`தனி கட்டுப்பாட்டு அறை; முன்னெச்சரிக்கை நடவடிக்கைகள் தீவிரம்! - மகாராஷ்டிராவில் பறவைக்காய்ச்சல்

இந்தியாவில் குஜராத், ராஜஸ்தான், டெல்லி போன்ற 7 மாநிலங்களில் பறவைக்காய்ச்சல் வேகமாக பரவி வருகிறது. இதனால் ஆயிரக்கணக்கான கோழிகள் அழிக்கப்பட்டு வருகிறது. மகாராஷ்டிரா மாநிலத்திலும் அதன் தாக்கம் தென்பட ஆரம்பித்துள்ளது. பர்பானி மாவட்டத்தில் உள்ள முரும்பா என்ற கிராமத்தில் சுய உதவிக்குழு நடத்தி வந்த கோழிப்பண்ணையில் 3 நாட்களுக்கு முன்பு திடீரென 800 கோழிகள் இறந்துவிட்டன. இறந்த கோழிகள் சோதனைக்கு கொண்டு செல்லப்படுகிறது அதன் மாதிரிகளை மாவட்ட நிர்வாகம் சோதனைக்காக அனுப்பி வைத்தது. அவை பறவை காய்ச்சல் காரணமாக இறந்திருப்பது ஆய்வில் தெரிய வந்துள்ளதாக அம்மாவட்ட ஆட்சி தலைவர் தீபக் முக்லிகர் தெரிவித்தார். இதையடுத்து இக்கிராமத்தை சுற்றி 10 கிலோ மீட்டர் தூரத்திற்கு கோழி இறைச்சி வாங்க விற்க தடை விதிக்கப்பட்டுள்ளது. அதோடு அக்கிராமத்தை சேர்ந்த அனைவருக்கும் பறவைக்காய்ச்சல் இருக்கிறதா என்பது குறித்து சோதனை செய்யப்பப்பட்டுள்ளது. பர்பானி மட்டுமல்லாது மும்பை மற்றும் அதனையொட்டியுள்ள தானேயிலும் பறவைக்காய்ச்சல் பரவி இருக்கிறது. மும்பையில் உள்ள செம்பூர் என்ற இடத்தில் 11 காகங்களும், தானேயில் 13 பறவைகளும் பறவைக்காய்ச்சலுக்கு இறந்துவிட்டது. இதனையடுத்து தானேயில் பறவைக் காய்ச்சலை கட்டுப்படுத்த தனி கட்டுப்பாட்டு அறை அமைக்கப்பட்டுள்ளது. இச்சம்பவத்தையடுத்து முதல்வர் உத்தவ் தாக்கரே சுகாதாரத்துறை அதிகாரிகளுடன் இது குறித்து அவசர ஆலோசனை நடத்தினார். இதில் தேவையான அனைத்து விதமான முன்னெச்சரிக்கை நடவடிக்கைகளையும் எடுக்கும்படி முதல்வர் தாக்கரே கேட்டுக்கொண்டார். பறவைக் காய்ச்சல் இது குறித்து மாநில கால்நடைத்துறை அமைச்சர் சுனில் கேதார் பொதுமக்களுக்கு விடுத்துள்ள அறிக்கையில், மக்கள் கோழிக்கறி மற்றும் முட்டையை 70 டிகிரியில் நன்றாக வேகவைத்து சாப்பிடும் படி கேட்டுக்கொண்டுள்ளார். பறவைக்காய்ச்சல் சம்பவத்தை தொடர்ந்து மும்பையில் கோழிக்கறி விலை கடுமையாக சரிந்துள்ளது. ஆனாலும் மக்கள் அவற்றை வாங்க ஆர்வம் காட்டாமல் இருந்து வருகின்றனர். குளிர்காலத்தில் கோழிக்கறி அதிக விலையில் விற்பனையாவது வழக்கம். ஆனால் பறவைக்காய்ச்சல் காரணமாக மக்கள் மத்தியில் கோழிக்கறியை வாங்க அச்சம் ஏற்பட்டுள்ளது.
http://dlvr.it/RqPKhq

Read More

வேளாண் சட்டங்கள் - மத்திய அரசை கேள்விகளால் துளைத்த உச்ச நீதிமன்றம்

வேளாண் சட்டங்களை அமல்படுத்துவதை தற்காலிகமாக நிறுத்தி வைக்க மத்திய அரசு தாயாரா என உச்ச நீதிமன்றம் கேள்வி எழுப்பியுள்ளது. மத்திய அரசு நிறுத்தி வைக்கவில்லை என்றால் நீதிமன்றமே நிறுத்தி வைக்க நேரிடும் எனவும் குறிப்பிட்டுள்ளது வேளாண் சட்டங்களை வாபஸ் பெறக்கோரி விவசாயிகளின் போராட்டம் நீடித்து வரும் நிலையில் அது தொடர்பான வழக்குகளை தலைமை நீதிபதி எஸ்.ஏ.பாப்டே தலைமையிலான அமர்வு விசாரித்தது. புதிதாக கொண்டு வரப்பட்ட 3 வேளாண் சட்டங்களுக்கு எதிராகவும் ஆதரவாகவும் தொடரப்பட்ட வழக்குகள் மற்றும் டெல்லியில் நடைபெறும் விவசாயிகள் போராட்டம் உள்ளிட்டவை தொடர்பான வழக்குகளை இணைத்து விசாரணை நடைபெற்றது. இந்த வழக்கு விசாரணையில் மத்திய அரசை கேள்விகளால் துளைத்தது உச்ச நீதிமன்றம். ''மத்திய அரசு நிறுத்தி வைத்தால் விவசாயிகளுடன் பேச நாங்கள் குழு அமைக்கிறோம். வேளாண் சட்டங்களை அமல்படுத்தியே தீருவோம் என மத்திய அரசு நினைப்பது ஏன் என்று தெரியவில்லை. விவசாயிகளின் போராட்டத்தை முடிவுக்கு கொண்டு வர மத்திய அரசு ஆக்கப்பூர்வமான நடவடிக்கை எடுக்கவில்லை'' எனத் தெரிவித்துள்ளது. மத்திய அரசு சார்பில் என்னென்ன நடவடிக்கைகள் எடுக்கப்பட்டன என்பது குறித்து விளக்குமாறும் உச்ச நீதிமன்றம் உத்தரவிட்டுள்ளது இது குறித்து குறிப்பிட்ட தலைமை நீதிபதி, வேளாண் சட்டங்கள் சிறந்தவை என ஒரு மனுகூட தாக்கல் செய்யப்படவில்லை, யாருடைய ரத்தத்தையும் எங்கள் கைகளில் வைத்திருக்க விரும்பவில்லை என காட்டமாக தெரிவித்துள்ளார்.
http://dlvr.it/RqLdFR

Read More

`இது வாழை விவசாயிகளுக்கு கிடைத்த வரப்பிரசாதம்!' - விஞ்ஞானிகளின் புதிய மதிப்புக்கூட்டல் பொருள்

வாழை விவசாயிகள் விலை வீழ்ச்சி உள்ளிட்ட பல காரணங்களால் வருத்தத்தில் இருக்கும் நேரத்தில் அவர்களுக்கு ஓர் இனிப்பான செய்தி வந்து சேர்ந்துள்ளது. வாழை பழத்தைக் கொண்டு ஒரு புதிய உணவு வகையை உருவாக்கியுள்ளனர் கேரளத்து விஞ்ஞானிகள் குழு. வாழை ஒரு சாதாரண பழவகையைச் சேர்ந்ததாக இருந்தாலும் அதன் மருத்துவ குணங்கள் அதிசயிக்க வைக்கின்றன. வாழைப்பழத்தில் உள்ள வைட்டமின் பி6 ஆனது டிரைப்டோபெனாக மாற்றப்படுகிறது. டிரைப்டோபென் சீரோடோனினாக மாற்றமடைகிறது. இது நமக்கு சாந்த குணத்தை உருவாக்குகிறது. டிரைப்டோபென் பின்னர் நியாசினாக மாற்றம் அடைகிறது.வாழை பழ கிரிட் வாழை பழமானது நமது உடலில் உள்ள ஹர்மோன் குறைபாடுகளை நிவர்த்தி செய்கிறது. வாழை பழத்தில் பொட்டாசியம் அதிகளவில் இருப்பதால் மூளையின் திறனை அதிகரிக்கிறது. நல்ல மனநிலையில் வைத்து கொள்ள துணை புரிகிறது. நரம்புகளை சீராக வைத்துக் கொள்கிறது. பொட்டாசியமானது ரத்த அழுத்தத்தையும் இதயத்தையும் சீராக இயங்க வைக்கிறது. வாழை பழத்தின் மூலம் பல உணவு பொருட்கள் செய்து வருகின்றனர். தற்போது, வாழை பழத்தை கொண்டு புதிய ரக உணவைத் தயாரித்துள்ளனர் கேரளாவின் பாப்பனம்கோட்டில் உள்ள தேசிய அறிவியல் தொழில்நுட்பம் கழகத்தைச் சேர்ந்த (NIIST– National Institute for Interdisciplinary Science and Technology) விஞ்ஞானிகள். நேந்திரன் வாழை பழங்களிலிருந்து வாழைப்பழ கிரிட் ஒன்றை உருவாக்கியுள்ளனர். இது ரவை மற்றும் உடைத்த கோதுமை போன்ற உணவு ரகமாகும். இந்த நேந்திரன் வாழை பழத்தை நன்கு காய வைத்து, பொடியாக்கி இதை உருவாக்கியுள்ளனர். இதை அனைத்து உணவு பொருள்களிலும் பயன்படுத்த முடியும். இது பார்ப்பதற்கு கோதுமை போல, ரவை போலத்தான் இருக்கும். ஆனால், அதிக சத்து கொண்டது. இதில், ஸ்டார்ச் சத்து இருக்கிறது. இவை உடலுக்கு மிகவும் சத்தான பொருள். இதை மக்கள் விரும்பி உண்ணமுடியும் என்று சொல்கிறார்கள் நிபுணர்கள்.வாழை ஆரோக்கியமான உணவில் சிறந்த மூலப்பொருளாகக் கருதப்படும் வாழை பழம், பல வகையான உணவுகளைத் தயாரிக்கப் பயன்படும் என்று NIIST தெரிவித்துள்ளது. பொதுவாக பழுத்த, நேந்திரன் வாழை பழத்தை வழக்கமான கேரள உணவுகளான ‘ஏவல்’ மற்றும் ‘தோரன்’ போன்றவற்றிலும் பயன்படுத்துகிறார்கள். மேலும், உப்புமா தயாரிக்க பயன்படுத்தப்படலாம், அல்லது வாழை பழ பவுடரைக் கலந்து பால் அல்லது தேங்காய் பாலுடன் கஞ்சி தயாரிக்கலாம். சுத்திகரிக்கப்பட்ட கோதுமை மாவுடன் வாழை பழத்தை சேர்த்து கேக் மற்றும் ரொட்டி தயாரிப்பில் பயன்படுத்தலாம். இது உண்மையிலேயே வாழை விவசாயிகளுக்கு மகிழ்ச்சியான செய்திதான். நேந்திரன் பழ விளைச்சலையும் இனி அவர்கள் அதிகரிக்கலாம். வாழை விலை வீழ்ச்சியடையும் நேரத்தில் இதுபோன்ற செய்திகள், விவசாயிகளுக்கு ஊக்கம் தரும் வகையில் அமைந்துள்ளன. - ஆனந்தி ஜெயராமன்
http://dlvr.it/RqLd5l

Read More

இலங்கை: இடிக்கப்பட்ட இடத்திலேயே மீண்டும் முள்ளிவாய்க்கால் நினைவிடம் அமைக்க அடிக்கல்

இலங்கையில் இடிக்கப்பட்ட அதே இடத்திலேயே மீண்டும் முள்ளிவாய்க்கால் நினைவிடம் அமைக்க அடிக்கல் நாட்டப்பட்டுள்ளது. இலங்கையில் உள்நாட்டுப் போரின்போது, அப்பாவி தமிழ் இன மக்கள் கொல்லப்பட்டதை நினைவுகூரும் வகையில் யாழ்ப்பாணம் பல்கலைக்கழக வளாகத்தில், முள்ளிவாய்க்கால் நினைவிடம் கடந்த 2019ஆம் ஆண்டு அமைக்கப்பட்டது. இந்த நினைவிடம் அமைக்கப்படும்போதே, அதாவது 2018ஆம் ஆண்டு அதற்கான கட்டுமான பணிகளை நிறுத்துமாறு இலங்கை உயர்கல்வி அமைச்சகம், பல்கலைக்கழக மானியக் குழுவும் யாழ் பல்கலைக்கழக நிர்வாகத்திற்கு உத்தரவிட்டிருந்தது. எனினும் முள்ளிவாய்க்கால் நினைவிடம் அமைக்கும் பணி மாணவர்களால் முடிக்கப்பட்டு, நினைவேந்தல் நிகழ்ச்சியும் நடத்தப்பட்டது. இந்நிலையில் கடந்த இரண்டு நாட்களுக்கு முன் இலங்கை யாழ்ப்பாணம் பல்கலைக்கழகத்தில் உள்ள முள்ளிவாய்க்கால் நினைவிடம் இடிக்கப்பட்டது. இதற்கு பல தரப்பில் இருந்தும் கடும் எதிர்ப்புகள் எழுந்தன. மாணவர்களும் தொடர்ந்து போராடி வந்தனர். இந்நிலையில் இடிக்கப்பட்ட அதே இடத்திலேயே மீண்டும் முள்ளிவாய்க்கால் நினைவிடம் அமைக்க அடிக்கல் நாட்டப்பட்டுள்ளது. மாணவர்கள், இலங்கை அரசின் கோரிக்கையை ஏற்று அடிக்கல் நாட்டப்பட்டுள்ளதாக யாழ்ப்பாணம் பல்கலைக்கழக துணைவேந்தர் சற்குண ராஜன் தெரிவித்தார். நினைவுத் தூண் பழைய மாதிரிலேயே அரசின் அங்கீகாரத்துடன் அமைக்கப்படும் என்றும் கூறினார். இதனையடுத்து அவரின் கோரிக்கையை ஏற்று மாணவர்கள் தங்களது போராட்டத்தை கைவிட்டுள்ளனர்.
http://dlvr.it/RqKVvF

Read More

PT Web Explainer: வாட்ஸ் அப் Vs சிக்னல்... 'பாதுகாப்பு' அம்சங்களில் சிறந்தது எது?

அமெரிக்காவின் கண்காணிப்பு செயல்பாடுகளுக்கு எதிராக போர்க்கொடி தூக்கிய தனியுரிமை செயற்பாட்டாளரான எட்வர்டு ஸ்னோடனும் சிக்னல் செயலியைதான் பயன்படுத்துகிறார். அமெரிக்க புலனாய்வுத் துறையால் வலைவீசி தேடப்படுவதால், மறைந்து வாழும் நிலையில் இருக்கும் ஸ்னோடன் சிக்னல் செயலியை பயன்படுத்துவதில் இருந்தே அதன் பாதுகாப்பு அம்சத்தை புரிந்துகொள்ளலாம். எலன் மஸ்க் வெளியிட்ட ஒரே ஒரு டிவீட் 'சிக்னல்' செயலியின் எதிர்காலத்தை மாற்றியிருக்கிறது. இதுவரை இந்த செயலியை அறிந்திராதவர்கள் கூட, இப்போது 'சிக்னல்' செயலியின் சிறப்பம்சங்களை அறிந்து கொள்வதில் ஆர்வம் காட்டுகின்றனர். அது மட்டும் அல்ல, பிரைவசி சர்ச்சையால் வாட்ஸ் அப்பை விட்டு வெளியேறலாம் என நினைப்பவர்களுக்கான மாற்று செயலியாக 'சிக்னல்' பலரால் ஏற்றுக்கொள்ளப்பட்டுள்ளது. இதன் விளைவுதான், 'சிக்னல்' செயலியை தரவிறக்கம் செய்பவர்களின் எண்ணிக்கை அதிகரித்திருப்பதோடு, இப்படி பலரும் ஒரே நேரத்தில் பதிவு செய்ய முயற்சிப்பதால் 'சிக்னல்' பதிவு தற்காலிகமாக முடங்கும் நிலை ஏற்பட்டுள்ளது. புதிய பயனாளிகளின் வருகைக்கு ஈடுகொடுக்கும் வகையில், 'சிக்னல்' செயலி தனது உள்கட்டமைப்பு வசதியை அவசரமாக மேம்படுத்தியிருக்கிறது. இவையெல்லாம் வாட்ஸ் அப்பின் புதிய தனியுரிமை கொள்கை அறிவிப்புக்கும் பின் நிகழ்ந்த மாற்றங்கள். பயனாளிகள் தரவுகளை கையாள்வது தொடர்பான வாட்ஸ் அப் வெளியிட்ட புதிய நிபந்தனைகளும், அவற்றை ஏற்காவிட்டால் சேவையை விட்டு வெளியேற வேண்டும் எனும் கெடுவும், இணைய உலகில் சர்ச்சையை ஏற்படுத்திய நிலையில், 'டெஸ்லா' நிறுவனர் எலன் மஸ்க், தனியுரிமையை மதிக்காத வாட்ஸ் அப் சேவைக்கு பதிலாக, பாதுகாப்பான 'சிக்னல்' சேவையை பயன்படுத்துமாறு ட்விட்டரில் கேட்டுக்கொண்டார். எலன் மஸ்கின் இந்த வேண்டுகோள் காரணமாக, 'சிக்னல்' செயலிக்கு ஆதரவு குவிந்த நிலையில், வாட்ஸ் அப்புக்கான மாற்று செயலிகள் பற்றி எழுதிய ஊடகங்களும், 'சிக்னல்' செயலியை தவறாமல் பரிந்துரைத்ததால், 'சிக்னல்' செயலி அனைவரது கவனத்தையும் ஈர்த்திருக்கிறது. மகத்தான மாற்று மெசேஜிங் செயலியாக இணையம் பச்சைக்கொடி காட்டியிருக்கும் 'சிக்னல்' செயலியின் தனித்தன்மை என்ன என்பதை பார்க்கலாம். தனியுரிமைக்கு முன்னுரிமை: வாட்ஸ் அப் போலவே சிக்னலும் மெசேஜிங் செயலிதான் என்றாலும், வாட்ஸ் அப் போல அல்லாமல், பயனாளிகளின் தனியுரிமைக்கு முன்னுரிமை அளிக்கும் செயலியாக 'சிக்னல்' அமைகிறது. 'தனியுரிமைக்கு ஹலோ சொல்லுங்கள்' எனும் இந்த செயலியின் கோஷத்தை வைத்தே இதைப் புரிந்து கொள்ளலாம். சிக்னலின் பிரைவசி அம்சம் காரணமாகவே பத்திரிகையாளர்கள், செயற்பாட்டாளர்கள், வழக்கறிஞர்கள், அதிருப்தியாளர்கள், இணைய பாதுகாப்பு வல்லுனர்கள் போன்றவர்கள் விரும்பி பயன்படுத்தும் செயலியாக விளங்குகிறது. அது மட்டும் அல்ல, 'பெரிய அண்ணன்' அமெரிக்காவின் கண்காணிப்பு செயல்பாடுகளுக்கு எதிராக போர்க்கொடி தூக்கிய தனியுரிமை செயற்பாட்டாளரான எட்வர்டு ஸ்னோடனும் சிக்னல் செயலியைதான் பயன்படுத்துகிறார். அமெரிக்க புலனாய்வுத் துறையால் வலைவீசி தேடப்படுவதால், மறைந்து வாழும் நிலையில் இருக்கும் ஸ்னோடன் சிக்னல் செயலியை பயன்படுத்துவதில் இருந்தே அதன் பாதுகாப்பு அம்சத்தை புரிந்துகொள்ளலாம். என்கிரிப்ஷன்... வாட்ஸ் அப் Vs சிக்னல் ஆம், 'சிக்னல்' செயலியில் பரிமாறப்படும் செய்திகள் அனைத்தும் இரு முனையிலும் 'என்கிரிப்ட்' செய்யப்படுகின்றன. எனவே யாரும் செய்திகளை இடைமறித்து படிக்க முடியாது. வாட்ஸ் அப்பிலும் 'என்கிரிப்ஷன்' வசதி இருக்கிறது என்றாலும், சிக்னலில், செய்திகள் மட்டும் அல்ல, அவை தொடர்பான உப தகவல்களும் கூட என்கிரிப்ட் செய்யப்படுகின்றன என்பதால் கூடுதல் பாதுகாப்பு. ஹாங்காங்கை உலுக்கிய ஜனநாயக போராட்டத்தில் செயற்பாட்டாளர்கள் அதிகம் பயன்படுத்தியதும் 'சிக்னல்' செயலியைதான். இங்கு இன்னொரு முக்கியமான விஷயத்தையும் கவனிக்க வேண்டும். சிக்னல் செயலி ஒரு நிறுவனத்தால் உருவாக்கப்பட்டது அல்ல. லாப நோக்கிலாத ஓர் அமைப்பு இதை இயக்குகிறது. இந்த அமைப்பு திறவு மூல அடிப்படையில் உருவாக்கிய என்கிரிப்ஷன் வசதியைதான் வாட்ஸ் அப் பயன்படுத்துகிறது. பாதுகாப்பு அம்சத்தில் சிறந்து விளங்குவது போலவே சிக்னல் தனியுரிமை விஷயத்திலும் பளிச்சிடுகிறது. பயனாளிகளின் போன் எண்ணை பதிவு செய்து கொள்வது தவிர, மற்றபடி அவர்கள் அடையாளம் தொடர்பான எந்த தகவலையும் இந்த செயலி திரட்டுவதில்லை. பயனாளிகள் தொடர்பாக எந்த முக்கிய தகவலையும் சேகரிப்பதில்லை என சிக்னல் உறுதி அளிக்கிறது. அதோடு, அனுப்பியவுடன் செய்திகள் மறையும் வசதி உள்ளிட்ட அம்சங்களையும் கொண்டுள்ளது. மேலும், 'சிக்னல்' பயனாளிகளின் செய்திகள் அல்லது அழைப்பு விவரங்களையும் சேமித்து வைப்பதில்லை என்கிறது. அதேபோல பயனாளிகள் தங்கள் இணைய அடையாளமான ஐபி முகவரியை அடையாளம் காட்டாமல் இருக்க, 'சிக்னல்' சர்வரில் அல்லாமல் ரிலே கால் மூலம் தொடர்பு கொள்ளும் வசதியையும் அளிக்கிறது. இவை எல்லாமே பயனாளிகள், தகவல் பாதுகாப்பு மற்றும் தனியுரிமையை உறுதி அளிக்கும் அம்சங்கள். சேவை எப்படி? எல்லாம் சரி, 'சிக்னல்' சேவை எப்படி என கேட்கலாம். இந்த செயலியில் செய்திகளை பரிமாறிக்கொள்ளலாம். ஆடியோ மற்றும் வீடியோ அழைப்புகளை மேற்கொள்ளலாம். புகைப்படங்கள், இணைப்புகளை பரிமாறிக்கொள்ளலாம். சிக்னலில் குழுக்களையும் உருவாக்கி கொள்ளலாம். சிக்னலின் மிக முக்கிய பலம், அது வர்த்தக நிறுவனத்திற்கு சொந்தமானதாக இல்லாமல், திறவு மூல பிரவுசரான ஃபயர்பாக்ஸ் போல, லாப நோக்கில்லாத அமைப்பால் நிர்வகிக்கப்படுவதுதான். 'சிக்னல்' பவுண்டேஷன் அமைப்பு இதை நிர்வகிக்கிறது. மேலும் சிக்னலில், நிரல்களும் பொதுவெளியில் இருக்கிறது. அமெரிக்காவை சேர்ந்த கிர்ப்டோகிராபரான மோக்சி மார்லின்ஸ்பைக் (Moxie Marlinspike)தான் 'சிக்னல்' சேவையை உருவாக்கியவர். வாட்ஸ் அப் சேவையின் இணை நிறுவனரும், ஃபேஸ்புக் செயல்பாட்டால் அதிருப்தி அடைந்து வாட்ஸ் அப்பில் இருந்து விலகியவருமான பிரையான் ஆக்டன், 'சிக்னல்' பவுண்டேஷனுக்கு நிதி அளித்திருப்பதோடு, அதன் செயல்பாட்டிலும் முக்கிய பங்காற்றி வருகிறார் என்பதுதான் ஹைலைட்டான விஷயம். சிக்னல் சேவை இணையதளம்: https://signal.org/ - சைபர்சிம்மன்
http://dlvr.it/RqHFdK

Read More

போலியோ சொட்டு மருந்து முகாம் ஒத்திவைப்பு!

கொரோனா தடுப்பூசி போடும் பணி ஜனவரி 16 முதல் தொடங்க உள்ளதால் போலியோ சொட்டு மருந்து முகாம் ஒத்திவைக்கப்பட்டுள்ளது. ஜனவரி 17 முதல் 3 நாட்களுக்கு போலியோ சொட்டுமருந்து முகாம் நடக்க இருப்பதாக மத்திய அரசு ஏற்கெனவே தெரிவித்திருந்தது. இந்நிலையில் கொரோனா தடுப்பூசி போடும் பணி ஜனவரி 16 முதல் தொடங்க உள்ளதால் போலியோ சொட்டு மருந்து முகாம் தேதி அறிவிக்காமல் ஒத்திவைக்கப்பட்டுள்ளது. மறுஅறிவிப்பு வரும் வரை நாடு முழுவதும் போலியோ சொட்டு மருந்து முகாம் ஒத்திவைப்பு என மத்திய சுகாதார அமைச்சகம் அறிவிப்பு வெளியிட்டுள்ளது. மத்திய அரசின் அறிவிப்பின்படி தமிழகத்திலும் போலியோ சொட்டு மருந்து முகாம் ஒத்திவைக்கப்பட்டுள்ளதாக சுகாதார செயலர் ராதாகிருஷ்ணன் தெரிவித்தார்.
http://dlvr.it/RqHFWK

Read More

`இவர் பிடுங்குவது எல்லாமே தேவையில்லாத ஆணிதான்!' - பெங்களூர் மரங்களைக் காக்கும் வினோத்

1976-ம் ஆண்டு 42-வது சட்டதிருத்தத்தின்படி இந்திய குடிமகனின் கடமைகளில் ஒன்று சுற்றுச்சூழலை பாதுகாப்பது. `இந்திய குடிமக்கள் அனைவரும் காடுகள், ஏரிகள், கடல்கள், ஆறுகள், வனவிலங்குகள் போன்ற இயற்கை சூழலைப் பாதுகாக்க வேண்டும்' என்பது தலையாய கடமையாக அதில் குறிப்பிடப்பட்டுள்ளது. இதில், எத்தனை பேர் இயற்கை வளத்தைப் பாதுகாத்து வருகிறார்கள் என்பது முதல் கேள்வி. சிலர் மட்டுமே இயற்கை வளத்துக்கு முக்கியத்துவம் கொடுத்து வருகின்றனர்.ஆணி பிடுங்கும் பணியில் மரம் ஒரு உயிருக்குச் சமம். மனிதனை ஒரு சிறிய ஊக்கைக் கொண்டு குத்தினால் வலிக்கும். அதேபோலதான் மரமும். ஒரு மரம் ஒரு மனிதருக்குச் சமம். கேட்பதற்கு யாரும் இல்லை என்று நினைத்துக்கொண்டு, விளம்பரத் தட்டிகளுக்காக மரங்களில் அறையும் ஆணிகளை உயிர் நேயத்தோடு அகற்றி சேவை செய்கிறார், பெங்களூரைச் சேர்ந்த வினோத் கர்தவ்யா. இவர் பிடுங்குவது எல்லாமே தேவையில்லாத ஆணிகள்தான்! ``நான் பெங்களூரில் உள்ள டி.ஆர்.டி.ஓ எனப்படும் பாதுகாப்பு ஆய்வு மற்றும் வளர்ச்சிக் கழகத்தின் உதவி விஞ்ஞானியாகப் பணியாற்றி வருகிறேன். கடந்த நவம்பர் மாதம், நான் போன் பேசிக்கொண்டே வீட்டிலிருந்து வெளியே வந்தேன். அங்கிருந்த மரத்தில் சாய்ந்தபோது, என்னுடைய தலையில் பலமாக ஒரு ஆணி குத்தியது. அப்போது, மரத்தில் இருக்கும் ஆணிகளை ஆராய்ச்சி செய்து அதைப் பிடுங்க முடிவு செய்தேன். இதனால், மற்றவர்களுக்கும் ஆபத்து வரக் கூடாது. மேலும், மரங்களையும் பாதுகாப்போம் வேண்டும் என முடிவு செய்தேன். இதுகுறித்து, விசாரித்தபோது ஆணிகள் அடிப்பது குற்றம் என மூன்று சட்டங்களே உள்ளன, ஆனால், இவற்றை யாரும் கடைப்பிடிப்பதில்லை என்று தெரியவந்தது. விளம்பரத் தட்டிகள் அகற்றும் பணி முதலில் நான் தனியாகச் சென்று என்னுடைய பகுதியில் உள்ள மரத்தில் அடிக்கப்பட்ட ஆணிகளைப் பிடுங்கி வந்தேன். பின்னர், என் நண்பர்களுடன் இணைந்து பெங்களூரில் உள்ள மரங்களில் அடிக்கப்பட்டுள்ள ஆணிகள், ஸ்டேபிள் பின்களைப் பிடுங்கி எடுக்கும் பணியில் ஈடுபட்டு வந்தேன். என்னுடைய நண்பர்கள் என் பணிகளைக் குறித்து, சமூக வலைதளங்களில் பதிவு செய்தனர். அதையடுத்து பலருக்கும் இது குறித்து தெரிய வந்தது. தொடர்ந்து, ஒவ்வொரு சனி, ஞாயிற்றுக்கிழமைகளிலும் இந்த வேலையில் ஈடுபட்டு வந்தேன். மரத்தில் ஆணி அடித்திருப்பதைப் பார்த்தபோது என் தலையில் அடித்ததைப் போல இருந்தது. இதனால்தான் அதை எடுக்க ஆரம்பித்தேன். பின்னர், அதை வாரம்தோறும் பழக்கமாக்கிக் கொண்டேன். நான் வசித்து வரும் சம்பங்கிராம் நகர் பகுதியில் உள்ள மரங்களை ஆணியிலிருந்து விடுவிக்கும் நடவடிக்கையில் இறங்கினேன். அதன் பின்னர், என் நண்பர்களும் இணைந்தனர். சனி, ஞாயிற்றுக்கிழமைதோறும் சில மணி நேரங்களை இதற்காகச் செலவிடுகிறோம். இந்தச் சேவையைக் கண்டு பிரபலங்களும் எங்களைப் பாராட்டி சமூக வலைதளங்களில் பகிர்ந்தனர். குழுவினர் ஒரே மரத்தில் மட்டும் 250 ஆணிகளையும், 2000 ஸ்டேபிள் பின்களையும் கண்டறிந்து அகற்றியிருக்கிறோம். கே.ஜி.ரோடு பகுதியில் உள்ள மரம் அது. மிகப் பெரிய சவாலாக இருந்தது அதுதான். தற்போது, நிறைய பேர் தாங்களாக முன்வந்து எங்கள் குழுவில் சேர்ந்து கொள்கின்றனர். பலர் எங்களுக்கு போன் செய்து அவர்களுடய பகுதியில் வந்து ஆணிகளைப் பிடுங்கச் சொல்லிக் கேட்கிறார்கள்'' என்கிறார் சமூக ஆர்வலர் வினோத். ``நன்கு வளர்ந்த ஒரு மரம் வருடத்துக்கு 260 பவுண்ட் ஆக்சிஜனை வளி மண்டலத்துக்குத் தருகிறது. இந்த அளவு ஆக்சிஜன் ஒரு குடும்பத்தில் உள்ள நான்கு பேருக்குப் போதுமானது. அவ்வாறு பயன்தரக்கூடிய மரங்களைக் காயப்படுத்துவது ஏற்றுக்கொள்ள முடியாத ஒன்று. மரங்களில் ஆணி அடிப்பதால் அவற்றுக்கு தொற்று ஏற்பட்டு வளர்ச்சி பாதிக்கப்பட்டு, பின்னர் அவை பட்டுவிடும். எனவே, சாலைகள் ஓரம் உள்ள மரங்களில் யாரும் ஆணி அடிக்கக் கூடாது எனப் பொது மக்களிடம் விழிப்புணர்வு ஏற்படுத்தி வருகிறோம்" எனத் தெரிவித்தார்.- ஆனந்தி ஜெயராமன்
http://dlvr.it/RqGWLZ

Read More