கிழிந்த ஷூவுடன் பந்து வீசிய முகமது ஷமி; காரணம் இதுதான்! - விளக்குகிறார் ஷேன் வார்ன்

இந்திய கிரிக்கெட் அணி அடிலெய்ட் மைதானத்தில் ஆஸ்திரேலியாவுடனான முதல் டெஸ்ட் போட்டியில் விளையாடி வருகிறது. பகலிரவு ஆட்டமாக நடைபெற்று வரும் இந்த போட்டியில் இந்தியா 244 ரன்களும், ஆஸ்திரேலியா 191 ரன்களும் முதல் இன்னிங்ஸில் குவித்துள்ளன. இந்திய அணி இந்த ஆட்டத்தில் 62 ரன்கள் முன்னிலையில் உள்ளது.  இந்நிலையில், இந்திய அணி பந்து வீசிய போது வேகப்பந்து வீச்சாளர் முகமது ஷமி இடது காலில் கிழிந்த ஷுவை அணிந்து கொண்டு விளையாடினார். அதை கவனித்த கிரிக்கெட் ரசிகர்கள் இணையத்தில் வைரலாக பகிர்ந்திருந்தனர். இதனிடையே, ஷமி ஏன் கிழிந்த ஷுவை அணிந்து கொண்டு பந்து வீசினார் என்பதற்கு ஆஸ்திரேலிய முன்னாள் வீரர் ஷேன் வார்னே விளக்கம் கொடுத்துள்ளார். “இது அவரது ஆட்டத்தின் வியூகம் என்று சொல்லலாம். பந்தை ரிலீஸ் செய்யும் போது சரியான லேண்டிங் கிடைக்க வேண்டும் என்பதற்காக ஷமி இதை செய்துள்ளார். HIGH ARM பவுலிங் ஆக்ஷனில் ஷமி பந்து வீசுகிறார். அப்படி அவர் பந்தை ரிலீஸ் செய்யும் போது எந்தவித இடம்பாடும் ஏற்படக் கூடாது என்பதற்காக ஷமி இதை செய்திருக்கலாம்” என வார்னே தெரிவித்துள்ளார்.  மொத்தமாக 17 ஓவர் வீசியுள்ள ஷமி 41 ரன்களை விட்டுக் கொடுத்துள்ளார். இதில் நான்கு மெய்டன் ஓவர்களும் அடங்கும். விக்கெட்  வீழ்த்த தவறி இருந்தாலும் ஆஸ்திரேலிய பேட்ஸ்மேன்களை அவர் கட்டுப்படுத்தி இருந்தார். அணிக்காக ஷமியின் அர்ப்பணிப்பை பார்த்து அவரை ரசிகர்கள் கொண்டாடி வருகின்றனர்.  
http://dlvr.it/RnxpwJ

Read More

மேதினிபூர் பிளான்: 2 நாட்களில் 3 எம்எல்ஏக்கள் ராஜினாமா... கலக்கத்தில் மம்தா!

மேற்கு வங்கத்தின் ஆளும் திரிணாமுல் காங்கிரஸ் கட்சியில் இருந்து 2 நாட்களில் 3 எம்எல்ஏக்கள் அடுத்தடுத்து ராஜினாமா செய்துள்ளது புதிய பரபரப்பை ஏற்படுத்தியுள்ளது.  திரிணாமுலின் மூத்த தலைவர்களில் ஒருவரும், அமைச்சருமான சுவேந்து ஆதிகாரி சமீபத்தில் தனது பதவியை அதிரடியாக ராஜினாமா செய்தார். அத்துடன், நேற்று முன்தினம் தனது எம்எல்ஏ பதவி, கட்சி பதவியையும் அவர் ராஜினாமா செய்தார். விரைவில் இவர் பாஜகவில் இணையலாம் எனக் கூறப்படுகிறது. இப்போது சுவேந்து ஆதிகாரியைத் தொடர்ந்து இன்னும் சில தலைவர்கள் ராஜினாமா செய்யத் தொடங்கியுள்ளனர். இது, சட்டப்பேரவைத் தேர்தலை விரைவில் எதிர்கொள்ளவுள்ள திரிணாமுல் கட்சிக்கு சிக்கலை ஏற்படுத்தியுள்ளது.  பண்டேஸ்வர் எம்.எல்.ஏ ஜிதேந்திர திவாரி தனது கட்சியை முதலில் ராஜினாமா செய்தார். இதையடுத்து, திரிணாமுல் தொண்டர்கள் இவரின் அலுவகலகத்தை சூறையாட, தற்போது எம்எல்ஏ பதவியையும் ராஜினாமா செய்துள்ளார். இவரைத் தொடர்ந்து சில்பத்ரா தத்தா, பாராக்பூரைச் சேர்ந்த டி.எம்.சி எம்.எல்.ஏவும் தற்போது தனது பதவியை ராஜினாமா செய்துள்ளார். இதேபோல், தென் வங்காள மாநில போக்குவரத்துக் கழகத்தின் (எஸ்.பி.எஸ்.டி.சி) தலைவரான கர்னல் தீப்தங்சு சவுத்ரியும் தனது பதவியில் இருந்து விலகினார்.  இதனைத் தடுக்க அதிருப்தி தலைவர்களுடன், குறிப்பாக எம்.பி, எம்எல்ஏக்களுடன் மம்தாவின் மருமகன் அபிஷேக் பானர்ஜி, மூத்த தலைவர்கள் ஃபிர்ஹாத் ஹக்கீம், அருப் பிஸ்வாஸ் ஆகியோர் பேச முயற்சித்து வருகின்றனர். அசான்சோல் பகுதியில் அரசியல் ரீதியாக செல்வாக்கு மிக்கவர்  ஜிதேந்திர திவாரி. இவர் கட்சியில் இருந்து வெளியேறுவதைத் தடுக்க மம்தா இன்று ஒரு கூட்டத்தைத் திட்டமிட்டார். ஆனால், அதற்கு முன்னர் திவாரி ராஜினாமா செய்தார்.  இவரின் ராஜினாமாவுக்கு காரணம், நகர்ப்புற மேம்பாட்டு அமைச்சரான ஃபிர்ஹாத் ஹக்கீம். ஸ்மார்ட் சிட்டி திட்டத்தின் கீழ் அசன்சோல் நகருக்கு மத்திய அரசு ஒதுக்கிய 3,500 கோடி ரூபாய் நிதியை அமைச்சரான ஃபிர்ஹாத் ஹக்கீம் தொகுதிக்கு ஒதுக்கீடு செய்யாமல் காலம் தாழ்த்தியதால், அசன்சோலின் வளர்ச்சி தடைபடுகிறது எனக் குற்றம்சாட்டி பதவி விலகியுள்ளார். இது தொடர்பாக 'தி பிரிண்ட்'டிடம் பேசியுள்ள திவாரி, ``தற்போதைய நகர்ப்புற மேம்பாட்டு அமைச்சரான ஃபிர்ஹாத் ஹக்கீம் ஒருபோதும் அசான்சோலில் எந்த வளர்ச்சியையும் அனுமதிக்க மாட்டார். அசன்சோல் மக்களுக்கு நான்தான் பொறுப்பு. முதல்வர் என்னிடம் பேசினார். ஆனால் நான் எழுப்பிய பிரச்சினைகள் அமைச்சரால் தீர்க்கப்படவில்லை. எனவே, எங்கள் முதல்வரை சங்கடப்படுத்த நான் விரும்பவில்லை. நான் ராஜினாமா செய்கிறேன், அவரை மீண்டும் அமைச்சராவதைத் தடுக்கும் எந்தவொரு சக்தியையும் ஆதரிப்பேன்" என்று கூறியுள்ளார்.  இதேபோல், கர்னல் தீப்தங்சு சவுத்ரியும், ``தற்போதைய தலைவர்கள் கீழ் செயல்பட முடியாது. நாங்கள் எப்போதும் தீதியைப் பார்த்து, ஒதுக்கப்பட்டபடி வேலை செய்தோம். நான் எம்.எல்.ஏ அல்லது எம்.பி. அல்ல. நான் அரசியல் பதவிகளுக்கு ஏங்கவில்லை. ஆனால் நான் ஒரு தொழில்முறை நிபுணராக வேலை செய்தேன். நான் எஸ்.பி.எஸ்.டி.சி யை லாபகரமாக்கினேன், குறை தீர்க்கும் களத்தை உருவாக்கிய பிறகு சரிசெய்தலில் நான் மிகவும் கடினமாக உழைத்தேன்" என்றவர், பிரசாந்த் கிஷோரின் ஐபேக் நிறுவனம் தொடர்பாக பேசினார்.  அதில், ``வாடகை நிறுவனம் எல்லாவற்றிலும் தலையிடத் தொடங்கியது. எங்களுக்கு ஒருபோதும் பாராட்டு கிடைக்கவில்லை, எங்கள் பணி இழிவுபடுத்தப்பட்டது. தீதி இப்போது பிஷி (அத்தை) ஆகிவிட்டார். இந்த தற்போதைய தலைவர்களின் கீழ் நாங்கள் பணியாற்ற முடியாது" என்று கூறியுள்ளார்.  ஆனால் இந்த ராஜினாமாக்களை பற்றி பேசியுள்ள திரிணாமுல் கட்சி தரப்பு, ``திரிணாமுல் காங்கிரஸ் மிகப் பெரிய குடும்பம். ஒரு சில மக்கள் விலகினால் அது எங்கள் கட்சியை பாதிக்காது. நாங்கள் அனைவரும் திரிணாமுலில் ஒரு குறிக்கோளுடன் மற்றும் ஒரு சித்தாந்தத்துடன் இணைந்தோம்.  பலர் ஆடைகளை மாற்றுவது போன்ற கட்சிகளை மாற்றலாம், ஆனால் அவர்களுடைய சித்தாந்தத்துடன் சமரசம் செய்ய முடியுமா? காந்திஜியைக் கொன்ற கட்சியில் அவர்கள் எவ்வாறு சேர முடியும்?" என்று கூறியுள்ளனர்.  இதற்கிடையே, ராஜினாமா செய்த அனைவரும் நாளை மேதினிபூரில் மத்திய உள்துறை அமைச்சர் அமித்ஷா நடத்தும் பேரணியின்போது பாஜகவில் இணைவார்கள் என எதிர்பார்க்கப்படுகிறது. இந்தக் கூட்டத்தில் மேலும் ட்விஸ்ட்கள் நடக்கும் என எதிர்பார்க்கப்படுகிறது. இவர்களை போல குறைந்தது நான்கு முதல் ஐந்து எம்.எல்.ஏக்கள் மற்றும் ஒரு எம்.பி. திரிணாமுல் கட்சியிலிருந்து விலகி நாளை அமித் ஷா முன்னிலையில் பாஜகவில் இணைவார்கள் என அக்கட்சி தரப்பில் பேசப்பட்டு வருகிறது. ஏற்கெனவே பர்த்வான், கிழக்கு மிட்னாபூர், மால்டா, முர்ஷிதாபாத், வடக்கு 24 பர்கானா ஆகிய மாவட்டங்களின் பல மூத்த நிர்வாகிகள் மற்றும் உள்ளூர் நகராட்சிகளின் பல கவுன்சிலர்கள் தங்கள் பதவிகளை விட்டு வெளியேறிய நிலையில், தொடர்ந்து நடக்கும் ராஜினாமா படலம் திரிணாமுல் தரப்பில் சற்று பதற்றத்தை ஏற்படுத்தியுள்ளது.
http://dlvr.it/Rnvmm7

Read More

வேளாண் சட்டங்கள்: `குறைந்தபட்ச ஆதார விலை தொடரும்!’ - பிரதமர் மோடி உறுதி

மத்தியப் பிரதேச மாநிலத்தின் ரைசன் நகரில் நடைபெற்ற 'கிசான் கல்யாண்' நிகழ்ச்சியில் பிரதமர் மோடி காணொளி காட்சி மூலம் கலந்துகொண்டார். இந்த நிகழ்ச்சியில் பயிர் சேதத்தால் பாதிக்கப்பட்ட 35 லட்சம் விவசாயிகளுக்கு 16 ஆயிரம் கோடி ரூபாய் நிவாரணங்கள் வழங்கப்பட்டது. இந்த நிகழ்ச்சியில் காணொலி காட்சி மூலம் கலந்து கொண்டு பேசிய பிரதமர் மோடி, ``வேளாண் சட்ட மசோதா ஒரு இரவில் கொண்டுவரப்பட்டது அல்ல, கட்சிகள், வல்லுநர்கள் மற்றும் விவசாய பிரதிநிதிகளின் நீண்டகால கோரிக்கையின் மூலம் கொண்டுவரப்பட்டது" என்றார். मध्य प्रदेश में किसान सम्मेलन को संबोधित करते हुए... https://t.co/Rli3e8o9xF— Narendra Modi (@narendramodi) December 18, 2020 தொடர்ந்து பேசிய பிரதமர் மோடி, ``இந்தியாவின் விவசாயமும், விவசாயிகளும் இனியும் பின்தங்கிய நிலையில் இருக்க முடியாது. உலகின் மற்ற பெரிய நாடுகளின் விவசாயிகளுக்குக் கிடைக்கும் நவீன வசதிகள் இந்திய விவசாயிகளுக்கும் கிடைக்க வேண்டும். அதை, இனியும் தாமதப்படுத்தக்கூடாது. நான் அனைத்து அரசியல் கட்சிகளையும் கைகூப்பிக் கேட்டுக்கொள்கிறேன். நீங்களே அனைத்து புகழையும் வைத்துக்கொள்ளுங்கள். நான் விவசாயிகளின் வாழ்க்கையை எளிமையாக்க விரும்புகிறேன். அவர்களின் முன்னேற்றத்தை விரும்புகிறேன். விவசாயத்தில் நவீனத்துவத்தை விரும்புகிறேன்" என்றார். தொடர்ந்து, "கடந்த 20 வருடங்களுக்கு மேலாக மத்திய மற்றும் மாநில அரசுகள் வேளாண் சட்ட திருத்தும் குறித்துப் பேசிவருகிறது. விவசாய வல்லுநர்கள், பொருளாதார வல்லுநர்கள் மற்றும் விவசாயிகள் இந்த சீர்திருத்தங்களைக் கோரியிருந்தனர். இந்த உலகம் நாளுக்கு நாள் மாறிக்கொண்டே இருக்கிறது, போட்டிகளுக்குப் பின்னால் விவசாயிகள் விழுவதை எங்களால் அனுமதிக்க முடியாது. நீண்டகால விவசாயிகளின் கோரிக்கையை நாங்கள் நிறைவேற்றியுள்ளோம். அரசியல் கட்சிகள் விவசாயிகளைத் தவறான வழியில் வழிநடத்துவதை நிறுத்தவேண்டும். வேளாண் சட்டம் கொண்டுவரப்பட்டு 6 மதங்களுக்கும் மேல் ஆகிறது. சிலரின் அரசியல் ஆதாயத்திற்காகப் பொய்யான பிரசாரம் செய்யப்பட்டுள்ளது" என்று கூறினார்.'கிசான் கல்யாண்' நிகழ்ச்சியில் பிரதமர் மோடி ``விவசாயிகள் எவ்வளவு முயற்சி செய்தலும் சேமிப்பு சரியாக இல்லையென்றால், அது பெரும் இழப்பு தான். அந்த இழப்பானது விவசாயிகளுக்கு மட்டுமில்லை, இந்த ஒட்டுமொத்த தேசத்திற்குமானது. விவசாயத்துறையில் சேமிப்பு வசதி மற்றும் கிடங்குகள் மிகவும் முக்கியமானது. தற்போது, உணவு பதப்படுத்தும் மையங்கள், கிடங்குகள், குளிர் களஞ்சியங்கள், உலர் களஞ்சியங்கள் அமைப்பது முக்கியம். இவற்றை அமைப்பது குறித்துச் செயல்படத் தொடங்கவேண்டும். Also Read: டெல்லி: `மத்திய அரசு ஆராய வேண்டும்; போராட்டத்தால் பிரச்னைகள் தீராது!’ - உச்ச நீதிமன்றம் கருத்து விவசாயிகளின் வளர்ச்சியை இந்த அரசாங்கம் உறுதிசெய்துள்ளது. இந்த சட்டம் விவசாயிகளையும் வியாபாரிகளையும் இணைக்கும். இது விவசாயிகளின் வருமானத்தை இரட்டிப்பாகும். விவசாயிகளின் பொருளாதாரம் மேம்படும். நாங்கள் குறைந்தபட்ச ஆதார விலையை (எம்.எஸ்.பி) நீக்க விரும்பினால், சுவாமிநாதன் கமிஷன் அறிக்கையை ஏன் செயல்படுத்த வேண்டும்? எம்.எஸ்.பி விவகாரத்தில் இந்த அரசு தீவிரமாக உள்ளது, அதனால் தான் அந்தந்த பருவத்திற்கு முன்பே அறிவிப்பை வெளியிடுகிறோம். குறைந்தபட்ச ஆதாரவிலை தொடரும். "The numbers I will provide you with, will clear everything up regarding the MSP," says PM Modi at the Kisan Kalyan event pic.twitter.com/cvnYtXuHq9— ANI (@ANI) December 18, 2020 தற்போது, அனைத்து விவசாயிகளுக்கு கிசான் கடன் அட்டை கிடைக்கிறது. முன்பு, இந்த அட்டை எல்லா விவசாயிகளுக்கும் கிடைக்கப்படவில்லை. ஆனால், அந்த போக்கை மாற்றி நாட்டின் எல்லா விவசாயிகளுக்கும் இந்த கடன் அட்டை கிடைக்கும் வகையில் நாங்கள் விதிகளை மாற்றி அமைத்தோம். இந்த சட்டம் விவசாயிகள் தற்கொலை செய்துகொள்வதைத் தடுக்கும் வகையில் இயற்றப்பட்டுள்ளன" என்று பேசினார் பிரதமர். இந்த நிகழ்ச்சியை மத்தியப் பிரதேசத்தில் உள்ள 23,000 கிராம மக்கள் பார்க்கும் வகையில் ஏற்பாடு செய்யப்பட்டிருந்ததாகத் தெரிவிக்கப்பட்டுள்ளது.
http://dlvr.it/RnvmdL

Read More

மதுரை எய்ம்ஸ்: முரண்பட்ட கருத்தை மாறி மாறி தெரிவித்த முதல்வர், வருவாய்த்துறை அமைச்சர்

மதுரையில் எய்ம்ஸ் மருத்துவமனை அமைக்க நிலம் வழங்கப்பட்டு விட்டது என அமைச்சர் உதயகுமார் தெரிவித்திருக்கும் நிலையில், நிலத்தைக் கொடுப்பதில் ஒருசில பிரச்னைகள் இருப்பதாக முதல்வர் பழனிசாமி கூறியிருக்கிறார். மதுரையில் எய்ம்ஸ் மருத்துவமனை அமைக்க அடிக்கல் நாட்டியபிறகு, அதற்கான முயற்சிகள் எடுக்கப்படாதது குறித்து பலரும் விமர்சித்து வருகின்றனர். இந்நிலையில், வருவாய்த்துறை அமைச்சரும், முதல்வரும் ஒன்றுக்கொன்று மாறுபட்ட கருத்தை தெரிவித்திருக்கின்றனர். வருவாய்த்துறை அமைச்சர் ஆர்.பி. உதயகுமார் பேசுகையில், ‘’எய்ம்ஸ் மருத்துவமனைக்கு இடம் கொடுக்கப்பட்டிருக்கிறது. மாவட்ட வருவாய்த்துறை அலுவலகத்திலும், கோட்டாட்சியர், வட்டாட்சியர் அலுவலகத்திலும் உறுதிசெய்துவிட்டுத்தான் வருவாய்த்துறை அமைச்சர் என்ற முறையில் நான் தெரிவிக்கிறேன். வருவாய்த் துறையிலிருந்து மக்கள் நல்வாழ்வுத் துறைக்கு மாற்றம் செய்யப்பட்டு ஒப்படைக்கப்பட்டிருக்கிறது. அவர்கள்(மத்திய) எத்தனை ஏக்கர் கேட்டாலும் கொடுப்பதற்கு நாம் தயாராக இருக்கிறோம். அவர்களிடம் ஒப்படைக்கப்பட்டதால்தான் சுற்றுச்சுவர் அமைக்கும் பணி தொடங்கியது. இல்லாவிட்டால் அத்துமீறல் என்றாகிவிடும்’’ என்றார். ஆனால் இன்று அரியலூரில் பேசிய முதல்வர் அதற்கு முரண்பாடான கருத்தை கூறினார். அவர் பேசியபோது, ‘’எய்ம்ஸ் மருத்துவமனை கட்டுவதில் சில வகைமாற்றம் செய்யவேண்டி இருக்கிறது. விரைவில் செயல்பட்டு அந்த நிலம் வழங்கப்படும். ஏற்கெனவே அறிவித்தபடி நிலம் வழங்கப்படும். வங்கியின் மூலமாக மத்திய அரசு லோன் வாங்கும் முயற்சியில் உள்ளதால் நிதி வழங்குவதில் சற்று கால தாமதம் ஏற்பட்டிருக்கிறது. நிலம் வழங்குவதில் எந்தவகையான இடர்பாடும் இல்லாமல் இருக்க அரசு நடவடிக்கையை மேற்கொள்ளும். இருக்கும் சில பிரச்னைகள் சரிசெய்யப்பட்டு உரிய நேரத்தில் நிலம் வழங்கப்படும்’’ என்றார்.
http://dlvr.it/RntCxl

Read More

கமல் நடத்தும் பிக்பாஸ் பார்த்தால், ஒரு குடும்பமும் நன்றாக இருக்காது: முதல்வர் விமர்சனம்

"கமல்ஹாசன் தனது திரைப்படங்கள், டிவி நிகழ்ச்சிகள் மூலம் குடும்பங்களை சீரழிக்கிறார்" என்று முதல்வர் எடப்பாடி பழனிசாமி விமர்சித்துள்ளார். குறிப்பாக,  "கமல் நடத்தும் பிக்பாஸ் நிகழ்ச்சியை பார்த்தால் ஒரு குடும்பம் கூட நன்றாக இருக்காது” என்றார். அரியலூர் மாவட்டத்தில் இன்று ஆய்வு மேற்கொண்ட முதல்வர் எடப்பாடி பழனிசாமி, முடிவுற்ற பணிகளை துவக்கி வைத்தும், புதிய திட்டங்களுக்கு அடிக்கல் நாட்டினார். அதன்பின் நடந்த செய்தியாளர்கள் சந்திப்பில், "லஞ்சம் ஊழலில் அரசு எவ்வழியோ அதிகாரிகள் அவ்வழி’ என்று கமல் தெரிவித்து கருத்து குறித்து முதல்வரிடம் கேள்வி எழுப்பப்பட்டது. அதற்கு பதிலளித்தவர், ‘’கமல் ரிட்டையர்ட் ஆகி அரசியலுக்கு வந்துள்ளார். அவருக்கு 70 வயது ஆகிறது. இந்த வயதில் டிவியில் பிக்பாஸ் நிகழ்ச்சி நடத்திக் கொண்டிருக்கிறார். பிக்பாஸ் நடத்துபவர்கள் அரசியல் செய்தால் எப்படியிருக்கும்? இந்நிகழ்ச்சியை பார்க்கும் ஒரு குடும்பம் கூட நல்லாயிருக்காது. பிக்பாஸ் நிகழ்ச்சியில் அப்படி என்ன இருக்கிறது? சொல்லுங்க பார்க்கலாம். கமல் நாட்டு மக்களுக்கு நல்லது செய்வதாக இல்லை. நல்லாயிருக்கும் குடும்பத்தை கெடுப்பதுதான் அவர் வேலை. பிக்பாஸ் நிகழ்ச்சியை பார்த்தால் குழந்தைகள் முதல் குடும்பங்கள் வரை கெட்டுப் போவார்கள். எம்.ஜி.ஆர் நாட்டு மக்களுக்கு பயன்படும்படி எவ்வளவு பாடல்கள் பாடியிருக்கிறார். ஆனால், கமல்ஹாசன் நாட்டு மக்களுக்கு ஆக்கப்பூர்வமான ஒரு பாடலையாவது பாடியிருக்கிறாரா? அவருடைய படத்தை பார்த்தால் அதோடு அந்தக் குடும்பம் காலி. அதனால் கமல் கருத்தை பெரிதாக எடுத்துக்கொள்ள வேண்டிய அவசியமில்லை’’ என்றார். 
http://dlvr.it/Rnr19S

Read More

கேரள உள்ளாட்சித் தேர்தல் : `தங்கக் கடத்தல்’ தகதகக்கவில்லை... எப்படி வென்றது இடது ஜனநாயக முன்னணி?

கேரளாவில் பினராயி விஜயன் தலைமையிலான இடது ஜனநாயக முன்னணி ஆட்சி (எல்.டி.எஃப்), கடந்த நான்கரை ஆண்டுகளில் நலத் திட்டங்கள் பலவற்றை செயல்படுத்தியிருந்தாலும்கூட, சபரிமலை விவகாரம் பினராயி விஜயன் அரசுக்குப் பின்னடைவை ஏற்படுத்தியது. `சபரிமலை ஐயப்பன் கோயிலில் பெண்களை அனுமதிக்கலாம்’ என்ற உச்ச நீதிமன்றத் தீர்ப்பை அமல்படுத்தியது இடது ஜனநாயக முன்னணி அரசு. அதற்கு எதிராக காங்கிரஸும் பா.ஜ.க-வும் மிகப்பெரிய போராட்டங்களை நடத்தின. அதைத் தொடர்ந்து, 2019-ல் நடைபெற்ற நாடாளுமன்ற பொதுத்தேர்தலில் இடது முன்னணி அரசு தோல்வியடைந்தது. மொத்தமுள்ள 20 தொகுதிகளில் ஒரே ஒரு தொகுதியில்தான் சி.பி.ஐ(எம்) வெற்றிபெற்றது. ஆனால், இப்போது நடைபெற்ற உள்ளாட்சித் தேர்தலில் மிகப்பெரிய வெற்றியைப் இடது ஜனநாயக முன்னணி பெற்றிருக்கிறது. நாடாளுமன்றத் தேர்தலில் 19 தொகுதிகளில் வெற்றிபெற்ற காங்கிரஸ் தலைமையிலான ஐக்கிய ஜனநாயக முன்னணி (யூ.டி.எஃப்), உள்ளாட்சித் தேர்தலில் சரிவைச் சந்தித்திருக்கிறது. கேரளாவில் பெரிய சக்தியாக வளர்ந்திருப்பதாகச் சொல்லிக்கொள்ளும் பா.ஜ.க-வின் தலைமையிலான தேசிய ஜனநாயகக் கூட்டணி (என்.டி.ஏ) படுதோல்வி அடைந்திருக்கிறது.பினராயி விஜயன் இந்தியாவில் கொரோனா தொற்று பரவிய முதல் மாநிலம் கேரளா. பினராயி விஜயன் அரசு, கொரோனா பரவலை மிகத் திறமையாகக் கையாண்டதாக சர்வதேச அளவில் பாராட்டைப் பெற்றது. இந்தநிலையில்தான், டிசம்பர் 8, 10, 14 ஆகிய தேதிகளில் கேரளாவில் உள்ளாட்சித் தேர்தல் நடைபெற்றது. எல்.டி.எஃப்., யூ.டி.எஃப்., என்.டி.ஏ ஆகிய மூன்று அணிகள் போட்டியிட்டன. கொரோனா தடுப்பு நடவடிக்கைகளைப் பின்பற்றி ஆறு மாநகராட்சிகள், 14 மாவட்ட பஞ்சாயத்துகள், 86 நகராட்சிகள், 152 ஒன்றிய பஞ்சாயத்துகள், 941 கிராமப் பஞ்சாயத்துகள் ஆகியவற்றுக்குத் தேர்தல் நடைபெற்றது. அனைத்துக் கட்சியினரும் இளம்பெண்களை வேட்பாளர்களாகக் களமிறக்குவதில் ஆர்வம் காட்டினர். சமீபகாலத்தில் கேரள அரசியலில் பெரும் பரபரப்பை ஏற்படுத்தியது தங்கக் கடத்தல் விவகாரம். தங்கக் கடத்தலில் முதல்வர் அலுவலகத்துக்குத் தொடர்பு இருப்பதாக எதிர்க்கட்சிகள் குற்றம்சாட்டின. முதல்வர் பினராயி விஜயன் பதவி விலக வேண்டும் என்று காங்கிரஸ் கட்சியும், பா.ஜ.க-வும் தீவிரமான போராட்டங்களை நடத்தின. உள்ளாட்சித் தேர்தல் பிரசாரத்தின்போது, தங்கக் கடத்தல் உள்ளிட்ட பினராயி அரசுக்கு எதிரான விவகாரங்களை காங்கிரஸும் பா.ஜ.க-வும் கையிலெடுத்தன. கொரோனாவைச் சிறப்பாகக் கையாண்டதன் மூலமாக பினராயி விஜயன் அரசு பெற்றிருந்த நற்பெயரை காலிசெய்யும் வகையில் எதிர்க்கட்சிகள் தீவிர பிரசாரத்தில் ஈடுபட்டன. ஏற்கெனவே நாடாளுமன்றத் தேர்தலில் தோல்வியடைந்த இடது ஜனநாயக முன்னணி, உள்ளாட்சித் தேர்தலிலும் தோற்கும் என்று எதிர்க்கட்சிகள் எதிர்பார்த்தன. ஆனால், அவர்களின் எதிர்பார்ப்புகளைத் தேர்தல் முடிவுகள் தகர்த்துவிட்டன.வாக்காளர்கள் நேற்று (டிச. 16) உள்ளாட்சித் தேர்தல் முடிவுகள் வெளியாகின. இதில் இடது ஜனநாயக முன்னணிக்குக் கிடைத்த மிகப்பெரிய வெற்றி, முதல்வர் பினராயி விஜயனின் தலைமைக்குக் கிடைத்த நற்சான்றிதழாகப் பார்க்கப்படுகிறது. ஐந்து மாநகராட்சிகள், 36 நகராட்சிகள், 10 மாவட்டப் பஞ்சாயத்துகள், 108 ஒன்றியப் பஞ்சாயத்துகள், 515 கிராமப் பஞ்சாயத்துகள் ஆகியவற்றில் எல்.டி.எஃப் வெற்றி பெற்றிருக்கிறது. திருவனந்தபுரம் மாநகராட்சியில் மொத்தம் 100 வார்டுகள் உள்ளன. அவற்றில், 52 வார்டுகளில் எல்.டி.எஃப் வெற்றி பெற்றது. அங்கு 33 வார்டுகளில் ஜெயித்ததன் மூலமாக இரண்டாவது இடத்தை பா.ஜ.க தலைமையிலான கூட்டணி பிடித்தது. 10 வார்டுகளில் யூ.டி.எஃப் வெற்றிபெற்றது. கொல்லம் மாநகராட்சியிலுள்ள 55 வார்டுகளில் எல்.டி.எஃப் 39 வார்டுகளையும், யு.டி.எஃப் ஒன்பது வார்டுகளையும், என்.டி.ஏ ஆறு வார்டுகளையும் கைப்பற்றின. எர்ணாகுளம் மாநகராட்சியின் 74 வார்டுகளில் 34 இடங்களில் எல்.டி.எஃப், 31 வார்டுகளில் யூ.டி.எஃப், ஐந்து வார்டுகளில் என்.டி.ஏ வெற்றிபெற்றன. திருச்சூர் மாநகராட்சியின் 55 வார்டுகளில் எல்.டி.எஃப் 24 வார்டுகளிலும், யூ.டி.எஃப் 23 வார்டுகளிலும், என்.டி.ஏ ஆறு வார்டுகளிலும் வெற்றிபெற்றன. கோழிக்கோடு மாநகராட்சியின் 75 வார்டுகளில் 48 இடங்களில் எல்.டி.எஃப்,14 இடங்களில் யூ.டி.எஃப், ஏழு இடங்களில் என்.டி.ஏ வெற்றிபெற்றன. 86 நகராட்சிகளில் 36 இடங்களில் எல்.டி.எஃப், 33 இடங்களில் யூ.டி.எஃப், ஓர் இடத்தில் பா.ஜ.க வெற்றிபெற்றன. மொத்தம் 14 மாவட்டப் பஞ்சாயத்துகள் உள்ளன. அவற்றில், பத்து மாவட்டங்களில் எல்.டி.எஃப், மூன்று மாவட்டங்களில் யூ.டி.எஃப் வெற்றிபெற்றுள்ளன. 152 ஒன்றிய பஞ்சாயத்துகளில் எல்.டி.எஃப் 111, யூ.டி.எப் 41 என வெற்றிபெற்றுள்ளன. 941 கிராமப் பஞ்சாயத்துகளில் எல்.டி.எஃப் 508, யூ.டி.எஃப் 374, என்.டி.ஏ 24, மற்றவர்கள் 32 என வெற்றி பெற்றுள்ளனர்.பினராயி விஜயன் சட்டமன்றத் தேர்தல் நடைபெறுவதற்கு ஒரு சில மாதங்களே உள்ள நிலையில், உள்ளாட்சித் தேர்தலில் கிடைத்துள்ள இந்த வெற்றியால் இடது ஜனநாயக முன்னணியினர் பெரும் உற்சாகத்தில் இருக்கிறார்கள். Also Read: `சமூகநீதியை ஒழிக்க முயற்சி’... ரஜினி மீது அமைச்சர் சி.வி.சண்முகம் பாய்வது ஏன்? மாநிலம் முழுவதும் சிறுபான்மை வாக்குகள் இடது முன்னணிக்குப் பெருமளவில் விழுந்துள்ளன. ஜோஸ் கே. மணி தலைமையிலான கேரளா காங்கிரஸ் (எம்) கட்சியுடன் இடது முன்னணி ஏற்படுத்திய கூட்டணி, இந்த வெற்றிக்குக் கூடுதல் பலமாக அமைந்தது. இந்தக் கூட்டணி, சிறுபான்மையினருக்கும் இடது ஜனநாயக முன்னணிக்கும் இடையே பெரும் நெருக்கத்தை ஏற்படுத்தியது. கோட்டயம், இடுக்கி, பத்தனம்திட்டா ஆகிய மாவட்டங்களில் எல்.டி.எஃப் அதிக வாக்குகள் பெற்றதற்கு ஜோஸ் கே.மணி உடனான கூட்டணி முக்கியக் காரணம்.பினராயி விஜயன் பல இடங்களில் காங்கிரஸ் கட்சி வேட்பாளரை எதிர்த்து, அதே கட்சியைச் சேர்ந்த போட்டி வேட்பாளர் களமிறங்கியதும், கொரோனா காலத்தில் ஆளும் சி.பி.ஐ(எம்) அளவுக்குக் கீழே இறங்கி வேலை செய்யாததும் யூ.டி.எஃப் தோல்விக்கு முக்கியக் காரணங்களாகச் சொல்லப்படுகின்றன. நகர்ப்புறத்தில் பா.ஜ.க-வுக்கு வாங்குவங்கி அதிகமாக இருப்பதால், திருவனந்தபுரம் மாநகராட்சியைப் பிடித்துவிட வேண்டும் என்று பா.ஜ.க முனைப்புக் காட்டியது. ஆனால், அங்கு மொத்தமுள்ள 100 வார்டுகளில் 34 வார்டுகளையே பா.ஜ.க-வால் பிடிக்க முடிந்தது. இந்த வெற்றி குறித்துப் பேசிய முதல்வர் பினராயி விஜயன், ``இது மக்களின் வெற்றி. ஒற்றுமையுடன் இருக்க வேண்டும் என்று விரும்பிய அனைவரின் வெற்றி. கேரளாவையும் அதன் சாதனைகளையும் ஒழித்துக்கட்ட முயன்றவர்களுக்கான பதிலடிதான் இந்தத் தேர்தல் முடிவுகள். யூ.டி.எஃப் முக்கியத்துவமற்றதாகிவிட்டது. பெரிதாக வளர்ந்துவிட்டதாகக் கூறிக்கொண்டிருந்த பா.ஜ.க தரைமட்டமாகிவிட்டது. எங்கள் தேர்தல் அறிக்கையில் 600 வாக்குறுதிகளை அளித்திருந்தோம். அவற்றில் 570 வாக்குறுதிகளை நிறைவேற்றியிருக்கிறோம். இவைபோக, ஏராளமான திட்டங்களைத் தொடங்கியிருக்கிறோம். இந்த நடவடிக்கைகள் அனைத்துக்கும் மக்கள் மதிப்பளித்திருக்கிறார்கள்” என்று கூறியிருக்கிறார்.
http://dlvr.it/Rnr18K

Read More

'மாஸ்டர்' படத்தால் தள்ளிப்போகும் 'ஈஸ்வரன்' ரிலீஸ்?

சிலம்பரசன் நடித்துள்ள 'ஈஸ்வரன்' திரைப்படத்தின் ரிலீஸ் தள்ளிச் செல்கிறது எனத் தகவல் வெளியாகியுள்ளது. சுசீந்திரன் இயக்கத்தில் சிலம்பரசன் நடித்துள்ள ஈஸ்வரன் திரைப்படத்தை வரும் பொங்கல் பண்டிகைக்கு வெளியிடத் திட்டமிட்டிருந்தனர். ஆனால் பொங்கல் பண்டிகைக்கு வெளியாகும் மாஸ்டர் திரைப்படத்தை ஆயிரத்துக்கும் அதிகமான திரையரங்குகளில் திரையிட பேச்சுவார்த்தை நடைபெற்று வருகிறது. இந்த நிலையில் ஈஸ்வரன் படத்துக்கு 100 திரையரங்குகள் மட்டுமே கிடைக்கும் சூழல் ஏற்படும் என்று திரையரங்கு உரிமையாளர்கள் தரப்பில் கூறுகின்றனர். இதனால் ஈஸ்வரன் படத்தின் வெளியீட்டை தள்ளிவைக்க தயாரிப்பு நிறுவனம் திட்டமிட்டுள்ளதாக தகவல் வெளியாகியுள்ளது. அதேவேளையில் சிலம்பரசனின் பிறந்த நாளை முன்னிட்டு ஜனவரி இறுதியில் வெளியிட முடிவெடுத்துள்ளதாகவும் கூறப்படுகிறது.
http://dlvr.it/RnpQj8

Read More