ஓய்வு பெற்ற நீதிபதி கர்ணனை ஏன் கைது செய்யவில்லை? - சென்னை உயர் நீதிமன்றம் கண்டனம்

நீதிபதிகளை அவதூறாக பேசிய விவகாரத்தில் ஓய்வு பெற்ற நீதிபதி கர்ணனை கைது செய்யாமல் இருப்பதற்கு சென்னை உயர்நீதிமன்றம் கண்டனம் தெரிவித்துள்ளது. சென்னை மற்றும் கொல்கத்தா உயர்நீதிமன்றங்களில் நீதிபதியாக இருந்த கர்ணன் ஓய்வு பெற்றார். அந்த சமயத்தில் அவர் உயர்நீதிமன்றம் மற்றும் உச்சநீதிமன்றம் நீதிபதிகளையும் அவரது குடும்பத்தினரையும் அவதூறாக பேசிய வீடியோ யூடியூபில் பதிவேற்றம் செய்யப்பட்டிருந்தது. இதையடுத்து ஓய்வு பெற்ற நீதிபதி கர்ணன், நீதிபதிகளையும், நீதிமன்ற ஊழியர்களையும் அவதூறாக பேசியதாக தமிழ்நாடு புதுச்சேரி பார் கவுன்சில் புகார் அளித்தது. இந்த புகாரின் பேரில் 4 பிரிவுகளின் கீழ் வழக்குப்பதிவு செய்யப்பட்டது. ஆனால் புகார் தொடர்பாக நடவடிக்கை எடுக்கப்படவில்லை என சென்னை உயர்நீதிமன்றத்தில் வழக்கு தொடரப்பட்டது. இந்த வழக்கு கடந்த முறை விசாரணைக்கு வந்தபோது நிலை அறிக்கை தாக்கல் செய்ய வேண்டுமென காவல்துறைக்கு உத்தரவிடப்பட்டது. இந்நிலையில் இன்று கர்ணனை நேரில் அழைத்து விசாரணை நடத்தியதாகவும் இனிமேல் வீடியோ வெளியிடமாட்டேன் என உறுதியளித்திருந்தார் எனவும் காவல்துறை சார்பில் விளக்கம் அளிக்கப்பட்டது. இதைக்கேட்ட நீதிமன்றம் இதுவரை ஏன் கைது செய்யவில்லை என அதிருப்தியை வெளிப்படுத்தினர். மேலும், இதுகுறித்து டிஜிபி, சென்னை மாநகர காவல்துறை ஆணையர் ஆகியோர் டிசம்பர் 7-ஆம் தேதி விளக்கம் அளிக்க வேண்டும் எனவும் உத்தரவிடப்பட்டுள்ளது.
http://dlvr.it/Rmjg18

Read More

ம.பி: `மத நம்பிக்கையை மாற்ற வற்புறுத்துகிறார்!’ - மனைவியின் புகாரால் கணவன் கைது

மத்திய பிரதேச மாநிலம் தன்பூர் பகுதியில், தனது மத பழக்கவழக்கங்களை தான் பின்பற்ற வேண்டும் என கணவன் வற்புறுத்தியதாக மனைவி அளித்த புகாரில் கணவர் கைது செய்யப்பட்டுள்ளார். இது தொடர்பாக நேற்று (29.11.2020) செய்தியாளர்களிடம் பேசிய தன்பூர் பகுதிக்குட்பட்ட துணை காவல்துறை அதிகாரியான பாரத் துபே, ``இந்து மதத்தைச் சேர்ந்த புகாரளித்த பெண் 2018-ம் ஆண்டு இஸ்லாமிய மதத்தைச் சேர்ந்தவரை திருமணம் செய்துள்ளார். திருமணத்திற்கு பின்னர், மத்திய பிரதேச மாநிலம் தன்பூரில் இருவரும் வசித்து வந்துள்ளனர். இந்நிலையில், தற்பொழுது அப்பெண்ணின் கணவர் அப்பெண்ணையும், அப்பெண்னின் உறவினர்களையும் இஸ்லாமிய மதத்திற்கு மாற வற்புறுத்தல் செய்வதோடு, உருது மற்றும் அரபு மொழிகளை கற்க கூறி அழுத்தம் தருவதாக அப்பெண் அளித்த புகாரில் தெரிவிக்கப்பட்டுள்ளது. இதனால் குற்றச்செயலில் ஈடுபட்டுள்ள கணவரை மத சுதந்திர சட்டத்தில் கீழ் கைது செய்துள்ளோம்” என்று தெரிவித்தார். ‘திருமண நோக்கத்துக்காக மட்டும் மதம் மாறுவது ஏற்கத்தக்கதல்ல’ என்று உத்தரப்பிரதேச மாநிலம் அலகாபாத் உயர்நீதிமன்றம் பிறப்பித்த உத்தரவின் அடிப்படையில், உத்தரப் பிரதேச மாநிலத்தில் மத சுதந்திர மசோதா விரைவில் அமல்படுத்த அம்மாநில அமைச்சரவை முடிவெடுத்துள்ளது. அதனைத் தொடர்ந்து, மத்திய பிரதேச மாநிலம் உட்பட பா.ஜ.க. ஆளும் மாநிலங்களான கர்நாடகா, அசாம், ஹரியானா உள்ளிட்ட மாநிலங்களில் மதச் சுதந்திர சட்டம் அமல்படுத்த ஆலோசனைகள் நடைபெற்று வருகிறது. Also Read: `மத்தியப் பிரதேச மதச் சுதந்திர மசோதா 2020’ - கேள்வி கேட்பவர்களை மிரட்ட இன்னோர் ஆயுதமா? இச்சட்டத்திற்கு சமாஜ்வாதி உள்ளிட்ட எதிர்கட்சியினர் மத்தியில் கடும் எதிர்ப்பலைகள் வீசி வருவது குறிப்பிடத்தக்கது.
http://dlvr.it/Rmj1D6

Read More

அதிக அளவில் போட்டியிடும் இளம் பெண் வேட்பாளர்கள்... களைகட்டும் கேரள உள்ளாட்சித் தேர்தல்!

கேரள மாநிலத்தில் உள்ளாட்சித் தேர்தல் வரும் டிசம்பர் மாதம் 8, 10 மற்றும் 14-ம் தேதிகளில் மூன்று கட்டமாக நடக்கவிருக்கிறது. உள்ளாட்சித் தேர்தல் பிரசாரம் கேரளத்தில் களைகட்டி வருகிறது. மாநகராட்சி, நகராட்சி, ஊராட்சி, பேரூராட்சி என அனைத்து உள்ளாட்சிகளுக்குமான தேர்தலில் 50% பதவிகள் பெண்களுக்கு ஒதுக்கப்பட்டுள்ளன. அந்த வாய்ப்பை பயன்படுத்திக்கொண்டு கல்லூரி மாணவிகளில் தொடங்கி இளம் பெண்கள்வரை 20 வயதுகளில் உள்ள பலர் களம் இறங்கியுள்ளனர். சி.பி.எம், காங்கிரஸ், பா.ஜ.க என அனைத்துக் கட்சிகளிலும் இளம் பெண்களுக்கு அதிகளவு வாய்ப்புக் கொடுக்கப்பட்டுள்ளது. இதில் சில பெண் வேட்பாளர்கள் தங்கள் சமூக வலைதளங்களில் ஓட்டுக்கேட்டு பதிவு செய்யும் போஸ்டர்களில் இடம்பெற்றுள்ள அவர்களின் படங்கள், 'கேரள தேர்தலில் இத்தனை இளம் பெண்களா' என்று அனைவரையும் கவனிக்க வைத்திருக்கிறது. காங்கிரஸ் இளம் பெண் வேட்பாளர் இது ஒருபுறம் இருக்க, சில விஷமிகள், தேர்தலில் போட்டியிடாத சில இளம் பெண்களின் புகைப்படங்களையும், அவர்கள் கேரள உள்ளாட்சித் தேர்தலில் போட்டியிடுவதாகக் கட்சிகளின் லோகோவுடன் போஸ்டர்கள் தயாரித்து சமூக வலைதளங்களில் பரப்பி வருகின்றனர். அந்தப் போஸ்ட்களில், 'கேரளாவில் தேர்தல் நடக்கிறதா உலக அழகிப் போட்டி நடக்கிறதா?' என்பது முதல், 'பஞ்சாயத்து மாறி வேறு பஞ்சாயத்தில் ஓட்டுப்போட முடியுமா?' என்பதுவரை விரும்பத்தகாத கமென்ட்கள் விழுகின்றன. கேரள உள்ளாட்சித் தேர்தலில் இளம் பெண்கள் அதிக அளவு போட்டியிடுவதற்கு அனைத்துக் கட்சிகளும் வாய்ப்பளித்துள்ளது வரவேற்க வேண்டிய விஷயம். திருவனந்தபுரம் மாநகராட்சி மேயர் பதவி இந்த முறை பெண்களுக்கு ஒதுக்கப்பட்டுள்ளது. மேலும் திருவனந்தபுரத்தில் அனைத்துக் கட்சிகளிலும் இளம் பெண்கள் அதிகமாகப் போட்டியிட்டுவருகின்றனர்.சி.பி.எம் கூட்டணி குந்நோத்துபறம்பு ஊராட்சி வார்டு உறுப்பினர் வேட்பாளர் திருவனந்தபுரம் மாநகராட்சி பாப்பனங்கோடு வார்டு கவுன்சிலராக போட்டியிடுகிறார் பா.ஜ.க இளைஞரணி மாவட்டச் செயலாளர் ஆஷாநாத். கேரள மாநிலத்தில் அதிக அளவு இளம் பெண்கள் போட்டியிடுவது குறித்து ஆஷாநாத்திடம் பேசினோம். "கேரள உள்ளாட்சித் தேர்தலில் இளம் வயது பெண் வேட்பாளர்கள் நிறைய பேர் களம் இறங்கியிருக்கிறோம். சமுதாயத்தை பாதிக்கும் என்ன விஷயமாக இருந்தாலும் அதற்கு முதலில் எதிர்வினை எழுவது இளைஞர்களிடம் இருந்துதான். அரசியலில் நிறைய விஷயங்கள் செய்ய வேண்டும் என்ற கனவு இளைஞர்களிடம் உண்டு. அதனால்தான் இந்தத் தேர்தலில் இளைஞர்கள் முன்னிலைப்படுத்தப்படுகிறார்கள். இளைஞர்கள் வந்தால் மக்களுக்கு நல்லது செய்வார்கள் என்ற நம்பிக்கை மக்களுக்கு உண்டு. இளைஞர்கள் சமூக வலைதளங்கள் மூலம் சின்னச் சின்ன பிரச்னைகளையும் கவனித்து வருகிறார்கள். சாலை சீரமைத்தல் போன்றவை குறித்து முதலில் குரல்கொடுப்பதும் இளைஞர்கள்தான். ஆஷாநாத் அதனால்தான் பா. ஜ.க. அதிக அளவு இளைஞர்களை வேட்பாளர்களாக நிறுத்தியுள்ளது. பா.ஜ.க மட்டுமல்லாது அனைத்துக் கட்சிகளும் இளைஞர்களை முன்னிறுத்தியுள்ளன. திருவனந்தபுரத்தில் போட்டியிடுவதில் அதிகமானோர் இளைஞர்கள்தான். ப.ஜ.க-வில் இளைஞர் வேட்பாளர்கள் அதிகம்" என்றார். கேரள உள்ளாட்சியில் அனைத்துக் கட்சிகளிலும் இளம் பெண்கள் பலர் வேட்பாளர்களாக நிறுத்தப்பட்டிருப்பது மாநிலம் தாண்டியும் ஆச்சர்யத்தை ஏற்படுத்தியுள்ளது.
http://dlvr.it/Rmj16J

Read More

கேரள அரசின் புதிய அணைக்கு எதிர்ப்பு... ஜோதி பயணத்திற்குத் தயாராகும் விவசாயிகள்!

தேனி மாவட்டத்தில் தமிழக - கேரள எல்லையில் அமைந்துள்ளது முல்லைப் பெரியாறு அணை. தேனி, மதுரை, திண்டுக்கல், ராமநாதபுரம், சிவகங்கை ஆகிய ஐந்து மாவட்ட மக்களின் நீராதாரமாக உள்ளது முல்லைப் பெரியாறு அணை. இந்த நிலையில், அணை பலவீனமாக இருப்பதாகவும் எனவே இந்த அணைக்குப் பதிலாக புதிய அணை கட்ட வேண்டும் என்று கேரள அரசு கூறி வருகிறது. இதற்கு தமிழக அரசு எதிர்ப்பு தெரிவித்த நிலையிலும் கேரள அரசு தொடர்ந்து புதிய அணை கட்டுவதற்கான ஆய்வுப் பணியை தொடங்கியுள்ளதாக விவசாயிகள் கொந்தளிக்கின்றனர்.விவசாயிகள் கம்பத்தில் ஐந்து மாவட்ட விவசாய சங்கத்தலைவர் எஸ்.ஆர்.தேவர் பத்திரிக்கையாளர்கள் சந்திப்பில் இதுகுறித்துப் பேசுகையில், ``உச்சநீதிமன்றமும், பல்வேறு ஆய்வு குழுக்களும், நிபுணர்களும் முல்லைப் பெரியாறு அணை பலமாக இருக்கிறது என்று ஒரு முறைக்கு பலமுறை சான்றளித்த பின்னரும் கேரள அரசும், அரசியல் கட்சியினரும் முல்லைப் பெரியாறு அணைக்கு மாற்றாக புதிய அணையை கட்டுவோம் என்ற பிடிவாதத்திலேயே இருந்து வருகின்றனர். மேலும் புதிய அணை கட்டுவதற்காக கேரள அரசு பசுமை தீர்ப்பாயத்திடமும், மத்திய நீர்வளத் துறையிடம் அனுமதி பெற்று புதிய அணை கட்டுவதற்காக நில அளவீடு செய்யத் தொடங்கியுள்ளது. புதிய அணை என்கிற கேரள அரசின் பிடிவாதம் இந்திய அரசியல் சாசனத்திற்கு எதிரானது. அதனால் மத்திய மாநில அரசு உடனடியாக இதை தடுத்து நிறுத்த வேண்டும். புதிய அணை கட்டுவதற்கு மத்திய வனம் மற்றும் சுற்றுச்சூழல் அமைச்சகம் கேரளாவிற்கு கொடுத்த, தாக்க மதிப்பீட்டு வரைவுக்கான அனுமதியை திரும்பப் பெற வேண்டும்.விவசாயிகள் மேலும் முல்லைப்பெரியாறு நீரினை பயன்படுத்தும் விவசாயிகள் மற்றும் பொதுமக்களுக்கு விழிப்புணர்வு ஏற்படுத்தும் வகையிலும், கேரள மாநில அரசின், அரசியல் சாசன அமர்வுக்கு எதிரான போக்கினை கண்டித்தும், உச்ச நீதிமன்றம் வழங்கிய தீர்ப்பின் அடிப்படையில், முல்லைப் பெரியாறு அணையின் நீர்மட்டத்தை 152 அடியாக உயர்த்தக் கோரியும், வருகின்ற டிசம்பர் 16-ம் தேதி தொடர் ஜோதி பயணம் ராமநாதபுரம் பெரிய கண்மாயில் தொடங்கி சிவகங்கை, மதுரை, திண்டுக்கல் மாவட்டங்கள் வழியாக தேனிவந்து சீலையம்பட்டி, சின்னமனூர், மார்க்கையன்கோட்டை, அம்மாபட்டி, உத்தமபாளையம், கம்பம் வழியாக லோயர்கேம்ப் பென்னிகுயிக் மண்டபத்தில் நிறைவு பெறும்" என்றார். இந்நிகழ்ச்சியின்போது ஐந்து மாவட்ட விவசாய சங்க ஒருங்கிணைப்பாளர் அன்வர் பாலசிங்கம், பொதுச் செயலாளர் பொன்காட்சிக்கண்ணன், செயலாளர் சலேத்து, பொருளாளர் லோகநாதன், இணைச்செயலாளர் ரஞ்சித்குமார் உடனிருந்தனர்.
http://dlvr.it/Rmcy8l

Read More

`கேரளா செல்பவர்களுக்கு சோதனை இல்லை!’ - இ-பாஸ் மேலும் தளர்வு

கம்பம் மற்றும் அதன் சுற்றுவட்டாரப் பகுதிகளிலிருந்து எல்லைப் பகுதியான கேரளவுக்கு உட்பட்ட இடுக்கி மாவட்டத்திலுள்ள ஏலத் தோட்டங்களுக்கு ஆயிரக்கணக்கான ஏழை, எளிய தொழிலாளர்கள் ஜீப் வாகனங்கள் மூலம் சென்று வருகின்றனர். கொரோனா அசாதாரண சூழல் காரணமாக, கடந்த மார்ச் மாத இறுதியில் தொழிலாளர்கள் கேரளா இ-பாஸ் இருந்தால் மட்டுமே அனுமதிக்கப்பட்டனர். அதிலும், பல்வேறுகட்ட சோதனைகளுக்குப் பிறகுதான் அனுமதிக்கப்பட்டனர். கடந்த இரண்டு மாதங்களுக்கு முன்னர் பொதுமக்கள் மற்றும் விவசாயிகளின் கோரிக்கையை ஏற்று, தோட்டத் தொழிலாளர்கள் மற்றும் விவசாயிகளுக்குத் தளர்வுகளுடன்கூடிய ஆறு மாத ரெகுலர் பாஸ் வழங்கப்பட்டது. இ-பாஸ் இதன்படி ஒரு முறை பாஸ் எடுத்தால் நாள்தோறும் காலையில் சென்று மாலையில் திரும்ப வேண்டும். ஒவ்வொரு நாளும் குமுளியில் கேரள வருவாய்த்துறையிடம் இ-பாஸ் பதிவு செய்து டோக்கன் மட்டும் பெற்றால் போதும். மற்ற சோதனைகள் இல்லை என்றும் தெரிவித்தனர். இருப்பினும், தமிழக எல்லையான குமுளிப் பகுதியில் நாள்தோறும் டோக்கன் பெற பொதுமக்களும், தொழிலாளர்களும் வாகனங்களுடன் நீண்ட நேரம் காத்துக்கிடந்தனர். இதனால், கேரளா செல்ல அனுமதித்திருக்கும் இ-பாஸை ரத்துசெய்ய தொழிலாளர்கள் தேனி மற்றும் இடுக்கி மாவட்ட நிர்வாகத்துக்குக் கோரிக்கை விடுத்திருந்தனர். இந்தநிலையில் கேரள அரசு இ-பாஸில் மேலும் தளர்வுகளை அளித்திருக்கிறது. இதன்படி குமுளி, சின்னாறு, போடிமெட்டு வழியாக கேரளாவுக்குச் செல்பவர்கள் இ-பாஸ் சரிபார்ப்பு, டோக்கன் பெறுதல் எனக் காத்திருக்க வேண்டியதில்லை. இ - பாஸ் இ-பாஸ் பதிவு செய்திருந்தால் மட்டும் போதும். அதை எல்லைப் பகுதியிலுள்ள போலீஸாரிடம் காட்டிவிட்டுச் செல்லலாம் என அறிவித்திருக்கிறது. இதனால், கேரளா செல்லும் ஆயிரக்கணக்கான தோட்டத் தொழிலாளர்களும், விவசாயிகளும் மகிழ்ச்சியடைந்திருக்கிறார்கள். குமுளி வழியாக கேரளாவுக்கு செல்ல அனுமதி வழங்கப்பட்டதால் நேற்று அரசு டவுன் பஸ் ஒன்று மட்டும் இயக்கப்பட்டது. ஆனால், குமுளி மலைச்சாலையில் சாலைப் பணிகள் நடைபெறுவதாகக் கூறி ஒரு ட்ரிப்போடு போக்குவரத்து நிர்வாகம் அதை ரத்துசெய்துவிட்டது.
http://dlvr.it/Rmb4SB

Read More

வேலூர்: வெள்ளத்தில் சிக்கி 2500 நாட்டுக் கோழிகள் உயிரிழப்பு - நிவாரணம் வழங்க கோரிக்கை!

காட்பாடி அருகே வெள்ள நீர் புகுந்ததால் விற்பனைக்கு தயாராக இருந்த 2500 நாட்டுக் கோழிகள் நீரில் மூழ்கி உயிரிழப்பு. அரசு உதவ வேண்டும் என விவசாயி கோரிக்கை வைத்துள்ளார். வேலூர் மாவட்டம் காட்பாடியை அடுத்துள்ள பொன்னை, பி.ஆர்.குப்பம் பகுதியில் வசித்து வருபவர் மோகன். இவர், கடந்த 11 ஆண்டுகளாக தனக்குச் சொந்தமான விவசாய நிலத்தில் பண்ணை அமைத்து நாட்டுக் கோழிகளை வளர்த்து வந்துள்ளார். இந்நிலையில் ஆந்திராவில் கனமழை பெய்து வருவதால் தமிழகத்தில் ஓடும் பொன்னை ஆற்றில் சுமார் 20 ஆயிரம் கனஅடி அளவுக்கு வெள்ளம் வந்துள்ளது. திடீரென வெள்ளம் அதிகரித்ததால் விவசாயி மோகனின் பண்ணையில் வெள்ள நீர் புகுந்துள்ளது. இதில் விற்பனைக்கு தயாராக இருந்த சுமார் 2500 நாட்டுக் கோழிகளும், 5 ஆடுகளும் பரிதாபமாக உயிரிழந்தன. சுமார் 3000 நாட்டுக் கோழிகள் காப்பாற்றப்பட்டுள்ளது. அதேபோல் பண்ணை கொட்டகை, கோழி தீவனம் போன்றவையும் சேதம் அடைந்துள்ளது. இது குறித்து மோகன் வருவாய்த்துறைக்கு தகவல் கொடுத்ததின் பேரில் சம்பவ இடத்தில் வந்த வருவாய்த்துறை அதிகாரிகள் சேதம் குறித்து ஆய்வு மேற்கொண்டனர். இதன் மொத்த பாதிப்பு சுமார் 3 லட்சம் வரை இருக்கும் என கூறப்படுகிறது. கோழி பண்ணையை மட்டுமே வாழ்வாதாரமாக நம்பியிருந்த தனக்கு தமிழக அரசு உரிய நிவாரணம் வழங்கி உதவ வேண்டும் என விவசாயி மோகன் கோரிக்கை வைத்துள்ளார்.
http://dlvr.it/RmZNR1

Read More

கேரளா:`உன் புகாரைப் பார்க்க எங்களுக்கு மனசு இல்ல போடா...!’ - தந்தை, மகளிடம் எகிறிய எஸ்.ஐ

கேரள மாநிலம் திருவனந்தபுரம் மாவட்டத்தில் நெய்யாறு அணை காவல் நிலையத்தில் புகார் மீது நடவடிக்கை எடுக்கக்கூறியவர் மற்றும் அவரது மகளை எஸ்.ஐ ஒருவர் ஒருமையில் பேசி ஆவேசமாகத் திட்டும் வீடியோ ஒன்று சமூக வலைத்தளங்களில் வைரலானது. அந்த வீடியோவில் புகார் அளிக்க வந்தவர், மது போதையில் வந்ததாக எஸ்.ஐ கூறுகிறார். ஆனால் அவரது மகளோ, `தந்தை மது குடிப்பதே இல்லை, வேண்டுமானால் போதையில் இருப்பதை ஊதிக் கண்டுபிடிக்கும் மிஷினைப் பயன்படுத்தி சோதனை செய்யுங்கள்’ எனக் கூறுகிறார். அதற்கு அந்த எஸ்.ஐ, ``நீ சொல்லும்போது அந்த மிஷினோட நாங்கள் நிற்கணுமா?" என எகிறுகிறார். அதற்குப் புகார் அளிக்க வந்தவர், "இதுதான் போலீஸ் ஸ்டேஷனில், நீங்கள் தரும் மரியாதையா? நாங்கள் எதாவது தப்பா சொன்னோமா... போலீஸ் ஸ்டேஷனில் சட்டம் எதுவும் இல்லையா?" எனக் கேட்கிறார்.கேரள போலீஸ் அதற்கு அந்த எஸ்.ஐ,``இதுதான் போலீஸ் ஸ்டேஷன். உன் புகாரைப் பார்க்க எங்களுக்கு மனசு இல்ல போடா... நாங்க உன்னை மிரட்டுவோம்; தப்பாத்தான் பேசுவோம். நீ போ... போயிட்டு வா" என எகிறுகிறார். இதனால் பயந்துபோன அந்தப் பெண், ``அப்பா இங்க இருந்து போயிடலாம்" என அழுதபடியே தந்தையை அழைத்துச் செல்கிறார். சுமார் ஒன்றரை நிமிடம் ஓடும் இந்த வீடியோ கேரளாவில் வைரலானது. Also Read: கேரளா: `வலைதளத்தில் அவதூறு பரப்பினால் 5 ஆண்டுச் சிறை!’ - எதிர்ப்பால் பின்வாங்கிய பினராயி விஜயன் திருவனந்தபுரம் மாவட்டம் நெய்யாறு அணை காவல் நிலைய எல்லைக்குட்பட்ட பள்ளிவேட்டை பகுதியைச் சேர்ந்த சுதேவன் என்பவர்தான், மகளுடன் புகார் அளிக்கச் சென்றவர். இவரது ஒரு மகள் பக்கத்து வீட்டைச் சேர்ந்த இளைஞ்ருடன் பழக்கம் ஏற்பட்டு, அவருடன் சென்றுள்ளார். இதுகுறித்து சுதேவன் அளித்த புகாரின் அடிப்படையில் போலீஸார், இரு தரப்பையும் அழைத்து விசாரணை நடத்தி அனுப்பி வைத்துள்ளனர். இந்த நிலையில் அந்த இளைஞர் சுதேவனின் வீட்டு முன்பு வந்து திட்டி, கொலை மிரட்டல் விடுத்ததாகக் கூறப்படுகிறது.எஸ்.ஐ கோபகுமார் இதுகுறித்து நெய்யாறு அணை காவல் நிலையத்தில் சுதேவன் கடந்த ஞாயிற்றுக்கிழமை புகார் அளித்துள்ளார். போலீஸார் விபரங்களை கேட்டறிந்துள்ளார்கள். அதன் பிறகு நடவடிக்கை எதுவும் எடுக்கவில்லை எனக் கூறப்படுகிறது. இதைத்தொடர்ந்து அதற்கு அடுத்த நாள், தனது மற்றொரு மகளுடன் நெய்யாறு அணை காவல் நிலையத்துக்கு சுதேவன் சென்றுள்ளார். அப்போதுதான் காவல் நிலைய எஸ்.ஐ கோபகுமார் மிரட்டியிருக்கிறார். இந்த வீடியோ வைரலானதைத் தொடர்ந்து கேரள டி.ஜி.பி தலையிட்டு, எஸ்.ஐ கோபகுமாரை குட்டிக்கானம் ஆயுதப்படைக்கு மாற்றி நடவடிக்கை எடுத்துள்ளார்.
http://dlvr.it/RmZNQC

Read More