வரலாறும் கூட. திமுகவைப் பற்றி தெரிந்துகொள்வதன் மூலம் தமிழ்ச் சமூக அரசியல்போக்கைப் பற்றிய விஸ்தாரமான பார்வையும் பெற முடியும். அந்த நம்பிக்கையில்தான் 'Karunanidhi A Life' புத்தகத்தை எழுதியவரும் தி இந்துவின் வாசகர் பகுதியின் எடிட்டராகவும் இருந்தவரான ஏ.எஸ்.பன்னீர்செல்வன் அவர்களைத் தொடர்புகொண்டு உரையாடினேன்.A.S. Panneerselvan

75 ஆண்டுகளை திமுக நிறைவு செய்கிறது. திமுக தொடங்கப்பட்ட செப்டம்பர் 17, 1949 அந்த தினத்துக்கு எங்களைக் கொஞ்சம் அழைத்துச் செல்லுங்களேன். அன்றைக்கு திமுக மாதிரியான ஒரு அமைப்பின் தேவை தமிழ்ச்சமூகத்தில் என்னவாக இருந்தது?அண்ணா

இந்தியாவில் இரண்டு வகையான அரசியல் போக்குகள் இருக்கின்றன. ஒன்று, தேசமானது அரசு இயந்திரத்தை மையமாகக் கொண்டு மக்கள் அதனைச் சார்ந்து இருப்பதைப் போன்ற போக்கு. மற்றொன்று மக்களெல்லாம் ஒன்று சேர்ந்து தங்களுக்கான தேசத்தை உருவாக்கிக் கொள்வது. 1947 ல் குறிப்பாக இந்தியா - பாகிஸ்தான் பிரிவினைக்குப் பிறகு மக்களைக் காட்டிலும் அரசு இயந்திரம்தான் பெரிது என்கிற பார்வை பொதுபுத்திக்குள் ஊறியிருந்தது. அப்படியொரு காலகட்டத்தில் திமுகதான் அதிகாரத்தை அரசு இயந்திரத்திடமிருந்து எடுத்து மக்களிடமே மாற்றிவிட்ட அமைப்பாக இருந்தது. இந்தப் புள்ளியிலிருந்துதான் திமுகவின் முக்கியத்துவத்தை உணர வேண்டும். மொழி, பண்பாடு, கலாசாரம் என அத்தனை விஷயங்களிலும் பன்முகத்தன்மை என்கிற பாங்கை ஒளித்துவிடாதீர்கள் என்பதுதான் திமுகவின் கொள்கையாக இருந்தது. சுதந்திரத்துக்கும் முதல் பொதுத்தேர்தலுக்கும் இடையில் தோன்றிய கட்சி எனும்போதே நவீன இந்திய அரசியலில் இருக்கக்கூடிய சிக்கல்களைப் பார்த்து எதிர்கொண்டு அதற்கு எதிர்வினையாற்றிய இயக்கமாக திமுக இருந்தது. அரசியல் என்பதை சென்று சேர வேண்டிய இடமாக இல்லாமல் பயணமாகப் பார்க்க வேண்டும். அப்படி பார்க்கும்போது தொடர்ச்சியாக சில சமூக மாற்றங்களை உருவாக்கக்கூடிய வல்லமை திமுகவுக்கு இருந்தது.

ஆட்சிக்கலைப்பு, பெரிய பிளவுகள், அதிகாரமில்லாத நிலை என திமுக பெரும் சவால்களை எதிர்கொண்டிருக்கிறது. அந்தக் காலகட்டங்களை அவர்கள் எவ்வாறு கடந்து வந்தார்கள்?

எந்த அரசியல் கட்சியாக இருந்தாலும் எதோவொரு கட்டத்தில் பிளவுகளை எதிர்கொண்டுதான் ஆக வேண்டும். காங்கிரஸ், கம்யூனிஸ்ட் உட்பட அத்தனை கட்சிகளுக்குமே இந்த அனுபவம் உண்டு. திமுகவும் மூன்று பெரிய பிளவுகளை எதிர்கொண்டிருக்கிறது. 1961 இல் EVK சம்பத் ஒரு பிளவை ஏற்படுத்தினார். 1972 இல் எம்.ஜி.ஆரும் 1993 இல் வைகோவும் ஒரு பிளவை ஏற்படுத்தினர். இந்த பிளவுகளால் திமுக என்கிற அமைப்பு நொடிந்து போய்விடவில்லை. அவர்களின் அடையாளத்தில் எந்த மாற்றமும் ஏற்பட்டுவிடவில்லை. 1952 இல் கம்யூனிஸ்ட் எப்படியொரு இடத்தில் இருந்தார்கள் என்பதை அசைபோட்டுப் பாருங்கள். பல மாநிலங்களில் அவர்கள்தான் காங்கிரஸூக்கு அடுத்தபடியாக இரண்டாம் இடத்தில் இருந்தார்கள்.DMK Complete History

ஏன் நீங்கள் காங்கிரஸை கூட எடுத்துக் கொள்ளுங்கள். அப்போதைய அவர்களின் நிலையையும் இப்போதையை நிலையையும் நம்மால் ஒப்பிடவே முடியாது. கடுமையான செல்வாக்குச் சுருக்கத்திற்கு உட்பட்டிருக்கிறார்கள். இந்த இடத்திலிருந்துதான் திமுகவின் வலிமை என்னவென்பதை நாம் உணர வேண்டும். அப்போது எப்படியிருந்தார்களோ இப்போதும் அதே வலிமையோடும் கொள்கைப் பிடிப்போடும் இருக்கிறார்கள். இதன்வழி காலங்காலமாக அவர்களால் மத்தியில் அதிகாரம் மொத்தமும் குவிவதற்கு எதிரான வலுவான குரலை எழுப்ப முடிந்தது. நீட் விவகாரத்தையே எடுத்துக்கொள்ளுங்கள். திமுக அளவுக்கு எந்தக் கட்சி அதற்கு எதிராக போராடிக் கொண்டிருக்கிறது. நீதிமன்றம் நீட் விலக்கு கொடுத்துவிடுமா திமுகவுக்கு வெற்றி கிடைத்துவிடுமா என்றால் தெரியாது. ஆனால், அரசியலில் அனைத்தையும் வெற்றியை வைத்தே அளவிட முடியாது. இங்கே போராட்டம்தான் முக்கியம். எதிர்க்குரல்தான் முக்கியம். வெற்றியை நோக்கி அழைத்துச் செல்வதற்கான பாதையை திமுக மாதிரியான அமைப்பால்தான் ஏற்படுத்திக் கொடுக்க முடியும்.

1976 ஜனவரி மாதத்திலேயே திமுகவின் ஆட்சி கலைக்கப்பட்டுவிட்டது. அதன்பிறகு, எம்.ஜி.ஆர் ஆட்சியைப் பிடிக்கிறார். 1967 இல் ஆட்சிக்கு வந்த பிறகு மொத்தமாக 13 ஆண்டுகள் அதிகாரத்தில் இல்லாமல் இருந்திருக்கிறார்கள். 1967 க்கு முன்பு ஒரு 18 ஆண்டுகள் அதிகாரத்தை நோக்கிய போராட்டத்தில் இருந்தனர். 80 களின் இறுதியில் மீண்டும் ஆட்சி கலைக்கப்படுகிறது. மீண்டும் எதிர்க்கட்சி. இப்போது கூட பாருங்கள், 10 ஆண்டுகள் அதிகாரமே இல்லாமல் இருந்துவிட்டுதான் 2021 இல் ஆட்சியில் அமர்ந்தார்கள். திமுக ஆட்சியில் இல்லாதபோதும் அமைப்புரீதியாக அவர்கள் பெரிய சுணக்கத்தையோ உத்வேகக் குறைவையோ எதிர்கொண்டதே இல்லை. சொல்லப்போனால் எதிர்க்கட்சியாக இருக்கும்போதுதான் இன்னும் வீரியமான கொள்கைப் பிடிப்புடனும் உத்வேகத்துடனும் இருந்திருக்கிறார்கள்.Kalaignar

தமிழகத்தின் வளர்ச்சியில் திமுக ஆட்சியில் அமர்ந்திருந்த காலக்கட்டங்களை பற்றியும் அந்த சமயத்தில் நிகழ்த்தப்பட்ட சமூக - பொருளாதார மாற்றங்களையும் பற்றி பேசியாக வேண்டும். அதைப் பற்றி கொஞ்சம் விவரியுங்களேன்.

ஆட்சியில் அமர்வதன் மூலம்தான் மாற்றங்களைக் கொண்டுவர முடியும். இடஒதுக்கீட்டை ஆட்சி அதிகாரத்தின் மூலம்தான் சாத்தியப்படுத்தினார்கள். இருமொழிக் கொள்கையை, பெண்களுக்கான சொத்துரிமையை, சுயமரியாதைத் திருமணத்தை, தமிழ்நாடு என்ற பெயர் மாற்றத்தை என எல்லாவற்றையும் ஆட்சி அதிகாரத்தின் மூலம்தான் சாத்தியப்படுத்தினார்கள்.

ஆட்சி இருந்ததால்தான் ஒரே சமயத்தில் சமத்துவப்புரத்தையும் டைடல் பார்க்கையும் திமுகவால் யோசிக்க முடிந்தது. யோசித்துப் பாருங்கள் எவ்வளவு பெரிய சிந்தனை இது. டைடல் பார்க்கைக் கட்டிய கட்சிதான் சமத்துவபுரத்தையும் கட்டியிருக்கிறது. சமூகநீதியையும் வளர்ச்சியையும் ஒன்றாகப் பார்த்திருக்கிறார்கள். இதுதான் திமுகவின் வெற்றி. சமூக ரீதியாகவும் பொருளாதார ரீதியாகவும் பெரும் முன்னேற்றத்தைச் சாத்தியப்படுத்தி இருக்கிறார்கள். எளிய மக்களுக்கான தேவைகளை காலத்தின் பரிணாமத்துக்கு ஏற்ப யோசித்திருக்கிறார்கள். நீதிக்கட்சியின் காலத்தில் சில பள்ளிகளில் மட்டுமே வழங்கப்பட்டு வந்த ஒரு வேளை உணவு என்கிற திட்டம் ஒவ்வொரு 10 ஆண்டுகளுக்கும் ஒரு முறை பரிணமித்து இப்போது மாணவர்களுக்கு காலை உணவும் வழங்கும் இடத்தில் வந்து நிற்கிறது. 'Incremental Growth' என்பதில்தான் அதிக கவனம் செலுத்தினார்கள். எந்தக் கட்டத்திலும் தேக்கமடையவில்லை. அடுத்து என்ன அடுத்து என்ன என்றே பயணித்துக் கொண்டிருந்திருக்கிறார்கள். இலவச பள்ளிக் கல்வி என்றார்கள். அத்தோடு நின்றுவிடவில்லை. அடுத்ததாக உயர்கல்வியில் என்ன செய்யலாம் என சிந்தித்தார்கள். திட்டங்களை அறிமுகப்படுத்தினார்கள்.

மற்ற மாநிலத்தவர்கள் இலவசங்களை இன்னமும் கிண்டலாகப் பார்க்கும் போக்கு இருக்கத்தான் செய்கிறது. ஆனால், நீங்கள் 1991 க்குப் பிறகான தரவுகளை எடுத்துப் பாருங்கள். உலகமயமாக்கலுக்குப் பிறகு தொழில் நிறுவனங்கள் முதலீடு செய்ய வேண்டி தமிழகத்தைதான் தேடி வந்தன. அதற்கு திராவிடக் கட்சிகள் குறிப்பாக திமுக செய்து வைத்திருந்த சமூக முதலீடுதான் காரணம். மற்ற மாநிலங்கள் வீண் விரயமாகப் பார்க்கும் விஷயங்களை திமுக தமிழகத்தில் சமூக முதலீடாகப் பார்த்தது. அதுதான் இந்த மாநிலத்தின் பெரும் வளர்ச்சிக்குக் காரணமாக அமைந்தது. பரந்து விரிந்த சாலைகளை அமைப்பது, விண்ணுயர கட்டடங்களைக் கட்டுவது போன்ற கட்டமைப்புரீதியான வளர்ச்சி மட்டுமே வளர்ச்சி இல்லை என்கிற புரிதல் திமுகவுக்கு இருந்தது. பொருளாதார வளர்ச்சி, கட்டமைப்பு வளர்ச்சி சமூக ரீதியான வளர்ச்சி என அனைத்தையும் கண்ணிகளால் பிணைக்கப்பட்ட சங்கிலியாக திமுக பார்த்தது. 1991 தாராளமயமாக்கலுக்குப் பிறகு சந்தைக்கு அதிக அதிகாரம் கிடைத்தது. அரசு இயந்திரத்துக்கும் சந்தைக்கும் சமநிலை இல்லையென்றால் நிறைய பேர் அடிவாங்குவார்கள் என்பதைப் புரிய வைத்தது தமிழ்நாட்டு மாடல்தான்.தமிழ்நாடு அரசு

1967 க்குப் பிறகு இங்கே ஒரு தேசிய கட்சியால் ஆட்சியைப் பிடிக்கவே முடியவில்லை. தேசியக் கட்சிகளும் திராவிடக் கட்சிகளைச் சார்ந்தே இருக்கின்றன. மக்களின் மனநிலையில் இந்த இயக்கம் என்ன மாற்றத்தை ஏற்படுத்தியிருக்கிறது?

தங்களுடைய தலைமை தங்களுக்கானவர்களாக இருக்க வேண்டும் என்பதில் தமிழக மக்கள் தெளிவாக இருக்கிறார்கள். போயஸ்கார்டனையோ அறிவாலயத்தையோ நம்முடைய மக்களால் எட்டிவிட முடியும். ஆனால், டெல்லியின் அசோகா தெரு நம் மக்கள் எட்டும் தூரத்தில் இல்லை. எங்களின் தலைமை எங்களிடத்தில்தான் இருக்க வேண்டும் என்பதுதான் தமிழக மக்களின் எண்ணம். இதை நீங்கள் ஒரு உவமையாகவே எடுத்துக் கொள்ள வேண்டும். அரசியலில் பங்கெடுத்துக் கொள்ள செல்வச் சீமானாகவோ பட்டம் பெற்றவனாகவோ இருக்க வேண்டிய தேவை இல்லை என்கிற நிலையை திமுகதான் ஏற்படுத்தியது. ஒதுங்கி நிற்கவைக்கப்பட்ட அத்தனை தரப்பையும் தயக்கமின்றி அரசியலுக்குள் பங்களிப்பு செய்ய வைத்தது. இந்த இடத்தில்தான் கலைஞரின் அரசியல் பங்களிப்பு முக்கியத்துவம் பெறுகிறது. அண்ணா, பேராசிரியர், நாவலர் என எல்லாருமே மெத்த படித்தவர்கள். பெரும்பணக்காரராக இருந்த பி.டி.ராஜன் எங்கே? கலைஞர் எங்கே?

கலைஞர் திருக்குவளையில் எளிய இசை வேளாளர் குடும்பத்தில் பிறந்தவர். கல்வி ரீதியாக சமூக ரீதியாக பொருளாதார ரீதியாக என எந்த அளவுகோலை வைத்துக் கொண்டாலும் கலைஞர் விளிம்புநிலையைச் சேர்ந்தவர்தான். ஆனால், அவராலும் திமுக என்கிற இந்த அமைப்புக்குள் சரிசமமாக போட்டியிட முடிந்தது. சுயமரியாதையோடு இருக்க முடிந்தது. கலைஞரை வைத்துதான் திமுகவுக்கும் மக்களுக்குமான பிணைப்பையும் நம்மால் புரிந்துகொள்ள முடியும். இந்த 75 ஆண்டுகளில் திமுக 'வாழ்ந்திடுவோம் வாரீர்!' என அனைவருக்கும் நம்பிக்கையை கொடுத்திருக்கிறது. அதனால்தான் இந்த அமைப்பில் வளர்ச்சிக்கு முக்கியத்துவம் கொடுக்கப்பட்டது. தியாகம் இரண்டாம்பட்ச விஷயமாகத்தான் இருந்தது. தியாகம்... தியாகம் என பேசி ஒன்றுமே இல்லாமல் அழிந்துபோவதில் பிரயோஜனமில்லை என்கிற பார்வை திமுகவுக்கு இருந்தது.

அரசியல்ரீதியாக திமுக எடுக்கும் முடிவுகள் பல சமயங்களில் விமர்சனம் ஆகியிருக்கிறதே. ஒரு காலத்தில் பாஜகவுடன் கூட்டணி வைத்த சம்பவத்தையே எடுத்துக் கொள்ளுங்கள். இன்னமும் அதற்கான விமர்சனங்களை திமுக எதிர்கொண்டு வருகிறதே.

கட்சிரீதியாக மதிப்பிடுவதைவிட அதிகாரக் குவிப்பு - அதிகாரப் பகிர்வு என்கிற இடத்திலிருந்துதான் திமுகவின் தேர்தல் கூட்டணிகளை மதிப்பிட வேண்டும். அப்படி செய்தால்தான் அவர்கள் எடுத்த முடிவின் முழு தார்ப்பரியத்தையும் நம்மால் புரிந்துகொள்ள முடியும். அதிகாரப் பங்கீடு அல்லது அதிகாரப் பகிர்வு என்பதை நீதிக்கட்சி மற்றும் திராவிடர் கழகத்திலிருந்தே திமுக உட்கொண்டு அதற்காக கடுமையாகப் போராடியது. 1999 ல் திமுக பாஜகவுடன் கூட்டணி சேர்ந்ததை இன்னமும் விமர்சிக்கிறார்கள். ஆனால், அதற்கு முன்பான நிகழ்வுகளை மறந்துவிடுகிறார்கள். அந்த சமயத்தில் மீண்டும் காங்கிரஸ் தலைமையில் ஒற்றை ஆட்சிதான் என காங்கிரஸ் தீர்மானம் எடுத்திருந்தது. அதிகாரக் குவிப்பின் உச்சகட்டம் அது. எங்கெல்லாம் அதிகாரப் பகிர்வுக்கு வாய்ப்பிருக்கிறதோ அங்கெல்லாம் திமுக முக்கிய பங்களிப்பைச் செய்திருக்கிறது. திமுகவின் தேர்தல் கூட்டணிகளையும் இதை அளவுகோலாக வைத்துதான் பார்க்க வேண்டும். அதிகாரப் பகிர்வுக்கு வாய்ப்பிருக்கும் இடத்தில்தான் விவாதங்களுக்கும் ஆரோக்கியமான முன்னேற்றத்துக்கும் இடமிருக்கும். அதனாலேயே திமுக எப்போதுமே அதிகாரப் பகிர்வின் பக்கத்தைதான் தேர்ந்தெடுக்கும்.

அண்ணா, கருணாநிதி, இப்போது ஸ்டாலின் அவர்களின் வழித்தோன்றலாக அவர்கள் அளவுக்கு வீரியமாக ஸ்டாலின் செயல்படுகிறாரா?முதல்வர் ஸ்டாலின்

அண்ணாவின் காலத்தில் அரசியல் சூழல் இவ்வளவு மோசமாக இல்லை. எதிர்க்கட்சியாக நிற்கிறோம் என்பதற்காகவே எவ்வளவு மோசமான நடவடிக்கைகளையும் ஏவலாம் என்கிற எண்ணம் அண்ணா எதிர்த்த ஆளுங்கட்சிகளுக்கு இல்லை. அண்ணா அமைத்துக் கொடுத்த அடித்தளத்தில் கலைஞர் 50 ஆண்டுகளுக்கும் மேல் பயணித்தார். ஒன்றிய மாநில உறவுகளுக்கிடையேயான சிக்கலை கலைஞர் அளவுக்கு விவாதித்தவர் யாருமே இருக்க முடியாது. ராஜ மன்னார் தலைமையில் தனிக்கமிட்டியையே ஒன்றிய - மாநில உறவைப் பற்றி ஆராய அமைத்தாரே. ஸ்டாலினைப் பொறுத்தவரைக்கும் அவர் அண்ணாவும் கலைஞரும் கலந்து நிற்கக்கூடியவர். தற்போதைய ஒற்றை அடையாள அதிகாரக் குவிப்பின் பக்கம் கொஞ்சம் கூட நெருங்கிவிடக் கூடாது என்பதில் தெளிவாக இருக்கிறார். காங்கிரஸ் முக்த் பாரத் என பாஜக சொல்கிறது. அதனால்தான் காங்கிரஸூடன் அவ்வளவு நெருக்கமாக நிற்கிறார் ஸ்டாலின். நாம் ஏன் காங்கிரஸூக்கு இத்தனை சீட்டுகளை வழங்க வேண்டும் என திமுகவின் மாவட்டச் செயலாளர்களுக்கு கோபம் இருக்கலாம். ஆனால், இது வெறும் இடங்களை மையப்படுத்தியது அல்ல. அடிப்படை அரசியல் சமநிலைக்கானதுதான் திமுக - காங் கூட்டணி. பல கட்சிகளையும் ஒன்றிணைத்துத் தொடர்ச்சியாக அடுத்தடுத்த தேர்தல்களில் அதே கூட்டணியை தக்க வைக்கும் பக்குவம் ஸ்டாலினிடம் இருக்கிறது.

திமுகவின் வரலாற்றிலேயே இது ஒரு புது மாற்றம்தான். இந்திரா காந்திக்கு எதிராக பல்வேறு கட்சிகளை ஒருங்கிணைத்த ஜெயப்பிரகாஷ் நாராயணனுடன் கூட ஸ்டாலினை ஒப்பிடலாம். தேசிய அரசியலில் ஸ்டாலின் இப்போது அப்படியொரு நிலையில் இருக்கிறார். அவரால் மம்தா, கெஜ்ரிவால், சந்திரசேகர் ராவ், சந்திரபாபு நாயுடு எனப் பலதரப்பட்டவர்களிடமும் பேச முடிகிறது. அவரின் குரலுக்கு ஒரு மதிப்பு இருக்கிறது. கலைஞர் 50 ஆண்டுகளாக திமுகவின் தலைவராக இருந்ததால் ஸ்டாலினின் அனுபவத்தைப் பலரும் குறைத்து மதிப்பிடுகிறார்கள். 1966 இல் அதாவது திமுக ஆட்சிக்கு வருவதற்கு முந்தைய ஆண்டே ஸ்டாலின் அமைப்புக்குள் இயங்க ஆரம்பித்துவிட்டார். இன்றைய தேதிக்கு அவருக்கு இருக்கக்கூடிய அனுபவம் தேசியளவிலேயே ஒரு சில அரசியல்வாதிகளுக்குதான் இருக்கும். 1972 இல் எம்.ஜி.ஆர் ஏற்படுத்திய பிளவையும் எமெர்ஜென்சியில் ஒரு அரசு இயந்திரம் எப்படி செயல்படும் என்பதையும் அவர் நேரில் எதிர்கொண்டிருக்கிறார். அப்படியான அனுபவமெல்லாம் இப்போதுள்ள பல அரசியல்வாதிகளுக்கும் கிடையாது.

அண்ணாவுக்கும் கலைஞருக்கும் எல்லாமே புதிது. அவர்கள் எல்லா தடத்திலும் புதுப் பாதையை அமைக்க வேண்டியிருந்தது. ஆனால், ஸ்டாலினுக்கு அவர்கள் இருவரும் விட்டுச் சென்ற முன்னுதாரணங்கள் நிறையவே இருக்கின்றன. அதனால்தான் தான்தோன்றித்தனமாக எந்த முடிவையும் எடுக்காமல் எல்லாரிடமும் கலந்துபேசி முடிவுகளை எடுக்கும் இடத்தில் ஸ்டாலின் இருக்கிறார்.

வாரிசு அரசியல், சீனியர் - ஜூனியர் உரசல் என பல சர்ச்சைகளை திமுக இப்போது எதிர்கொண்டு வருகிறதே?

நீண்ட நெடிய பாரம்பரியம் கொண்ட எல்லா கட்சியிலுமே சீனியர் - ஜூனியர் பிரச்னைகள் இருக்கத்தான் செய்யும். 20-25 ஆண்டுகள் கட்சியில் செலவளித்துவிட்டவர் தன்னுடைய அடுத்தக்கட்டம் என்ன என யோசிப்பார். ஆனால், நீண்ட நெடும் பாரம்பரியத்தால் அவரை விடவும் சீனியர் ஆட்கள் கட்சியில் இருக்கத்தான் செய்வார்கள். ஒரு கட்சி உயிரோட்டத்தோடு இருப்பதைத்தான் இந்த சர்ச்சைகள் வெளிக்காட்டுகின்றன. அதேமாதிரிதான் வாரிசு அரசியல் என்கிற விமர்சனமும். ஸ்டாலின் தேர்தலில் நின்றுதானே எம்.எல்.ஏ, மந்திரி, முதலமைச்சர் என பதவிகளை அடைந்திருக்கிறார். அதேமாதிரிதான் உதயநிதியும் தேர்தலில் நிற்கிறார். உதயநிதி ஸ்டாலின்

மக்கள் அவரை ஏற்றுக்கொண்டால் அவர் அடுத்தக்கட்டத்துக்கு செல்லப்போகிறார் இல்லையேல் அப்படியே கரைந்துவிடுவார் அவ்வளவுதான். வாரிசு என்பதாலயே எல்லாவற்றையும் அடைந்துவிட முடியும் என்றால் இன்றைக்கு அழகிரி எங்கே இருக்கிறார்? நாவலர் நெடுஞ்செழியன் எத்தனை முயற்சிகளை செய்திருப்பார்? அவர் எந்த உயரத்தை எட்டினார்? அரசியலில் வாரிசா இல்லையா என்பதெல்லாம் பிரச்னையில்லை. மக்களால் ஏற்கப்பட்டவர் மக்களால் ஏற்கப்படாதவர், அந்த கட்சியின் அமைப்பால் ஏற்கப்பட்டவர், அமைப்பால் ஏற்கப்படாதவர் என்பதை மட்டுமே இங்கே பார்க்க வேண்டும்.

பவளவிழா கொண்டாடப்படும் இந்த நேரத்தில் திமுக இனி கவனமாக இருக்கவேண்டிய விஷயங்களாக நீங்கள் நினைப்பவை என்னென்ன?MK Stalin

அதிகாரக் குவிப்பிலிருந்து திமுக எப்போதுமே தள்ளியிருக்க வேண்டும். அதை எதிர்ப்பதில் சமரசம் செய்துகொள்ளக்கூடாது. மேற்கு வங்க முதல்வராக இருந்த ஜோதிபாசு ஒரு முறை இப்படி கூறினார். அதாவது, 'பல மத்திய அரசுகள் திமுகவின் குரலை கேட்கும் நிலையில் இருந்திருக்கின்றன. ஆனால், அப்போதும் திமுக உச்சநீதிமன்ற தலைமை நீதிபதியாக ஒரு தலித் வர வேண்டும் எனக் குரல் கொடுத்திருக்கிறார்கள். நாடாளுமன்றத் தலைவரை தேர்ந்தெடுப்பதில் முக்கிய பங்காற்றியிருக்கின்றனர். ஆனால், ஒருபோதும் மத்தியில் தங்களுக்கு இருக்கும் செல்வாக்கைப் பயன்படுத்தி கவர்னர் பதவியை வாங்கியதில்லை.' எனக் கூறியிருந்தார். ஆட்டுக்கு தாடியும் நாட்டுக்கு கவர்னரும் தேவையில்லை என்பதில் அவர்கள் காலங்காலமாக தெளிவான நிலைப்பாட்டில் இருந்திருக்கிறார்கள். இந்த அரசியல் பார்வைதான் அவர்களுக்கான அரண். அதை என்றுமே கைவிட்டுவிடக்கூடாது.


http://dlvr.it/TDKmxx

Read More

Periyar 146: பெரியார் காலாவதியானவரா, காலம் கடந்தவரா? பிறந்ததினப் பகிர்வு

தந்தை பெரியாரின் பிறந்தநாளைக் கொண்டாடிக்கொண்டிருக்கும் தருணத்தில்தான் தமிழ்ச் சமூகத்தின் அடுத்த தலைமுறையின் எதிர்காலத்தில் கொள்ளிவைக்கும் அறிவிப்பை வெளியிட்டிருக்கிறது தமிழக அரசு. மத்திய பா.ஜ.க அரசின் கைப்பாவையாக இருக்கும் தமிழக அரசு, புதிய கல்விக்கொள்கை நடைமுறைக்கு வரும் முன்பே ஐந்தாம் வகுப்பு மற்றும் எட்டாம் வகுப்பு மாணவர்களுக்குப் பொதுத்தேர்வு என்று அறிவித்திருக்கிறது. பெரியாரை சுவரொட்டிகளில் மட்டும் போட்டுவிட்டு, அவர் கொள்கைகளைக் குப்பைத்தொட்டியில் தூக்கிப்போடும் தமிழக அரசின் பகுத்தறிவற்ற செயல்களை எதிர்ப்பதற்கும் நமக்குப் பெரியார் தேவைப்படுகிறார். Periyar

"கல்வி என்பதை ஒரு மனிதனுக்குக் கற்பிக்க வேண்டிய அவசியமெல்லாம் ஒருவன் தன் வாழ்நாளில் சுதந்திரத்தோடு வாழ்வதற்குத் தகுதிப்படுத்துவது என்பதேயாகும்" என்றார் பெரியார். உண்மையில் கல்வி என்பது பாடப்புத்தகங்களுடன் முடிந்துவிடுவதில்லை. அறிதலுக்கான பல திறப்புகளை உருவாக்குவதே கல்வி. அதனால்தான் பள்ளிக்கூடங்களில் புராணங்கள் கற்றுத்தருவதைவிடவும் நவீனக் கல்விக்கு அவர் முக்கியத்துவம் அளித்தார்.

"உலக ஞானமற்ற சோம்பேறிகள் என்றால் உபாத்தியாயர்களைத்தான் சொல்ல வேண்டும்" என்று அவர் ஆசிரியர்களைக் கடுமையாக விமர்சிக்கவும் தவறவில்லை. மனப்பாடக் கல்விமுறையைக் கடுமையாக விமர்சித்த பெரியார், "உருப்போட்டு ஒப்புவிப்பது என்பதே எந்தப் பரிட்சைக்கும் பாடமாக இருக்க முடியாது. அப்படியானால் அர்ச்சகனும் புரோகிதனும்தான் ஒப்புவிக்க முடியும்" என்று சொன்னார். சமூக விஞ்ஞானம், தேர்வுமுறைகள் ஒரு மாணவரின் திறமையையும் எதிர்காலத்தையும் தீர்மானிப்பதைக் கடுமையாக எதிர்த்த பெரியார், இன்று நமக்குத் தேவை.

பெரியாரின் சிறப்பு என்பதே அவர் காலங்கடந்து நிற்க விரும்பிய தலைவர் அல்ல என்பதுதான். "இன்னும் 50 ஆண்டுகளுக்குத்தான் என்னுடைய தேவை இருக்கும். அதற்குப் பிறகு ஈ.வெ.ராமசாமி என்ற மூடக்கொள்கைக்காரன் இருந்தான் என்று உலகம் பேசும்" என்றும் அவர் கூறினார். ஒருகாலத்தில் ஏற்றுக்கொள்ளப்படும் விஷயங்கள் இன்னொருகாலத்தில் ஏற்றுக்கொள்ளப்படுவதில்லை என்பதை அவர் சுட்டிக்காட்டினார். "எதிர்காலத்தில் சாதி, மதம், கடவுள் போன்றவை இருக்காது. அப்போது 'இவற்றையெல்லாம் ஈ.வெ.ராமசாமி என்று ஒருவர் எதிர்த்தார்' என்பதே கேலிப்பொருளாக இருக்கும்" என்று அவர் எதிர்பார்த்தார். அவர் இறந்து 45 ஆண்டுகள் கடந்துவிட்டோம். ஆனால், பெரியார் இன்றும் நமக்குத் தேவைப்படுகிறார் என்றால் சமூகம் இன்னும் பிற்போக்காக இருக்கிறது என்றே அர்த்தம். Periyar

பெரியார் காலங்கடந்து நிற்க விரும்பிய தலைவரில்லை. ஆனால், காலம் தாண்டிச் சிந்தித்தவர். அவர் வெறுமனே சமகாலச் சூழல்களுக்கான எதிர்வினைகளை மட்டும் நிகழ்த்தவில்லை. காலமாற்றங்களை அவர் உருவாக்கினார். எதிர்காலத்தில் உலகமும் மனிதச் சமூகமும் அடைய வேண்டிய மாற்றங்கள் குறித்து சிந்தித்தார். அதனால்தான் தமிழ்ப் பற்றையும் தமிழ்ப் புலவர்களையும் தமிழ் இலக்கியங்களையும் கடுமையாக விமர்சித்த பெரியார்தான், தமிழ் எழுத்துச் சீர்திருத்தத்தையும் முன்மொழிந்தார். இன்று நம் கணிப்பொறிக்கேற்ற தமிழ் வடிவத்தை உருவாக்கியது பெரியாரின் சாதனை. 'இனிவரும் உலகம்' என்னும் நூலில் 'எதிர்காலத்தில் அனைவரின் பையிலும் கம்பியில்லா தந்திச் சாதனம் இருக்கும்' என்றார். 'குழந்தை பெறுவதற்கு ஆண், பெண் சேர்க்கை தேவைப்படாத காலம் உருவாகும்' என்று யோசித்தவர் அவர். டெஸ்ட் டியூப் பேபியும் செல்போனும் அவர் கனவில் இருந்தன.

இவற்றைச் சொன்னதாலேயே அவர் குறி சொல்பவரோ தீர்க்கதரிசியோ, மகானோ தேவகுமாரனோ அல்ல. அப்படி யாரும் தன்னை ஆக்கிவிடக் கூடாது என்பதற்காகத்தான் தன் சிலைகளின் கீழ் கடவுள் மறுப்பு வாசகங்களை எழுதச் சொன்னார். தன்னுடைய ஒவ்வொரு உரையின் தொடக்கத்திலும் ''நான் சொல்வதை ஏற்றுக்கொள்ள வேண்டிய அவசியமில்லை. உங்கள் பகுத்தறிவு கொண்டு சிந்தியுங்கள். உங்கள் அறிவு ஏற்றுக்கொள்வதை ஏற்றுக்கொள்ளுங்கள். பொருந்தாதவற்றை விட்டுத்தள்ளுங்கள்" என்று கூறினார். Periyar

அவருடைய பகுத்தறிவு என்பது வெறுமனே நாத்திகமோ மூடநம்பிக்கை ஒழிப்போ அல்ல. சிந்தனைக்கான உரிமை, ஜனநாயகத்தின் உச்சம்தான் அவருடைய பகுத்தறிவு என்ற கருத்தாக்கம். "கற்பு என்கிற ஒன்று கிடையாது என்கிறீர்களே, உங்களுடைய மனைவி வேறொருவரிடம் போனால் ஏற்றுக்கொள்வீர்களா?" என்று அவரை கூட்டத்தில் கேட்கும் உரிமை இருந்தது. "இதை ஏன் என்னிடம் கேட்கிறீர்கள்? அதை முடிவு செய்ய வேண்டிய உரிமை என் மனைவியுடையது அல்லவா?" என்று பதிலளித்தார் பெரியார். இப்படியொரு பதிலையும் உலகத்தில் எந்தத் தலைவரும் அளித்திருக்க மாட்டார்கள். அவர்தான் பெரியார்!

பெண்ணியச் சிந்தனையாளர்களில் உலகளவில் முக்கியமான சிந்தனையாளர் என்று பெரியாரைச் சொல்லலாம். சமகாலத்தில் பேசப்படும் பல பெண்ணியச் சிந்தனைகளை 30-களில் பேசியவர் அவர். இன்றளவும் உலகளவில் கருக்கலைப்பு என்பது சமயத்துக்கு எதிரான சிந்தனையாகக் கருதப்படுகிறது. குடும்பக்கட்டுப்பாடு என்பது மக்கள்தொகைப் பெருக்கத்துக்காக என்ற பிரசாரம் தொடங்குவதற்கு முன்பு, அதை மக்கள் ஏற்றுக்கொள்ளத் தயாராக இல்லாத காலத்தில், மக்கள்தொகைப் பெருக்கத்துக்காக மட்டுமல்லாது பெண்களின் விடுதலைக்காகக் கருத்தடையை முன்வைத்தவர் பெரியார்.

பிள்ளை பெறும் இயந்திரமல்ல பெண்கள். குழந்தை பெறுவதா வேண்டாமா என்று முடிவு செய்ய வேண்டியவர்கள் பெண்கள்தான் என்றார். 'காதலுக்கு வழிவைத்து கருப்பாதை சாத்த கதவொன்று கண்டறிவோம். இதிலென்ன குற்றம்?' என்றார் பெரியாரியக்க புரட்சிக்கவிஞர் பாரதிதாசன். 'ஐயயோ, பெண்கள் குழந்தை பெறாவிட்டால் மனித சமூகம் விருத்தியடையாதே?" என்ற கேள்விக்குப் பெரியாரின் பதில், "மனித சமூகம் விருத்தியடையாவிட்டால் என்ன, மற்ற ஜீவராசிகள் விருத்தியடையட்டுமே! பெண்களை ஒடுக்கும் மனித சமூகம் விருத்தி அடைந்தால் என்ன, அடையாவிட்டால் என்ன?' அவர்தான் பெரியார்! Periyar and Maniammai

பெரியார் வெறுமனே பேச்சளவில் நிற்கவில்லை. இன்றைக்குத் திருமணம் செய்யாமல் தனியாக வாழும் பெண்கள், கணவனைப் பிரிந்து வாழும் பெண்கள், சிங்கிள் பேரண்ட், பாலியல் தொழிலாளர்கள் ஆகியோரின் நிலை குறித்தும் உரிமை குறித்தும் பேசுகிறோம். ஆனால், பெரியாரோ 1928-ல் செங்கல்பட்டு முதல் சுயமரியாதை மாகாண மாநாட்டில், 'தனியாக வாழும் பெண்கள், விதவைகள், விலைமகள் என்று தங்களைக் கருதிக்கொள்வோர் இந்த மாநாட்டில் சிறப்பாகக் கலந்துகொள்ள வேண்டும்' என்று அழைப்பு விடுத்தார். தனது வீட்டிலேயே பெண்களுக்கான முறைசாரா அமைப்பு ஒன்றையும் ஏற்படுத்தி, அதில் பெண்கள் தங்கள் பிரச்னைகள் குறித்து பேசுவதற்கும் வசதி செய்து தந்தார். வீட்டைவிட்டு வெளியேறும் பெண்கள், அநாதரவான பெண்கள் தங்குவதற்காக ஒரு விடுதியையும் நடத்தியிருக்கிறார் பெரியார்.

மூன்றாவது தஞ்சை மாவட்ட சுயமரியாதை மாநாட்டில் 22 வயதான சின்னராயம்மாள் என்ற பெண்ணின் சார்பாக ஒரு கோரிக்கை வைக்கப்பட்டிருக்கிறது. 50 வயதான ஓர் ஆணுக்கு மூன்றாம் தாரமாக வலுக்கட்டாயமாகத் திருமணம் செய்யப்பட்டிருந்தார் சின்னராயம்மாள். ‘குழந்தை வேண்டும்’ என்று அவரின் கணவர் கட்டாய உறவுகொள்ள முயன்றபோது, சின்னராயம்மாள் வீட்டைவிட்டு வெளியேறி பெரியார் நடத்திய விடுதியில் குடிபுகுந்தார்.

தேவதாசி முறையை ஒழிப்பதற்காகத் துணை நின்றவர் பெரியார். காங்கிரஸ் கட்சியின் தலைவர் சத்தியமூர்த்தி அய்யர், தேவதாசி முறையை ஆதரித்தபோது, அதை எதிர்த்த டாக்டர் முத்துலெட்சுமி அம்மையாருக்கு உறுதியுடன் துணைநின்றவர் பெரியார். மூவலூர் ராமாமிர்தம் அம்மையாரின் தேவதாசி ஒழிப்புப் போராட்டங்களுக்குத் தன்னை முன்னிறுத்தாமல் துணை நின்றார். ராமாமிர்தம் அம்மையாரின் நாவலான 'மதிகெட்ட மைனர்' நூலுக்கு அணிந்துரை, சாற்றுக்கவி ஆகியவற்றை எழுதியவர்கள் முழுக்கப் பெண்கள். தன்னை முன்னிறுத்தாமல் ஈரோட்டில் உள்ள தன் அச்சகத்தில் அந்த நாவலை அச்சிட்டவர் பெரியார். Periyar and Rajaji

சமீபத்தில் ஓர் ஈழத்தமிழர் திருமணத்தில் மணப்பெண் மணமகனுக்குத் தாலி கட்டியதற்காக அந்தப் பெண்ணைச் சொல்லத்தகாத வார்த்தைகளால் சமூகவலைதளங்களில் விமர்சிக்கின்றனர். ஆனால், 1935-ல் மாநில சுயமரியாதை சங்கப் பொருளாளர் வை.சு.சண்முகத்தின் மகளின் திருமணத்தில் மணப்பெண், மணமகனுக்குத் தாலி கட்டினார் என்றால் பெரியாரின் துணிச்சலை நாம் புரிந்துகொள்ளலாம். பொதுவாழ்க்கைக்காகத் தன்னை அர்ப்பணித்துக்கொண்டாலும் அதை எப்போதும் பெருமையாக அவர் கூறிக்கொண்டதில்லை. ஒரு மாநாட்டில் பெரியாரைப் பலரும் புகழ்ந்து தள்ளிக்கொண்டிருக்கிறார்கள். இறுதியாகப் பேசவந்த பெரியார், "நான் என்னென்னவோ கஷ்டங்களை அனுபவித்ததாகச் சொல்கிறார்கள். ஆனால், இவ்வளவு நேரம் என்னைப் புகழ்ந்தார்களே அதைக் கேட்பதுதான் நான் அனுபவித்த கஷ்டம்" என்றார்.

'பொதுநலமோ தியாகமோ பெருமைக்குரியதல்ல. பொதுவாழ்க்கையில் கிடைக்கும் திருப்தி என்பதும் சுயநலம்தான்' என்ற பெரியார், 'ஒருவர் பொதுவாழ்க்கைக்கு வந்துவிட்டால் தனிப்பட்ட மான, அவமானத்தைப் பார்க்க முடியாது' என்றார். எல்லோருக்கும் பொதுவான ஒழுக்கம் என்பதோ எல்லாக் காலத்துக்கும் பொருந்தும் ஒழுக்கம் என்ற ஒன்றோ கிடையாது என்றார். 'பிறர் உனக்கு எதைச் செய்யக் கூடாது என்று நினைக்கிறாயோ அதை நீ பிறருக்குச் செய்யாமல் இருப்பதுதான் ஒழுக்கம்' என்றார். இப்படிப் பல விஷயங்களில் அவர் தன் காலத்தைத் தாண்டி சிந்தித்த நவீனச் சிந்தனையாளராக இருந்தார். Periyar

அதனால்தான் அவர் காலாவதியான தலைவராக இல்லாமல், காலத்தைத் தாண்டி நின்ற, வென்ற தலைவராக, சிந்தனையாளராக இருக்கிறார். இன்று பெரியார் பெரியாரிஸ்ட்களைத் தாண்டி, பெரியார் இயக்கங்களைத் தாண்டி இளைஞர்களின் பேசுபொருளாக இருக்கிறார். சமூக வலைதளத்தில் பெரியாரை முன்வைத்து உரையாடும் லட்சக்கணக்கான இளைஞர்கள் உருவாகியிருக்கிறார்கள். குறிப்பாகப் பெண்கள் பெரியாரைக் கொண்டாடுகிறார்கள். இது தமிழகத்தில் மட்டுமல்ல. எந்த இந்தியைப் பெரியார் எதிர்த்தார் என்று சொல்லப்படுகிறதோ அந்த இந்தியில் பெரியாரின் சிந்தனைகள் மொழிபெயர்க்கப்படுகின்றன.

சாதி ஆதிக்கத்தால் தற்கொலை செய்துகொண்ட ஹைதராபாத் மாணவர் ரோகித் வெமுலா பெரியாரைத் தன் ஆதர்சமாக முன்னிறுத்தினார். வட இந்தியாவின் முற்போக்கு ஆளுமைகளான கன்ஹையா குமார், ஜிக்னேஷ் மேவானி போன்றவர்கள் பெரியாரைப் பேசுகிறார்கள். மதவாதமும் சாதியமும் ஆணாதிக்கமும் ஒற்றைத்துவ பண்பாட்டு ஆதிக்கமும் மேலெழும் சூழலில், பெரியார் இன்று இந்தியாவின் தேவை.Periyar

பெரியாரை வெறுமனே கடவுள் மறுப்பாளராகவும் பார்ப்பன எதிர்ப்பாளராகவும் மட்டுமே புரிந்துகொண்டு கொண்டாடுபவர்களும் சரி, நிராகரிப்பவர்களும் சரி இருதரப்புமே பரிதாபத்துக்குரியவர்கள். ஏனெனில், அவருடைய நாத்திகத்துக்கும் பார்ப்பன எதிர்ப்புக்கும் அடிப்படையாக இருந்தவை சாதியொழிப்பு சமத்துவச் சிந்தனையும் சகமனிதர்களை மதிக்கும் சுயமரியாதை வேட்கையும்தான். அவர் எந்தக் கோயில்களுக்கும் எந்தத் தனிப்பட்ட பார்ப்பனருக்கும் எதிராக வன்முறையைத் தூண்டவில்லை. அப்படியான சூழல் அமையும் காலகட்டங்களில் வன்முறையைத் தடுத்து அறத்தை நிலைநாட்டியவர். அவர்தான் பெரியார்!

சமகாலச் சூழலுக்கு ஏற்ப பெரியாரைக் கட்டமைக்க வேண்டிய கடமை அனைவருக்கும் இருக்கிறது. 'பறையன் பட்டம் ஒழியாமல் சூத்திரன் பட்டம் ஒழியாது' என்றார் பெரியார். இன்று அவருடைய கருத்துப்படி சூத்திர இழிவு ஒழியாமல் இருக்கலாம். ஆனால், 'சூத்திரன்' என்ற சொல் இன்றைய தலைமுறை அறியாத ஒன்றாக மாறியிருக்கிறது. ஆனால், இன்னமும் 'பறையன்' பட்டம் ஒழியவில்லை. சாதி ஒழிப்பை பார்ப்பன எதிர்ப்போடு நிறுத்தாமல் இடைநிலைச் சாதி ஆதிக்கத்தையும் எதிர்க்க வேண்டிய அவசியம் இருக்கிறது. கல்வி கற்க, பணிக்குச் செல்ல இன்று பெண்களுக்கு வாய்ப்பு அமைந்திருக்கிறது. ஆனால், இந்த உடையைத்தான் போட வேண்டும், இப்படித்தான் நடந்துகொள்ள வேண்டும் என்ற கட்டுப்பாடுகள் மாறவில்லை. வேலைக்கும் செல்ல வேண்டும், வீட்டிலும் சமைக்க வேண்டும் என்ற இரட்டை அடிமைமுறை உருவாகியிருக்கிறது. Periyar

பிள்ளை பெறுவதைப் பெண்கள்தான் தீர்மானிக்க வேண்டும் என்ற பெரியாரின் மண்ணில் பெண்கள் யாரைத் திருமணம் செய்ய வேண்டும் என்று சாதிச்சங்கத் தலைவர்கள் தீர்மானிக்கிறார்கள். சாதிவெறியும் ஆணவக்கொலையும் மதவாதமும் ஆணாதிக்கமும் இருக்கும்வரை பெரியார் இருப்பார். ஏனெனில் பெரியார் எங்கள் காலத்தின் கைத்தடி.

2019- செப் 17 எழுதப்பட்ட கட்டுரை


http://dlvr.it/TDKVWk

Read More

DMK Vs VCK: அண்ணா அறிவாலயத்தில் நடந்தது என்ன? | MODI | STALIN | THIRUMAVALAVAN Imperfect Show

இன்றைய இம்பர்ஃபெக்ட் ஷோவில் , 

* `விரிசல், நெருடல் இல்லை; இது தேர்தலுக்கானதல்ல' - திருமாவளவன்.

* தமிழ்நாட்டில் படிப்படியாக மதுவிலக்கு அமல்படுத்தப்படும்  மு.க.ஸ்டாலின் உறுதி! 

* மது ஒழிப்பு: அன்புமணி Vs திருமாவளவன் - புது பஞ்சாயத்து. 

* திமுக பிரமுகர் பெண் குறித்த சர்ச்சை பேச்சு; வெளியான ஆடியோ; பட்டுக்கோட்டை திமுகவில் சலசலப்பு.

* சிறுமி கொலை வழக்கில் சிறையில் அடைக்கப்பட்டிருந்த கைதி தற்கொலை! 

* நடிகைகள் குறித்து அவதூறு - மருத்துவர் காந்தராஜ் மீது 5 பிரிவுகளில் வழக்கு! 

* ``எதிர்க்கட்சித் தலைவர் என்னைப் பிரதமர் பதவிக்கு அழைத்தார்!" -நிதின் கட்காரி புது தகவல்.

* பதவி விலகுவதாக அரவிந்த் கெஜ்ரிவால் அறிவித்தது விளம்பர யுக்தி எனக் காங்கிரஸ் விமர்சனம்.

* 'முதல்வர் பதவிக்கு ஆசையில்லை' - சரத் பவார், காங்கிரஸ் எதிர்ப்பால் மனதை மாற்றிக்கொண்ட உத்தவ் தாக்கரே! 

* மோடி வளர்த்தும் புதிய கன்றுக்குட்டி! 

* Trump: ட்ரம்பை தீர்த்துக் கட்ட திட்டம் தீட்டியது ஏன்? கைது செய்யப்பட்ட ரியான் ரூத் யார்?

 காணொலியை முழுமையாக காண லிங்கை கிளிக் செய்யவும். 


http://dlvr.it/TDJc5h

Read More

'காங்கிரஸில் பலருக்கு துணிச்சல் இல்லை; சீமான் - `ஜீரோ’ தீர்வு' - கார்த்தி சிதம்பரம் ஓப்பன் டாக்

"கூவத்தைச் சுத்தம் செய்வதற்குப் பயன்படுத்தப்பட்ட தொகை குறித்து நீங்கள் வெள்ளை அறிக்கை கேட்டதுபோல், ‘முதல்வர் வெளிநாடு பயணம் குறித்தும் வெள்ளை அறிக்கை வெளியிட வேண்டும்’ என எதிர்க்கட்சிகள் கேட்கின்றனவே?"

"நான் பள்ளிக்குச் செல்லும் காலத்திலிருந்து கூவத்தைச் சுத்தம் செய்கிறோம் என்கிறார்கள். ஆனால் சுத்தமானதாகத் தெரியவில்லை. அண்மையில் நடந்த மாமன்ற கூட்டத்தில் மேயர், 'கூவத்தைச் சுத்தம் செய்வதற்கு ரூ.750 கோடி ஒதுக்கீடு செய்யப்பட்டுள்ளது. அதில் ரூ.529 கோடி செலவு செய்துள்ளோம்' என்றார். எனவேதான் வெளிப்படைத்தன்மை வேண்டும் என்பதற்காக இவ்வளவு ஆண்டுக்காலம் கூவத்தைச் சுத்தம் செய்ய எவ்வளவு தொகை செலவு செய்திருக்கிறீர்கள் என்று வெள்ளை அறிக்கை கேட்டேன். முதல்வரின் வெளிநாடு பயணம் குறித்து வெள்ளை அறிக்கை கேட்பதில் தவறு இல்லை.கூவம் நதி

அவர்கள் தினமும் அறிக்கை கொடுத்துக்கொண்டுதான் இருக்கிறார்கள். 10 ஆண்டுக்காலம் அ.தி.மு.க ஆட்சியிலிருந்தது. அவர்களும் இதுபோன்ற வெளிநாடு முதலீடுகளை ஈர்ப்பதற்கான மாநாடுகளை நடத்தியிருக்கிறார்கள். லட்சக்கணக்கான கோடி முதலீடு வந்திருக்கிறது என்று அறிக்கை வெளியிட்டார்கள். எனவே அவர்கள் முதலில் கிடைத்த முதலீடு, கட்டப்பட்ட தொழிற்சாலைகள், வேலைவாய்ப்பு குறித்து எடப்பாடி அறிக்கை வெளியிட வேண்டும். அதேபோல தி.மு.க-வும் மூன்று ஆண்டுகளில் கிடைத்த முதலீடுகள் குறித்து முதல்வர் வெளிப்படையாக அறிவிக்க வேண்டும்."

"இதன் மூலம் அ.தி.மு.க ஆட்சிக் காலத்தில் நடந்ததுதான் இப்போதும் நடக்கிறது என்கிறீர்களா?"

"என்னிடம் தரவுகள் இல்லாமல் எதுவும் சொல்ல முடியாது. செல்வி ஜெயலலிதா முதல்வரான பிறகு வெளிநாட்டுக்குச் சென்றது கிடையாது. கடைசியாக சினிமா சூட்டிங்கிற்கு சென்றிருப்பார். எடப்பாடி ஒருமுறைதான் சென்றார். ஆனால் முன்பு இருந்த முதல்வர்களைவிட ஸ்டாலின் வெளிநாட்டுப் பயணத்தில் வெளிப்படைத் தன்மை அதிகரித்துள்ளது."முதல்வர் ஸ்டாலின்

"முருகன் மாநாடு நடத்தியதன் மூலம் வரம்புகளை மீறி பா.ஜ.க போல அமைச்சர் சேகர்பாபு செயல்படுகிறார் என்கிற விமர்சனத்தை எப்படிப் பார்க்கிறீர்கள்?"

"அரசில் அறநிலையத்துறை இருக்கும் வரையில் கோயில்களில் நிகழ்ச்சிகளை நடத்தித்தான் ஆக வேண்டும். மாநாடு நடத்தி முருகன் பெருமை குறித்துப் பேசியதில் பெரிய தவறாகத் தெரியவில்லை. தி.மு.க-வுக்கு என்று ஒரு கொள்கை இருக்கிறது. ஆனால் அரசாங்கம் மதச்சார்பற்ற கொள்கையில் இருக்கிறது. கடவுள் மறுப்பு கொள்ளை இருப்பதால் அறநிலையத்துறையை மூட முடியாது."பழனி முத்தமிழ் முருகன் மாநாடு'10 ஆண்டுகளுக்கு பிறகு தேர்தல்... காங்கிரஸ், பாஜக மோதல்' - பரபர ஜம்மு காஷ்மீர் தேர்தல்

"செல்வப்பெருந்தகையின் பாதுகாப்பு வாபஸ், வி.சி.க கொடிக்கம்பத்துக்குத் தடை எனச் சமீப காலமாக தி.மு.கவுக்கும், அதன் கூட்டணிக் கட்சிகளுக்கும் இடையில் முரண் நிலவி வருகிறதே?"

"முரண்பாடுகள் இருக்கத்தான் செய்யும். கூட்டணி வைத்திருக்கிறோம் என்பதற்காகவே அனைத்து விஷயங்களிலும் ஒன்றுபட வேண்டிய அவசியம் இல்லை. அப்படி இருந்தால் நாங்கள் ஒரே கட்சியாக ஆகிவிடலாம்தானே. எங்களுக்கு என்று சில கோட்பாடுகள் இருக்கும். அதேபோல அவர்களுக்கு என்று சில கோட்பாடுகள் இருக்கும். அவர்கள் அரசாங்கத்தில் இருக்கிறார்கள். நாங்கள் இல்லை. முரண் இருப்பதால் எங்களுக்குள் பிரச்னை இருப்பதாக அர்த்தம் இல்லை. மதச்சார்பின்மை, பா.ஜ.க-வை தனிமைப் படுத்த வேண்டும் என்கிற கொள்கையில் ஒன்றாக இருக்கிறோம்." திருமாவளவன்

"ஆனால் 'யாருடைய தயவில் ஆட்சியமைக்க வேண்டும் என்கிற அவசியம் எங்களுக்கு இல்லை' என்கிறாரே தி.மு.க அமைச்சர் ரகுபதி?"

"அது அவர்களுடைய பார்வை. அவர்கள் மெஜாரிடியாக இருக்கிறார்கள். அவர்களுக்கு யாருடைய தயவும் தேவையில்லை. ஆனால் தேர்தலின் போது யார் எத்தனைச் சீட்டில் நிற்கிறார்கள். எவ்வளவு இடங்களில் வெற்றி பெறுகிறார்கள் என்பதைப் பார்த்துவிட்டுத்தான் முடிவு சொல்ல முடியும். எல்லா கட்சிகளும் தங்களுடைய சொந்தக் காலில் நிற்க வேண்டும் என்கிற விருப்பத்தைச் சொல்வதில் தவறு இல்லை!"அமைச்சர் ரகுபதி

"இந்த சூழலில் வி.சி.க-வின் மாநாட்டுக்கு அ.தி.மு.க-வை தொல்.திருமாவளவன் அழைத்திருப்பது சந்தேகத்தை மேலும் கூட்டுகிறதே?"

"வி.சி.க சுதந்திரமான அரசியல் கட்சி. அவர்கள் பிற அரசியல் கட்சிகளுடன் உறவு வைத்துக்கொள்ளத்தான் செய்வார்கள். கொள்கை ரீதியாக பா.ஜ.க-வைத்தான் விரோதியாகப் பார்ப்பார்கள். பிற கட்சிகளை அப்படிப் பார்க்க முடியாது. பா.ம.க-வுடன் முரண்பாடு இருக்கலாம். பெரிய முரண்பாடுகள் இல்லாத கட்சிகளை மேடைக்கு அழைப்பதில் ஒரு விசித்திரமும் கிடையாது."எடப்பாடி பழனிசாமி

"ஆனால் இதன் மூலமாக வரும் சட்டப்பேரவை தேர்தலில் கூட்டணியில் மாற்றங்கள் ஏற்படலாம் என்கிற பேச்சு எழுகிறதே?"

"அதை இப்போது சொல்ல முடியாது. இன்னும் 18 மாதங்கள் இருக்கின்றன. யார் களத்தில் ஆடப்போகிறார்கள். யார் எந்த அணியில் இருக்கப் போகிறார்கள் என்பதை இப்போதே எப்படிச் சொல்ல முடியும். இன்று இந்தியா கூட்டணியில் இருக்கிறோம் என்றுதான் சொல்ல முடியும். எதிர்காலம் குறித்துச் சொல்லும் சக்தி என்னிடம் இல்லை."முதல்வர் ஸ்டாலின் / திமுக

"ஆட்சி அதிகாரத்தில் பங்கு வேண்டும் என நீங்கள் சொல்லிருந்தீர்கள். ஆனால் அதை தி.மு.க கண்டுகொள்ளவில்லையே?"

"கண்டிப்பாக வேண்டும். எல்லா அரசியல் கட்சிகளுக்கும் அந்த ஆசை இருக்கிறது. ஆட்சிக்கு வருவதற்கு தானே அரசியல் கட்சிகளை ஆரம்பிக்கிறோம். கிரிக்கெட்டில் பேட் பிடிப்பவர்கள் எல்லோரும் ரன் அடிக்க வேண்டும் என்றுதானே நினைப்பார்கள். வெறுமென போட்டோ எடுத்துவிட்டுச் செல்ல விரும்ப மாட்டார்கள். அதேதான் அனைத்து அரசியல் கட்சிக்கும். நான் எனது கட்சி தொண்டர்களிடம் தெரிவித்தேன். அதை அவர்கள் ஏற்றுக்கொண்டு விட்டார்கள்"செல்வப்பெருந்தகை, கார்த்தி சிதம்பரம்

"கோரிக்கை நியாயமாக இருந்தபோதும் உங்களுடன் காங்கிரஸ் தலைவர்களே துணை நிற்கவில்லையே?"

"எனக்கு இருக்கும் துணிச்சல் பலருக்கு இல்லை. சிலர் மன ரீதியாக வாழ்த்துகிறார்கள். ஆனாலும் என்னை எதிர்க்கவில்லையே?. ஈவிகேஎஸ் மட்டும் எதிர்ப்பு தெரிவித்தார். அவருக்கு யாரும் ஆதரவு தரவில்லை!"சத்தியமூர்த்தி பவன்

"இதை விட்டுவிடலாம் கூவம் நதி குறித்து வெள்ளை அறிக்கை கேட்டதாகட்டும், காலிப்பணியிடங்களை நிரப்ப வேண்டும் என்கிற உங்களது அடிப்படை கோரிக்கைகளுக்குக் கூட அவர்கள் ஆதரவு தரவில்லையே?"

"அவர்கள் ஆதரவு தரவில்லை என்பதை ஒத்துக்கொள்கிறேன். என்னைப்போல் வெளிப்படையாகக் கருத்துச் சொல்வதற்கு மனநிலை இல்லை. அதனால் எனக்கு ஆதரவு இல்லை என்று அர்த்தம் கிடையாது. காங்கிரஸ் கட்சியின் 90% தொண்டர்கள் நான் பேசுவது நியாயம் என்றுதான் சொல்வார்கள். ஒவ்வொருவருக்கும் சில தர்ம சங்கடங்கள், நெருடல்கள், கட்டுப்பாடுகள் இருக்கின்றன. அதற்குள் அவர்கள் இயங்குகிறார்கள்"விஜய்

"விஜய் கட்சி மாநாடு அறிவிக்கப்பட்டுவிட்டது. வரும் தேர்தலில் களமாட இருக்கிறார். அது குறித்து?"

"கட்சியின் பெயர், கொடி தெரியும். வேறு எதுவும் எனக்குத் தெரியாது. அவர் என்ன நிலைப்பாட்டில் இருக்கிறார் என்று சொன்னால்தானே எடை போட முடியும். அவர் தமிழ்நாடு அரசியலுக்கு மாற்றம் என்றால், தி.மு.க-வுக்கு மாற்றா அவர்?. தி.மு.க-வில் இருந்து எந்த விதத்தில் மாறுபடுகிறார் என்பதை முதலில் சொல்ல வேண்டும். தி.மு.க அரசு, கொள்கைகள், கோட்பாடுகளுக்கு மாற்றுக் கருத்துச் சொல்ல வேண்டும். அப்படிச் சொன்னதாகத் தெரியவில்லை. அவர் திரைத்துறையைச் சேர்த்தவர் என்பதால்தான் எல்லோரும் பேசுகிறார்கள். இதுவே அவர் பொருளாதார நிபுணராக இருந்து கட்சி ஆரம்பிப்பதாக அறிவித்தால் கண்டுகொள்ள மாட்டார்கள்"ஜெயலலிதா'10 ஆண்டுகளுக்கு பிறகு தேர்தல்... காங்கிரஸ், பாஜக மோதல்' - பரபர ஜம்மு காஷ்மீர் தேர்தல்

"ஆனாலும் சினிமாவில் இருந்து வந்தவர்கள்தானே தமிழக அரசியலில் பெரும் தாக்கத்தை ஏற்படுத்தி இருக்கிறார்கள்?"

"எம்ஜிஆர் மட்டும்தான் திரையுலகத்திலிருந்து வந்து வெற்றிபெற்றார். அதுவும் முதலில் ஒரு அரசியல் கட்சியிலிருந்தார். பிறகு அங்கிருந்து பிரித்து, பாதியை எடுத்துவந்துதான் கட்சி ஆரம்பித்து வெற்றி பெற்றார். லெட்டர் பேடில் கட்சி ஆரம்பித்து வெற்றிபெறவில்லை. எந்த நடிகரும் லெட்டர் பேடில் கட்சி பெயரை எழுதி, கொடி வரைந்து வெற்றிபெற்றது கிடையாது. எதிர்காலத்திலும் வெற்றிபெற மாட்டார்கள். நடிகர் திலகம் சிவாஜி கணேசன், விஜயகாந்த், கமலஹாசன், டி.ராஜேந்தர், பாக்யராஜ் பட்டியலில் விஜய்யும் ஒருநாள் சேர்ந்து கொள்வார்"பாக்யராஜ்

" 'நீங்கள் ஒருமுறை இளைஞர்கள் காங்கிரஸ் பக்கம் வரவில்லை' எனச் சொல்லிருந்தீர்கள். விஜய்க்கு இளைஞர்கள் ஆதரவு அதிகமாக இருப்பதாகச் சொல்லப்படுவது காங்கிரஸுக்கு மேலும் பின்னடைவை ஏற்படுத்துமா?"

"இளைஞர் இல்லை. ரசிகர்கள்தான் இருக்கிறார்கள். அவரது சினிமா ரசிப்பவர்களைத் தாண்டி பிறர் செல்வதற்குக் காரணமே இல்லை. எதன் அடிப்படையில் செல்வார்கள். இவர் ஒன்றும் சமுதாய சீர்திருத்தத்தை நடத்திவிட்டு, அரசியல் கட்சியாக மாறவில்லை. சுதந்திரப் போராட்டத்துக்காக உருவாகி பிறகு அரசியல் கட்சியாகக் காங்கிரஸ் மாறியது. தி.மு.க சமுதாய சீர்திருத்தத்தைச் செய்துவிட்டு பிறகு அரசியல் கட்சியாக மாறியது. இதுபோல் எந்த சமூக காரணங்களுக்காகவும் விஜய் வரவில்லை. அடித்தட்டு மக்களுக்கு ஆளும் கட்சி என்ன செய்யவில்லை என்றும் தான் என்ன மாறுபட்டுச் செய்யப்போகிறேன் என்றும் சொல்லவில்லை. ஆளும்கட்சியை விமர்சனம் செய்து பேசுவதற்குத் தயாராக இருக்கிறாரா?. பிறகு எப்படி அவரை மாற்றம் என எடுத்துக்கொள்ள முடியும்."சீமான்

"இதேபோல் மக்களின் பிரச்னைகளுக்குத் தமிழக காங்கிரஸ் குரல் கொடுக்கவில்லை என்கிற விமர்சனமும் இருக்கிறதே?"

"இதை நீங்கள் மாநில தலைவரிடம்தான் கேட்க வேண்டும். நம்ம முன்னேறும் நடுத்தர வர்க்க மாநிலம். போராட்டத்துக்கொல்லா மக்கள் யாரும் வரமாட்டார்கள். அநியாயம் நடக்கும் இடத்தில்தான் மக்கள் நிற்பார்கள். என் மனதில் படுவதை நான் பேசுகிறேன். மாநில தலைவருக்கென்று சில தர்ம சங்கடங்கள், கட்டுப்பாடுகள் இருக்கின்றன. அந்த சீட்டில் இருப்பவர்களுக்குத்தான் அது தெரியும். நான் அதில் இல்லை"தமிழிசை செளந்தரராஜன்

"ஆனால் விஜயை பார்த்து தி.மு.க பயப்படுகிறது எனத் தமிழிசை சொல்கிறாரே?"

"யாரும் பயப்படவில்லை. திரைத்துறையைச் சேர்த்தவர் என்பதால் ஊதி பெரிதாக்குகிறார்கள். அக்கா தமிழிசையின் நிலையைக் கண்டு வருத்தமாக இருக்கிறது. சவுரியமாக இரண்டு மாநிலத்துக்கு ஆளுநராக இருந்தார். அவரை கட்சியில் சித்து விளையாட்டு செய்து பஸ் ஸ்டாண்டில் ஒட்டுக்கேட்க வைத்து காலிசெய்து விட்டார்கள் என வருத்தமாக இருக்கிறது."ராகுல் காந்தி

"விஜய் மாநாட்டில் ராகுல் காந்தி கலந்து கொள்வதாகச் சொல்லப்படுகிறதே?

"ஒபாமா கூட கலந்து கொள்வதாக கேள்விப்பட்டேன் (சிரிக்கிறார்..)"அண்ணாமலை'10 ஆண்டுகளுக்கு பிறகு தேர்தல்... காங்கிரஸ், பாஜக மோதல்' - பரபர ஜம்மு காஷ்மீர் தேர்தல்

" 'அந்நிய மண்ணிலிருந்து தாய்நாட்டை ராகுல் காந்தி இழிவு படுத்தி உள்ளார்' என அண்ணாமலை கூறியுள்ள கருத்தை எப்படிப் பார்க்கிறீர்கள்?"

"அண்ணாமலை முதலில் ஒழுங்காகப் புத்தகங்களைப் படிக்கச் சொல்லுங்கள் (மீண்டும் சிரிக்கிறார்..)"பாஜக

"இதேபோல, 'ராகுல் காந்தி இந்திய ஜனநாயகத்தில் ஒரு கரும்புள்ளி' என பா.ஜ.க-வின் செய்தித் தொடர்பாளர் கவுரவ் பாட்டியா கடுமையாக விமர்சனம் செய்திருக்கிறாரே?"

"எதார்த்த உண்மையை எடுத்துச் சொன்னால் அவர்களுக்கு ஏன் கசக்கிறது. இந்தியாவில் இருக்கும் உண்மை நிலையைப் பேசுகிறார். வெளிநாட்டில் பேசினால் என்ன?. இங்குப் பேசினால் என்ன?. இன்று இருக்கும் தொழிநுட்ப வளர்ச்சியில் ஸ்பேஸ் ஸ்டேஷனில் இருந்து கூட பேசலாம். இங்கு இருந்து பேசினால் நியாயம், அமெரிக்காவிலிருந்து பேசினால் நியாயம் இல்லை என்றால் எப்படி?. அவர் ஒரு கருத்தைச் சொல்கிறார். அதற்கு முடிந்தால் பதில் சொல்லுங்கள். அமெரிக்க ஜனநாயக கட்சி என்னை ஒருமுறை மாநாட்டுக்கு அழைத்ததின் பேரில் சென்றேன். அதற்கு நான் அவர்களுடன் தொடர்பு வைத்திருக்கிறேன் என்று ஆகிவிடுமா?"சீமான்

"சீமான் ஆட்சிக்கு வந்தால் எந்த மாற்றமும் வராது என நீங்கள் சொல்கிறீர்கள். ஆனால் அவர் தமிழகத்தை வளர்ச்சிப் பாதைக்குக் கொண்டு செல்வேன், இளைஞர்களுக்கு வேலைவாய்ப்பு என பல்வேறு விஷயங்களை முன்னிறுத்தி அரசியல் செய்கிறாரே?"

"இளைஞர்களுக்கு வேலைவாய்ப்பு என்றால் என்ன செய்வார். அனைத்தையும் தேசிய மயமாக்குவாரா அல்லது தனியார் மயமாக்குவாரா?. தனியார்த்துறையில் தமிழர்களுக்கு மட்டும் வேலைவாய்ப்பு என்பது சட்ட ரீதியாக நடைபெறாத ஒன்று. இப்படிப்பட்ட சட்டத்தைக் கர்நாடகாவில் கொண்டுவந்தார்கள். ஆனால் நடைமுறைப் படுத்த முடியவில்லை. இந்திய யூனியனில் அப்படிச் செய்ய முடியாது. ஒருவேளை அப்படி நடந்தால் கர்நாடகாவில், மும்பையில், டெல்லியில் வேலை செய்து கொண்டிருக்கும் தமிழர்களின் நிலை என்னவாகும்?. அதற்கெல்லாம் சீமான் தீர்வு வைத்திருக்கிறாரா?. சும்மா வீரவசனம் பேசுகிறார்.மகா விஷ்ணு - MahaVishnu

நடைமுறையில் ஜீரோ தீர்வுதான் சீமானிடம் இருக்கிறது. சீமான் ஆட்சிக்கு வந்தால் தமிழ்நாடு தனியாகப் பிரிந்துவிடுமா?. தமிழ்நாட்டில் தமிழர்களுக்கு எப்படி முக்கியத்துவம் இல்லை என்று பேசுகிறார். தமிழ் படிக்க வேண்டாம், பேச வேண்டாம் எனச் சொல்கிறார்களா?. தமிழராக இருந்தால் வெளியேறுங்கள் என்று சொல்கிறார்களா?. தமிழ்நாட்டில் தமிழர்களுக்கு எங்கு மரியாதை இல்லாமல் இருக்கிறது?. உலகமெங்கும் மரியாதை இருக்கிறது. சீமான் தரவுகளை வைத்துக்கொண்டு பேச வேண்டும். மேலோட்டமாக பேசக்கூடாது"

"மகா விஷ்ணு சர்ச்சைக்குரிய வகையில் பேசியது, விநாயகர் தினம் சுற்றறிக்கை எனப் பள்ளிக் கல்வித்துறையின் ஏராளமான சர்ச்சைகள் நிலவுகின்றதே?"

"அரசுப் பள்ளிகள் மதச்சார்பற்றதாக இருக்க வேண்டும். எந்த மதத்தையும் யார் மீதும் திணிக்கக் கூடாது. மகா விஷ்ணு பேசியதை ஏற்றுக்கொள்ள முடியவில்லை. முதலில் அவர் ஆன்மீக பேச்சாளர் அல்ல. ஒரு காமெடி பீஸ். காமெடியாக இருந்துவிட்டு புது நித்தியானதாகவாக வந்திருக்கிறார். இவருக்கு உண்மையாக மகா விஷ்ணு என்றுகூட வீட்டில் பெயர் வைத்திருக்க மாட்டார்கள். விஷ்ணு அல்லது மகா என்றுதான் வைத்திருப்பார்கள் என நினைக்கிறன. இதுபோன்ற நபர்களின் பின்னணியைப் பரிசோதனை செய்த பிறகே பள்ளிக்குள் அனுமதித்திருக்க வேண்டும். பாவம் செய்ததால்தான் மாற்றுத்திறனாளியாக பிறந்திருக்கிறாய் என்று சொல்வதெல்லாம் ஏற்றுக்கொள்ள முடியாது. அவரை மனநலம் குன்றியோருக்கான மருத்துவமனையில் சேர்க்க வேண்டும்."கார்த்தி சிதம்பரம்

"திருவள்ளுவர், வள்ளலார் கூறிய கருத்துக்களைத்தான் மகா விஷ்ணு பேசியிருக்கிறார் என்கிற பா.ஜ.க-வின் கருத்தை எப்படிப் பார்க்கிறீர்கள்?"

"திருக்குறளை எப்படி வேண்டுமானாலும் மாற்றலாம். அதில் நல்லது செய்தால் நல்லது நடக்கும் என்றுதான் சொல்லப்பட்டுள்ளது. பூர்வ ஜென்மம் குறித்தெல்லாம் பேசவில்லை. அறிவியல் ரீதியாக முன் ஜென்மம் இருப்பதாக நிரூபிக்க முடியுமா?"

Junior Vikatan-ன் பிரத்யேக Whatsapp Group...



இணைவதற்கு இங்கே க்ளிக் செய்யவும்...
https://bit.ly/3PaAEiY />
வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்...
https://bit.ly/3PaAEiY'10 ஆண்டுகளுக்கு பிறகு தேர்தல்... காங்கிரஸ், பாஜக மோதல்' - பரபர ஜம்மு காஷ்மீர் தேர்தல்


http://dlvr.it/TDJFTQ

Read More

Thirumavalavan: `விரிசல், நெருடல் இல்லை; இது தேர்தலுக்கானதல்ல' - முதல்வரைச் சந்தித்த திருமாவளவன்

விடுதலைச் சிறுத்தைகள் கட்சித் தலைவர் திருமாவளவனின் எக்ஸ் தளத்தில் சனிக்கிழமை அன்று, ஆட்சியில் அதிகாரப் பகிர்வு குறித்த வீடியோ ஒன்று பதிவிடப்பட்டு, டெலிட் செய்யப்பட்டு, மீண்டும் பதிவிடப்பட்டது சர்ச்சையை ஏற்படுத்தியிருந்தது.திருமாவளவன்

சமூக வலைத்தளங்களில் இது பேசுபொருளானது. திமுக கூட்டணியில் அங்கம் வகிக்கும் நிலையில் சமீபத்தில் விடுதலைச் சிறுத்தைகள் நடத்தும் மது ஒழிப்பு மாநாட்டிற்கு அனைத்து கட்சிகளுக்கும் திருமாவளவன் அழைப்பு விடுத்திருந்தார். அப்போதும் அந்த அழைப்பு அதிமுகவுக்கும் தான் என பதில் வர, அதுவே கூட்டணிக்குள் பேசுபொருளாகியிருந்தது. மேலும் திமுகவுக்கும் விசிகவுக்கு இடையில் விரிசல் இருப்பதாகவும் விவாதங்கள் கிளம்பத் தொடங்கின.

இந்நிலையில் இன்று முதலமைச்சர் ஸ்டாலினை திருமாவளவன் சந்தித்தார். சந்தித்த பிறகு செய்தியாளர்களின் கேள்விக்குப் பதிலளித்த திருமாவளவன், ``முதலீடுகளை ஈர்ப்பதற்கு அமெரிக்கா பயணம் மேற்கொண்டு, அதை வெற்றிகரமாக முடித்து தமிழ்நாடு திரும்பியிருக்கும் முதல்வர் ஸ்டாலினை சந்தித்தோம். பல்லாயிரகணக்கான முதலீடுகளை ஈர்த்து, 19 ஒப்பந்தங்கள் கையெழுத்தாகி, தமிழ் நாட்டுக்கு அந்நிய முதலீட்டுக்கான வாய்ப்பு கிடைத்திருக்கிறது. இந்த வரலாற்று முக்கியத்துவம் வாய்ந்த பயணத்தை முடித்திருக்கும் முதல்வர் ஸ்டாலிக்கு வாழ்த்துகள் தெரிவித்தோம்.முதல்வர் ஸ்டாலின்

அக்டோபர் 2-ம் தேதி நடத்தவிருக்கும் மது ஒழிப்பு மகளிர் மாநாடு தொடர்பாக, இரண்டு முக்கியக் கோரிக்கைகளை முன்வைத்து பரப்புரை மேற்கொண்டு வருகிறோம். அதில் ஒன்று, தமிழ்நாட்டில் அரசின் மதுபான விற்பனை இலக்கை படிப்படியாக குறைக்க வேண்டும். இரண்டாவது, அரசமைப்புச் சட்டம் உறுப்பு எண் 47-ன் படி, மதுவிலக்கை படிப்படியாக அனைத்து மாநில அரசுகளும் கொண்டுவரவேண்டும் என மத்திய அரசை வலியுறுத்துவதாகும். மருத்துவக் காரணங்களுக்காகவே தவிர மற்ற எந்த நுகர்வு போதைப்பொருளும் பயன்பாட்டில் இருக்கக் கூடாது. அதைத் தடை செய்ய வேண்டும் என்பதுதான், உறுப்பு 47.

பேரறிஞர் அண்ணா மதுவிலக்கில் உறுதியாகவும், உடும்புப் பிடியாகவும் இருந்தார். இந்திய ஒன்றிய அரசுக்கும் அழுத்தம் கொடுத்திருக்கிறார். இதே கருத்தை முத்தமிழ் அறிஞர் கலைஞரும் வலுவாகப் பேசியிருக்கிறார். அதைப் பின்பற்றி ஒன்றிய அரசை வலியுறுத்த வேண்டும் என தி.மு.கவின் 75-ம் ஆண்டு பவளவிழா காணவிருக்கும் முதல்வர் ஸ்டாலினிடம் கோரிக்கை மனு ஒன்றை வழங்கியிருக்கிறோம்.திருமாவளவன்

அந்த மனுவைப் படித்த முதல்வர் ஸ்டாலின், 'மதுவிலக்கு என்பது தி.மு.க-வின் கொள்கைதான். எனவே, மதுவிலக்கு மாநாட்டில், தி.மு.க சார்பில் அமைப்புச் செயலாளர் ஆர்.எஸ்.பாரதியும், செய்தித் தொடர்பு செயலளர் டி.கே.எஸ் இளங்கோவனும் கலந்துகொள்வார்கள். இதை உங்களுடன் ஒன்றிய அரசின் கவனத்துக்கு எடுத்துச் சொல்லி, அழுத்தம் கொடுக்க விரும்புகிறோம். மதுவிலக்கு தமிழ்நாட்டில் வரவேண்டும் என்பதில் எந்த மாற்றுக்கருத்தும் கிடையாது. சில நிர்வாக சிக்கலை கவனத்தில் கொண்டு, படிபடியாக அதை நடைமுறைப்படுத்துவோம்' எனக் கூறியிருக்கிறார்.

அதிகாரத்தில் பங்கு என்பது குறித்தெல்லாம் எதுவும் பேசவில்லை. அது 1999-லிருந்து பேசிவரும் எங்களின் கருத்து. தற்போது சமூகவலைதளங்களில் பகிரப்பட்டு வருகிறது. அந்தக் கோரிக்கையை எப்போதும் நாங்கள் பேசிக்கொண்டுதான் வருகிறோம்... தொடர்ந்து பேசுவோம். அதில் எந்த மாற்றுக்கருத்தும் இல்லை. எந்த நேரத்தில் எந்த கொள்கையை, கோட்பாட்டை, நிலைப்பாட்டை பேச வேண்டுமோ, அந்த நேரத்தில் அதைப் பேசுவோம்.திருமாவளவன்

இந்த மாநாட்டுக்கும் தேர்தலுக்கும் எந்த சம்பந்தமும் இல்லை. பல்லாயிரக்கணக்கான பெண்களின் கோரிக்கையைதான் இந்த மாநாட்டின் மூலம் முன்னிறுத்துகிறோம். இதைத் திசைதிருப்ப வேண்டாம். இந்த மாநாட்டில் பங்குபெற வேண்டும் என தி.மு.க-வுக்கு நாங்கள் நேரடியாக அழைப்புவிடுக்கவில்லை. ஆனால், முதல்வர் தானாகவே இருவர் பங்கேற்பார்கள் எனக் கூறியிருக்கிறார். இந்தக் கருத்தில் உடன்படுபவர்கள் எங்கள் மாநாட்டில் பங்குபெறுவதில் எந்த ஆட்சேபனையும் இல்லை.

தி.மு.க-வுக்கும் வி.சி.க-வுக்கும் மத்தியில் எந்த விரிசலும், நெருடலும் இல்லை. எங்கள் கொள்கை நிலைபாட்டில் உறுதியாக நின்று அதை முன்னிறுத்துகிறோம். இது ஒரு கட்சிக்கான பிரச்னை இல்லை. இது எல்லோருக்குமான பிரச்னை. யாரெல்லாம் மது விலக்குக்கு உறுதியாக குரல்கொடுக்கிறார்களோ அவர்கள் எல்லோரும் இதில் பங்கெடுக்கலாம்.திருமாவளவன்

இந்திய ஒன்றிய அரசு இதில் எங்களுக்கு எந்தப் பொறுப்பும் இல்லை என்பதுபோல வேடிக்கை பார்க்கிறது. இந்தியா முழுவதும் போதைப் பொருள் புழக்கம் தீவிரமாக இருக்கிறது. 4 மாநிலங்களைத் தவிர அனைத்து மாநிலங்களிலும் அரசே முன்னின்று மதுவை விற்பனை செய்கிறது. இதில் ஒன்றிய அரசுக்கு பொறுப்பு இருக்கிறதா இல்லையா...

அரசமைப்புச் சட்டம் 44-ன் படி பொது சிவில் சட்டம் கொண்டுவர இந்திய ஒன்றிய அரசுக்கு உரிமை இருக்கிறது எனக் கூறும் பா.ஜ.க-வினர், அதேபோல அரசமைப்புச் சட்டம் 47-யைப் பயன்படுத்தி, மது ஒழிப்பு தொடர்பாக ஏன் ஒரு சட்டம் கொண்டுவரக்கூடாது. இதைதான் அண்ணா அன்று வலியுறுத்தினார். அந்த கோரிக்கையைதான் இன்று வி.சி.க முன்னிறுத்துகிறது. இதில் உடன்படுவதால்தான் முதல்வர் ஸ்டாலின் இரண்டு பிரதிநிதிகளை அனுப்ப முன்வந்திருக்கிறார்" எனக் குறிப்பிட்டிருக்கிறார்.Thirumavalavan: டெலிட் செய்யப்பட்டு மீண்டும் பதியப்பட்ட வீடியோ; நடந்தது என்ன? - திருமாவளவன் விளக்கம்


http://dlvr.it/TDHYXX

Read More

Trump: ட்ரம்பை தீர்த்துக் கட்ட திட்டம் தீட்டியது ஏன்? கைது செய்யப்பட்ட ரியான் ரூத் யார்?

முன்னாள் அமெரிக்க அதிபர் டொனால்ட் ட்ரம்ப்பைக் குறி வைத்து மீண்டும் துப்பாக்கிச்சூடு நடைபெற்றுள்ளது. தெற்கு ஃப்ளோரிடாவில் நடைபெற்ற இந்த சம்பவத்தில் 58 வயதான ரியான் விஸ்லி ரூத் என்பவர் கைது செய்யப்பட்டுள்ளார்.

துப்பாக்கிச் சூடு நடைபெற்றபோது ட்ரம்பின் கோல்ஃப் மைதான எல்லையில் இருந்த சீக்ரட் சர்வீஸ் ஏஜென்ட்கள் குற்றவாளியை நோக்கிச் சுட்டுள்ளனர். ஏஜென்ட்களிடம் இருந்து கருப்பு நிற காரில் தப்பிச் சென்றுள்ளார். Trump

துப்பாக்கிச் சூடு சம்பவம் நடந்த இடத்தில் உயர் சக்திவாய்ந்த ஏகே 47, ஸ்கோப்வ் மற்றும் கோப்ரோ கேமரா கண்டெடுக்கப்பட்டது. காரில் தப்பியவரைச் சாட்சிகளின் உதவியுடன் துரத்திப் பிடித்துள்ளனர். 

ரியான் வய்ஸ்லி ரூத்



நியூயார்க் டைம்ஸ் பத்திரிகை தெரிவிப்பதன்படி, ரியான் ரூத், நார்த் கரோலினா மாகாணத்தைச் சேர்ந்த முன்னாள் கட்டடத் தொழிலாளி. தற்போது ஒரு நிறுவனம் வைத்திருக்கிறார்.

இவருக்கு இராணுவப் பின்னணி எதுவும் இல்லை என்றாலும், ரஷ்யாவுக்கு எதிராகச் சண்டையிட விருப்பப்படுவதாக அறிவித்துள்ளார். ஆன்லைனில் அன்றாட அரசியல் நிகழ்வுகள் குறித்துக் கருத்துச் சொல்பவராக அறியப்படுகிறார்.

2022ம் ஆண்டு அவரது எக்ஸ் கணக்கில் உக்ரைன் - ரஷ்யா போரில் சண்டையிட விருப்பப்படுவதாகப் பதிவிட்டுள்ளார்.ட்ரம்பை கொலை செய்ய முயன்ற ரியான் ரூத் (Ryan Ruth)Donald Trump: இரண்டாது முறையாக கொலை முயற்சி.. ட்ரம்பை சுற்றி வரும் மரணம்! - என்ன நடந்தது?

பொதுமக்கள் போர்களில் ஈடுபடுவது குறித்து அவர் பேசிவந்துள்ளார். அவரது வாட்ஸ்அப் பயோவில் "நாம் ஒவ்வொருவரும் தினமும் மனித உரிமைகள், சுதந்திரம் மற்றும் ஜனநாயகத்தைக் காப்பதற்கு நமது பங்கைச் செய்ய வேண்டும்; நாம் ஒவ்வொருவரும் சீனர்களுக்கு உதவ வேண்டும்" என எழுதியிருக்கிறார்.

முன்னதாக பென்சில்வேனியா பகுதியில் ட்ரம்ப் பேரணி நடந்தபோது அவர் மீது துப்பாக்கிச் சூடு நடத்தப்பட்டது. அது குறித்து எக்ஸ் தளத்தில் கமலா ஹாரிஸைக் குறிப்பிட்டு ட்வீட் செய்துள்ளார் ரியான்.

அவர், "நீங்களும் பைடனும் காயமடைந்தவர்களை நேரில் சென்று பார்வையிட வேண்டும். மரணமடைந்த தீயணைப்பு வீரரின் இறுதிச் சடங்கில் பங்கேற்க வேண்டும். ஏனெனில் ட்ரம்ப் அவர்களுக்காக எதுவும் செய்யப்போவதில்லை" எனக் கருத்து தெரிவித்திருக்கிறார்.

துப்பாக்கிச்சூடு சம்பவத்துக்குப் பிறகு பாதுகாப்பாக இருக்கிறார் ட்ரம்ப். இது அமெரிக்க அதிபர் தேர்தலை ஒட்டி அவர்மீது நடத்தப்படும் இரண்டாவது துப்பாக்கிச்சூடாகும்.``கமலா, ட்ரம்ப் இருவருமே வாழ்வுக்கு எதிரானவர்கள்" - போப் பிரான்சிஸ் பேசியது என்ன?


http://dlvr.it/TDHHWF

Read More