மதுரை: ஆம்னி பேருந்து கட்டணம் நிர்ணயிக்க ஓய்வு பெற்ற நீதிபதி தலைமையில் குழு அமைக்க அரசுக்கு உயர்நீதிமன்ற மதுரை கிளை உத்தரவிட்டுள்ளது. தனி நபருக்கான கட்டணத்தை ஆம்னி பேருந்து நிறுவனங்கள் நிர்ணயிக்க கூடாது என நீதிபதிகள் உத்தரவிட்டுள்ளனர்.
தீபாவளி பண்டிகைக்கு சில நாட்களுக்கு முன்பு ஆம்னி பேருந்துகள் சங்கங்கள் பேருந்து கட்டணத்தை உயர்த்தி அறிக்கை வெளியிட்டனர். இந்த அறிக்கையை பார்த்த உயர்நீதிமன்ற மதுரை கிளை நீதிபதிகள் நாகமுத்து, முரளிதரன் தாமாகவே முன்வந்து வழக்காக எடுத்துக் கொண்டனர்.
மேலும் இந்த வழக்கில் ஆம்னி பேருந்துகளில் கட்டணம் நிர்ணயிக்காதது ஏன் என்றும், தமிழக அரசுஅரசு பதில் தருமாறு உயர்நீதிமன்ற மதுரை கிளை ஏற்கனவே உத்தரவிட்டிருந்தது. இந்நிலையில் இன்று மீண்டும் வழக்கு விசாரணைக்கு வந்தது. ஆம்னி சங்கம் சார்பில் முதலில் வாதிடப்பட்டது. பின்னர் தமிழக அரசு சார்பில் வாதம் செய்யப்பட்டது.
இரு தரப்பு வாதங்களையும் கேட்ட நீதிபதிகள் ஆம்னி பேருந்து கட்டணம் நிர்ணயிக்க ஓய்வு பெற்ற நீதிபதி தலைமையில் குழு அமைக்க வேண்டும் என தமிழக அரசுக்கு உத்தரவிட்டனர். தனி நபருக்கான கட்டணத்தை ஆம்னி பேருந்து நிறுவனங்கள் நிர்ணயிக்க கூடாது எனவும் நீதிபதிகள் உத்தரவிட்டுள்ளனர். மேலும் விரிவான உத்தரவை திங்கள் கிழமை பிறப்பிப்பதாக நீதிபதிகள் நாகமுத்து, முரளிதரன் அமர்வு தெரிவித்துள்ளது.
Posts
