"முதலில் ரத்து... உங்கள் சார்பில் ஒருவர் மட்டுமே!" - மத்திய அரசுக்கு விவசாயிகள் நிபந்தனை

பேச்சுவார்த்தையை தொடர வேண்டுமானால் 3 வேளாண் சட்டங்களையும் ரத்து செய்ய வேண்டும் என்பன உள்ளிட்ட பல்வேறு நிபந்தனைகளை விவசாயிகள் முன்வைத்துள்ளனர். வேளாண்சட்டங்களுக்கு எதிராக டெல்லியில் விவசாயிகள் நடத்தும் போராட்டம் 7-வது நாளை எட்டியுள்ளது. நேற்றைய தினம் மத்திய அரசுடன் நடந்த பேச்சுவார்த்தையில் உடன்பாடு எட்டப்படாத நிலையில் இன்று விவசாயிகள் தங்கள் போராட்டங்களை பல இடங்களில் தீவிரப்படுத்தியுள்ளனர். இதையடுத்து மத்திய அரசின் சார்பில் நாளைய தினமும் விவசாய சங்க பிரதிநிதிகளுடன் பேச்சுவார்த்தை நடத்த திட்டமிட்டுள்ளது. இதற்காக இன்றைய தினத்திற்குள் விவசாயிகள் தங்கள் கோரிக்கைகளை எழுத்துப்பூர்வமாக அளிக்க வேண்டும் என தெரிவிக்கப்பட்டுள்ளது. இந்நிலையில், பேச்சுவார்த்தையை தொடர விவசாயிகள் நிபந்தனை விதித்துள்ளனர். இதுகுறித்து செய்தியாளர்களை சந்தித்த விவசாய சங்க பிரதிநிதிகள் “3 வேளாண் சட்டங்களையும் அவசர சட்டம் மூலம் ரத்து செய்ய வேண்டும். மூன்று வேளாண் சட்டங்களையும் நிறுத்தி வைக்க 10 நிமிடங்கள் போதும். போராட்டம் தொடர்பாக மத்திய அரசின் சார்பில் ஒருவர் மட்டுமே பேச வேண்டும். பலரும் கருத்து தெரிவிக்கக்கூடாது. தவறினால் பேச்சுவார்த்தையில் ஈடுபட மாட்டோம். பேச்சுவார்த்தை என்ற பெயரில் காலதாமதப்படுத்த வேண்டாம். போராட்டத்தை கொச்சைப்படுத்தும் விதமாக பாஜகவினர் பேசுவதை ஏற்க முடியாது” எனத் தெரிவித்துள்ளனர்.
http://dlvr.it/Rmtngl

Read More

“ஸ்விட்ச் ஹிட்டிங்கை ஐசிசி தடை செய்யவேண்டும்” - இயன் சேப்பல்

பேட்ஸ்மேன்கள் ஸ்விட்ச் ஹிட்டிங் ஷாட் விளையாடுவதற்கு சர்வதேச கிரிக்கெட் கவுன்சில் தடை விதிக்க வேண்டும் என்று ஆஸ்திரேலிய அணியின் முன்னாள் கேப்டன் இயன் சேப்பல் வலியறுத்தியுள்ளார். இந்திய கிரிக்கெட் அணி, ஆஸ்திரேலியாவில் சுற்றுப்பயணம் மேற்கொண்டு விளையாடி வருகிறது. ஒருநாள் தொடரின் முதல் இரண்டு ஆட்டங்களில் ஆஸ்திரேலிய பேட்ஸ்மேன்களான மேக்ஸ்வெல், வார்னர் ஆகியோர் இந்திய பவுலர்களை ஸ்விட்ச் ஹிட் முறையில் அட்டாக் செய்திருந்தனர். இந்நிலையில், இது பவுலர்களுக்கும், ஃபீல்டிங் செய்கின்ற அணிக்கும் எதிராக நடக்கின்ற அநீதி என சொல்லியிருக்கிறார் இயன் சேப்பல். வலது கை பேட்ஸ்மேன், இடது கை பேட்ஸ்மேனாகவோ அல்லது இடது கை பேட்ஸ்மேன், வலது கை பேட்ஸ்மேனாகவோ மாறி பந்தை அடிப்பதுதான் ஸ்விட்ச் ஹிட். “இந்தியாவுக்கு எதிரான ஒருநாள் தொடரில் ஆஸ்திரேலிய பேட்ஸ்மேன்களின் ஆட்டம் அமர்க்களமாக உள்ளது. குறிப்பாக வார்னர், ஸ்மித், ஃபின்ச் மற்றும் மேக்ஸ்வெல் மாதிரியான பேட்ஸ்மேன்கள் அற்புதமாக விளையாடி தங்களது பேட்டிங் திறனை நிரூபித்துள்ளனர். மாடர்ன் டே கிரிக்கெட்டிற்கு ஏற்ப ஸ்விட்ச் ஹிட் முறையில் பல ஷாட்களை மேக்ஸ்வெல் விளையாடி உள்ளார். இருப்பினும் இது நல்லதற்கு அல்ல.  பவுலர்கள் பந்து வீசுவதற்கு முன்னர் அது குறித்து அம்பயர்களிடம் சொல்லிவிட்டுதான் அதை செய்கிறார்கள். பேட்ஸ்மேனின் லெக் மூவ்மெண்ட்டிற்கு ஏற்ப பந்துகளை வீசுவது பவுலர்களின் வியூகம். ஆனால் பவுலர்கள் பந்தை ரிலீஸ் செய்தவுடன் ஸ்விட்ச் ஹிட் முறையில் கைகளை மாற்றியும், பொசிஷனை பேட்ஸ்மேன்கள் மாற்றுவதும் ஏற்புடையதல்ல. இந்த மாதிரியான ஷாட்களை பேட்ஸ்மேன்கள் ஆட ஐசிசி தடை விதிக்க வேண்டும்” என தெரிவித்துள்ளார் சேப்பல்.  இங்கிலாந்தின் கெவின் பீட்டர்சன், ஆஸ்திரேலியாவின் வார்னர் மற்றும் மேக்ஸ்வெல் இந்த ஷாட்களை ஆடுவதில் வல்லவர்கள் என்பது குறிப்பிடத்தக்கது.
http://dlvr.it/RmrV0M

Read More

மு.க.அழகிரியின் அடுத்த அரசியல் 'இன்னிங்ஸ்' எப்படி இருக்கும்? - ஒரு பார்வை

வருகின்ற சட்டமன்ற தேர்தலில் தனது பங்கும் நிச்சயம் இருக்கும் என முன்னாள் மத்திய அமைச்சர் மு.க.அழகிரி தெரிவித்திருக்கிறார். அவரதுஇந்த திடீர் 'அணுகுமுறை' தமிழக அரசியலில் பல்வேறு வியூகங்களுக்கு வித்திட்டுள்ளது. முன்னாள் மத்திய அமைச்சரும், திமுகவில் முக்கிய பொறுப்பு வகித்து வந்தவருமான மு.க.அழகிரி, கட்சிக் கட்டுப்பாட்டை மீறி நடந்து கொண்டதாகக்கூறி கடந்த 2004-ஆம் ஆண்டு மார்ச் மாதம் திமுகவில் இருந்து நிரந்தரமாக நீக்கப்பட்டார். அதற்கு பின் மு.க.அழகிரியின் அரசியல் நடவடிக்கைகள் சற்று ஓய்ந்திருந்தன. பின்னர் 2018-ஆம் ஆண்டு ஆகஸ்ட் மாதம் கருணாநிதி மறைவுக்குப் பிறகு, சேப்பாக்கத்தில் இருந்து மெரினா வரை ஒரு அமைதிப் பேரணி நடத்தினார். அதன்பின் கடந்த இரண்டு ஆண்டுகளாக அமைதியாக இருந்து வந்த அழகிரி, தற்போது மீண்டும் அரசியல் பரபரப்புக்கு வந்துள்ளார். மதுரையில் நேற்று செய்தியாளர்களை சந்தித்த மு.க.அழகிரி கூறும்போது, “பாஜகவில் நான் இணையப்போவதாக வந்த செய்திகள், அனைத்தும் வதந்திகளே. வரும் சட்டப்பேரவைத் தேர்தலில் எனது பங்கும் இருக்கும்” என்றார். புதியக் கட்சி தொடங்குவது தொடர்பான கேள்வியை எழுப்பியபோது “அது போக போகத்தான் தெரியும். அது சம்பந்தமான முடிவை ஆதரவாளர்களுடன் ஆலோசித்த பிறகு கூறுவேன்” என்று கூறினார். அழகிரியின் இந்த பேட்டி பேசுபொருளான நிலையில், இது குறித்து அரசியல் விமர்சகரும் பத்திரிகையாளருமான தராசு ஷ்யாம் கூறும்போது “கடந்த மூன்று ஆண்டுகளாகவே அவருக்கு அரசியலில் பின்னடைவுதான். குறிப்பாக கருணாநிதி இறப்பு மற்றும் அதன்பின் அழகிரி நடத்திய அமைதிப் பேரணிக்கு பின்னர் அவருக்கான ஆதரவு என்பது காணாமல் போய்விட்டது. அவருக்கு தற்போது இருக்கும் ஒரே அந்தஸ்து அவர் கருணாநிதி மகன் என்பதுதான். பாஜகவில் அவரால் சேர இயலாது. ஒருவேளை சேர்ந்தால் அந்த அந்தஸ்தும் போய்விடும். ஆகையால் மு.க.அழகிரி, தற்போது அரசியலில் தனது இருப்பை காட்டிக்கொள்ள வேண்டும் என்ற நிலையில் இருக்கிறார்” என்றார். இது குறித்து அரசியல் விமர்சகர் கணபதி கூறும்போது “அழகிரியை வெளியேவிட்டால் நிச்சயம் திமுகவிற்கு பாதிப்பு உருவாகும் என்பது அவர்களுக்கு தெரியும். ஆகையால் திமுக தலைவர்கள் அவரை சமாதானப்படுத்தும் முயற்சியில் இறங்குவார்கள். அழகிரியை பொருத்தவரை தனது மகனுக்கு கட்சியில் பொறுப்பை கொடுக்குமாறு நிர்பந்திக்கலாம். பாஜகவில் அவர் சேரமாட்டார் என்றே நான் நினைக்கிறேன். அப்படி ஒருவேளை அவர் இணைவதாக இருந்தால், கடந்த நாடாளுமன்ற தேர்தலின்போதோ அல்லது அதற்கு முன்போ அவர் இணைந்திருக்கலாம். பாஜகவின் ஆதரவில் அவர் தனிக்கட்சி தொடங்குவாரா என்பது கணிக்க முடியாததாக இருக்கிறது. மு.க.அழகிரியின் இந்தப் பேட்டி குறித்து திமுக மூத்த தலைவர்களிடம் கேட்டபோது, அழகிரியை மீண்டும் கட்சியில் சேர்ப்பதற்கு மூத்த நிர்வாகிகளுக்கும், திமுக தலைவர் ஸ்டாலின் குடும்பத்தில் இருப்பவர்களுக்குமே விருப்பமில்லை என தெரிவிக்கின்றனர்.
http://dlvr.it/RmrTxL

Read More

சாதிவாரியான கணக்கெடுப்பு - ஆணையம் அமைக்க முதல்வர் பழனிசாமி உத்தரவு

சாதிவாரியான கணக்கெடுப்பு நடத்தி புள்ளிவிவரங்களை சேகரிப்பதற்கான ஆணையம் அமைக்க முதல்வர் பழனிசாமி உத்தரவிட்டுள்ளார். இட ஒதுக்கீடு தொடர்பான ஆணையம் அமைக்க முதல்வர் பழனிசாமி உத்தரவு ஒன்றை பிறப்பித்துள்ளார். இந்த ஆணையத்தின்கீழ் சாதிவாரியான புள்ளிவிவரங்கள் சேகரிக்கப்பட்டு பிரத்யேகமான அறிக்கை அளிக்கப்படும் எனவும் அவர் அறிக்கை வாயிலாகத் தெரிவித்துள்ளார். தமிழகத்தைப் பொருத்தவரை 69% இட ஒதுக்கீட்டிற்கு அரசியலமைப்பு சட்ட பாதுகாப்பைப் பெற்று, தமிழகம் சமூக நீதி வரலாற்றில் தொடர்ந்து இடம்பெற்றுவருகிறது. மேலும் சாதிவாரியான கணக்கெடுப்பு நடத்தவேண்டும் என பல்வேறு அரசியல் கட்சிகளும் பல்வேறு கால கட்டங்களில் கோரிக்கைகளை வைத்து வருவதாகவும், அரசு பல்வேறு நலத் திட்டங்களை செயல்படுத்தி வருவதாகவும், இதன் பயன் அனைத்து பிரிவினருக்கும் சென்றடைவதை அரசு உறுதி செய்ய வேண்டியுள்ள காரணத்தினால், சாதிவாரியான கணக்கெடுப்பு நடத்தவேண்டிய கட்டாயம் ஏற்பட்டுள்ளதாக அவர் இந்த அறிக்கை வாயிலாகத் தெரிவித்துள்ளார். தற்போது 69% இட ஒதுக்கீடு தொடர்பான வழக்கு உச்ச நீதிமன்றத்தில் நிலுவையில் இருக்கும் நிலையில், அதை எதிர்கொள்ள புள்ளிவிவரங்கள் தேவை எனவும் அதை சேகரிக்க ஆணையம் அமைக்கப்படும் எனவும் முதல்வர் தெரிவித்துள்ளார்.
http://dlvr.it/Rmq1HX

Read More

மக்கள் நீதி மய்யத்தில் இணைந்த உடனேயே பொதுச் செயலாளரான சந்தோஷ் பாபு

அண்மையில் விருப்ப ஓய்வுபெற்ற ஐஏஎஸ் அதிகாரி சந்தோஷ்பாபு மக்கள் நீதி மய்யத்தில் இணைந்தார் 1995-ஆம் ஆண்டு பேட்ச் மூத்த ஐ.ஏ.எஸ். அதிகாரி டாக்டர் சந்தோஷ் பாபு திடீரென்று விருப்ப ஓய்வு அறிவித்தார். இது பல யூகங்களுக்கு வழிவகுத்தது. தகவல் தொழில் நுட்பத் துறையின் அரசு செயலாளராக இருக்கும் இவரின் கீழ்தான், தமிழ்நாடு கண்ணாடி வலையமைப்பு நிறுவனம் - 12,524 கிராம பஞ்சாயத்து அமைப்புகள், 528 பேரூராட்சிகள், 124 நகராட்சிகள் மற்றும் 15 மாநகராட்சிகளில் அதிவேக அலைக்கற்றை மற்றும் தடையில்லா இணைப்புக்கான உட்கட்டமைப்பை இணைக்கும் 2441 கோடி ரூபாய் மதிப்புள்ள திட்டம் செயல்படுத்தப்பட இருந்தது. இது குறித்து அறிக்கை வெளியிட்ட ஸ்டாலின், மூத்த ஐஏஎஸ் அதிகாரி டாக்டர் சந்தோஷ்பாபு திடீரென விருப்ப ஓய்வில் செல்ல விண்ணப்பித்து இருப்பதன் பின்னணி என்ன? என கேள்வி எழுப்பினார். இந்நிலையில் சந்தோஷ்பாபு தற்போது மக்கள் நீதி மய்யம் கட்சியில் இணைந்துள்ளார். இன்று மக்கள் நீதி மய்யம் கட்சியின் தலைவர் கமல்ஹாசனின் முன்னிலையில் அவர் தன்னை அக்கட்சியில் இணைத்துக்கொண்டார். கட்சியில் இணைந்த உடனேயே அவரை பொதுச்செயலாளராக நியமித்து கமல்ஹாசன் உத்தரவிட்டார்.
http://dlvr.it/RmmkHr

Read More

இந்தியாவில் இன்று அறிமுகமாகும் Micromax In Note 1: விலை மற்றும் விவரங்கள்!

Micromax In Note 1 போன் இந்தியாவில் இன்று அறிமுகமாகவுள்ளது. இன்று மதியம் 12 மணிக்கு பிளிப்கார்ட் இணையதளத்தில் வெளியாகிறது. அமெரிக்கன் எக்ஸ்பிரஸ் கார்ட் வைத்திருப்பவர்களுக்கு ரூ.5ஆயிரம் வரை தள்ளுபடி, ஆக்ஸிஸ் வங்கி கிரெடிட் கார்ட் மூலம் பதிவு செய்யப்பட்டால் 10% தள்ளுபடி என்ற ஆஃபர்களும் அறிவிக்கப்பட்டுள்ளது. 64ஜிபியானது 10,999 ரூபாயாகவும், 128 ஜிபியானது 12,499 ரூபாயாகவும் குறிப்பிடப்பட்டுள்ளது. MediaTek Helio G85 புராசெஸ்சர் கொண்டுள்ளது. 5000mAh பேட்டரியைக் கொண்டுள்ளதால் நீண்ட நேரம் சார்ஜ் இருக்கும் வகையிலும், உடனடியாக சார்ஜ் ஏறும் வகையில் உருவாக்கப்பட்டுள்ளதாக கூறப்பட்டுள்ளது. மைக்ரோமேக்ஸ், தன்னுடைய ரீ என்ரியை இதன் மூலம் கொடுக்கிறது. In என்ற லோகோவுடன் ஸ்டைலாக அமைந்துள்ளது இந்த மாடல். இது இந்தியாவில் உருவாக்கப்படும் போன் வகை. இந்திய செல்போன் ரசிகர்களை பொருத்தவரை பெரிய டிஸ்பிளே, சிறந்த கேமரா என்பதே அவர்களின் முக்கிய எதிர்பார்ப்பாக இருக்கும். இந்த போன் அந்த தேவையை பூர்த்தி செய்யும் என்றே தெரிகிறது. 6.67 இஞ்ச் கொண்ட டிஸ்பிளே கொண்டுள்ளது. மார்க்கெட்டில் இந்த போன் கிடைக்கப்போகும் விலையோடு ஒப்பிட்டு பார்த்தால் பெரிய டிஸ்பிளே கொண்ட போன் இதுவே. முன்பக்க செல்ஃபி கேமரா செல்போனின் நடுவே ஹோல்-பஞ்ச் மாடலில் அமைக்கப்பட்டுள்ளது. HD ரெசொலேஷன்ஸ் கிளாரிட்டியை இந்த கேமரா வழங்கும் என கூறப்பட்டுள்ளது. ஆனால் இத்தனை பெரிய டிஸ்பிளே கொண்ட போனை ஒருகையில் வைத்துக்கொண்டு பயன்படுத்த முடியுமா என்பது சந்தேகம் தான்.பளபளப்பான லுக்கில் இருந்தாலும் இந்த போனானது பிளாஸ்டிக் மூடி தான். தற்போது வரும் போன் வகைகளை போலவே C டைப் யூஎஸ்பி போர்ட். 4ஜிபி ரேமில் கிடைக்கும் இந்த போன் இரண்டு வகை ஸ்டோரேஜ் மாடல்களை கொண்டுள்ளது. அதன்படியே விலையும் நிர்ணயம் செய்யப்பட்டுள்ளது. கேமராவை பொருத்தவரை 48 மெகா பிக்ஸல் பிரைமரி கேமரா, 5 மெகா பிக்ஸல் அல்ட்ரா-வைட் கேமரா, 2 மெகா பிக்ஸ்ல் மேக்ரோ கேமரா மற்றும் 2 பிக்ஸல் டெப்த் சென்சார் கேமராவை கொண்டுள்ளது.
http://dlvr.it/RmmkFj

Read More

ஓய்வு பெற்ற நீதிபதி கர்ணனை ஏன் கைது செய்யவில்லை? - சென்னை உயர் நீதிமன்றம் கண்டனம்

நீதிபதிகளை அவதூறாக பேசிய விவகாரத்தில் ஓய்வு பெற்ற நீதிபதி கர்ணனை கைது செய்யாமல் இருப்பதற்கு சென்னை உயர்நீதிமன்றம் கண்டனம் தெரிவித்துள்ளது. சென்னை மற்றும் கொல்கத்தா உயர்நீதிமன்றங்களில் நீதிபதியாக இருந்த கர்ணன் ஓய்வு பெற்றார். அந்த சமயத்தில் அவர் உயர்நீதிமன்றம் மற்றும் உச்சநீதிமன்றம் நீதிபதிகளையும் அவரது குடும்பத்தினரையும் அவதூறாக பேசிய வீடியோ யூடியூபில் பதிவேற்றம் செய்யப்பட்டிருந்தது. இதையடுத்து ஓய்வு பெற்ற நீதிபதி கர்ணன், நீதிபதிகளையும், நீதிமன்ற ஊழியர்களையும் அவதூறாக பேசியதாக தமிழ்நாடு புதுச்சேரி பார் கவுன்சில் புகார் அளித்தது. இந்த புகாரின் பேரில் 4 பிரிவுகளின் கீழ் வழக்குப்பதிவு செய்யப்பட்டது. ஆனால் புகார் தொடர்பாக நடவடிக்கை எடுக்கப்படவில்லை என சென்னை உயர்நீதிமன்றத்தில் வழக்கு தொடரப்பட்டது. இந்த வழக்கு கடந்த முறை விசாரணைக்கு வந்தபோது நிலை அறிக்கை தாக்கல் செய்ய வேண்டுமென காவல்துறைக்கு உத்தரவிடப்பட்டது. இந்நிலையில் இன்று கர்ணனை நேரில் அழைத்து விசாரணை நடத்தியதாகவும் இனிமேல் வீடியோ வெளியிடமாட்டேன் என உறுதியளித்திருந்தார் எனவும் காவல்துறை சார்பில் விளக்கம் அளிக்கப்பட்டது. இதைக்கேட்ட நீதிமன்றம் இதுவரை ஏன் கைது செய்யவில்லை என அதிருப்தியை வெளிப்படுத்தினர். மேலும், இதுகுறித்து டிஜிபி, சென்னை மாநகர காவல்துறை ஆணையர் ஆகியோர் டிசம்பர் 7-ஆம் தேதி விளக்கம் அளிக்க வேண்டும் எனவும் உத்தரவிடப்பட்டுள்ளது.
http://dlvr.it/Rmjg18

Read More