ஜல்லிக்கட்டு போராட்டத்தால் திணறிய சிவகங்கை

சிவகங்கை: சிவகங்கையில் ஜல்லிக்கட்டுக்காக மாணவர்கள் போராட்டத்தால் சிவகங்கை திணறியது.

உறுதி:

ஜல்லிக்கட்டை நடத்த வேண்டும் எனக்கூறி தமிழகம் முழுவதும் மாணவர்கள் வகுப்புகளை புறக்கணித்து போராட்டம் நடத்தி வருகின்றனர். சிவகங்கை மன்னர் துரைசிங்கம் கல்லூரி மாணவர்கள், வகுப்புகளை புறக்கணித்து ஜல்லிக்கட்டுக்காக போராட்டம் நடத்தினர். தொடர்ந்து கல்லூரியிலிருந்து முக்கிய சாலைகள் வழியாக பேரணியாக சென்றனர். அரண்மனையை தாண்டி பேரணியாக சென்ற மாணவர்கள், பஸ் ஸ்டாண்ட் அருகே அமர்ந்து போராட்டம் நடத்தினர். அங்கு பீட்டா அமைப்புக்கு எதிராக கோஷம் எழுப்பி மாணவர்கள் போராட்டம் நடத்தினர். தொடர்ந்து சென்னையில் மாணவர்கள் போராட்டத்திற்கு முடிவு கி டைக்கும் வரை தங்களது போராட்டம் தொடரும் என அவர்கள் அறிவித்துள்ளனர்.

தடையை மீறி...

சிவகங்கை மாவட்டம் கண்டிப்பட்டி என்ற இடத்தில் தடையை மீறி மஞ்சு விரட்டு நடத்தப்பட்டது. 100க்கும் மேற்பட்ட காளைகள் இந்த போட்டியில் அவிழ்த்து விடப்பட்டன. இதனையடுத்து அங்கு வந்த போலீசார் தடியடி நடத்தி கூட்டத்தை கலைக்க முயன்றனர். இதனால், ஆத்தரிமடைந்த அங்கிருந்த மக்கள், போலீசார் மீது கற்களை வீசி தாக்கினர். போலீஸ் வாகனத்தை அடித்து சேதப்படுத்தினர். இதனால், அங்கு பரபரப்பு ஏற்பட்டுள்ளது.

மதுரை மாவட்டம் உசிலம்பட்டி அருகேயுள்ள பசுக்காரன்பட்டி மற்றும் காக்கிவீரன்பட்டியில் தடையை மீறி ஜல்லிக்கட்டு நடந்தது. பசுக்காரன்பட்டியில் செல்லம்கருப்பசாமி கோயிலில் வழிபாடு நடத்தி ஜல்லிக்கட்டு காளைகள் அவிழ்த்து விட்டனர். இதேபோல், காக்கிவீரன்பட்டியில் சிறுபட்டி முத்தையா கோயிலில் வழிபாடு நடத்திய பின் காளைகளை விட்டனர்.

சேலம் மாவட்டம், ஆத்தூர் பஸ் ஸ்டாண்ட் முன்பு ஜல்லிக்கட்டு நடத்தக்கோரி தொடர் போராட்டம் நடந்து வருகிறது.

அதேபோல், ஆத்தூர் அரசு கல்லூரி மாணவ, மாணவிகள் உள்ளிருப்பு போராட்டம் நடக்கிறது.

கூலமேடு, தம்மம்பட்டி, மல்லியக்கரை, காட்டுக்கோட்டை, தலைவாசல் உள்ளிட்ட பகுதிகளில், ஜல்லிக்கட்டு நடத்தக்கோரி போராட்டம் நடந்து வருகிறது.

ஈரோடு மாவட்டத்தில் வ.வு.சி., பூங்காவில் பல கல்லூரிகளை சேர்ந்த 4 ஆயிரத்திற்கு மேற்பட்ட மாணவர்கள் கூடியுள்ளனர். அவர்கள் ஜல்லிக்கட்டுக்கு தடை விதிக்க வேண்டும் எனவும், பீட்டாவை தடை செய்ய வேண்டும் எனவும் கூறினர். அவர்கள் பேரணி செல்ல முயற்சி செய்து வருகின்றனர். இதனையடுத்து அங்கு போலீசார் குவிக்கப்பட்டுள்ளனர்.

மதுரை தமுக்கம் மைதானத்தில் போராட்டம் நடக்கும் இடத்திற்கு இயக்குநர் சீமான் வந்தார். அங்கிருந்த நேரு பீடத்தின் மீது அவர் ஏறி நின்றார். அப்போது அவர் மீது செருப்பு வீசப்பட்டது. தண்ணீர் பாட்டீல்கள் வீசப்பட்டன. இதனால் அங்கு பரபரப்பு ஏற்பட்டது.

English Summary:

Sivaganga: Jallikattu in Sivaganga Sivaganga struggled to fight for the students.