சிகிச்சைக்குப் பின் கருணாநிதியின் உடல்நிலை சீராக உள்ளது: காவேரி மருத்துவமனை தகவல்

சென்னை,

உடல்நலக் குறைவு காரணமாக மீண்டும் மருத்துவமனையில் அனுமதிக்கப்பட்டுள்ள கருணாநிதியின் உடல்நிலை சீராக உள்ளதாக காவேரி நிர்வாகம் தரப்பில் தெரிவிக்கப்பட்டுள்ளது.

ஒவ்வாமை பாதிப்பு 

தி.மு.க. தலைவர் கருணாநிதி கடந்த 1–ந் தேதி உடல் நலக்குறைவால் சென்னை மயிலாப்பூரில் உள்ள காவேரி ஆஸ்பத்திரியில் அனுமதிக்கப்பட்டார். அப்போது வயது மூப்பு காரணமாக அவருக்கு அளிக்கப்பட்டு வந்த மருந்துகளால் ஏற்பட்ட ஒவ்வாமையால் ஆஸ்பத்திரியில் அனுமதிக்கப்பட்டுள்ளார் என்றும், அவருக்கு ஊட்டச்சத்து குறைபாடு மற்றும் நீர்ச்சத்து குறைபாடு இருப்பதாகவும் ஆஸ்பத்திரி நிர்வாகம் சார்பில் கூறப்பட்டது.

அதைத் தொடர்ந்து ஒரு வார சிகிச்சைக்கு பிறகு அவர் கடந்த 7–ந் தேதி வீடு திரும்பினார். அப்போது, மருத்துவமனை நிர்வாகம் சார்பில், கருணாநிதியின் உடல் உள்ளுறுப்புகள் இயல்பு நிலைக்கு திரும்பி இருப்பதாகவும் தெரிவிக்கப்பட்டது. எனினும், அவர் வீடு திரும்பிய பிறகும், வீட்டில் வைத்தும் அவர் தொடர்ந்து மருத்துவர்களின் கண்காணிப்பில் இருந்து வந்தார்.

சளித் தொல்லை 

இந்தநிலையில், நேற்று மாலையில் அவருக்கு சளித் தொல்லை அதிகரித்ததாக தெரிகிறது. அதைத் தொடர்ந்து அவர் நேற்று இரவு 11.10 மணி அளவில் மீண்டும் மயிலாப்பூரில் உள்ள காவேரி மருத்துவமனையில் அனுமதிக்கப்பட்டார்.

தி.மு.க. பொருளாளரும், எதிர்க்கட்சி தலைவருமான மு.க.ஸ்டாலின், துர்கா ஸ்டாலின், கருணாநிதியின் துணைவியார் ராஜாத்தி அம்மாள், மகள்கள் கனிமொழி எம்.பி., செல்வி, முன்னாள் அமைச்சர் பொன்முடி உள்ளிட்டோர் நேற்று இரவு அவருடன் மருத்துவமனைக்கு வந்தனர்.

ஆஸ்பத்திரி அறிக்கை 

தி.மு.க. தலைவர் கருணாநிதி உடல்நிலை குறித்து காவேரி ஆஸ்பத்திரி நிர்வாகம் நேற்று இரவு வெளியிட்டுள்ள அறிக்கையில் கூறியிருப்பதாவது:–

தி.மு.க. தலைவரும், முன்னாள் முதல்–அமைச்சருமான கருணாநிதிக்கு தொண்டை மற்றும் நுரையீரல் தொற்று காரணமாக மூச்சு திணறல் ஏற்பட்டதால், மீண்டும் அவர் ஆஸ்பத்திரியில் அனுமதிக்கப்பட்டுள்ளார். முதலில் அவருக்கு நோய் தொற்றை சரி செய்வதற்கான சிகிச்சை அளிக்கப்பட்டது. தற்போது அவரது உடல்நிலை சீராக உள்ளது. மருத்துவ குழுவினர் தொடர்ந்து சிகிச்சை அளித்து வருகின்றனர். இவ்வாறு அதில் கூறப்பட்டுள்ளது.