கிரிக்கெட்: ஆஸி., அணிக்கு எதிரான டெஸ்ட் தொடரை வென்றது தெ. ஆப்ரிக்கா

ஆஸ்திரேலியாவில் உள்ளஹோபர்ட்டில் நடந்த டெஸ்ட் போட்டியில் ஒரு இன்னிங்ஸ் மற்றும் 80 ரன்கள் வித்தியாசத்தில் ஆஸ்திரேலியாவை வென்ற தென் ஆப்ரிக்க கிரிக்கெட் அணி, 2-0 என்று டெஸ்ட் தொடரை வென்றுள்ளது.

தென் ஆப்ரிக்க வேகப்பந்துவீச்சாளர் பிலாண்டர்

ஹோபர்ட் நகரின் பெல்லரிவ் ஓவல் மைதானத்தில் தென் ஆப்ரிக்கா மற்றும் ஆஸ்திரேலியா அணிகளுக்கு இடையே இரண்டாவது கிரிக்கெட் டெஸ்ட் போட்டி கடந்த 11-ஆம் தேதியன்று தொடங்கியது. இந்த போட்டியில் டாஸ் வென்ற தென் ஆப்ரிக்கா பந்து வீச தீர்மானித்தது.

முதலில் பேட்டிங் செய்த ஆஸ்திரேலியா தென் ஆப்ரிக்காவின் பந்துவீச்சாளர்களை சமாளிக்க முடியாமல் தனது முதல் இன்னிங்ஸில் 85 ரன்களுக்கு ஆட்டமிழந்தது. இரண்டு ஆஸ்திரேலிய வீரர்களை தவிர மற்ற அனைவரும் ஒற்றை இலக்கத்தில் ஆட்டமிழந்தனர்.

தென் ஆப்ரிக்க வேகப்பந்துவீச்சாளர் பிலாண்டர் 5 விக்கெட்டுகளை எடுத்தார். பின்னர், தனது முதல் இன்னிங்ஸை தொடங்கிய தென் ஆப்ரிக்கா 326 ரன்கள் எடுத்தது. அந்த அணியின் குயிண்டன் டி காக் சதமடித்தார்.

குயிண்டன் டி காக்

241 ரன்கள் பின்தங்கிய நிலையில் தனது இரண்டாவது இன்னிங்க்ஸை தொடங்கிய ஆஸ்திரேலியா தென் ஆப்ரிக்க வேகப் பந்துவீச்சாளர்களை சமாளிக்க முடியாமல் தனது விக்கெட்டுகளை தொடர்ந்து பறி கொடுத்து வந்தது. இறுதியில் 161 ரன்களுக்கு அனைத்து விக்கெட்டுகளையும் ஆஸ்திரேலியா இழக்க, இந்தப் போட்டியில்

ஒரு இன்னிங்ஸ் மற்றும் 80 ரன்கள் வித்தியாசத்தில் தென் ஆப்ரிக்கா வென்றது.

முன்னதாக பெர்த் மைத்தனத்தில் நடந்த முதல் டெஸ்ட் போட்டியை தென் ஆப்ரிக்கா வென்றுள்ளதால், மூன்று டெஸ்ட்கள் அடங்கிய இந்த தொடரை தென் ஆப்ரிக்கா 2-0 என்று வென்றுள்ளது.

தென் ஆப்ரிக்க வேகப் பந்துவீச்சாளர் கைல் அபோட் (கோப்புப் படம்)

துல்லியமாகவும், அதிவேகமாகவும் பந்து வீசிய தென் ஆப்ரிக்க வேகப் பந்துவீச்சாளர் கைல் அபோட் ஆறு விக்கெட்டுக்களை எடுத்து ஆட்ட நாயகன் விருதையும் வென்றுள்ளார்.

முன்னதாக இலங்கையில் நடந்த மூன்று டெஸ்ட் போட்டிகளிலும் தோல்வியுற்ற ஆஸ்திரேலியா, இந்த போட்டி தோல்வியுடன் தொடந்து 5 டெஸ்ட் போட்டிகளில் தோல்வியடைந்துள்ளது.