மேக்கேதாட்டூ அணை: மத்திய அரசுக்கு அழுத்தம் கொடுக்கும் கர்நாடகம்... தடுத்து நிறுத்துமா தமிழகம்?

`மேக்கேதாட்டூவில் கர்நாடகம் அணை கட்டுவதற்கான கூடுதல் விவரங்களுடன் செப்டம்பர் 16 அல்லது 17-ம் தேதி மத்திய சுற்றுச்சூழல் மற்றும் வனத்துறை அமைச்சர் பிரகாஷ் ஜவடேகரைச் சந்திக்க உள்ளார் கர்நாடக அமைச்சர் ரமேஷ் ஜெர்க்கிஹோலி. தொடர்ந்து கர்நாடக முதல்வர் எடியூரப்பாவும் மத்திய அரசுக்கு அழுத்தம் கொடுத்து வருகிறார். 2017-ம் ஆண்டு ராம் நகர் மாவட்டம், கனகபுராவுக்கு அடுத்த மேக்கேதாட்டூவில் காவிரியாற்றின் குறுக்கே 9,000 கோடி பட்ஜெட்டில் பெங்களூரு மாநகரின் குடிநீர் தேவைக்காக அணை கட்டப்பட்டும் என அறிவித்தது கர்நாடக மாநில அரசு. இதற்காக அந்தப் பகுதியில் ஆய்வு செய்து வரைபடம் உள்ளிட்ட தகவல்களுடன் வரைவு திட்ட அறிக்கையை மத்திய நீர்வளத்துறை அமைச்சகத்திடம் அனுமதிக்காக அனுப்பியது. நீர்வளத்துறை அமைச்சகம் கர்நாடக மாநில அரசு அளித்த திட்ட வரைவு அறிக்கையை ஆய்வுக்காக எடுத்துக்கொண்டது. இதையடுத்து கர்நாடகம் மேக்கேதாட்டூவில் அணை கட்டுவதை எதிர்த்து தமிழகம் உச்ச நீதிமன்றத்தில் வழக்கு தொடர்ந்தது. இந்த வழக்கு நிலுவையில் உள்ளது. இந்நிலையில், சமீபத்தில் அணை அமையவிருக்கும் ஒன்டிகுண்ட்லு பகுதியில் ஆய்வு மேற்கொண்டார் கர்நாடக பாசனத்துறை அமைச்சர் ரமேஷ் ஜெர்க்கிஹோலி. அப்போது அவர் பேசும்போது, ``5,051 ஹெக்டேர் வன நிலம் இந்த அணைக்காக கையகப்படுத்தப்பட உள்ளது. இதில் 3,181 ஹெக்டேர் நிலம் காவிரி வனவிலங்கு சரணாலய நிலம், 1,870 ஹெக்டேர் நிலம் காப்புக்காடாகும். இந்த அணை அமையவிருக்கும் இடத்தில் 63 சதவிகிதம் நிலம் வனத்துறை கட்டுப்பாட்டில் உள்ள காவிரி வனவிலங்கு சரணாலயத்தின் கீழ் வருகிறது. இதைக் கையகப்படுத்துவதற்கு மத்திய சுற்றுச்சூழல் மற்றும் வனத்துறை அமைச்சகத்தின் அனுமதிக்காக காத்திருக்கிறோம்.மேக்கேதாட்டூ அணை அமையவிருக்கும் இடம் 2019-ம் ஆண்டிலேயே விரிவான திட்ட அறிக்கையை மத்திய அரசிடம் சமர்ப்பித்துள்ளோம். மத்திய நீர் கமிஷனின் கீழ் வரும் இயக்குநரகங்களின் ஆய்வில் இத்திட்டம் இருக்கிறது. விரைவில் இதற்கான பதில் கிடைத்துவிடும். மத்திய நீர்வள அமைச்சகத்தின் அனுமதி கிடைத்தவுடன் அமைச்சரவையின் ஒப்புதல் பெற்று டெண்டர் விட்டுவிடுவோம். 4 டி.எம்.சி தண்ணீர் பெங்களூரு குடிநீர் திட்டத்துக்காக அணையிலிருந்து எடுக்கப்படும். இதனால் தமிழகத்துக்குத் தரவேண்டிய தண்ணீரின் அளவில் எதுவும் பாதிக்கப்படாது” என்று தெரிவித்திருக்கிறார். இதுகுறித்து காவிரி தொழில்நுட்ப குழுவின் தலைவர் ஆர்.சுப்ரமணியனிடம் பேசியபோது, ``கர்நாடகம் எப்போதும் இப்படியேதான் செய்து கொண்டிருக்கிறது. கர்நாடகம் எந்த முயற்சியை எடுத்தாலும் அதைத் தடுத்து நிறுத்த தமிழகம் தயாராக இருக்கிறது. காவிரியாற்று பிரச்னை நூறாண்டு கால பிரச்னை. அவற்றை அவ்வளவு சீக்கிரத்தில் விட்டுக் கொடுக்கமாட்டோம். சின்ன சின்ன திட்டங்களுக்கெல்லாம் மத்திய சுற்றுச்சூழல் மற்றும் வனத்துறை அமைச்சகம் தடை போடுகிறது. 5,051 ஹெக்டேர் நிலம் இத்திட்டத்துக்காக கையகப்படுத்தப்பட உள்ளது. இதைக் கவனத்தில் கொண்டு மத்திய சுற்றுச்சூழல் மற்றும் வனத்துறை அமைச்சகம் இத்திட்டத்தை அனுமதிக்கக் கூடாது” என்றார்.வீரப்பன் தமிழ்நாடு மூத்த பொறியாளர் சங்கத்தைச் சேர்ந்த பொறிஞர் அ.வீரப்பன் பேசியபோது, ``கர்நாடகம் நினைப்பதெல்லாம் நடந்துவிடாது. மத்திய நீர்வளத்துறை கர்நாடகத்தின் திட்ட வரைவை ஆய்வுக்கு எடுத்துக் கொண்டிருக்கிறது என்பதே அனுமதி கொடுப்பதாக ஆகிவிடாது. அந்த அனுமதியெல்லாம் அவ்வளவு எளிதில் கிடைத்துவிடாது. அப்படியே அனுமதி கிடைத்தாலும் மத்திய வனத்துறை அமைச்சகத்திடம் அவ்வளவு எளிதில் அனுமதி பெற்றுவிட முடியாது. எப்போதும் தமிழகத்தைச் சீண்டிக் கொண்டே இருப்பது கர்நாடகத்தின் வேலைகளில் ஒன்றாக ஆகிவிட்டது. அதற்காகத்தான் ஆய்வு, அது இது என்று நாடகமாடி கொண்டிருக்கிறது கர்நாடகம்” என்றார் காட்டமாக.
http://dlvr.it/Rgfjyp

Read More

இந்தியாவில் 87 மில்லியன் பெண்கள் தீவிர வறுமையில் உள்ளனர் : ஐநா

இந்தியாவில் தற்போது 87 மில்லியன் பெண்கள் தீவிர வறுமை நிலையில் உள்ளதாகவும், கோவிட்-19 நெருக்கடி காரணமாக 2021ஆம் ஆண்டில் இந்த எண்ணிக்கை 100 மில்லியனாக உயரும் என்றும் ஐநா அறிக்கை கூறியுள்ளது.  ஐநா சபையின் பெண்கள் குறித்த வளர்ச்சித்திட்ட அறிக்கையின்படி 129 நாடுகளில் எடுக்கப்பட்ட இந்த தரவுகளில் 2021 ஆம் ஆண்டில் மட்டும் உலகம் முழுவதும் 96 மில்லியன் மக்கள் தீவிர வறுமையால் பாதிக்கப்படும் வாய்ப்பிருப்பதாக கணிக்கப்பட்டுள்ளது. இதில் 47 மில்லியன் பேர் பெண்கள் மற்றும் குழந்தைகள் என்றும் கூறப்பட்டுள்ளது. இந்தியாவில் கொரோனாவுக்கு முன்பாக தீவிர வறுமையால் பாதிக்கப்பட்டிருந்தோர் சதவீதம் பெண்களில் 13.3% ஆகவும், ஆண்களில் 12.1%ஆகவும் இருந்தது. இதுவே 2021 ஆம் ஆண்டில் இந்த எண்ணிக்கை பெண்களில் 14.7% ஆகவும், ஆண்களில் 13.7% ஆகவும் உயரும் என்று கணிக்கப்பட்டுள்ளது. ஒரு நாளைக்கு 1.90 டாலருக்கு குறைவான தொகையில் வாழும் மக்கள் வறுமைக்கோட்டுக்கு கீழ் உள்ளவர்கள் என்று இந்த கருத்துக்கணிப்பின் கணக்கில் கொள்ளப்பட்டுள்ளது. 129 நாடுகளில் எடுக்கப்பட்ட இந்த ஆய்வுகள் என்பது உலக மக்கள் தொகையில் 89 சதவீத பேரிடம் எடுக்கப்பட்டுள்ளது. உலக அளவில் 2019ஆம் ஆண்டில் 398.5 மில்லியன் பெண்கள் தீவிர வறுமையில் இருந்தனர், இது 2020 ஆம் ஆண்டில் 409 மில்லியனாக உயரும் என்று கணிக்கப்பட்டது. ஆனால் கொரோனா நெருக்கடி காரணமாக 2021ஆம் ஆண்டில் 435 மில்லியனாக இந்த எண்ணிக்கை உயரும் என எதிர்பார்க்கப்படுகிறது. கொரோனா நெருக்கடியால் உருவான விளைவுகள் வரும் 2030 ஆம் ஆண்டுவரை குறைய வாய்ப்பில்லை என்றும் இந்த அறிக்கை கூறியுள்ளது.
http://dlvr.it/RgdWC7

Read More

இப்படியொரு கருணையா!! மற்றொரு நோயாளியைக் காப்பாற்ற தன் உயிரை பணயம் வைத்த மருத்துவர்

குஜராத் மாநிலம், சூரத்தைச் சேர்ந்த மயக்க மருந்து நிபுணரான சங்கெத் மேக்தா என்பவருக்கு கொரோனா பாதிப்பு ஏற்பட்டதால் மருத்துவமனையில் 42 நாட்களுக்கு முன்பு அனுமதிக்கப்பட்டார். இவருடன் மருத்துவமனையில் அனுமதிக்கப்பட்டிருந்த 65 வயது முதியவருக்கு நிலைமை மோசமாகவே தனக்குக் கொடுக்கப்பட்டிருந்த ஆக்ஸிஜனை 15-20 நிமிடங்கள் அந்த நோயாளிக்குக் கொடுத்தார். அதனால் அந்த நோயாளி காப்பாற்றப்பட்டார். பொதுவாகவே மயக்கமருந்து நிபுணர்கள் இக்குபேஷன் செயல்முறையில் தேறியவர்களாக இருப்பார்கள். எனவே சங்கெத் தைரியமாக இந்த செயலை செய்துள்ளார். ஆனால் 15-20 நிமிடங்கள் ஆக்ஸிஜன் உதவி இல்லாமல் இருந்ததால் அவருடைய நிலைமை மோசமானது. எனவே வெண்டிலேட்டரில் அனுமதிக்கப்பட்டார். ஆனால், அவருக்கு கூடுதல் ஆக்ஸிஜன் உதவி தேவைப்படவே அவரை சென்னையில் உள்ள எம்.ஜி.எம் மருத்துவமனைக்கு மாற்ற மருத்துவர்கள் அறிவுறுத்தி இருக்கின்றனர். ஞாயிற்றுக்கிழமை விமான ஆம்புலன்ஸ் மூலம் சென்னை வந்த அவருக்கு நுரையீரல் செயலிழந்து விட்டதாக சென்னை மருத்துவர்கள் கூறிவிட்டனர். நுரையீரல் மாற்று அறுவைசிகிச்சை செய்தால் மட்டுமே அவரைக் காப்பாற்ற முடியும் எனவும் கூறிவிட்டனர். அதற்கு குறைந்தது 1.5 கோடி செலவாகும் என்பதால், அவருடைய நண்பர்கள் நன்கொடை சேர்க்கத் தொடங்கியுள்ளனர். மற்றொரு நோயாளியின் உயிரைக் காப்பாற்ற தன்னுடைய உயிரையே பணயம் வைத்துள்ளார் இந்த மருத்துவர்.
http://dlvr.it/RgbVK7

Read More

`` `வைரஸ் வருது'ன்னு கிண்டல் பண்ணுவாங்க!" கேரளப் பெண் `கொரோனா' ஜாலி பேட்டி

``கொரோனா... சீக்கிரம் இங்கே வா..." - பொதுவிடம் ஒன்றில் யாரோ யாரையோ அழைக்க, கழுத்தொடிய சட்டெனத் திரும்பிப் பார்க்கிறார்கள் மக்கள். 34 வயது இல்லத்தரசி கொரோனா, கொஞ்சம் கூச்சமும் கொஞ்சம் சிரிப்புமாக அனைவரின் பார்வையையும் கடந்துசெல்கிறார். ஆம்... அவர் பெயரே கொரோனாதான்! கொரோனா வைரஸ் உலகையே ஆட்டிப்படைத்துக்கொண்டிருக்கும் வேளையில், கேரளப் பெண் கொரோனாவிடம் பேசினோம். கேரள மாநிலம், கோட்டயத்தில் வசிக்கிறார் கொரோனா. ``எங்கள் ஊரில் இப்போது என்னை `வைரஸ் வருது', `கோ கொரோனா கோ' என்றெல்லாம் கிண்டல் செய்கிறார்கள்'' என்று சிரித்தபடியே ஜாலியாகப் பேசினார் கொரோனா. ``நான் பிறந்தது ஆலப்புழா மாவட்டத்தில் உள்ள கரிப்பாடு, முத்துக்குளம். கணவர் ஊர் கோட்டயம் மாவட்டத்தில் உள்ள சுங்கம்.கணவன் குழந்தைகளுடன் கொரோனா நான் பிறந்த மூன்றாவது மாதம் ஞானஸ்தானம் எடுக்க என் அம்மாவும் அப்பாவும் எங்கள் ஊரில் உள்ள சென் செபாஸ்டின் சர்ச்சுக்கு என்னை தூக்கிச் சென்றார்கள். அப்போது சர்ச்சில் இருந்த போதகர் எனக்கு `கொரோனா' என்று பெயர் வைத்தார். `கொரோனா' என்றால் `கிரீடம் (Crown)' என்று அர்த்தம் சொன்னார்கள். எனக்கு இப்போது 34 வயதாகிறது. இத்தனை வருடங்களாக நார்மலான பெயராகயிருந்த என் பெயர், கொரோனா வைரஸ் உலகில் காலடி எடுத்துவைத்த நாளிலிருந்து ஜாலி பெயராகிவிட்டது. என் கணவர், பிள்ளைகளிலிருந்து ஊர்க்காரர்கள் வரை என்னை ஒரே கேலி, கிண்டல்தான்! என் கணவர் ஷைன் தாமஸ், மீன்பிடி தொழில் செய்கிறார். கெவின், நவீன் என இரண்டு குழந்தைகள். இப்போது வீட்டுக்குள் நான் நடமாடும்போதெல்லாம், `வைரஸ் வருது' என்கிறார் கணவர், குழந்தைகளுடன் சேர்ந்து சிரித்தபடி. என் இளைய மகன் என்னை, `கொரோனா அம்மே' என்றே விளிக்கிறான். `வைரஸ் நிக்குது பாருங்க... எல்லாரும் பத்தடி தள்ளி நில்லுங்க' என்று ஜாலி செய்கிறார்கள் அக்கம் பக்கத்தினர். வீட்டுப் பக்கத்தில் உள்ள குழந்தைகள் என்னைக் காணும்போதெல்லாம், `கோ கொரோனா கோ' என்று பாடுகிறார்கள். அவங்க களியாக்கும்ப (கேலிபண்ண) நானும் சிரித்துக்கொண்டே போயிடுவேன்" என்றார்.குடும்பத்தினருடன் கொரோனா கொரோனா வந்து ஆறு மாதங்களுக்கு மேல் ஆகும் நிலையில், திடீரென அவர் பெயர் சோஷியல் மீடியாவில் வைரல் ஆனது எப்படி என்பது குறித்துக் கேட்டோம். ``என் கணவரின் நண்பர் ஒருவர் யூடியூப் சேனல் நடத்துகிறார். செப்டர்ம்பர் 1-ம் தேதி எங்கள் வீட்டுக்கு வந்த அவர், நாங்கள் பேசிக்கொண்டிருந்ததைக் கேட்டுவிட்டு, `உங்க பெயர் கொரோனாவா?' என்று ஆச்சர்யமானார். உடனே என்னைப் பற்றிய விவரங்களைக் கேட்டு, வீடியோ எடுத்தார். இரண்டு, மூன்று நாள்களில் அதை யூடியூபில் போட்டார். அதைப் பார்த்துவிட்டுத்தான் பத்திரிகைகளிலிருந்து பேசினார்கள். இப்போது ரேடியோ, சேனலிலிருந்து எல்லாம் வந்து பேட்டி எடுக்கிறார்கள். நான் பத்தாம் வகுப்புவரை படித்திருக்கிறேன். என் பெயரை மலையாளத்தில் எழுதும்போது `கொரோனா' என்ற ஒலியிலோ, எழுத்திலோ எந்த வேறுபாடும் இல்லை. ஆங்கிலத்தில் எழுதும்போது, முதல் எழுத்து `K' ஆக இருக்கும். அதாவது, `Korona'. வங்கி, மருத்துவமனை என நான் வெளியிடங்களில் விண்ணப்பங்களில், ஃபைல்களில் என் பெயரை எழுதும்போது, `Corona' என்று அவர்கள் எழுதுவதை நான் `Korona' என்று மாற்றிக்கொடுப்பேன். இது கொரோனா வைரஸுக்கு முந்தைய கதை. கொரோனா லாக்டௌனால் இப்போது நான் வீட்டைவிட்டு எங்கேயும் போகவில்லை. இனி கொரோனா முடிந்து நான் வெளியே போகும்போது, என் பெயரை விண்ணங்கள், ரெஜிஸ்டர்களில் எழுதும்போது, எல்லோரும் ஆர்வமாகி நிச்சயம் என் பெயர் கதையை கேட்பார்கள் என்பதில் சந்தேகமில்லை. இதெல்லாம் எல்லோருக்கும் கிடைக்குமா என்ன? அதனால் சந்தோஷம்தான்!" ஜாலியாகச் சிரிக்கிறார் கொரோனா!
http://dlvr.it/RgZHL6

Read More

59 லட்ச ரூபாய்க்கு ஏலம் போன ஆபிரகாம் லிங்கனின் தலை முடி

முன்னாள் அமெரிக்க அதிபர் ஆபிரகாம் லிங்கனின் தலை முடி 59 லட்ச ரூபாய்க்கு ஏலம் போயுள்ளது. அமெரிக்காவின் 16வது அதிபராக இருந்தவர் ஆபிரகாம் லிங்கன். அடிமை முறையை ஒழிக்க உழைத்தவர். அதிபரான பிறகும் தன்னடக்கத்தோடு செயல்பட்டவர். ஜனநாயகம் என்றால் என்ன என்பதை தனது உரையின் மூலம் விளக்கியவர்.  அவர் 1865ஆம் ஆண்டு OUR AMERICAN COUSIN என்ற மேடை நாடகத்தை பார்த்துக் கொண்டிருந்த போது நாடக கலைஞர் ஜான் பூத் என்பவரால் சுட்டுக் கொல்லப்பட்டார்.  அவரது உடல் பிரேத பரிசோதனை செய்யப்பட போது ஐந்து சென்டிமீட்டர் நீளமுள்ள தலை முடி அகற்றி எடுக்கப்பட்டது. லிங்கனின் மனைவி மேரி டோட் தனது உறவினர் லிமான் பீச்சர் டோடுக்கு அதனை லிங்கனின் நினைவாக கொடுத்துள்ளார். ரத்தக் கரை படிந்த உரை கொண்ட தபால் மூலம் அனுப்பப்பட்ட அந்த முடியை லிமான் குடும்பத்தினர் பத்திரமாக  பாதுகாத்து வந்துள்ளனர்.  பின்னர் அது விற்கப்பட்டுள்ளது. இந்நிலையில் பாஸ்டன் நகரில் உள்ள ஏல கம்பெனி ஒன்று லிங்கனின் தலைமுடியை ஏலத்தில் விட்டுள்ளது.  சுமார் 59 லட்ச ரூபாய்க்கு லிங்கனின் தலைமுடி ஏலம் எடுக்கப்பட்டுள்ளது. ஏலத்தில் எடுத்தவரின் பெயரை ஏல கம்பெனி வெளியிடாமல் ரகசியமாக வைத்துள்ளது.
http://dlvr.it/RgYl6s

Read More

‘ஆன்மிக பெரியாரின் ஆட்சி மலரட்டும்’ - போஸ்டர் அடித்த ரஜினி ரசிகர்கள்

‘ஆன்மிக பெரியாரின் ஆட்சி மலரட்டும்’ என நடிகர் ரஜினி ரசிகர்கள் மதுரையில் போஸ்டர் ஒட்டியுள்ளனர். சென்னையில் நடிகர் ரஜினிகாந்த் கடைசியாக செய்தியாளர்களிடம் பேசிய போது “தமிழக இளைஞர்களிடம் எழுச்சி ஏற்பட்ட பிறகே, நான் அரசியலுக்கு வருவேன். மேலும் அரசியல் மாற்றம் இப்போது இல்லையென்றால் எப்போதும் இல்லை” என தெரிவித்திருந்தார். அப்போதிலிருந்த நடிகர் ரஜினிகாந்த் விரைவில் கட்சி ஆரம்பித்து தனது அரசியல் பயணத்தை தொடங்குவார் என அவரது ஆதரவாளர்கள் கூறிவந்தனர். இந்நிலையில் ரஜினியை அரசியலில் மைப்படுத்தும் விதமாக ‘நல்லவர் பின்னாலே நாடே வரும் தன்னாலே’, ‘எம்.ஜி.ஆர் போல இல்லையென்றாலும் எம்.ஜி.ஆரின் ஆட்சியை தருவேன்’ எனவும் ரஜினி ரசிகர்களால் போஸ்டர்கள் ஒட்டப்பட்டன. இதனையடுத்து ரசிகர்கள் போஸ்டர்கள் ஒட்ட வேண்டாம் என ரஜினி மக்கள் மன்ற தலைமை நிர்வாகி சுதாகர் கேட்டுக்கொண்டார். இந்நிலையில் மதுரையில் ரஜினி ரசிகர்கள் ‘கடவுள் நிந்தனை ஒழியட்டும், ஆன்மீக ஆட்சி மலரட்டும்’, ‘ஆன்மீக பெரியாரின் ஆட்சி மலரட்டும்’, ‘அரசியல் மாற்றம் இப்ப இல்லைனா எப்பவும் இல்ல’ ஆகிய வாசகங்கள் அடங்கிய போஸ்டர்களை போட்டியுள்ளனர்.
http://dlvr.it/RgWJnx

Read More

போதை மருந்து பரிசோதனைக்கான சிறுநீரில் தண்ணீரை கலந்த நடிகை ராகினி - அதிகாரிகள் குற்றசாட்டு

போதைப் பொருள் பயன்படுத்தியதாக கைது செய்யப்பட்ட நடிகை ராகினி, அவருக்கு எடுக்கப்பட்ட சிறுநீர் பரிசோதனையின்போது சிறுநீருடன் தண்ணீரைக் கலந்து கொடுத்ததாக அதிகாரிகள் குற்றம் சாட்டியுள்ளனர். கடந்த 4ஆம் தேதி போதைப் பொருள் பயன்படுத்தியதற்காக கன்னட நடிகை ராகினி திவேதியை பெங்களூர் போதைத் தடுப்பு பிரிவு அதிகாரிகள் கைது செய்தனர். அவர் போதைப் பொருள் உட்கொண்டாரா என்பதைச் சோதனை செய்ய கடந்த வாரம் அவருக்கு கே.சி பொது மருத்துவமனையில் பரிசோதனைகள் மேற்கொள்ளப்பட்டது.   அப்போது பரிசோதனைக்காக எடுக்கப்பட்ட ராகினியின் சிறுநீரில் தண்ணீர் கலந்திருப்பதை மருத்துவர்கள் கணடறிந்தனர். இதனை அவர்கள் ராகினி கொடுத்த சிறுநீரின் வெப்ப அளவை வைத்துக் கண்டறிந்தனர். இதனையடுத்து அதிக தண்ணீரை குடித்த ராகினி மீண்டும் சிறுநீர் பரிசோதனைக்கு உட்படுத்தப்பட்டார். மேலும் அதிகாரிகள் தரப்பில் கூறும் போது, “ ராகினிக்கும், ஆப்பிரிக்க நாட்டைச் சேர்ந்தவராகச் சொல்லப்படும் சிமோன் என்பவருக்கும் தொடர்பு இருப்பதாக தெரிகிறது. போதைப் பொருள் தொடர்பான தகவல்களை பரிமாறுவதற்கு பிரேத்யக கோடுகளை ராகினி பயன்படுத்தியுள்ளார். இதனைத் தொடர்ந்துதான் அவருக்கு சிறுநீர் பரிசோதனை செய்ய முடிவெடுத்தோம். சிறுநீர் மற்றும் தலைமுடி பரிசோதனை முடிவுகளை வைத்து, சில குறிப்பிட்ட கால இடைவெளியில் சம்பந்தப்பட்ட நபர் என்ன விதமான போதை பொருளை உட்கொண்டார் என்பதைக் கண்டறிய முடியும்” என்றனர். ராகினியிடம் இருந்து தலைமுடி பரிசோதனைக்காக வாங்கப்பட்டதாக என்பதை அதிகாரிகள் இன்னும் உறுதி செய்யவில்லை.
http://dlvr.it/RgWJlc

Read More