`பாகிஸ்தான், சீனாவுடன் போருக்கு நாள் குறித்துவிட்டார் பிரதமர் மோடி!’ - உ.பி பா.ஜ.க தலைவர் சர்ச்சை

கல்வான் பள்ளத்தாக்கு மோதல், பாங்கோங் சோ ஏரி அத்துமீறல் முறியடிப்பு என கடந்த சில மாதங்களாக எல்லையில் சீன ராணுவத்தின் செயல்பாடுகள் பதற்றத்தை ஏற்படுத்தியிருக்கின்றன. இந்தநிலையில், எல்லையில் பதற்றத்தைத் தணிக்கும் வகையில் இருதரப்பிலும் ராணுவ அதிகாரிகள் மட்டத்திலான பேச்சுவார்த்தை நடந்து வருகிறது. அதேபோல், பாகிஸ்தானும் எல்லையில் அவ்வப்போது அத்துமீறித் தாக்குதலில் ஈடுபட்டு வருகிறது. கல்வான் பள்ளத்தாக்கு இந்தசூழலில் உத்தரப்பிரதேச பா.ஜ.க மாநிலத் தலைவர் ஸ்வந்திரதேவ் சிங் பேச்சு சர்ச்சையாகியிருக்கிறது. பா.ஜ.க எம்.எல்.ஏ சஞ்சய் யாதவின் வீட்டில் நடந்த நிகழ்ச்சி ஒன்றில் அக்கட்சித் தொண்டர்களிடையே பேசிய அவர், அயோத்தியில் ராமர் கோயில் கட்டுவது, ஜம்மு - காஷ்மீருக்கு வழங்கப்பட்டு வந்த சிறப்பு அந்தஸ்து ரத்து செய்யப்பட்டது போன்ற விவகாரங்களைப் போலவே, பாகிஸ்தான், சீனா ஆகிய நாடுகளுடன் போருக்கான தேதியைப் பிரதமர் மோடி குறித்துவிட்டதாகப் பேசினார். ஸ்வந்திரதேவ் சிங் பேசிய வீடியோவை சஞ்சய் யாதவ் வெளியிட்டிருக்கிறார். அந்த வீடியோ சமூக வலைதளங்களில் வைரலாகி சர்ச்சையை ஏற்படுத்தியிருக்கிறது. அதேபோல், சமாஜ்வாதி, பகுஜன் சமாஜ் ஆகிய கட்சிகளின் தொண்டர்களைத் தீவிரவாதிகளுடன் ஒப்பிட்டும் அந்த வீடியோவில் ஸ்வந்திரதேவ் பேசியிருக்கிறார். உ.பி பா.ஜ.க தலைவர் ஸ்வந்திரதேவ் சிங் இதுகுறித்து பேசிய பா.ஜ.க எம்.பி ரவீந்திர குஷ்வாஹா, பா.ஜ.க தொண்டர்களை உற்சாகப்படுத்துவதற்காக அவர் அப்படி பேசியிருக்கலாம் என்று கருத்துத் தெரிவித்திருக்கிறார். அதேநேரம், சீனாவுடனான எல்லைப் பிரச்னை விவகாரத்தில் இந்தியாவின் நிலைப்பாட்டுக்கு எதிராக அவர் கருத்துத் தெரிவித்திருப்பதாக சர்ச்சை எழுந்திருக்கிறது. Also Read: இந்தியா - சீனா... எப்போது முடியும் எல்லைப்பிரச்னை? எல்லைப் பிரச்னை குறித்து பேசிய பாதுகாப்புத் துறை அமைச்சர் ராஜ்நாத் சிங், ``சீனாவுடனான எல்லைப் பிரச்னையை விரைவில் முடிவுக்குக் கொண்டுவர வேண்டும் என்றே இந்தியா விரும்புகிறது. அதேநேரம், இந்திய ஆளுகைக்குட்பட்ட பகுதியில் இருந்து ஒரு இன்ச் இடத்தைக் கூட விட்டுத்தர மாட்டோம்’’ என்று பேசியிருந்தார்.
http://dlvr.it/RkLLXS

Read More

`நாங்கள் இத்தேசத்துக்கு எதிரானவர்கள் அல்ல; பா.ஜ.க-வுக்கு எதிரானவர்கள்!' - ஃபரூக் அப்துல்லா

``நாங்கள் பா.ஜ.க.-வுக்கு எதிரானவர்களே அன்றி, இத்தேசத்திற்கு எதிரானவர்கள் இல்லை, ஜம்மு & காஷ்மீரின் சிறப்பு அந்தஸ்தினை ரத்து செய்ததினை எதிர்த்து, அதனை திரும்பப் பெறுவதற்காக அமைத்துள்ள மக்கள் கூட்டணி என்பது தேச விரோதமானது என்று மத்திய பா.ஜ.க. அரசு பொய்ப் பிரசாரம் செய்து வருகிறது” என்று ஜம்மு & காஷ்மீரின் முன்னாள் முதல்வரும், மக்கள் கூட்டணித் தலைவருமான ஃபரூக் அப்துல்லா குற்றம்சாட்டியுள்ளார். கடந்த ஆண்டு ஆகஸ்ட் மாதம் 5 -ம் தேதி ஜம்மு - காஷ்மீரின் சிறப்பு அந்தஸ்தை மத்திய அரசு ரத்து செய்து உத்தரவிட்டது. இதனால் ஏற்படும் போராட்டங்களைக் கட்டுப்படுத்தும் விதமாக அம்மாநிலத்தின் அரசியல் கட்சித் தலைவர்களான ஃபரூக் அப்துல்லா, மெஹபூபா முப்தி உட்பட பலர் வீட்டுக்காவலில் வைக்கப்பட்டு சமீபத்தில் விடுவிக்கப்பட்டனர்.ஃபரூக் அப்துல்லா விடுதலைக்குப் பின்னர், ஜம்மு - காஷ்மீருக்கான சிறப்பு அந்தஸ்தினை ரத்து செய்ததினை எதிர்த்து, தங்கள் கருத்துக்களைப் பதிவுசெய்ததோடு அதனை திரும்பப்பெறுவதற்கான முயற்சிகள் மாநிலத் தலைவர்களால் முன்னெடுக்கப்பட்டு வந்தது. இந்நிலையில், அம்மாநிலத்தின் கட்சித் தலைவர்கள் ஒன்றிணைந்து தேசிய மாநாடுக் கட்சியின் தலைவரான ஃபரூக் அப்துல்லாவின் இல்லத்தில் ஆலோசனை நடத்தினர். ஜம்மு காஷமீருக்கான சிறப்பு அந்தஸ்தினை உறுதி செய்யும் குப்கார் தீர்மானத்துக்கான மக்கள் கூட்டணித் தலைவராக பரூக் அப்துல்லாவையும், துணைத் தலைவராக மக்கள் ஜனநாயக் கட்சித் தலைவர் மெகபூபா முப்தியையும், செய்தித் தொடர்பாளராக மக்கள் மாநாட்டுக் கட்சியின் சஜித் அலோயும், ஒருங்கிணைப்பாளராக மார்க்சிஸ்ட் கம்யூனிஸ்ட் கட்சியின் மூத்த தலைவரான முகமது தாரிகாமியையும் தேர்வு செய்தனர். பின்னர், செய்தியாளர்களிடம் பேசிய ஃபரூக் அப்துல்லா, “காஷ்மீருக்கான சிறப்பு அந்தஸ்தினை ரத்து செய்து, ஜம்மு காஷ்மீரை இரு யூனியன் பிரதேசங்களாகப் பிரித்து கூட்டாட்சிக் கட்டமைப்பை மத்திய பா.ஜ.க. அரசு உடைத்துவிட்டது. இந்திய அரசியலமைப்பு சட்டத்தை தகர்த்து இந்தியாவில் பிளவு உண்டாக்கி வருகின்றனர். இதைத்தான் கடந்த ஆண்டு ஆகஸ்ட் மாதம் 5-ஆம் தேதி பார்த்தோம். குப்கார் தீர்மானத்துக்கான மக்கள் கூட்டணியை தேசத்திற்கு விரோதமானது என்று பா.ஜ.க. பொய்ப் பிரசாரம் செய்து வருகிறது. எங்கள் அமைப்பு பா.ஜ.க.-வுக்கு எதிரானதே தவிர தேசவிரோதமானது அல்ல. ஜம்மு - காஷ்மீர், லடாக் மக்களின் உரிமைகளைப் பெறுவதே எங்கள் போராட்டத்தின் நோக்கம். மதத்தின் பெயரைக் கூறி பா.ஜ.க ஜம்மு - காஷ்மீரின் மக்களைப் பிரிக்க நினைக்கும் செயல் வெற்றிபெறாது” என்று கூறினார்.
http://dlvr.it/RkJJpK

Read More

ரோட்டில் கிடந்த பையில் ரூ.1.50 லட்சம்... பாராட்டுக்குள்ளாகும் வியாபாரியின் நேர்மை

திருப்பூரில் சாலையில் கண்டெடுத்த ஒரு லட்சத்து 50 ஆயிரம் ரூபாயை போலீசாரிடம் ஒப்படைத்தவருக்கு பாராட்டுகள் குவிந்து வருகின்றன. திருப்பூர் நெசவாளர் காலனியை சேர்ந்தவர் செல்வம் (50). இவர் காதர்பேட்டையில் செகண்ட்ஸ் பனியன் வியாபாரம் செய்து வருகிறார். இந்நிலையில் நேற்று காலை தனது நண்பர் ராஜமாணிக்கம் என்பவருடன், நஞ்சப்பா பள்ளி சாலையில் நடந்து சென்றார்.   அப்போது, ரோட்டில் கிடந்த பேக் ஒன்றை கண்டெடுத்தார். அதில் ஒரு லட்சத்து, 50 ஆயிரம் ரூபாய் இருந்தது. உடனே இருவரும் திருப்பூர் வடக்கு போலீஸ் ஸ்டேஷனுக்கு விரைந்து சென்று இன்ஸ்பெக்டர் கணேசனிடம் ஒப்படைத்தனர். இச்சம்பவம் குறித்து கட்டுப்பாட்டு அறைக்கு தகவல் தெரிவிக்கப்பட்டு போலீசார் விசாரித்து வந்தனர். அப்போது, ரூ.1.50 லட்சம் ரூபாய் தவறியதாக போலீஸ் ஸ்டேஷனில் புகார் அளிக்க கருவம்பாளையத்தை சேர்ந்த விஜயகுமார் என்பவர் சென்றார். அவரிடம் விசாரித்த போது ராக்கியபாளையத்தில் பனியன் நிறுவனத்தில் வேலை செய்து வருவதாகவும், வசூல் செய்த பணத்துடன், நூல் வாங்குவதுக்காக ஆலாங்காட்டில் இருந்து காலேஜ் ரோட்டுக்கு டூவீலரில் சென்ற போது பணம் தவறியதாக கூறினார்.  இதையடுத்து கண்டெடுக்கப்பட்ட பணம் விஜயகுமாருடையது என விசாரணையில் தெரியவந்தது. உடனே பணத்தை உரியவரிடம் ஒப்படைத்த இன்ஸ்பெக்டர் கணேசன், ஸ்டேஷனில் பணத்தை ஒப்படைத்தவரின் நேர்மையை பாராட்டி, சால்வை அணிவித்து கவுரவித்தார்.
http://dlvr.it/RkHZvj

Read More

5000 ஆண்டுகளுக்கு முன்பே அறுவைசிகிச்சையா? மிரள வைத்த பழங்கால மண்டை ஓடு!

பழங்காலத்தில் அதாவது 5000 ஆண்டுகள் பழமையான, அறுவைசிகிச்சைக்கு சென்று இறந்த ஒரு நபரின் மண்டை ஓட்டை ரஷ்ய தொல்பொருள் ஆராய்ச்சியாளர்கள் கண்டுபிடித்துள்ளனர். வெண்கல காலத்தில் வாழ்ந்த 20 வயது நபருக்கு அறுவைசிகிச்சை நடைபெற்றிருக்கும் தடயங்களை கிரிமியா வெளியிட்டுள்ள 3டி புகைப்படங்கள் காட்டுகின்றன. இந்த அறுவைசிகிச்சை வெற்றியடையாததால் துர்திர்ஷ்டவசமாக அந்த நோயாளி ’ஸ்கல்பெல்’ நடைபெற்ற குறுகிய காலத்திலேயே உயிரிழந்திருக்கக் கூடும் என்றும் ஆராய்ச்சியாளர்கள் தெரிவித்துள்ளனர். மேலும் அறுவைசிகிச்சை செய்த மருத்துவர் கல்லால் ஆன அறுவைசிகிச்சை உபகரணங்களை வைத்திருந்திருக்கக் கூடும் என்றும் மாஸ்கோவின் ரஷ்ய அறிவியல் அகாடமி தொல்பொருள் நிறுவனம் குறிப்பிட்டுள்ளது. அறுவைசிகிச்சை செய்த அந்த மண்டைஓடு 140×125 மில்லிமீட்டர்கள் பரிமாணத்தில் நடைபெற்றிருப்பதாகவும் குறிப்பிட்டுள்ளது. பழங்காலத்திலும் அறுவைசிகிச்சைக்குப் பிறகு உயிர்வாழும் வாய்ப்புகள் அதிகமாக இருந்தும்கூட இந்த இளைஞர் நீண்டநாள் வாழவில்லை என்று சூழ்நிலை மானுடவியல் ஆய்வகத்தின் தலைவர் டாக்டர் மரியா டோப்ரோவோல்ஸ்கியா கூறியுள்ளார். மேலும், குணமடைந்ததற்காக தடயங்கள் எதுவும் இல்லை எனவும், எலும்பின் மேற்பரப்பில் ட்ரபனேஷன் கருவியின் தடயங்கள் இருப்பதாகவும் அவர் கூறியுள்ளார். உலகமே ஒன்றிணைந்து விரட்டிய நோய்: உலக போலியோ தினம் இன்று!  சித்தியன் காலத்தைச் சேர்ந்த புதைகுழியில் இருந்து இந்த 5000 ஆண்டு பழமையான மண்டைஓடு கண்டுபிடிக்கப்பட்டுள்ளது. இறந்தவரின் எலும்பின் நிலையை வைத்து கவனித்துப் பார்த்தால், நேராகப் படுக்கவைத்த உடல் இடதுபக்கமாக சற்று திரும்பி இருக்கிறது, குறிப்பாக முழங்கால்கள் வளைந்து இடதுபக்கம் நன்கு திரும்பி இருக்கிறது என்றும், மேலும் பெரிய சிவப்புக்கறை தலைக்கு அருகிலும் மண்டை ஓட்டின்மீதும் காணப்பட்டது என்றும் அவர் கூறியுள்ளார். பண்டைய காலங்களில், கடுமையான தலைவலியைக் குறைக்க, ஒரு ஹீமாடோமாவைக் குணப்படுத்த, மண்டை ஓட்டின் காயங்களை சரிசெய்ய அல்லது கால்-கை வலிப்பை சரிசெய்ய மூளை அறுவைசிகிச்சையை மேற்கொண்டிருக்கலாம் என ஆராய்ச்சியாளர்கள் கருதுகின்றனர். மேலும் வலியைக் குறைக்க கஞ்சா மற்றும் மேஜிக் காளான்களை மருந்துகளாகப் பயன்படுத்தியிருக்கக் கூடும் என்றும் ஆராய்ச்சியாளர்கள் தெரிவிக்கின்றனர்.
http://dlvr.it/RkGTQf

Read More

பஞ்சாப்: `அவர்கள் மனசாட்சியை இந்த கொடூரம் கொஞ்சம் கூட அசைத்து பார்க்கவில்லை?!’ - நிர்மலா சீதாராமன்

உத்தரபிரதேச மாநிலம் ஹத்ராஸ் பகுதியில் நடந்த பாலியல் வன்கொடுமை சம்பவம் நாடு முழுவதும் பெரும் அதிர்வலைகளை ஏற்படுத்தியது. இந்த சம்பவத்துக்கு கண்டனம் தெரிவித்தும், ஆளும் பா.ஜ.க அரசை கண்டித்தும் எதிர்க்கட்சிகள் கடுமையான போராட்டங்களை முன்னெடுத்தது. காங்கிரஸ் கட்சியின் ராகுல் காந்தி மற்றும் அவரின் சகோதரி பிரியங்கா காந்தி ஆகியோர் பாதிக்கப்பட்ட பெண்ணின் குடும்பத்தினரை சந்திக்க செல்லும் போது கைது செய்யப்பட்ட சம்பவங்களும் அரங்கேறியது. ஹத்ராஸ் - ராகுல், பிரியங்கா காந்தி இந்த நிலையில் பீகாரை சேர்ந்த 6 வயது சிறுமி, பஞ்சாப்பில் பாலியல் வன்கொடுமைக்கு ஆளானதுடன் கொடூரமாக் கொல்லப்பட்டுள்ளார். பாதிக்கப்பட்ட சிறுமியின் குடும்பத்தினர் பீகாரில் இருந்து புலம்பெயர் தொழிலாளர்களாக பஞ்சாப் வந்திருக்கிறார்கள். அங்கு தான் இந்த கொடூரம் நடந்திருக்கிறது. இந்த நிலையில் இன்று மத்திய அமைச்சர் நிர்மலா சீதாராமன் செய்தியாளர்களை சந்தித்தார். அப்போது பேசிய அவர், ``பீகாரை சேர்ந்த 6 வயது பட்டியலின சிறுமி ஒருவர், பஞ்சாப் மாநிலத்தில் பாலியல் வன்கொடுமை செய்யப்பட்டதுடன், கொலை செய்யப்பட்டு கொடூரமாக எரிக்கப்பட்டிருக்கிறார். மற்ற இடங்களில் எல்லாம் அரசியலில் தங்களுக்கு உதவும் என்பதற்காக ஓடி ஓடி சென்ற சகோதரர், சகோதரியின் மனசாட்சியை இந்த கொடூரம் கொஞ்சம் கூட அசைத்து பார்க்க வில்லை. எந்த வகையிலும் ஒரு பாலியல் வன்கொடுமை சம்பவம் அரசியலாக்கப்பட கூடாது. ஆனால் சிலர் தங்களின் அரசியல் விளையாட்டை விளையாடுவதற்காக, குறிப்பிட்ட மாநிலங்களில் நடக்கும் கொடுமைக்கு மட்டும் குரல் கொடுக்கிறார்கள். அதுவே அவர்களின் காங்கிரஸ் கட்சி ஆளும் மாநிலத்தில் நடந்தால் அமைதியாகி விடுகிறார்கள்” என்றார். தொடர்ந்து பேசிய நிர்மலா சீதாராமன், ``இந்த பாலியல் வன்கொடுமை விவகாரத்தில் ராகுல் காந்தி தற்போது வரை ஒரு ட்வீட் கூட போடவில்லை. இந்த விவகாரத்தில் எந்த சீற்றமும் இல்லை. பாதிப்பு நடந்த இடத்துக்கு சுற்றுப்பயணமும் செல்லவில்லை. ஒரு பெண் தலைமை தாங்கும் கட்சி, இப்படியான குறிப்பிட்ட பகுதிகளுக்கு மட்டும் தனது சீற்றத்தை வெளிப்படுத்துகிறது” என்றார் காட்டமாக. Also Read: ஹத்ராஸ்: `உங்கள் வீட்டுப் பெண்களுக்கு இப்படி நடந்திருந்தால்..?' - அதிகாரிகளைச் சாடிய நீதிபதிகள்
http://dlvr.it/RkFj7J

Read More

நிலுவையில் போக்சோ வழக்கு... சிறுமிக்கு பிறந்த குழந்தை உயிரிழப்பு.. போலீஸ் விசாரணை

‘போக்சோ’ வழக்கு நிலுவையில் உள்ள நிலையில் சிறுமிக்கு பிறந்த ஆண் குழந்தை இறந்தது குறித்து போலீசார் விசாரணை செய்து வருகின்றனர்.  விழுப்புரம் மாவட்டம் திண்டிவனம் அருகேயுள்ள வேங்கை கிராமத்தை சேர்ந்தவர் ஆறுமுகம் என்பவரின் மகன் ராஜன் 22. இவருக்கும், கள்ளக்கொளத்தூர் பகுதியை சேர்ந்த 17 வயது சிறுமிக்கும், கடந்த 2018ம் ஆண்டு, பள்ளியில் படிக்கும்போது பழக்கம் ஏற்பட்டுள்ளது, இந்த பழக்கத்தால் சிறுமி கர்ப்பமடைந்தார். இதில், ராஜன் போக்சோ சட்டத்தில் கைது செய்யப்பட்டார். இந்த வழக்கு நிலுவையில் உள்ள நிலையில் அந்த சிறுமிக்கு, அதே ஆண்டில் ஆண் குழந்தை பிறந்தது. அதன் பிறகு, அந்த சிறுமி தனது குழந்தையுடன், திண்டிவனம் அவரப்பாக்கம் தாடிக்காரன் குட்டைத்தெருவில் தாய் வனிதாவுடன் வசித்து வந்தார். இந்நிலையில் நேற்று மதியம், அந்த சிறுமி கழிவறைக்கு சென்றபோது, தனது ஒன்றறை வயது குழந்தை சஷ்வந்த் படிக்கட்டில் இருந்து கீழே தவறி விழுந்து மயக்கமடைந்ததாக கூறியுள்ளார். உடனடியாக குழந்தையை, தாய் மற்றும் அக்கம் பக்கத்தினர், மீட்டு சிகிச்சைக்காக திண்டிவனம் அரசு மருத்துவமனையில் சேர்த்தனர். ஆனால், குழந்தைக்கு தலையில் பலத்த காயம் ஏற்பட்டதால் ஏற்கெனவே இறந்து விட்டதாக டாக்டர்கள் கூறினர். ‘போக்சோ’ வழக்கு நிலுவையில் உள்ள நிலையில், சிறுமிக்கு பிறந்த ஆண் குழந்தை இறந்தது குறித்து போலீசார் வழக்குப்பதிவு செய்து விசாரணை நடத்தி வருகின்றனர்.
http://dlvr.it/RkDbc4

Read More

`ஒவ்வொரு வீட்டிலும் ஒரு முருங்கை மரம்!' - ஏன் முருங்கையை ஊக்குவிக்கிறது உ.பி அரசு?

முருங்கையிலிருந்து கிடைக்கக்கூடிய இலை, காய், பூ, விதை அனைத்துமே மருத்துவ பண்புகளைக் கொண்டவை. இந்தியாவிலிருந்து பல நாடுகளுக்கு முருங்கை சம்பந்தமான பொருள்கள் ஏற்றுமதியாகின்றன. முருங்கையிலுள்ள சத்துகளின் அவசியத்தைப் புரிந்து கொண்ட உத்தரப் பிரதேச மாநில அரசு கிராமங்களில் உள்ள ஒவ்வொரு வீட்டிலும் கட்டாயம் ஒரு முருங்கை மரத்தை வளர்க்க வேண்டும் என்று கேட்டுக் கொண்டுள்ளது. முருங்கைக்கீரை கோவிட் 19 பெருந்தொற்று தொடங்கியதை அடுத்து, கடந்த ஜூலை மாதத்தில் முருங்கை பரவலாக்கத்திற்கான இந்த உத்தரவு பிறப்பிக்கப்பட்டுள்ளது. இதற்காக 1.7 கோடி முருங்கை நாற்றுகளை உற்பத்தி செய்து அவற்றை மாநிலம் முழுவதும் நடுவதற்கும் திட்டமிடப்பட்டுள்ளது. முதல்வர் யோகி ஆதித்யாநாத்தும் அம்மாநில வனத்துறையினரிடம், ``ஒவ்வொரு கிராமத்திலும் முருங்கையின் அவசியத்தை சொல்லி, அதிலிருக்கும் சத்துகள் குறித்து விளக்கி இது சம்பந்தமாக விழிப்புணர்வு ஏற்படுத்த வேண்டும்" எனக் கேட்டுக் கொண்டுள்ளளார். குறிப்பாக குழந்தைகள் மற்றும் பெண்களுக்கு ஏற்படும் ஊட்டச்சத்து குறைப்பாட்டினைச் சரிசெய்வதற்காக அவர்களிடமும் விழிப்புணர்வு ஏற்படுத்தும்படி உத்தரவிட்டுள்ளார். இதன்படி வனத்துறை அதிகாரிகள், அலுவலர்கள் இந்த முருங்கை மர வளர்ப்பு விழிப்புணர்வு பணியில் ஈடுபட்டுள்ளனர். ``சஹ்ஜன் (Sahjan) என்று சொல்லப்படும் முருங்கையில் பல்வேறு சத்துகள் அடங்கியுள்ளன. முருங்கையின் இலை, காய், பூ அனைத்துமே இன்றைக்கு விலை அதிகம் கொடுத்து வாங்கும் காய்கறிகளுக்கு மாற்றான எளிமையான உணவுப் பொருள். வீட்டில் முருங்கை மரம் ஒன்றிருந்தால் காய்கறிகளுக்கு எங்கும் அலைய வேண்டியதில்லை. முருங்கையானது ஆயுர்வேத மருத்துவத்திலும் பயன்படுத்தப்படுகிறது. இது கல்லீரல் சம்பந்தமான நோய்களை கட்டுப்படுத்தும் என்றும் புற்றுநோய்க்கு எதிர்ப்புத் தன்மையைக் கொண்டது என்றும் கருதப்படுகிறது. இயல்பாகவே முருங்கைக்கீரை நோய் எதிர்ப்பு சக்தி கொண்டது. முருங்கைத் தோட்டம் இன்றைய தேதியில் குறைந்த உணவுப் பொருளிலிருந்து அதிக சத்துகளை பெறுவதைத்தான் சூப்பர் ஃபுட் என்கின்றனர். அந்த வகையில் குறைந்த உணவில் அதிக சத்துகள் பெற முருங்கை துணை நிற்கும். இன்றைக்கு மருத்துவத்துக்கு செலவிடும் தொகையை முருங்கை பெருவாரியாக தடுக்கும் என்பதில் சந்தேகமில்லை. இன்னொன்று பொருளாதார ரீதியாகவும் காய்கறிகளுக்குச் செலவிடும் தொகை குறையும். அதனாலே அனைவரும் முருங்கையை உணவில் சேர்க்க வேண்டும் என்று வலியுறுத்தி வருகிறோம்” என்று உத்தரப்பிரதேச வனத்துறை அதிகாரிகள் விழிப்புணர்வில் ஈடுபட்டு வருகின்றனர். முருங்கையைத் தமிழகத்திலும் பரவலாகப் பயன்படுத்தி வருகின்றனர். சாகுபடியும் ஓரளவுக்கு நடந்து வருகிறது. தமிழக அரசும் இதிலுள்ள சத்துகளின் அடிப்படையில் முருங்கையைப் பயிர் செய்ய ஊக்குவிக்க வேண்டும் என்பதே உணவு ஆர்வலர்களின் எதிர்பார்ப்பு.
http://dlvr.it/RkC3sX

Read More